1. Wai wi geh kongsl, ahn wai aala wi need it?

AALA wi need kongsl fahn taim tu taim. Sohntaim, wi mait aks sohnbadi weh wi rispek fi gi wi kongsl. Ada taimz, wahn brada weh kay bowt wi mait tel wi dat wi di “goh di rang way” ahn dat wi ku en op di du sohnting bad. (Gal. 6:1) Er sohnbadi mait kongsl wi bikaaz wi mek wahn seeryos mistayk. Noh mata wai wi geh kongsl, wi shuda aalwayz lisn tu it bikaaz ih gud fi wi an ih ku sayv wi laif!—Prov. 6:23.

2. Bays pahn weh Proverbs 12:15 seh, wai wi shuda lisn tu kongsl?

² Wi teem teks inkorij wi fi “lisn tu di werdz a dehn wan weh waiz.” (Prov. 22:17) No hyooman noa evriting, dehn wahn aalwayz ga sohnbadi weh noa moa dan wee er weh ga moa ekspeeryens dan wee. (Reed Proverbs 12:15.) * Soh wen wi lisn tu kongsl ih shoa dat wi hombl. Ih shoa wi dat wi noa wi limits, an ih aalso help wi fi si dat wi need help fi reech wi goalz. Jehoava mek waiz King Salaman rait dis: “Wen wahn groop a kongsla ga gud kamyoonikayshan dehn ga gud rizolts.”—Prov. 15:22.

3. How wi mait geh kongsl?

³ Wi mait geh kongsl weh kohn fahn wahn persn. Wahn elda er wahn nada spirichwali machoar brada mait gi wi kongsl pahn sohnting weh wi need fi werk pan. Wen sombadi lov wi inof fi gi wi kongsl fahn di Baibl, wi shuda bee tankful ahn lisn tu di kongsl ahn chrai aplai it. Bot kongsl ku kohn eena ada wayz tu. Weh wi meen bai dat? Wi mait reed sohnting eena di Baibl er eena wi poblikayshan dehn weh mek wi stap ahn tink bowt weh wi di du. Ahn dat ku  help wi chaynj wi tinkin ahn wi akshanz.—Heeb. 4:12.

4. Akaadn tu Ecclesiastes 7:9, weh wi noh fi du wen wi geh kongsl?

⁴ Wi mait fain it reeli haad fi lisn tu kongsl weh kohn fahn wahn persn an aksep it. Ahn wi mait eevn geh beks wen dehn kongsl wi. Wai? Eevn doa wi aksep dat wi noh perfek, wi mait stil fain it haad fi aksep kongsl wen sohnbadi tel wi bowt wahn spesifik mistayk weh wi mek. (Reed Ecclesiastes 7:9.) * Wi mait mek ekskyoos ahn chrai difen wiself. Wi mait eevn wanda wai dis persn di kongsl wi er wi mait geh beks fi di way how di persn kongsl wi. Wi mait eevn fain faalt wid di persn weh di kongsl wi. Wi mait seh tu wiself, ‘Da hoo hihn fi kohn kongsl mee? Hihn mek mistayk tu!ʼ An if wi noh laik di kongsl weh wi get, wi mait ignoar it er aks sohnbadi els fi kongsl bikaaz wi hoap dat dehn mait tel wi weh wi waahn hyaa.

5. Weh wi wahn diskos eena dis aatikl?

⁵ Eena dis aatikl, wi wahn diskos bowt sohn peepl eena di Baibl weh mi rijek kongsl ahn bowt sohn peepl weh mi aksep it. Wi wahn aalso kansida weh ku help wi fi aksep kongsl ahn benifit fan it.

6. Weh wi laan fahn di way how King Rehobowam mi riyak wen ih mi geh kongsl?

⁶ Mek wi kansida Rehobowam egzampl. Wen hihn mi geh fi bee di king a Izrel, ih peepl mi aks ahn fi sohnting. Dehn mi aks ahn if ih kuda mi mek dehn du les dan weh ih pa, Salaman, mi ekspek fahn dehn. Rehobowam mi du sohnting waiz. Ih mi aks di oalda man dehn a Izrel how ih shuda mi ansa di peepl. Di oalda man dehn mi tel ahn dat if ih mi du weh di peepl aks ahn fi du, di peepl mi wahn aalwayz sopoat ahn. (1 Ki. 12:3-7) Bot, Rehobowam neva hapi wid da advais, soh hihn gaahn aks di man dehn weh ih mi groa op wid. Dehndeh man mi bowt 40 yaaz oal, soh dehn mi praabli ga sohn ekspeeryens eena laif. (2 Chron. 12:13) Bot dis taim, dehn neva gi Rehobowam gud advais. Dehn mi tel ahn fi aks moa fahn di peepl. (1 Ki. 12:8-11) Rehobowam mi geh too difrent advais. Soh hihn kuda mi pray tu Jehoava an aks ahn wich advais ih shuda mi fala. Bot insted, hihn mi chooz fi fala di advais weh hihn mi laik an ih mi en op di du weh di yonga man dehn tel ahn fi du. Bikaaz a weh Rehobowam mi du, ih neva gaahn gud fi hihn ahn fi di peepl a Izrel. Tudeh, di advais weh wee geh mait noh aalwayz bee weh wi waahn hyaa. Bot if ih bays pahn Gaad Werd, wi shuda aksep it.

7. Weh King Yuzaiya egzampl teech wi?

⁷King Yuzaiya mi rijek kongsl. Hihn mi gaan eena wahn paat a Jehoava templ weh onli di prees dehn mi alow fi goh eena, ahn hihn mi chrai aafa insens. Jehoava prees dehn mi tel ahn: “Yuzaiya, ih noh rait fi mek yoo bon insens tu Jehoava! Da onli di prees fi bon insens.” Weh Yuzaiya mi du? If hihn mi hombl an aksep di kongsl ahn lef di templ rait away, Jehoava wuda mi fergiv ahn. Bot insted, “Yuzaiya . . . mi geh reeli beks.” Wai Yuzaiya mi rijek di kongsl? Hihn mi praabli tink dat bikaaz hihn da-mi king, hihn kuda mi du wateva ih mi waahn du. Bot Jehoava neva seeʼt da way deh. Bikaaz Yuzaiya mi du sohnting weh ih neva ga di rait fi du, Jehoava mi schraik ahn wid leprosi ahn hihn “mi stay az wahn lepa til di day ih ded.” (2 Chron. 26:16-21) Yuzaiya  egzampl teech wi dat, noh mata hoo wee, if wi rijek kongsl fahn di Baibl, Jehoava noh wahn hapi wid wi.

8. Weh Joab mi du wen ih mi geh kongsl?

⁸ Di Baibl noh onli ga bad egzampl laik weh wi jos diskos, bot ih aalso gat een sohn gud egzampl a peepl weh mi geh blesinz fahn Jehoava bikaaz dehn mi aksep kongsl. Kansida Joab egzampl. Eevn doa hihn mi lov Jehoava an ih mi waahn pleez ahn, hihn neva perfek. Joab mi deh anda wahn lata presha an ih mi seh tingz weh neva rait. Ahn bikaaz a dat, hihn mi geh kongsl weh kohn fahn Jehoava ahn fahn Ilaihyu. Weh Joab mi du? Hihn mi hombl an ih mi aksep di kongsl weh ih mi get. Hihn mi seh: “Yes, Ai mi taak, bot Ah mi seh tingz weh Ah neva andastan . . . Ah tek bak weh Ah mi seh, an Ah doo rigret it. Dat da wai Ah sidong pahn dos an ashiz.” Jehoava bles Joab bikaaz ih mi hombl.—Job 42:3-6, 12-17.

9. Weh Moaziz mi du wen ih mi geh kongsl, ahn wai hihn da wahn gud egzampl fi wee?

⁹Moaziz da wahn gud egzampl a sohnbadi weh mi aksep kongsl afta ih mi mek wahn seeryos mistayk. Wahn taim, hihn mi geh beks bad an ih neva aana Jehoava. Bikaaz a dat, ih mi looz di privilij fi goh eena di Pramis Lan. (Num. 20:1-13) Wen Moaziz mi aks Jehoava fi tink oava ih disizhan, Jehoava mi tel ahn: “Neva taak tu mi bowt dis mata agen.” (Deut. 3:23-27) Moaziz neva geh beks. Insteda dat, ih mi aksep Jehoava disizhan, ahn Jehoava mi kantinyu yooz ahn fi leed di Izrelaits. (Deut. 4:1) Joab ahn Moaziz mi aksep kongsl. Dehn da gud egzampl fi mek wee fala tudeh. Joab mi chaynj di way how ih mi-di tink an ih neva mek ekskyoos fi weh ih mi du. Ahn Moaziz mi proov dat ih mi aksep kongsl fahn Jehoava wen ih mi stay faytful eevn afta ih mi looz wahn preshos privilij.

10. (a) Weh Proverbs 4:10-13 shoa wi bowt how wee benifit wen wi aksep kongsl? (b) Weh gud atichood sohn peepl shoa wen dehn geh kongsl?

¹⁰ Wi benifit wen wi fala di egzampl a faytful peepl laik Joab ahn Moaziz. (Reed Proverbs 4:10-13.) * Tudeh, wahn lata bradaz ahn sistaz fala fi dehn egzampl. Noatis weh Brada Emmanuel fahn Congo seh bowt kongsl weh ih mi get: “Sohn spirichwali machoar bradaz eena mi kangrigayshan mi si dat Ah mi bowt fi damij mi rilayshanship wid Jehoava ahn dehn mi chrai help mi. Ah mi aplai di kongsl weh dehn gi mi an ih mi help mi fi avoid wahn lata prablemz.” * Dis da weh Sista Megan, hoo da wahn painyaa fahn Canada, seh bowt kongsl: “Da neva aalwayz weh Ah mi waahn hyaa, bot da mi weh Ah mi need fi hyaa.” Ahn dis da weh Brada Marko fahn Croatia seh: “Ah mi looz wahn privilij, bot wen Ah luk bak, Ah riyalaiz dat di kongsl weh Ah mi geh mi help mi fi schrentn mi rilayshanship wid Jehoava agen.”

11. Weh Brada Karl Klein mi seh bowt kongsl?

¹¹ Wahn nada egzampl a sohnbadi weh benifit wen ih aksep kongsl da Brada Karl Klein, hoo mi serv az wahn memba a di Govanin Badi. Eena Brada Klein laif stoari, hihn tel wi bowt wahn taim wen hihn mi geh schrang kongsl fahn Brada  Joseph Rutherford, hoo da-mi wan a fi hihn kloas fren. Brada Klein mi admit dat at fers hihn mi geh beks. Hihn mi seh: “Di neks taim [Brada Rutherford] mi si mi, hihn mi seh eena wahn hapi way, ‘Heloa Karl!ʼ Bot bikaaz Ai mi stil beks, Ah jos mombl tu ahn. Soh hihn mi tel mi, ‘Karl, wach owt! Di Devl deh afta yu!ʼ Ah mi soh shaym soh Ah tel ahn, ‘Oa, Ai noh beks wid yu Brada Rutherford.ʼ Bot hihn mi noa dat Ah mi stil beks wid ahn, soh ih waan mi agen, ‘Ai andastan. Jos wach owt. Di Devl deh afta yu.ʼ Hihn mi rait! Wen wi stay beks er hoal wahn groj gens wahn brada afta ih kongsl wi, espeshali if ih seh sohnting weh ih ga di rait fi seh . . , wi mek it eeziya fi mek di Devl chrap wi.” * (Ifee. 4:25-27) Brada Klein mi aksep Brada Rutherford kongsl, ahn dehn mi kantinyu fi bee kloas frenz.

12. If wi hombl, how dat ku help wi fi aksep kongsl? (Psalm 141:5)

¹² Weh ku help wi fi aksep kongsl? Wi need fi bee hombl ahn memba dat wi noh perfek ataal ahn dat sohntaim wi ku bee veri foolish. Jos laik weh wi mi taak bowt erliya, Joab neva andastan di sichuwayshan an ih mi seh tingz weh neva rait. Bot hihn mi chaynj di way how hihn mi-di tink, ahn Jehoava mi bles ahn far it. Wai? Bikaaz Joab mi hombl. Hihn mi proov dat hihn mi hombl wen ih mi aksep di kongsl weh Ilaihyu mi giv ahn, eevn doa Ilaihyu mi yonga dan hihn. (Job 32:6, 7) Sayhn way soh, if wi hombl, ih wahn help wi fi aplai di kongsl weh dehn gi wi, eevn if wi feel laik wi neva dizerv di kongsl er if di persn weh di gi wi kongsl yonga dan wi. Wahn elda da Canada seh: “Sins wee noh si wiself di way how adaz si wi, ih haad fi mek proagres widowt sohnbadi kongsl wi.” Aala wi need fi werk haad fi ga di kwaliti dehn weh di froot a di hoali spirit bayr ahn fi teech ahn preech di gud nyooz beta.—Reed Psalm 141:5. *

13. How wi shuda vyoo di kongsl weh wi get?

¹³Wi fi vyoo kongsl az wahn way how Gaad shoa dat ih lov wi. Jehoava waahn di bes fi eech wan a wi. (Prov. 4:20-22) Wen hihn kongsl wi chroo ih Werd di Baibl, wahn poblikayshan weh bays pahn di Baibl, er wahn spirichwali machoar Kristyan, ih di shoa dat ih lov wi. Heebrooz 12:9, 10 seh: “Wi hevnli Faada aalwayz disiplin wi fi wi oan benifit.”

14. Weh wi shuda foakos pahn wen wi geh kongsl?

¹⁴Foakos pahn di kongsl, noh pahn how  dehn gi wi di kongsl. Sohntaim, wi mait feel laik di persn weh gi wi di kongsl neva du it eena di rait way. Af koars, enibadi weh di gi kongsl shuda chrai dehn bes fi du it eena wahn way weh eezi fi aksep. * (Gal. 6:1) Bot if wee da di wan weh di geh kongsl, wi waahn foakos pahn weh wi ku laan fahn di kongsl, eevn if wi tink dat di persn weh gi wi di kongsl kuda mi du it eena wahn beta way. Wi mait aks wiself: ‘Eevn if Ah noh laik di way how dehn gi mi di kongsl, eniting deh weh Ah ku laan fan di kongsl? Ai ku stap luk pahn di faalts a di persn weh di kongsl mi an insted laan fahn di kongsl?ʼ Ih wuda bee waiz fi si how wi ku benifit fahn eni kongsl weh wi get.—Prov. 15:31.

15. Wai wi shuda aks fi kongsl?

¹⁵ Di Baibl inkorij wi fi aks fi kongsl. Proverbs 13:10 seh: “Wizdom bilangz tu dehn wan weh aks fi advais.” Weh da skripcha seh da chroo! Dehn wan weh aks fi kongsl yoozhwali mek moa spirichwal proagres dan dehn wan weh onli wayt fi mek sohnbadi kohn gi dehn kongsl. Soh mek shoar yu aks fi kongsl.

16. Eena weh sichuwayshanz wi mait aks fi kongsl?

¹⁶ Wen wi mait aks fi kongsl fahn wi Kristyan bradaz ahn sistaz? Kansida sohn sichuwayshan: (1) Wahn sista aks wahn poblisha weh ga lata ekspeeryens eena di minischri fi goh wid ahn pan ih stodi. Afta di stodi, ih aks ahn fi advais pahn how fi bee wahn beta teecha. (2) Wahn singl sista waahn bai sohn kloaz, soh ih aks wahn spirichwali machoar sista weh ih reeli tink bowt di kloaz weh ih pik. (3) Wahn brada geh ih asainment fi gi ih fers poblik taak. Hihn aks wahn brada weh ga lata ekspeeryens di gi taak fi lisn tu ih taak ahn den giv ahn kongsl pahn how ih ku du beta. Eevn if wahn brada di gi taak fi wahn lata yaaz, ih gud fi mek ih aks fi advais fahn bradaz weh ga lata ekspeeryens di gi taak an aplai di kongsl weh ih get.

17. How wi benifit wen wi aksep kongsl?

¹⁷ Eena di fyoocha, aala wi wahn geh kongsl weh kohn fahn sohnbadi er wi wahn geh kongsl weh kohn eena ada wayz. Wen dat hapm, wi waahn memba di points weh wi don diskos. Stay hombl. Foakos pahn di kongsl ahn noh pahn how di persn gi di kongsl. An aplai di kongsl weh yu get. Non a wi baan waiz. Bot wen wi “lisn tu kongsl an aksep disiplin,” Gaad Werd pramis wi dat wi wahn “geh waiz.”—Prov. 19:20.