1. Weh gud atichood Jehoava peepl gat?

FAHN way bak, di Baibl mi seh dat Gaad peepl mi wahn “wilin fi serv” Jehoava ahn fala Jeezas dairekshan. (Ps. 110:3) Da prafesi di kohn chroo tudeh. Evri yaa, Jehoava servants hapi fi spen milyanz a owaz eena di preechin werk. Dehn noh geh pay fi du dis werk ahn dehn wilin fi du it. Dehn aalso mek di taim fi help dehn bradaz ahn sistaz fi geh di tingz weh dehn need, fi inkorij dehn, ahn fi mek dehn lov fi Jehoava geh schranga. Eldaz ahn ministeeryal servants spen lata owaz di pripyaa fi di meetin dehn ahn di vizit dehn bradaz ahn sistaz fi inkorij dehn. Wai Jehoava peepl du aala dis werk? Bikaaz dehn lov Jehoava ahn dehn lov peepl.—Mach. 22:37-39.

2. Bays pahn Roamanz 15:1-3, weh egzampl Jeezas mi set fi wee?

² Jeezas mi shoa dat hihn kay moa bowt adaz. Hihn mi aalwayz put di needz a adaz heda ih oan. Wee di chrai wi bes fi bee laik hihn. (Reed Roamanz 15:1-3.) If wi du dis, wi wahn benifit wahn lat. Jeezas mi seh: “Wi feel moa hapinis wen wi giv tu adaz dan wen wi get tingz fahn ada peepl.”—Aks 20:35.

3. Weh wi wahn kansida eena dis aatikl?

³ Eena dis aatikl, wi wahn taak bowt som a di tingz weh Jeezas mi du fi help adaz ahn wi wahn kansida how wee ku kapi fi hihn egzampl. Wi wahn aalso diskos how wee ku bee moa wilin fi serv adaz.

4. How Jeezas mi put di needz a adaz heda ih oan?

⁴Jeezas mi help adaz eevn wen ih mi taiyad. Tink bowt weh Jeezas mi du wen lata peepl gaahn meet ahn bai wahn mongtinsaid weh mi praabli deh kloas tu Kapernyam. Jeezas mi spen di hoal nait di pray. Hihn mosi mi veri taiyad, bot wen hihn si di krowd a peepl, ih haat gaahn owt tu dehn wan weh mi poa ahn dehn wan weh mi sik monks dehn. Hihn neva onli heel dehn bot ih mi aalso gi wan a di moas inkorijin speech eva—di Sermon Pahn di Mongt.—Look 6:12-20.

5. How di famili hed dehn di fala Jeezas egzampl di shoa lov eevn wen dehn taiyad?

⁵Dis da how di famili hed dehn di fala Jeezas egzampl. Tink bowt dis: Afta wahn lang day da werk, wahn pa reech hoam veri taiyad. Hihn mosi mi waahn kyansl Famili Wership da eevnin, bot hihn bayg Jehoava fi giv ahn di schrent fi stodi wid ih famili. Jehoava ansa ih pryaa ahn di brada stodi wid ih famili jos laik how ih du it evri week. Di chiljren laan wahn impoatant lesn da eevnin. Dehn laan dat spirichwal tingz da di moas impoatant ting fi fi dehn payrents.

6. Gi wahn egzampl weh shoa how Jeezas mi mek taim fi spen wid adaz eevn wen ih mi need taim fi ihself.

⁶Jeezas mi mek taim fi spen wid adaz eevn wen ih mi need taim fi ihself. Yoo ku imajin how Jeezas mosi mi feel wen ih mi fain owt dat dehn mi kil ih fren Jan di Baptis? Jeezas mosi mi feel veri sad. Di Baibl seh: “Wen Jeezas hyaa [dat dehn mi kil Jan], ih get eena wahn boat ahn lef fahn deh. Ih mi waahn goh sohnweh weh nobadi mi liv kaaz ih mi waahn deh bai ihself.” (Mach. 14:10-13) Wee ku andastan wai hihn mi waahn deh bai ihself. Sohn peepl prifaa fi deh bai dehnself afta sohnting laik dis hapm. Bot Jeezas mi kyaahn deh bai ihself bikaaz wahn big krowd a peepl mi fala ahn, an dehn reech di plays bifoa hihn. Weh Jeezas mi  du? Hihn mi put di needz a di peepl heda ih oan, an “ih haat gaan owt tu dehn.” Jeezas mi riyalaiz dat dehn mi need help ahn komfert fahn Gaad, soh kwik-wan hihn staat tu help dehn. In fak, “ih staat teech dehn wahn lata tingz.”—Maak 6:31-34; Look 9:10, 11.

7-8. Gi wahn egzampl weh shoa how lovin eldaz kapi Jeezas wen sohnbadi need help eena di kangrigayshan.

⁷Di way lovin eldaz kapi Jeezas egzampl. Wi veri tankful fi di werk weh wi lovin eldaz du fi wi! Moas a di bradaz ahn sistaz eena di kangrigayshan noh noa weh aal dehn du. Fi egzampl, wen wahn medikal imerjensi kom op, di bradaz weh da paat a di Hospital Liaison Committee rosh fi help dehn bradaz ahn sistaz weh need dehn help. Moas a di taim, dehndeh kaina imerjensi kom op da di midl a di nait. Bot bikaaz di elda dehn an dehn famili ga kompashan fi dehn bradaz ahn sistaz, dehn put di needz a dehn bradaz heda dehn oan.

⁸ Eldaz aalso help wid di kanschrokshan a Kingdom Haalz an ada bildinz, ahn dehn aalso help eena dizaasta rileef werk. Ahn di eldaz eena wi oan kangrigayshan spen lata dehn taim di teech wi ahn di inkorij wi. Aala dehnya bradaz ahn dehn famili dizerv wi lov ahn wi shuda komen dehn fi evriting weh dehn du. Wi pray dat Jehoava bles aal weh dehn du! Bot af koars, jos laik evribadi els, eldaz need fi bee balans ahn noh spen soh moch taim di du tingz fi di kangrigayshan dat dehn noh ga taim fi dehn famili.

9. Akaadn tu Filipiyanz 2:4, 5, weh atichood aal Kristyanz shuda werk haad fi ga?

⁹ Reed Filipiyanz 2:4, 5. Da chroo, noh aala wi da eldaz, bot aala wi ku laan fi kapi Jeezas ahn put di needz a adaz heda wi oan. Di Baibl seh dat hihn mi “mek ihself bee laik wahn slayv.” (Fil. 2:7) Tink bowt weh wee ku laan fahn da vers. Wahn gud slayv, er servant, wuda luk fi difrent apachooniti fi pleez ih maasta. Bikaaz wee da slayvz a Jehoava ahn wi serv wi bradaz ahn sistaz, wi waahn bee moa yoosful tu Jehoava ahn wi bradaz ahn sistaz. Yoo kud du dat if yu kansida dehnya sojeshan.

10. Weh kweschanz wi ku aks wiself?

¹⁰Tink bowt yu atichood. Aks yuself kweschanz laik dehnya: ‘Ai wilin fi giv mai taim an enerji fi help adaz? Weh Ai wuda du if dehn aks mi fi goh spen taim wid wahn oalda brada er fi kehr wahn oalda sista da di meetinz? Ai wilin fi help wen dehn need valantyaaz fi kleen di plays wehpaat wi wahn ga wi kanvenshan er fi du mantaynans pahn di Kingdom Haal?ʼ Wen wi mi dedikayt wi laif tu Jehoava, wi mi pramis ahn dat wi wahn yooz evriting weh wi ga eena wi servis tu hihn. Hihn waahn wi yooz wi taim, enerji, ahn mateeryal tingz fi help adaz. Soh hihn hapi wen wi put di needz a adaz heda wi oan. Bot weh wi ku du if wi noatis dat wi need fi du beta eena dis ayrya?

11. How pryaa ku help wi fi bee moa wilin fi help adaz?

¹¹Pray tu Jehoava fahn yu haat. Sopoaz yu si dat yu need fi bee moa wilin fi help adaz, bot fi sohn reezn yu noh feel laik du notn bowt it. Wel, dis da wen yu need fi bayg Jehoava fi help yu fi bee wilin fi mek chaynjiz. Bee aanis wid Jehoava. Tel ahn egzakli how yu feel, an aks ahn fi gi yu “di dizaiya ahn di powa fi du weh hihn waahn.”—Fil. 2:13.

12. How wahn yong brada weh don baptaiz ku help ih kangrigayshan?

¹² If yoo da wahn yong brada weh don baptaiz, aks Jehoava fi help yu fi ga di dizaiya fi du moa fi di bradaz ahn sistaz eena yu kangrigayshan. Eena sohn konchri, dehn ga moa eldaz dan ministeeryal servants, ahn lata dehndeh ministeeryal servants noh yong. Az di aaganaizayshan kip di groa, wi need moa yonga bradaz fi help di eldaz tek kyaa a di bradaz ahn sistaz eena di kangrigayshan. If yoo wilin fi serv eena eni way, fi shoar yu wahn bee hapi. Wai? Bikaaz yu wahn mek Jehoava hapi, di bradaz wahn si dat yu wilin fi help adaz, ahn yoo wahn bee hapi bikaaz yu help adaz.

13-14. Weh wee ku du fi help wi bradaz ahn sistaz? (Koment pahn di picha pahn di kova.)

¹³Noatis wen sombadi need help. Paal mi tel di Kristyanz weh mi-di liv da Judeeya: “Unu mosn ferget fi du gud ahn fi shayr weh unu gat wid adaz, kaaz Gaad pleez wid dehndeh kaina sakrifais.” (Heeb. 13:16) Dat da-mi gud advais! Noh tu lang afta dehn mi geh dis leta fahn Paal, dehndeh Kristyanz mi haftu lef dehn hows, dehn bizniz, ahn dehn relitiv dehn weh da neva Kristyan ahn “ron tu di mongtin dehn.” (Mach. 24:16) Fi shoar, joorin da taim ih mi veri impoatant fi mek dehn help wan anada. If dehn mi-di fala Paal advais fi shayr weh dehn mi ga wid wan anada, dehn  wuda mi fain it eeziya fi ga jos wahn fyoo tingz eena dehn nyoo hoam.

¹⁴ Wi bradaz ahn sistaz mait noh aalwayz tel wi if dehn need sohnting. Fi egzampl, wahn brada sad bikaaz ih looz ih waif eena det. Yu tink di brada need help wid food, yu tink ih need wahn raid fi goh da meetinz, er ih need help fi du tingz rong di hows? Hihn mait noh aks fi help bikaaz ih noh waahn bada wi. Bot hihn wuda bee veri tankful if wee aafa fi help ahn bifoa hihn eevn aks wi. Wi noh fi tink dat sohnbadi els wahn help ahn er dat hihn wahn aalwayz tel wi weh ih need. Aks yuself, ‘If Ai mi deh eena da sayhn sichuwayshan, weh kaina help Ai wuda need?ʼ

15. Weh wee fi du if wi waahn help adaz?

¹⁵Mek it eezi fi adaz soh dat dehn ku aks yu fi help. Fi shoar yu noa bradaz ahn sistaz eena yu kangrigayshan weh aalwayz redi fi help adaz. Dehn neva mek wi feel laik wi di bada dehn. Wee noa dat dehn wahn aalwayz wilin fi help wi, ahn wee waahn bee jos laik dehn! Alan, wahn elda weh 45 yaaz oal, waahn mek adaz feel komfatabl fi aks ahn fi help. Dis da weh Alan seh bowt Jeezas egzampl: “Jeezas mi bizi, bot yong peepl an oalda peepl mi laik ahn, an dehn neva frayd fi aks ahn fi help. Dehn mi noa dat hihn reeli kay bowt dehn. Fahn di batam a mi haat, Ai reeli waahn bee laik Jeezas. Ah waahn adaz noa mi az sohnbadi weh eezi fi taak tu, frenli, an Ah waahn dehn noa dat Ah kay bowt dehn.”

16. If wi du weh Psalm 119:59, 60 seh, how dis ku help wi fi kapi Jeezas egzampl kloas-wan?

¹⁶ Wi noh fi geh diskorij if wi noh kapi  Jeezas egzampl eena wahn perfek way. (Jay. 3:2) Wahn styoodent noh beta dan ih teecha. Bot az di styoodent laan fan ih mistayk dehn ahn chrai fi kapi ih teecha az bes az pasabl, di styoodent wahn kip di du beta. Sayhn way soh, if wi aplai weh wi laan wen wi stodi di Baibl ahn kip di chrai du beta, wi wahn di kapi Jeezas egzampl kloas-wan.—Reed Psalm 119:59, 60. *

17-18. How wi wahn benifit if wi kapi Jeezas egzampl ahn put di needz a adaz heda wi oan?

¹⁷ Wen wi wilin fi help, adaz wahn waahn du di sayhn ting. Wahn elda weh naym Tim seh: “Sohn veri yong bradaz geh fi serv az ministeeryal servants. Wan reezn da bikaaz dehn mi si how wilin adaz mi wilin fi help, ahn dehn mi waahn bee laik dehn. Bikaaz dehnya yong bradaz aafa fi help, wi kangrigayshan benifit, ahn dehn da wahn big sopoat fi di eldaz.”

¹⁸ Lata peepl eena di werl tudeh veri selfish. Bot Jehoava peepl da noh laik dat ataal. Jeezas egzampl fi put adaz heda ih oan reeli toch wi haat, ahn wee mek op wi main fi kapi fi hihn egzampl. Da chroo, wee kyaahn fala ih egzampl eena wahn perfek way, bot wee kud “fala ih egzampl kloas-wan.” (1 Peet. 2:21) Az wi du wi veri bes fi kapi Jeezas egzampl fi aalwayz put di needz a adaz heda wi oan, wi wahn di mek Jehoava hapi ahn wee wahn bee hapi.