1-2. (a) Wai wahn lata peepl fain it haad fi chros dehn wan weh ga atariti? (b) Weh wi wahn diskos eena dis aatikl?

TUDEH wahn lata peepl fain it haad fi chros enibadi weh ga atariti. Dehn seh dat di leegal ahn politikal sistem protek peepl weh ga moni ahn weh powaful ahn dehn noh help poa peepl. Di Baibl seh: “Man rool oava man an onli kaaz payn.” (Eccl. 8:9) Pahn tap a dat, sohn rilijos leedaz du bad tingz ahn dat mek peepl looz dehn chros eena Gaad. Soh if wi stodi di Baibl wid sohnbadi, wi need fi help da persn fi chros eena Jehoava ahn dehn wan weh Hihn apoint rait ya pahn ert.

² Af koars, Baibl styoodents da noh di onli wan dehn weh need fi laan fi chros eena Jehoava an eena fi hihn aaganaizayshan. Eevn if wi di serv Jehoava fi wahn lata yaaz, wi neva waahn dowt dat Jehoava way a du tingz da aalwayz di bes way. Sohntaim, sohnting ku hapm weh mait tes wi chros eena Jehoava. Eena dis aatikl, wi wahn diskos chree wayz how wi fayt ku geh tes: (1) wen wi reed sohn Baibl akonk, (2) wen wi geh dairekshan fahn Jehoava aaganaizayshan, ahn (3) wen wi fays chalenjiz eena di fyoocha.

3. How sohn Baibl akonk ku tes wi chros eena Jehoava?

 ³ Wen wi reed Gaad Werd, wi mait wanda wai Jehoava mi chreet sohn peepl wahn sertn way ahn wai hihn mek sertn disizhanz. Fi egzampl, eena di buk a Numbers, wi reed dat Jehoava mi kandem wahn Izrelait tu det bikaaz ih mi kalek wud pahn di Sabat. Eena di sekant buk a Samuel, wi laan  dat wahn lata yaaz layta, Jehoava mi fergiv King Dayvid wen ih mi komit adolchri ahn merda. (Num. 15:32, 35; 2 Sam. 12:9, 13) Wi mait aks wiself, ‘Wai Jehoava mi fergiv Dayvid fi adolchri ahn merda bot kandem di ada man tu det fi wahn sin weh neva luk az seeryos az di wan weh Dayvid mi komit?ʼ Fi ansa da kweschan, mek wi kansida chree tingz weh wi need fi memba az wi reed di Baibl.

4. How Genesis 18:20, 21 ahn Deuteronomy 10:17 schrentn wi chros eena Jehoava disizhanz?

⁴Di Baibl noh aalwayz gi wi aal di deetaylz a wahn Baibl akonk. Fi egzampl, wi noa dat Dayvid mi reeli sari fi weh ih mi du. (Ps. 51:2-4) Bot da-mi weh kaina persn di man weh mi brok di laa bowt di Sabat? Hihn mi sari fi weh ih mi du? Hihn mi disobay Jehoava laa dehn eena di paas? Hihn mi ignoar er eevn rijek eni waanin weh ih mi geh eena di paas? Di Baibl noh seh. Bot wi ku bee shoar a dis: Jehoava “neva joj rang.” (Deut. 32:4) Yoozhwali, hyoomanz mek disizhanz bays pahn weh peepl taak bowt, pahn rang opinyan bowt adaz, er eniting els weh mek wi joj di rang way. Bot Jehoava da noh laik hyoomanz, hihn bays ih disizhanz pahn faks. (Reed Genesis 18:20, 21; Deuteronomy 10:17.) * * Di moa wi laan bowt Jehoava ahn fi hihn standadz, di moa wi wahn chros eena fi hihn disizhanz. Eevn if wi reed di Baibl ahn wi ga kweschanz weh wi kyaahn ansa now, wi noa moa dan inof bowt fi wee Gaad ahn wi ku bee shoar dat hihn “raichos eena aala fi hihn wayz.”—Ps. 145:17.

5. Bikaaz wi noh perfek, how dat afek di way wi joj adaz? (Si di baks “ Bikaaz Wi Noh Perfek, Wi Kyaahn Aalwayz Joj Mataz Laik Jehoava.”)

⁵Wi kyaahn aalwayz joj laik Jehoava bikaaz wi noh perfek. Gaad mek wi wid di abiliti fi ga di sayhn kwalitiz laik hihn, soh wi waahn si peepl geh chreet eena wahn fyaa way. (Gen. 1:26) Bot bikaaz wi noh perfek, wi mait joj mataz di rang way, eevn wen wi tink wi ga aala di faks. Fi egzampl, memba how beks Joana mi beks wen Jehoava mi shoa mersi tu di peepl a  Niniveh? (Jonah 3:10–4:1) Bot tink bowt weh mi hapm bikaaz Jehoava mi shoa dehn mersi. Moa dan 120,000 peepl fahn Niniveh mi ripent ahn bikaaz a dat dehn mi geh sayv! Soh eena da Baibl akonk, wi si dat da mi Joana weh neva joj di rait way, noh Jehoava.

6. Wai Jehoava noh need fi eksplayn fi hihn disizhan dehn tu wee?

⁶Jehoava noh need fi eksplayn fi hihn disizhan dehn tu hyoomanz. Da chroo, Jehoava mi alow ih servants eena di paas fi ekspres how dehn feel bowt di disizhan dehn weh hihn mi mek er weh ih mi bowt fi mek. (Gen. 18:25; Jonah 4:2, 3) Ahn sohntaim, hihn mi eksplayn tu dehn wai hihn mi mek sertn disizhanz. (Jonah 4:10, 11) Bot, Jehoava noh haftu eksplayn tu wee di reezn wai ih mek sertn disizhanz. Az wi Kriyayta, hihn noh need fi mek wi aproov wahn disizhan weh hihn don mek er weh hihn wahn mek.—Isa. 40:13, 14; 55:9.

7. Weh mait bee haad fi mek wi du, ahn wai?

⁷ Wi noa fi shoar dat Jehoava aalwayz du weh rait. Fi som a wi, doh, ih mait bee haad fi mek wi chros di man dehn weh hihn apoint rait ya pahn ert. Wi mait wanda if dehnya man weh ga atariti eena Jehoava aaganaizayshan di du weh Jehoava waahn dehn fi du er if dehn di du dehn oan ting. Dat kuda mi bee di sayhn kaina tinkin weh peepl eena Baibl taimz mi gat. Tink bowt di egzampl dehn eena  paragraaf 3. Wahn relitiv a di man weh brok di laa a di Sabat mosi mi wanda if Moaziz mi reeli gaahn tu Jehoava fi advais bifoa di man mi geh kandem tu det. Ahn wahn fren a Yuraiya di Hitait, hoofa waif mi komit adolchri wid Dayvid, mosi mi tink dat Dayvid mi yooz fi hihn pozishan az king fi get weh fahn di ponishment weh ih dizerv. Jehoava chros dehn wan weh hihn apoint fi tek di leed eena ih aaganaizayshan an eena di kangrigayshan. Soh, if wi noh chros dehnya man, den wi kyaahn seh dat wi chros Jehoava.

8. How di ripoat da Aks 16:4, 5 ahn di way how di Kristyan kangrigayshan fongshan tudeh simila?

⁸ Tudeh, Jehoava di yooz “di faytful ahn waiz slayv” fi leed ih aaganaizayshan rait ya pahn ert. (Mach. 24:45) Jos laik di govanin badi eena di fers senchri, “di faytful ahn waiz slayv” di luk afta Gaad peepl aal oava di werl ahn dehn di gi dairekshan tu di eldaz eena di kangrigayshan dehn. (Reed Aks 16:4, 5.) Den di eldaz mek shoar dat di kangrigayshan di fala dehndeh dairekshan. Wi shoa dat wi chros di way how Jehoava du tingz wen wi obay di dairekshan weh wi get fahn di aaganaizayshan ahn fahn di eldaz.

9. Wen wi mait fain it haad fi obay di disizhan dehn weh di eldaz mek, ahn wai?

⁹ Sohntaim, wi mait fain it haad fi sopoat di disizhan dehn weh di eldaz mek. Fi egzampl, wahn fyoo yaaz agoa, di aaganaizayshan mi swich op wahn lata di kangrigayshan ahn di serkit dehn. Eena sohn kays, di eldaz mi aks sohn poblishaz fi moov tu wahn neks kangrigayshan soh dat dehn ku mek gud yoos a di spays eena di Kingdom Haal. If dehn mi aks wi fi jain wahn nyoo kangrigayshan, wee wuda mi praabli fain it haad fi lef wi famili ahn frenz. Yu tink Jehoava mi persnali tel dehnya eldaz wehpaat dehn fi put eech poblisha? Af koars nat. Ahn bikaaz a dat, ih wuda mek it haada fi mek wi fala di dairekshanz weh wi get. Bot Jehoava chros  di eldaz fi mek dehndeh disizhanz, ahn wee need fi chros dehn tu. *

10. Wai wi shuda werk lang wid di eldaz? (Heebrooz 13:17)

¹⁰ Wai wi shuda werk lang wid di eldaz ahn sopoat di disizhanz weh dehn mek eevn if dehn disizhanz da noh weh wi mi ekspek? Bikaaz wen wi du dat, wi help mek Gaad peepl stay yoonaitid. (Ifee. 4:2, 3) Di kangrigayshan praspa wen evribadi hombl ahn sopoat di disizhanz weh di badi a eldaz mek. (Reed Heebrooz 13:17.) Ahn moa impoatant, wi shoa Jehoava dat wi chros ahn wen wi lisn tu di bradaz weh hihn apoint fi tek kayr a wi.—Aks 20:28.

11. Weh ku help wi fi schrentn wi chros eena di dairekshan weh wi geh fahn di eldaz?

¹¹ Wen wi memba dat di eldaz pray fi hoali spirit bifoa dehn mek disizhanz weh wahn afek di kangrigayshan, dat ku schrentn wi chros eena di dairekshan weh wi get fahn dehn. Dehn aalso kansida Baibl prinsiplz ahn gaidlainz weh Jehoava aaganaizayshan provaid. Dehn reeli waahn mek Jehoava hapi ahn tek kayr a fi hihn peepl. Dehnya faytful man noa dat Gaad reeli kay bowt di way how dehn tek kayr a fi hihn peepl. (1 Peet. 5:2, 3) Tink bowt dis: Eena wahn werl weh divaid op bikaaz a skin kala, rilijan, ahn palitiks, Jehoava peepl di serv di wan chroo Gaad tugeda eena pees. Dis onli pasabl bikaaz Jehoava di bles fi hihn aaganaizayshan!

12. Weh di eldaz need fi kyaafuli tink bowt wen dehn di disaid if wahn persn reeli ripent fahn wahn seeryos sin weh ih komit?

¹² Jehoava gi di eldaz di seeryos rispansabiliti fi kip di kangrigayshan kleen. If wahn Kristyan komit wahn seeryos sin, Jehoava ekspek di eldaz fi disaid weda er nat da persn ku stay eena di kangrigayshan. Dehn ga wahn lata tingz weh dehn aalso need fi tink bowt. Dehn need fi fain owt if di persn reeli ripent fi weh ih mi du. Di persn mait seh dat ih ripent, bot ih reeli hayt weh ih mi du? Hihn don mek op ih main fi noh komit da sin agen? If di reezn wai hihn mi komit da sin da bikaaz hihn mi-di heng rong bad kompni, hihn wilin fi stap bee frenz wid dehn peepl? Di eldaz pray tu Jehoava bowt aala dis, dehn kansida di faks ahn weh di Baibl seh, ahn dehn kansida how di persn feel bowt weh ih mi du. Den dehn disaid weda er nat di persn ku stay eena di kangrigayshan. Sohntaim, doh, di persn wuda haftu geh disfeloship.—1 Kor. 5:11-13.

13. Weh wi mait wori bowt if wan a wi fren er relitiv geh disfeloship?

¹³ Weh ku tes wi chros eena di eldaz? If di persn weh geh disfeloship da noh wi kloas fren er wahn relitiv, ih mait bee eeziya fi mek wi aksep di disizhan weh di eldaz mek. Bot if di persn weh geh disfeloship da wahn kloas fren er wahn relitiv, wi mait wori dat di eldaz dehn neva kansida aala di faks. Er wi mait wanda if di eldaz mi joj di mata di way how Jehoava wuda joj it. Weh ku help wi fi kip di prapa atichood tuwaadz di disizhan dehn weh di eldaz mek?

14. Weh ku help wi if di eldaz disaid dat wan a wi fren er relitiv shuda geh disfeloship?

¹⁴ Ih gud fi mek wi memba dat wen sohnbadi geh disfeloship da wahn araynjment fahn Jehoava an ih benifit di kangrigayshan ahn di persn weh komit di sin. If di eldaz alow sohnbadi weh noh ripent  fan ih sin fi stay eena di kangrigayshan, ih ku afek adaz eena di kangrigayshan an ih ku mek dehn komit wahn sin tu. (Gal. 5:9) Pahn tap a dat, di persn mait noh riyalaiz how bad ih mi sin, an ih mait noh si di reezn fi chaynj ih tinkin an ih akshanz soh dat ih ku geh bak Jehoava blesin. (Eccl. 8:11) Wee ku bee shoar dat di eldaz tek dehn rispansabiliti seeryos wen dehn di disaid weda er nat wahn persn fi geh disfeloship. Dehn riyalaiz dat jos laik di joj dehn eena aynshent Izrel, dehn “noh joj fi man bot fi Jehoava.”—2 Chron. 19:6, 7.

15. Wai wi need fi chros Jehoava dairekshan now moa dan eva bifoa?

¹⁵ Di en a dis wikid sistem deh veri kloas, soh wi need fi chros di way how Jehoava du tingz now eevn moa dan bifoa. Wai? Joorin di grayt chribyulayshan, wi mait geh inschrokshanz weh mait noh mek sens tu wee, weh mait luk haad fi andastan, er weh mait haad fi obay. Af koars, Jehoava noh wahn taak tu wi persnali. Moa dan laikli, hihn wahn gi wi dairekshan chroo di bradaz weh hihn apoint rait ya pahn ert. Dat noh wahn bee di taim fi dowt di dairekshan er tink, ‘Ah wanda if dis dairekshan reeli di kohn fahn Jehoava, er if da di persnal opinyan a di bradaz weh di tek di leed?ʼ Yoo wahn chros eena Jehoava an eena fi hihn aaganaizayshan joorin da impoatant taim? Di way how yoo vyoo di dairekshan weh kohn fahn di bradaz weh Gaad apoint tudeh wahn help yu fi noa if yu wahn ku chros eena Jehoava an eena fi hihn aaganaizayshan joorin da impoatant taim. If yoo chros di dairekshan weh wi geh tudeh an yu wilin fi obay, fi shoar yu wahn du di saym joorin di grayt chribyulayshan.—Look 16:10.

16. How di chros weh wi ga eena di way how Jehoava joj mataz ku geh tes eena di fyoocha?

¹⁶ Wi aalso need fi reeli tink bowt how wi wahn riyak tu di way how Jehoava joj mataz da di en a dis wikid sistem. Rait now, wi hoap dat lata peepl weh noh di serv Jehoava, inkloodin wi relitivz weh da noh Witnisiz, disaid fi serv hihn bifoa di en kohn. Bot da Armagedon, Jehoava wahn yooz Jeezas fi joj eech persn. (Mach. 25:31-33; 2 Tes. 1:7-9) Ih noh wahn bee op tu wee fi disaid hoo wahn geh Jehoava mersi ahn hoo noh wahn geh ih mersi. (Mach. 25:34, 41, 46) Yu tink wi wahn bee aybl fi chros eena di way how Jehoava joj mataz, er wi wahn stap serv Jehoava bikaaz wi noh gree wid fi hihn disizhanz? Ih klyaa fi si dat wi need fi schrentn wi chros eena  Jehoava now soh dat wi ku chros hihn kompleetli eena di fyoocha.

17. How wi wahn benifit fahn di way how Jehoava joj mataz da di en a dis sistem a tingz?

¹⁷ Imajin how wi wahn feel eena Gaad nyoo werl wen wi si weh hapm bikaaz a di way how Jehoava joj mataz. Faals rilijan noh wahn egzis nohmoh, ahn di greedi bizniz ahn di govament dehn weh abyooz peepl ahn weh mek dehn sofa fi soh lang noh wahn egzis needa. Helt prablemz, oal ayj, ahn det noh wahn egzis nohmoh. Saytan ahn di deemonz wahn kyaahn du notn tu hyoomanz fi wahn towzn yaaz. Aala di bad tingz weh mi hapm bikaaz a weh dehn mi ribel wahn disapyaa. (Rev. 20:2, 3) Wi wahn soh tankful bikaaz wi mi chros eena di way how Jehoava du tingz!

18. Bays pahn Numbers 11:4-6 ahn 21:5, wat da sohn lesn weh wi ku laan fahn di Izrelait dehn?

¹⁸ Eena Gaad nyoo werl, yu tink wi wahn fays sohn chalenjiz weh ku tes wi chros eena di way how Jehoava du tingz? Noatis, fi egzampl, weh mi hapm lee bit afta di Izrelait dehn mi lef Eejip. Som a dehn mi staat tu komplayn bikaaz dehn mi mis aala di nais food weh dehn mi injai da Eejip, ahn dehn mi chreet di mana weh Jehoava mi gi dehn laik if da sohnting disgostin. (Reed Numbers 11:4-6; 21:5.) * * Yu tink wi wahn feel da sayhn way afta di grayt chribyulayshan kohn tu wahn en? Wee noh noa humoch werk wi wahn haftu du fi kleen op di ert ahn mek ih bee wahn paradais. Bot moa dan laikli, wi wahn ga lata werk fi du an at fers, laif mait noh bee eezi. Wee wahn komplayn bowt weh Jehoava gi wi joorin da taim? Wan ting da fi shoar: If wi graytful fi weh Jehoava gi wi now, wi wahn bee eevn moa graytful fi weh hihn wahn gi wi eena di fyoocha.

19. Wat da di mayn points a dis aatikl?

¹⁹ Wi need fi bee shoar dat Jehoava aalwayz du tingz di rait way. Wi aalso need fi chros di bradaz weh Jehoava yooz fi dairek wi. Neva ferget di werdz weh Jehoava mi seh chroo fi hihn prafit Aizaiya: “Yu wahn bee powaful if yu stay kaam ahn chros [Gaad].”—Isa. 30:15.