BAK eena Baibl taimz wen too famili wuda gree pahn wahn marij, di groom er fi hihn famili wuda pay wahn prais tu di famili a di braid. Dehn kuda mi yooz animal er moni fi pay di famili. Er laik weh Jaykop mi du, hihn mi werk fi ih faada-in-laa fi sevn yaaz ahn den ih kuda mi marid Raychel. (Gen. 29:17, 18, 20) Bot wai dehn mi du dis?

Di prais weh wahn groom er fi hihn famili pay fi di braid wuda help pay fi di werk weh di famili mi laas. Noatis weh Carol Meyers, hoo da wahn Baibl teecha, seh bowt dis: “Wen wahn daata geh marid, shee kyaahn help di famili fi werk di lan nohmoh soh di prais weh di groom pay help di famili.” Di prais weh di groom er fi hihn famili pay fi di braid mi aalso help di too famili fi ga wahn schranga frenship wid wan anada ahn fi help eech ada joorin haad taimz. Dis mi aalso shoa dat di uman mi ingayj ahn dat now fi shee fyoocha hozban wahn protek shee ahn tek kayr a ahn.

Di fak dat dehn mi pay wahn prais tu di famili a di braid neva meenz dat shee da-mi wahn ting weh dehn kuda mi bai er sel. Dis da weh di buk Ancient Israel—Its Life and Institutions seh: “Di fak dat dehn mi haftu pay wahn amonk a moni er sohnting eekwal tu dat tu di famili a di braid mi mek ih luk laik di groom er fi hihn famili mi-di bai di braid. Soh tu som peepl, ih mi luk laik if marij bitween Izrelaits da-mi bizniz. Bot akchwali, [di prais weh dehn mi pay tu di famili a di braid] da-mi jos fi pay bak tu di famili fi weh dehn mi-di looz.”

Tudeh, eena sohn konchri, peepl stil fala dis kostom. Wen Kristyan payrents aks fi mek di groom er fi hihn famili pay wahn prais, dehn mek shoar dat dehn noh aks fi tu moch ahn dehn mek shoar dat dehn noh greedi. Wen dehn du dis, dehn shoa dat dehn “noh aalwayz waahn [dehn] oan way.” (Fil. 4:5; 1 Kor. 10:32, 33) Ahn dehn aalso shoa dat dehn noh “lov moni.” (2 Tim. 3:2) Pahn tap a dat, wen Kristyan payrents noh aks fi wahn reeli hai prais, di groom noh wahn haftu chaynj di dayt a di wedn til ih ga inof fi pay di famili. Er di groom noh wahn feel laik ih haftu stap painyaa bikaaz ih need fi goh werk ful-taim soh dat ih ku pay fi aal weh di famili aks fa.

Eena sohn paats a di werl, di govament kanchroal humoch wahn famili ku aks fa. Soh Kristyan payrents weh liv eena dehndeh ayrya obay dehndeh laa. Wai? Bikaaz Gaad Werd seh dat Kristyanz “fi bee wilin fi obay peepl weh ga atariti” ahn fi obay eni laa weh noh goh gens Gaad laa dehn.—Roam. 13:1; Aks 5:29.