Yu Mi Noa?
Wai da mi wahn gud ting dat Jehoava mi alow di Izrelaits fi aafa too kaina berd az sakrifais?
ANDA di Laa, Jehoava mi aksep dov ahn pijin az sakrifais tu hihn. Dehnya too berd aalwayz geh menshan tugeda eena di laa dehn bowt weh animalz di Izrelaits kuda mi aafa az sakrifais. Dehn kuda mi chooz fi aafa dov er pijin. (Lev. 1:14; 12:8; 14:30) Wai da mi wahn gud ting dat Jehoava mi alow di Izrelaits fi aafa too kaina berd az sakrifais? Wan reezn da-mi bikaaz di dov dehn neva aalwayz avaylabl. Wai nat?
Dov (Tertldov)
Di dov dehn liv eena Izrel joorin di monts wen di weda waam. Bot evri yaa eena Aktoaba, dehn flai sowt fi goh da ada konchriz weh waama. Den dehn wuda goh bak da Izrel wen di weda wuda staat tu geh waam agen rong spring taim. (Song of Sol. 2:11, 12; Jer. 8:7) Soh dis meenz dat eena Baibl taimz, ih mi haad fi mek di Izrelaits aafa dov az sakrifais joorin winta taim.
Pijin (Rak pijin)
Pan di ada han, di pijin dehn noh yoozhwali flai tu wahn neks plays wen di weda chaynj, insted, dehn avaylabl eena Izrel aal yaa rong. In fak, di pijin dehn da-mi laik pet fi di Izrelaits. (Kompyaa Jan 2:14, 16.) * Akaadn tu wahn buk weh naym Bible Plants and Animals, “peepl da aala di vilij dehn ahn tong dehn eena Palestine mi ga pijin az pet. Eech hows mi ga wahn hoal pahn di waal wehpaat di berd dehn kuda mi liv.”
Wahn pijin eena wahn hoal pahn di waal
Jehoava mi shoa dat ih lovin ahn reeznabl wid di Izrelaits bikaaz ih mi aksep berd weh mi avaylabl aal yaa rong az sakrifais.
