Ai laaf kaaz Ah neva tink mai fren da-mi wahn rilijos persn. Ai aks ahn, “Weh yoo noa bowt di Baibl?” Hihn mi tek ih taim fi ansa. Laytaraan, ih tel mi dat ih ma da wan a Jehoava Witnisiz ahn dat hihn mi laan sohn tingz fan ahn. Soh Ah mi aks ahn fi tel mi moa.

Wi mi taak aalmoas aal nait. Mai fren mi tel mi dat di Baibl seh dat Saytan da di roola a dis werl. (Jan 14:30) Maybi yoo noa dat fahn lang taim, bot Ai neva noa dat. Dat da-mi sohnting nyoo tu mee. Ah mi aalwayz hyaa dat Gaad da-mi wahn kain ahn fyaa Gaad, ahn dat hihn da-mi di roola a dis werl. Bot dat neva mek no sens tu mee bikaaz a weh Ah si di hapm eena di werl. Eevn doa Ah mi jos 26 yaaz oal, Ah mi si wahn lata bad tingz di hapm weh mi-di bada mi.

Mai pa da-mi wahn pailat eena di United States Air Force. Soh fan Ah smaal, Ah mi noa dat wahn nyooklyaa waar da-mi sohnting weh kuda mi hapm fi chroo. An if di aami mi waahn, dehn kuda mi sen wahn nyooklyaa bom enitaim. Wail Ah mi deh da kalij da California, dehn mi-di ga waar da Vietnam. Ah mi jain wahn groop a styoodents weh mi-di proates. Di polees mi chays wi dong wid dehn stik. An az wi mi-di ron, wi mi-di choak kaaz a di gyas bom weh dehn mi chroa aata wi, ahn wi kudn si gud. Lata palitishan mi-di geh kil. Peepl mi-di proates, ahn lata raiyats mi deh. Evribadi mi ga dehn oan opinyan bowt weh mi-di hapm. Evriting mi soh kanfyoozin.

Eena 1970, Ah mi-di werk da di naat koas a Alaska an Ah mi-di mek wahn lata moni. Aftawodz, Ah mi kech wahn playn fi goh da London. Den Ah bai wahn motosaikl ahn raid dong sowt. Ah neva plan wehpaat Ah mi gwehn, Ah mi jos kip di jraiv. Monts layta, Ah mi reech da Africa. Az Ah mi-di goh, Ah meet sohn peepl weh mi wish dat dehn kuda ron weh fahn dehn prablemz tu.

Soh bikaaz a weh Ah mi-di hyaa ahn weh Ah mi-di si, wen Ah mi hyaa dat di Baibl teech dat wahn eevl kreecha di kanchroal di werl, dat mi mek sens tu mee. Bot weh Ai mi waahn noa da if  Gaad da neva di wan weh di kanchroal di werl, den weh hihn mi-di du?

Monts layta, Ah mi geh di ansa tu da kweschan. An oava taim, Ah mi geh fi lov peepl weh mi proov bai dehn akshan dat dehn faytful tu di onli chroo Gaad, noh mata weh sichuwayshan dehn fays.

Wen Ah mi gaahn bak da London, Ah mi geh in kantak wid mi fren ma ahn shee mi gi mi wahn Baibl. Laytaraan, Ah mi gaahn da Amsterdam, da di kyapital siti a di Netherlands. Wahn Witnis si mi di reed anda wahn lampoas, ahn hihn mi help mi fi laan moa bowt di Baibl. Afta dat Ah mi gaahn da Dublin, Ireland, an Ah mi fain wahn branch aafis a Jehoava Witnisiz deh. Ah mi nak pahn di doa ahn da soh Ah mi geh fi meet Arthur Matthews. Hihn da-mi wahn waiz brada weh mi ga lata ekspeeryens. Ah mi aks ahn if ih ku stodi di Baibl wid mi, ahn hihn mi seh yes.

Wen Ah staat stodi di Baibl, Ah mi tek it seeryos. Ah mi eega fi reed di buk ahn magazeen weh di Witnisiz mi poblish. An, af koars, Ah mi reed di Baibl tu. Dat mi amayzin! Da di kangrigayshan meetin dehn, Ah mi geh fi si dat eevn pikni mi noa di ansaz tu kweschanz weh ejukaytid peepl mi stodi fi honjrid a yaaz, laik ‘Wai bad tingz hapm? Hoo da Gaad? Ahn weh hapm tu wi wen wi ded?ʼ Aal mi frenz da-mi Witnisiz. Dat mi eezi kaaz Ah neva noa enibadi els eena di konchri. Dehn mi help mi fi geh fi lov Jehoava ahn serv ahn.

Ah mi geh baptaiz eena 1972, ahn wan yaa afta dat Ah mi staat painyaa. An Ah mi jain wahn smaal kangrigayshan da Newry, eena Northern Ireland. An Ah mi rent wahn hows pahn di mongtinsaid. Dehn mi ga sohn kow eena wahn feel kloas tu weh Ah mi liv, an Ah yoostu praktis mi taak fronta dehn. Dehn mi luk laik dehn di lisn gud wail dehn di choo. Dehn neva gi mi no kongsl, bot dehn mi help mi fi luk pahn di aadyans wen Ah mi-di gi mi taak. Eena 1974, Ah mi geh apointid az wahn speshal painyaa an Ah mi geh fi painyaa lang wid Nigel Pitt, weh mi geh fi bee wan a mi gud fren.

Rong da taim dehn mi ga wahn lata vailens eena Northern Ireland. Peepl yoostu kaal it “di lan a di bom ahn bulit.” Ih mi kaman fi si peepl di fait pahn di schreet er di shoot op wan anada, er fi si kaar di geh bom owt, aal bikaaz a palitiks ahn rilijan. Kyaatlik peepl ahn peepl fahn di ada cherch dehn mi noa dat di Witnisiz noh tek said eena  palitiks. Sayka dat, di Witnisiz mi free fi preech, ahn nobadi neva du dehn notn. Lata taim di peepl eena di ayrya wuda waan wi fi noh goh preech da sertn plays, bikaaz dehn mi noa wen ahn wehpaat vailens mi wahn hapm.

Bot dehn mi stil ga sohn taim wen wi mi fays daynja. Wan day, mee ahn Denis Carrigan, hoo da-mi wahn painyaa tu, mi gaahn preech da wahn tong weh deh kloas tu wehpaat wi mi-di stay, ahn no Witnisiz mi liv deh. Wee da-mi di onli too Witnis weh eva gaahn deh bifoa. Wahn laydi eena di tong mi akyooz wi dat wee da British soalja weh mi deh andakova. Maybi da mi bikaaz non a wee mi taak wid wahn Irish aksent. Wi mi geh fraitn wen shee mi akyooz wi. Eevn if yu mi jos frenli tu di soaljaz, peepl rong deh mait shoot yu ahn kil yu er dehn mait shoot yu nee. Wail wi mi-di stan op bai wiself owt eena di koal di wayt fi di bos, wi si wahn kaar stap rait fronta di kaafi shap weh di laydi mi akyooz wi. Den shee kom owt ahn staat tu taak tu di too man weh mi deh eena di kaar ahn shee mi-di point pahn wi az ih mi-di taak. Afta dat di too man jraiv op sloa-wan tuwaadz wi ahn dehn staat tu aks wi kweschanz bowt di bos skejul. Wen di bos reech dehn gaahn taak tu di bos jraiva, ahn wi kudn hyaa notn weh dehn mi-di seh. Dehn neva ga no pasinja eena di bos, soh wi mi kanvins dat dehn mi mek araynjment fi du wi sohnting wen wi kom owta di tong. Bot notn neva hapm. Az Ah kom aafa di bos, Ah mi aks di bos jraiva, “Dehn mi aks yu sohnting bowt wee?” Hihn mi seh: “Unu noh need fi wori bowt notn, unu sayf. Ai tel dehn dat unu da Jehoava Witnisiz, ahn dat unu da noh British soalja.”

Eena 1976 wen Ah mi deh da Dublin fi wahn dischrik asembli, a Ah mi meet Pauline Lomax. Shee da-mi wahn speshal painyaa weh mi-di vizit fahn England. Shee da-mi wahn faytful, hombl, ahn lovin sista. Shee an ih yonga breda, Ray, mi groa op eena di chroot. Wahn yaa afta dat Ah mi marid Pauline, ahn wi mi kantinyu serv az speshal painyaaz eena Ballymena, Northern Ireland.

Wi mi du serkit werk fi wahn wail ahn wi mi serv wi bradaz da Belfast, Londonderry, an ada daynjaros ayryaz. Ih mi inkorij wi fi si di fayt a wi bradaz ahn sistaz weh mi geh rid a dehn schrang rilijos bileef, prejudis, ahn haychrid soh dat dehn kuda serv Jehoava. Jehoava reeli bles dehn ahn protek dehn!

Ah mi liv da Ireland fi ten yaaz. An eena 1981, wi mi geh invaitid fi goh da di 72nd klaas a Gilyad. Afta wi grajuayt, wi mi geh asain fi goh da Sierra Leone, West Africa.

Wi mi liv eena wahn mishineri hows lang wid 11 amayzin peepl. Wi mi ga wan kichin, chree baachroom, too showa, wan foan, wan washin masheen, ahn wan jraiya. Di korant yoostu aalwayz goh, ahn wi neva noa wen ih wuda hapm. Dehn mi ga lata rat eena di seelin, ahn koabra eena di baysment.

Wehpaat wi mi-di liv neva aal dat gud, bot wi mi injai di minischri wahn lat. Di peepl mi rispek di Baibl ahn lisn tu wi. Wahn lata dehn mi stodi di Baibl ahn geh baptaiz. Di peepl eena di ayrya mi kaal mee “Mista Robert,” ahn Pauline “Mis Robert.” Bot afta wahn wail, Ah mi staat werk da di branch aafis moa ahn kudn goh pahn feel servis moch, soh di peepl mi staat kaal Pauline “Mis  Pauline,” ahn dehn mi staat kaal mee “Mista Pauline.” Dat mi sweet Pauline!

Wahn lata di bradaz mi poa, bot Jehoava mi aalwayz tek kayr a dehn eena sohn amayzin way. (Mach. 6:33) Wahn taim dehn mi ga wahn sista weh mi onli ga inof moni fi bai food fi shee an ih pikni dehn fi da day. Bot shee mi en op di giv da moni tu wahn brada weh mi need malayrya medisn. Pahn da saym day, owta no way wahn laydi mi aks di sista fi fiks op ih hyaa, an ih mi pay ahn. Dehn ga wahn lat moa ekspeeryens laik dehndeh.

Wee mi liv da Sierra Leone fi nain yaaz. Afta dat, di branch mi asain wi fi serv da Betel da Nigeria. Dis branch aafis mi reeli big. Ai mi-di du di saym kaina werk weh Ah mi du da Sierra Leone, bot Pauline mi fain it haad bikaaz da-mi wahn big chaynj fi shee. Eena di paas, shee doz spen op tu 130 owaz evri mont eena di minischri, ahn shee mi ga sohn gud Baibl stodiz weh mi-di mek proagres. Bot now dehn mi asain shee fi soa kloaz weh mi need fi fiks, ahn shee mi stay eensaid aal day di du dat. Ih mi tek shee wahn wail fi geh yoostu it, bot den shee riyalaiz dat di bradaz mi reeli tankful fi di werk weh shee mi-di du. Ahn shee mi mek it ih goal fi inkorij ada Betelaits.

Di kolcha da Nigeria mi nyoo tu wee, soh wi mi ga lat fi laan. Wahn taim, wahn brada mi kohn da mi aafis fi inchrojoos wahn nyoo sista weh jos reech da Betel. Az Ai mi-di chrai shayk ih han, shee mi bow dong bai mi fut. Ai mi soh shak! Di fers too skripchaz weh mi kohn tu mi main da Aks 10:25, 26 ahn Revilayshan 19:10. Ah mi aks miself, ‘Ah wanda if Ah shuda tel ahn dat shee noh fi du dat?ʼ Bot saym taim, Ah riyalaiz dat dehn mi aksep ahn fi kohn da Betel. Soh fi shoar shee noa weh di Baibl teech.

Ah mi feel soh shaym fi di res a di kanvasayshan. An afta dat Ah mi du sohn risaach. Ah laan dat di sista mi du dat bikaaz da wahn kostom eena fi dehn kolcha weh stil kaman eena sohn ayrya eena di konchri. Di man dehn wuda bow dong jos laik di laydi dehn, bikaaz dis da-mi wahn way fi shoa rispek. Dehn neva di bow dong fi wership enibadi. Ahn dehn ga lata egzampl a peepl eena di Baibl weh mi du dat tu. (1 Sam. 24:8) Ah mi soh hapi dat Ah neva seh notn weh kuda mi shaym di sista jos bikaaz Ah neva noa moch bowt di kolcha.

 Mee ahn Pauline mi meet wahn lata faytful bradaz ahn sistaz wail wi mi-di serv da Nigeria. Fi egzampl, Isaiah Adagbona da-mi wan a dehn. b Hihn mi laan di chroot wen hihn da-mi wahn yong man. Bot hihn mi kech leprosi, soh dehn sen ahn da wahn plays weh dehn kwaranteen peepl weh ga leprosi. Hihn da-mi di onli Witnis deh. Wail hihn mi-di stay deh, wahn lata peepl mi deh gens ahn, bot hihn mi stil help oava 30 peepl weh ga leprosi fi laan di chroot. Dehn mi eevn faam wahn kangrigayshan een deh.

Eena 1996 wi mi geh asain fi serv da di branch da Kenya. Soh wi mi liv da Betel. Dis da-mi di fers taim Ah gaahn bak da Kenya sins Ai da-mi wahn yong man. Wail wi mi deh da Betel, som a di vizitaz weh wi wuda geh da sohn vervet mongki. Dehn yoostu laik teef froot fahn di sistaz. Wahn day wahn sista da Betel mi lef ih windo oapm. Wen shee mi reech hoam, ih fain wahn hoal groop a mongki eena ih room di eet op ih food. Soh shee skreem ahn ron bak owt chroo di doa. Di mongki dehn mi geh fraitn tu, soh dehn brok weh chroo di windo.

Mee ahn Pauline mi jain wahn Swahili kangrigayshan. Lee wail afta dat, dehn mi aks mi fi kandok di Kangrigayshan Buk Stodi (weh naym Kangrigayshan Baibl Stodi now). Bot Ai neva taak di langwij gud, soh Ah wuda stodi di buk heda taim soh dat Ah ku reed di kweschanz gud. Bot if di bradaz ahn sistaz koment mi lee bit difrent fahn weh deh eena di buk, Ah wudn andastan weh dehn seh. Ih neva eezi ataal, an Ah mi feel sari fi di bradaz ahn sistaz. Bot ih mi amayzin fi si how dehn mi payshent ahn hombl fi alow mi fi kandok di meetin.

Wee mi liv da Kenya fi les dan wahn yaa. Den eena 1997 wi mi geh invaitid tu Betel da Brooklyn, New York. Now wi di liv eena wahn konchri wehpaat peepl ga lata mateeryal tingz. Stilyet, dat bring lata prablemz. (Prov. 30:8, 9) Bot eevn doa wi bradaz ahn sistaz di liv eena wahn konchri laik dat, dehn stay faytful. Dehn noh yooz dehn taim fi mek moa moni er fi geh moa rich. Insted, dehn yooz it fi sopoat Jehoava aaganaizayshan.

Aal chroo wi laif, wi geh fi si how bradaz ahn sistaz stay faytful eevn wail dehn goh chroo lata difrent prablemz. Da Ireland, di bradaz ahn sistaz stay faytful eevn doa wahn lata vailens deh eena di ayrya wehpaat dehn liv. Da Africa, dehn mi faytful eevn wen dehn mi poa ahn deh bai dehnself. Ahn da di United States, dehn mi faytful ahn noh foakos pahn mateeryal tingz. Fi shoar Jehoava hapi wen ih luk dong ahn si ih peepl di shoa humoch dehn lov ahn noh mata weh dehn di goh chroo!

Di yaaz dehn flai bai soh faas dat ih mi feel laik ih gaahn “faasa dan how wahn persn weh weev moov ih needl.” (Job 7:6) Now wi di werk wid bradaz ahn sistaz da Warwick, New York, ahn wi feel soh moch jai fi kantinyu werk wid peepl weh lov eech ada. Wi soh hapi fi du aal weh wi kud fi sopoat wi King, Krais Jeezas, weh wahn soon bles aala ih peepl!—Mach. 25:34.