1. How preshos fi wee laif tu Jehoava?

 SOPOAZ wahn fren gi yu wahn hows. Eevn if di roof mait leek, som a di windo brok, ahn di waal need paynt, yu wuda stil apreeshiayt it ahn tek kayr a it, noh chroo? Saym way soh, Jehoava gi wi wahn preshos gif. Hihn gi wi laif. Ahn hihn shoa humoch hihn cherish wi laif wen hihn mek ih Son ded fi wee.—Jan 3:16.

2. Akaadn tu 2 Korintyanz 7:1, weh kaina laif Jehoava waahn wi liv?

² Wi laif kohn fahn Jehoava. (Ps. 36:9) Di apasl Paal mi bileev dat wen ih seh: “Da sayka hihn wi ku moov an egzis.” (Aks 17:25, 28) Soh wi ku seh dat wi laif da wahn gif fahn Gaad. Hihn gi wi evriting weh wi need fi liv. (Aks 14:15-17) Bot Jehoava noh wahn du wahn mirakl fi kip wi alaiv. Insted, hihn ekspek dat wee wahn du evriting wi kud fi stay helti ahn fi kip aan di serv ahn. (Reed 2 Korintyanz 7:1.) Wai wi need fi protek wi helt ahn laif, ahn how wi ku du dat?

3. Wat da wan reezn wai wi shuda chrai wi bes fi stay helti?

³ Wan reezn wai wi chrai stay helti da bikaaz wi waahn serv Jehoava di bes way wi kud. (Maak 12:30) Wi waahn du wi bes fi aafa op wi ‘badi ahn wi laif az wahn hoali sakrifais weh pleez Gaad,ʼ soh wi chrai noh du  tingz weh wi noa wahn mek wi geh sik. (Roam. 12:1) Af koars, noh mata weh wi du, wi kyaahn seh fi shoar dat wi noh wahn geh sik. Bot wi du evriting weh wi kud fi stay helti bikaaz wi waahn shoa wi Pa, Jehoava, dat wi cherish di laif hihn gi wi.

4. Weh King Dayvid mi waahn du?

⁴ King Dayvid mi tel wi wai hihn apreeshiayt di laif weh Jehoava giv ahn wen ih seh: “Weh gud wahn kohn if Ah ded, an if Ah goh dong da mi grayv? Di dos wahn prayz yu? Ih wahn taak bowt how yu mi faytful?” (Ps. 30:9) Dayvid mi praabli rait dehndeh werdz lee bit bifoa ih mi ded. Bot hihn mi mek op ih main fi liv ahn stay az helti az ih kud soh dat ih kuda kip di serv Jehoava. Fi shoar, aala wi waahn du di saym ting.

5. Weh wi ku du eevn if wi sik er oal?

⁵ If wi sik er oal, wi mait kyaahn du az moch az wi yoostu. Dat ku mek wi feel foschraytid ahn sad. Bot wi shuda stil chrai du wi bes fi tek kayr a wiself. Wai? Bikaaz eevn if wi sik er oal wi ku stil serv Jehoava, jos laik how King Dayvid mi du. Ih komfertin fi noa dat eevn if wi sik er oal, wee preshos tu Jehoava. (Mach. 10:29-31) Soh eevn if wi ded, Jehoava waahn bring wi bak tu laif, an ih luk faawod fi du it. (Job 14:14, 15) Dat gi wi wahn lata reezn fi kip aan di liv ahn tek kayr a wi helt.

6. Weh Jehoava waahn wi du wen ih kohn tu eetin ahn jrinkin?

⁶ Di Baibl da noh wahn buk bowt how fi tek kayr a yu helt ahn bowt weh fi eet. Bot ih doo tel wi how Jehoava feel bowt dehnya tingz. Fi egzampl, ih gi wi sohn gud advais bowt how wi ku protek wi badi fahn tingz weh ku hert wi. (Eccl. 11:10) Di Baibl seh dat if wi eet er jrink tu moch, dat ku mek wi sik er eevn kil wi. (Prov. 23:20) Dat da wai Jehoava waahn wi shoa self-kanchroal wen wi disaid humoch wi wahn eet ahn jrink.—1 Kor. 6:12; 9:25.

7. How Proverbs 2:11 help wi fi mek gud disizhanz bowt wi helt?

⁷ Wi shoa dat wi tankful fi di gif a laif wen wi yooz gud jojment wen wi di mek disizhanz. (Ps. 119:99, 100; reed Proverbs 2:11.) b Fi egzampl, wi waahn bee kyaaful bowt di tingz weh wi eet. Kaman sens tel wi dat if wi laik wahn sertn food bot ih mek wi sik, wi wahn mek shoar dat wi noh eet it. Wi shoa dat wi waiz wen geh inof sleep, eksasaiz regyula, ahn kip wi badi ahn hows kleen.

8. Weh di Baibl tel wi bowt how Jehoava feel bowt wi sayfti?

⁸ Di Laa weh Jehoava mi gi di Izrelaits mi ga advais pahn how fi stay sayf da dehn hows ahn wen dehn deh da werk. (Ex. 21:28, 29; Deut. 22:8) If sohnbadi kil sombadi els bai aksident, dehn mi en op eena wahn seeryos sichuwayshan. (Deut. 19:4, 5) Di Laa seh dat if sohnbadi mi hert wahn pregnant laydi bai aksident ahn hert di baybi, da persn mi wahn stil geh ponish. (Ex. 21:22, 23) Di Baibl mek it klyaa dat Jehoava waahn  mek wi du wi bes fi avoid aksidents az moch az pasabl.

9. Weh wi ku du fi avoid aksidents? (Koment pahn di picha dehn.)

⁹ Wi shoa dat wi tankful fi di gif a laif weh Jehoava gi wi wen wi chrai fi bee sayf da wi hows ahn da werk. If wi ga paizn, eniting weh shaap, er medikayshan weh wi noh yooz nohmoh, wi waahn chroa dehn weh eena wahn sayf way soh dat nobadi geh hert. Wi aalso waahn kip dehnya kaina tingz wehpaat lee pikni kyaahn reech dehn. Chrai bee kyaaful wen yu di lait faiya, bail waata, ahn yooz toolz. Wi noh waahn jos waak weh wen wi di du dehnya tingz. Wi noh waahn jraiv wen wi kyaahn foakos pahn di road bikaaz wi jrink alkohol, wi sleepi, er bikaaz a wahn medikayshan weh wi di tek. Ahn wi noh waahn mek wi foan dischrak wi wail wi di jraiv.

10. Weh wi fi du bifoa ahn joorin wahn dizaasta?

¹⁰ Sohntaim wi kyaahn du notn fi stap wahn daynjaros sichuwayshan fahn  hapm. Dis ku bee wahn nachral dizaasta, wahn dizeez weh spred wehpaat wi liv, er waar. Wen wi fala weh di govament tel wi fi du wen wi di goh chroo dehnya tingz, ih wahn help wi fi stay sayf, fi egzampl, if dehn gi wi kerfyoo, tel wi fi lef di ayrya weh wi liv, er eni ada inschrokshanz. (Roam. 13:1, 5-7) Sohntaim wi ku noa wen wahn dizaasta di kohn, soh wi shuda lisn tu weh di govament tel wi soh dat wi ku bee redi fi dehndeh kaina dizaasta. Maybi wi ku put op sohn waata, food weh noh eezi fi spail, ahn wahn lee fers-ayd kit.

11. Weh wi fi du wen wahn dizeez di spred wehpaat wi liv?

¹¹ If wahn dizeez di spred wehpaat wi liv, weh wi shuda du? Wi need fi obay di govament wen dehn tel wi fi wash wi han, wayr maas, kip soashal distans, an eevn kwaranteen wiself. If wi du dehnya tingz, wi wahn di shoa dat wi tankful fi di gif a laif.

12. How Proverbs 14:15 ku help wi fi disaid wich infamayshan wi shuda lisn tu wen wan dizaasta hapm?

¹² Wen wahn dizaasta hapm, wi hyaa wahn lata yehrisoh di goh rong. Insteda bileev ‘evriting weh peepl tel wiʼ fi du, ih wuda bee gud if wi lisn tu di infamayshan fahn di govament er fahn daktaz weh wi ku chros. (Reed Proverbs 14:15.) c Di Govanin Badi ahn di branch aafis dehn du aal weh dehn kud fi geh di karek infamayshan bifoa dehn gi wi inschrokshanz fi wi meetinz ahn di preechin werk. (Heeb. 13:17) Wen wi fala dehnya dairekshan, wi protek wiself ahn kip adaz sayf tu. Dis ku help mek peepl taak gud bowt Jehoava Witnisiz eena wi naybahud.—1 Peet. 2:12.

13. How wi shoa dat wi cherish di gif a laif wen wi obay Jehoava laa bowt blod?

¹³ Lata peepl noa dat Jehoava Witnisiz bileev dat blod hoali, ahn wi obay Gaad laa fi kip weh fahn blod. Dis meen dat wi noh wahn aksep blod chransfyoozhan eevn eena wahn medikal imerjensi. (Aks 15:28, 29) Bot dat noh meen dat wi waahn ded. Wi tankful fi di gif a laif. Dis da wai wee wuda geh help fahn daktaz weh wuda wilin fi tek kayr a wi widowt yooz blod chransfyoozhan.

14. Weh yoo ku du fi chrai noh en op da haaspital fi geh wahn serjri?

¹⁴ If yu fala di advais er sojeshan weh wi don taak bowt eena dis aatikl, ih ku loawa di chaans dat wi wahn en op eena haaspital fi wahn serjri. If wi du wi bes fi kip helti, dis wahn help wi fi bee schrang joorin wahn serjri ahn geh beta faasa. An if wi kip wi hows ahn wehpaat wi werk sayf an obay di chrafik laa dehn, wi wahn ga les chaans a wahn imerjensi weh wi wuda need serjri.

15. (a) Wai ih impoatant fi kip wi DPA kyaad op-tu-dayt? (Koment pahn di picha) (b) Laik wi si eena di veedyo, how wi ku mek gud disizhanz wen ih kohn tu di yoos a blod?

¹⁵ Wahn nada way wi shoa dat wi valyu wi laif da wen wi tek di taim fi ful owt wahn durable power of attorney (DPA kyaad) an aalwayz gat it wid wi. Dis dakyument wahn help wi put wi disizhanz  bowt blod an ada medikal chreetment eena raitin. Yoo ga wan? If yoo noh ga wan er need fi opdayt di wan weh yu gat, du it az soon az pasabl. Wen yu rait dong yu disizhan pahn da dakyument, ih wahn help yu daktaz noa how fi chreet yu, an ih wahn help dehn noh ways taim di taak bowt weh kaina chreetment dehn fi gi yu. Dis wahn help dehn fi mek shoar dat yu noh geh wahn chreetment er medikayshan weh daynjaros fi yu. d

16. Weh wi ku du if wi noh shoar how fi ful owt wahn DPA kyaad?

¹⁶ Noh mata if yu yong er helti, yu ku stil get eena wahn aksident er geh sik. (Eccl. 9:11) Soh di waiz ting fi du da fi ful owt wahn DPA kyaad. If yu noh noa how fi ful owt wan, aks di eldaz eena yu kangrigayshan fi help yu, bikaaz dehn noa how fi ful it owt. Bot dehn noh wahn tel yu weh kaina disizhan yu fi mek. Onli yoo fi disaid weh yu wahn du. (Gal. 6:4, 5) Bot dehn ku help yu andastan di difrent opshan yu ku chooz ahn help yu fi eksplayn  yu disizhanz eena wahn klyaa way.

17. How wi ku shoa dat wi reeznabl eena wi disizhanz bowt helt?

¹⁷ Wahn lata wi disizhan bowt helt ahn medikal chreetment bays pahn weh wi laan fahn di Baibl. (Aks 24:16; 1 Tim. 3:9) Wen wi di mek wahn disizhan an di taak bowt dehnya tingz wid adaz, wi waahn memba weh Filipiyanz 4:5 seh: “Evribadi fi si dat unu noh aalwayz waahn unu oan way.” Dis meen dat wi noh wahn aalwayz di wori tu moch bowt wi helt ahn wi noh wahn foas wi opinyan pahn ada peepl. Wi waahn shoa lov ahn rispek fi wi bradaz eevn wen fi dehn disizhan difrent fahn fi wee wan.—Roam. 14:10-12.

18. How wee ku shoa dat wi tankful fi di gif a laif?

¹⁸ Wen wi tek kayr a wi helt ahn du wi bes fi serv Jehoava, di wan weh gi wi laif, wi shoa dat wi tankful tu ahn. (Rev. 4:11) Rait now wahn lata wi sik ahn di goh chroo sohn haad taimz, bot dis da noh weh wi Kriyayta waahn fi wi. Soon hihn wahn mek wi liv fareva ahn wi noh wahn ga no payn er haftu wori bowt det. (Rev. 21:4) Fi now, wi ku bee hapi dat wi di liv ahn serv wi lovin Pa, Jehoava!