1. Weh Jeezas mi tel ih disaiplz bowt wen di en mi wahn kohn, ahn weh waanin hihn mi gi dehn?

 WAHN fyoo dayz bifoa Jeezas ded, foa a ih disaiplz mi aks ahn: “Wat wahn bee di sain a di en a di sistem a tingz?” (Mach. 24:3) Dehndeh disaipl mosi mi-di wanda how dehn mi wahn noa wen Jeroosalem an ih templ mi wahn geh dischrai. Di ansa weh Jeezas mi gi dehn da neva onli bowt Jeroosalem an ih templ, bot da mi aalso bowt di “en a di sistem a tingz” weh wi di liv eena rait now. Dis da weh Jeezas mi tel dehn bowt di en: “Nobadi noh noa di day ner di owa wen dehnya tingz wahn hapm. Di aynjel dehn da hevn noh noa, ahn di Son a Gaad noh noa needa, bot onli di Faada noa.” Den ih waan ih disaiplz fi “noh jrap asleep” ahn fi “kip pahn di lukowt.”—Maak 13:32-37.

2. Wai di Kristyan dehn eena di fers senchri mi haftu kip pahn di lukowt?

² Di Jooish Kristyanz eena di fers senchri mi haftu kip pahn di lukowt if dehn mi waahn sayv dehn laif. Jeezas mi don tel dehn weh fi lukowt fa if dehn mi waahn noa wen Jeroosalem an ih templ mi wahn geh dischrai. Hihn mi seh: “Wen unu si soaljaz di kyamp rong Jeroosalem, den noa dat shee wahn soon geh dischrai.” Az soon az dat hapm, dehn mi haftu obay Jeezas waanin ahn “staat ron tu di mongtin dehn.” (Look 21:20, 21) Dehn wan  weh mi lisn tu Jeezas waanin mi sayv dehn laif wen di Roaman soaljaz mi gaahn dischrai Jeroosalem.

3. Weh wi wahn diskos eena dis aatikl?

³ Rait now wi di liv joorin di en a dis wikid werl, soh wi need fi deh pahn wi gyaad ahn kip pahn di lukowt. Eena dis aatikl, wi wahn laan how wi ku yooz gud sens az wi di kip pahn di lukowt, how wi ku egzamin wiself, ahn how wi fi yooz di taim weh wi ga lef eena di bes way pasabl.

4. Wai wi shuda pay atenshan tu di tingz weh di hapm eena di werl tudeh?

⁴ Dehn ga lata gud reezn wai wi shuda waahn noa how di tingz weh di hapm eena di werl di mek Baibl prafesi kohn chroo. Jeezas mi menshan wahn lis a tingz weh wahn help wi fi noa dat di en a Saytan sistem deh kloas. (Mach. 24:3-14) Di apasl Peeta inkorij wi fi pay atenshan tu Baibl prafesi weh di kohn chroo soh dat wi fayt ku geh schranga. (2 Peet. 1:19-21) Di laas buk a di Baibl staat aaf di seh: “Dis da wahn revilayshan weh Gaad mi giv Jeezas Krais fi giv tu Jan. Jeezas mi geh dis revilayshan fi mek ih ku shoa ih slayv dehn di tingz weh wahn soon hapm.” (Rev. 1:1) Soh ih gud fi pay atenshan tu di tingz weh di hapm eena di werl bikaaz dat wahn help wi fi noa wen Baibl prafesi di kohn chroo. Ahn wi mait waahn taak bowt it wid wi bradaz ahn sistaz.

5. Weh wi shuda bee kyaaful wid wen wi di taak bowt Baibl prafesi, ahn weh wi shuda du? (Koment pahn di picha dehn.)

⁵ Wen wi di taak bowt Baibl prafesi wid adaz, wi noh fi chrai gi wi oan opinyan pahn weh di prafesi meen. Wai? Bikaaz wi noh waahn di seh notn weh ku divaid di kangrigayshan. Fi egzampl, wi mait hyaa di werl leedaz di taak bowt how dehn ku fiks wahn prablem weh ku mek evriting fain ahn peesful. Soh insteda staat tu gi wi oan opinyan bowt how dat ku mek di prafesi da 1 Tesaloanyanz 5:3 kohn chroo, wi need fi kip op-tu-dayt wid di laytes infamayshan fahn Jehoava aaganaizayshan. Wen wi bays weh wi seh pahn di poblikayshanz weh kohn fahn di aaganaizayshan, ih help di kangrigayshan fi ga pees ahn fi ga “di saym way a tinkin.”—1 Kor. 1:10; 4:6.

6. Weh wi laan fahn 2 Peeta 3:11-13?

⁶ Reed 2 Peeta 3:11-13. Di apasl Peeta help wi fi andastan di reezn wai wi shuda pay atenshan tu Baibl prafesi. Hihn waan wi fi “noh ferget dat di day a Jehoava di kom an ih deh kloas.” Wai? Wel, wi noh di chrai fain owt di “day ner di owa” wen Armagedon wahn kohn, bot wi waahn yooz di taim weh wi ga lef fi ‘kip wi kandok hoali ahn shoa dat wi faytful tu Gaad.ʼ (Mach. 24:36; Look 12:40) Dis meenz dat wi need fi liv di rait way ahn mek shoar dat evriting weh wi du fi Jehoava proov humoch wi lov ahn. Fi mek shoar wi aalwayz du dat, wi need fi kip aan di chek how wi di du.

7. How wi ku shoa dat wi kyaaful? (Look 21:34)

⁷ Jeezas neva onli tel ih disaiplz fi pay atenshan tu di tingz weh di hapm eena di werl, bot hihn mi aalso tel dehn fi bee kyaaful. Wi ku reed Jeezas  waanin eena Look 21:34. (Reed.) Hihn mi seh: “Unu mos bee kyaaful.” Wahn persn weh kyaaful noh wahn ron intu daynja. Insted, ih wahn luk fi wayz how ih ku stay faar fahn eniting weh ku damij ih frenship wid Jehoava. Da way deh, ih wahn aalwayz bee di kaina persn weh Gaad lov.—Prov. 22:3; Jood 20, 21.

8. Weh waanin di apasl Paal mi gi Kristyanz?

⁸ Di apasl Paal mi waan Kristyanz fi egzamin dehnself. Fi egzampl, hihn mi tel di Kristyanz da Efisos: “Unu mos kip aan di chek unuself gud fi mek shoar dat unu di liv laik how waiz peepl liv, ahn noh laik how foolish peepl liv.” (Ifee. 5:15, 16) Saytan aalwayz di chrai dischrai wi frenship wid Jehoava. Soh di Baibl waan wi fi “kip aan di chrai fi andastan wat da Jehoava wil” soh dat wi ku protek wiself fahn aala Saytan atak dehn.—Ifee. 5:17.

9. How wi ku andastan Jehoava wil?

⁹ Di Baibl noh tel wi evri singl ting weh ku damij wi frenship wid Jehoava. Soh sohntaim wi haftu mek disizhanz bowt tingz weh di Baibl noh spesifik bowt. If wi waahn mek waiz disizhanz, wi need fi andastan wat da “Jehoava wil.” Wi ku du dis wen wi reed di Baibl evri day ahn meditayt pahn weh wi reed. Di moa wi andastan Jehoava wil ahn chrai ga “di main a Krais,” di moa wi wahn liv “laik how waiz peepl liv,” eevn wen wi noh ga spesifik roolz weh tel wi weh fi du. (1 Kor. 2:14-16) Sohntaim ih mait bee eezi fi noatis tingz weh wi need fi avoid, bot ada taimz ih noh soh eezi.

10. Wat da sohn tingz weh wi noh fi du?

¹⁰ Sohn tingz weh wi noh fi du da flert, jrink tu moch, oava eet, er seh tingz weh hert adaz. Wi aalso noh waahn wach poarnografi, eniting weh vailent, er ada tingz weh simila. (Ps. 101:3) Wi enimi, di Devl, aalwayz di luk fi wayz fi damij wi rilayshanship wid Jehoava. (1 Peet. 5:8) If wi noh kyaaful, wi ku staat hoal malis, bee prowd, jelos, greedi, er stap bee aanis. (Gal. 5:19-21) At fers, dehndeh feelinz mait noh soh schrang. Bot if wi noh chrai get rid a dehn rait away, dehn ku tek root eena wi haat laik wahn daynjaros ahn paiznos plaant.—Jay. 1:14, 15.

11. Gi wahn egzampl a wahn daynja weh noh soh eezi fi noatis, ahn wai wi need fi avoid it?

¹¹ Wahn daynja weh ku bee haad fi noatis da bad kompni. Tink bowt dis sichuwayshan. Imajin dat yu di werk wid sohnbadi weh da noh wan a Jehoava Witnisiz. Bikaaz yu waahn yu werkmayt taak gud tingz bowt Jehoava Witnisiz, yu wuda chreet ahn gud ahn help ahn eena eni kaina way. Sohntaim yu wuda eevn eet wid ahn. Ahn bifoa yu noatis, yu wuda di eet wid ahn moa aafn. Now an agen di persn mait taak bowt tingz weh imoaral, an at fers yu mait noh laik it. Bot az unu spen moa taim tugeda, yu geh yoostu da taip a kanvasayshan dat ih noh bada yu nohmoh. Fi shoar, wi waahn bee kain ahn shoa rispek tu evribadi. Bot wi haftu memba dat wi ku staat tu ak laik di peepl weh wi spen lata taim wid. (1 Kor. 15:33) If wi obay Jeezas waanin fi bee kyaaful, wi noh wahn spen taim wid bad kompni. (2 Kor. 6:15) Insteda dat, wi waahn stay faar fahn  eniting weh ku damij wi rilayshanship wid Jehoava.

12. Weh Jeezas mi tel ih disaiplz fi du wail dehn mi-di wayt fi mek di en kom?

¹² Jeezas mi gi ih disaipl dehn lata werk fi du bikaaz hihn mi waahn dehn stay bizi wail dehn mi-di wayt fi mek di en kom. Jeezas koman dehn fi preech di gud nyooz “da Jeroosalem, eena aala Judeeya ahn Samayrya, an aal oava di ert.” (Aks 1:6-8) Dat da-mi wahn lata werk. Dehn mi yooz dehn taim eena di bes way pasabl wen dehn mi preech tu az moch peepl az dehn kud.

13. Wai wi need fi yooz wi taim eena di bes way pasabl? (Koloashanz 4:5)

¹³ Reed Koloashanz 4:5. If wi kyaaful, wi wahn tink gud bowt how wi yooz wi taim. Laik weh Ecclesiastes 9:11 seh: ‘Tingz weh wi noh ekspekʼ ku afek wi. Ahn wi ku ded enitaim.

14-15. How yu ku yooz yu taim fi du di tingz weh moa impoatant? (Heebrooz 6:11, 12) (Koment pahn di picha.)

¹⁴ Di bes way fi yooz wi taim da fi du Jehoava wil ahn fi mek wi rilayshanship wid ahn geh schranga. (Jan 14:21) Wi  need fi ‘stan op schrang, noh mek notn moov wi, an aalwayz ga plenti fi du eena di werk weh di Laad gi wi fi du.ʼ (1 Kor. 15:58) Soh if wee ded er if di en kom, wi noh wahn luk bak ahn wish dat wi mi du moa fi Jehoava.—Mach. 24:13; Roam. 14:8.

¹⁵ Tudeh, Jeezas stil di teech ahn gaid ih disaiplz fi preech di gud nyooz bowt Gaad Kingdom aal oava di ert. Jeezas di kip ih pramis. Chroo Jehoava aaganaizayshan, hihn di chrayn wi fi preech di gud nyooz bowt Gaad Kingdom an ih gi wi aala di toolz weh wi need. (Mach. 28:18-20) Ahn wi du wi paat wen wi werk haad fi preech ahn teech. Wi aalso du weh Jeezas tel wi fi du wen wi kip pahn di lukowt wail wi wayt fi mek Jehoava bring wahn en tu dis sistem. Wen wi obay di advais da Heebrooz 6:11, 12, ih wahn mek wi hoal aan tait tu wi hoap “rait dong tu di en.”—Reed.

16. Weh yoo mek op yu main fi du?

¹⁶ Jehoava don set wahn day ahn taim wen hihn wahn bring wahn en tu dis wikid werl. Wee ku bee shoar dat Jehoava wahn mek aala di prafesi weh deh eena di Baibl kohn chroo. Sohntaim, doh, wi mait feel laik di en di tek tu lang fi kohn. Bot Jehoava day “noh wahn bee layt.” (Hab. 2:3) Soh mek wi mek op wi main fi “bee payshent ahn wayt fi di Gaad a [wi] salvayshan.”—Mic. 7:7.