YOMARA an ih breda dehn—Marcelo ahn Hiver—liv eena wahn smaal vilij da Guatemala. Yomara mi staat tu stodi di Baibl wid wan a Jehoava Witnisiz, ahn laytaraan ih too breda dehn mi staat tu stodi di Baibl tu. Bot dehn mi ga wahn prablem. Di chree a dehn mi blain ahn kyaahn reed brayl, soh dehn Baibl teecha wuda reed di infamayshan ahn di skripchaz fi dehn.

Ih mi haad fi mek dehn goh da meetin pan deh oan, bikaaz di kloasis Kingdom Haal mi deh 40 minits fahn weh deh liv. Soh di bradaz ahn sistaz fahn di kangrigayshan mi help dehn fi goh da di meetinz. Ahn wen dehn mi staat geh asainment fi gi taak fi di midweek meetin, di bradaz ahn sistaz mi help dehn memoraiz dehn taak bai haat.

Eena May 2019, dehn mi staat tu ga kangrigayshan meetinz eena di vilij weh Yomara an ih breda dehn mi liv. Bai da taim, wahn painyaa kopl mi moov da di vilij. Dis kopl neva noa how fi reed er rait eena brayl, soh dehn gaahn da wahn laibri ahn laan how fi reed ahn rait brayl soh dat dehn ku teech it. Dehn mi mek it dehn goal fi teech Yomara an ih breda dehn fi reed ahn rait eena brayl.

Kopl monts afta dat, Yomara an ih breda dehn mi laan fi reed ahn rait brayl gud. Dis mi help dehn fi ga wahn kloasa rilayshanship wid Jehoava. a Tudeh, Yomara, Marcelo, ahn Hiver di serv az painyaaz. Marcelo da wahn ministeeryal servant. Evri week dehn stay bizi eena Jehoava servis. Di hapinis weh dehn ga di serv Jehoava moov adaz fi waahn serv Jehoava wid da saym hapinis.

Di chree a dehn tankful fi di lov weh dehn feel fahn di bradaz ahn sistaz eena di kangrigayshan. Yomara seh: “Fahn di fers taim wi meet Jehoava Witnisiz, dehn mi shoa wi chroo chroo lov.” Marcelo seh: “Wi ga sohn amayzin frenz eena di kangrigayshan ahn wi ga wahn big spirichwal famili aal oava di werl weh yoonaitid bikaaz dehn lov eech ada.” Yomara an ih breda dehn kyaahn wayt fi si di day wen Jehoava mek di ert eena wahn paradais.—Ps. 37:10, 11; Isa. 35:5.