1. How wee noa dat di Skripchaz mi impoatant tu Jeezas?

 IMAJIN di lisn tu di way Jeezas mi teech. Hihn mi aalwayz yooz di Skripchaz an ih mi noa dehn bai haat. Di fers werdz weh Jeezas mi seh afta ih geh baptaiz ahn di laas werdz weh ih mi seh bifoa ih ded da werdz fahn di Skripchaz. b (Deut. 8:3; Ps. 31:5; Look 4:4; 23:46) Joorin di chree an a haaf yaaz afta Jeezas geh baptaiz, hihn yoostu yooz eni apachooniti fi reed di Skripchaz, koat fahn dehn, an eksplayn dehn tu peepl.—Mach. 5:17, 18, 21, 22, 27, 28; Look 4:16-20.

2. Weh mi help Jeezas fi noa di Skripchaz gud fahn ih yong? (Koment pahn di picha pahn di kova.)

² Lang bifoa Jeezas mi staat ih minischri, ih yoostu reed ahn hyaa Gaad Werd wahn lat. Wi ku bee shoar dat hihn mi hyaa Mayri ahn Joazef di taak bowt di Skripchaz eena dehn evriday kanvasayshan. c (Deut. 6:6, 7) Wi aalso noa dat evri Sabat ih yoostu goh wid ih famili da di sinagag. (Look 4:16) Wail ih mi dehdeh, fi shoar ih mi pay atenshan wen dehn mi reed di Skripchaz. Afta wahn wail, ih mi laan fi reed di Hoali Raitin pahn ih oan. Sayka dis, Jeezas mi geh fi noa di Skripchaz gud ahn fi lov dehn, ahn dat mi help ahn fi obay dehn. Yu praabli memba weh mi hapm da di templ wen Jeezas mi 12 yaaz oal. Di rilijos  teechaz weh mi noa di Laa a Moaziz gud mi “impres wid humoch tingz [Jeezas] mi andastan ahn wid di way ih mi-di ansa dehn.”—Look 2:46, 47, 52.

3. Weh wi wahn diskos eena dis aatikl?

³ Yoo tu ku geh fi noa ahn lov Gaad Werd wen yu reed it evri day. Bot how yoo ku geh di moas owta yu Baibl reedin? Wi ku laan wahn lat fahn weh Jeezas mi tel di skraib, di Farisee, ahn di Sadyusee dehn weh mi noa di Laa gud. Dehnya rilijos leedaz mi reed di Skripchaz wahn lat, bot dehn neva laan notn fahn weh dehn mi reed. Jeezas mi menshan chree reezn wai dehnya peepl neva di geh di sens owta weh dehn reed fahn di Skripchaz. Weh hihn mi tel dehn ku help wi fi du beta eena wi Baibl reedin. Ih wahn help wi (1) fi andastan weh wi reed, (2) fi fain spirichwal chrezhaz, ahn (3) fi mek Gaad Werd chaynj wi.

4. Weh lesn wi ku laan fahn Look 10:25-29?

⁴ Wi waahn geh di sens owta weh wi reed eena Gaad Werd, bikaaz if wi noh andastan it, wi noh wahn benifit fahn weh wi reed. Fi egzampl, noatis di kanvasayshan weh Jeezas mi ga wid “wahn teecha a di Laa.” (Reed Look 10:25-29.) Wen di man aks ahn weh ih need fi du fi geh evalastin laif, Jeezas mi help ahn fi fain di ansa eena di Baibl. Hihn mi aks ahn: “Weh yoo andastan fahn weh yu reed fahn di Laa?” Di man mi gi di rait ansa wen ih mi seh lov Gaad ahn lov yu naybaz. (Lev. 19:18; Deut. 6:5) Bot den hihn mi aks Jeezas, “Hoo reeli da mai nayba?” Dis kweschan mi shoa dat hihn neva andastan weh ih mi-di reed. Ahn bikaaz a dat, ih neva noa how fi yooz dehndeh skripchaz eena ih laif.

5. Wen yu pray ahn tek yu taim fi reed, how dat ku help yu andastan weh yu di reed beta?

⁵ If wi mek it wi goal fi reed evri day, dat wahn help wi andastan Gaad Werd eevn moa. Dehnya da sohn tingz weh ku help yu. Pray bifoa yu staat reed. Wi need Jehoava help fi andastan di Skripchaz, soh wee ku aks ahn fi gi wi ih hoali spirit fi help wi foakos. Den tek yu taim wen yu di reed. Dat wahn help yu fi andastan weh yu di reed beta. Wahn nada ting weh yu ku du da reed owt lowd er lisn tu wahn rikaadn a di Baibl ahn fala lang. Wen yu du dis yu wahn andastan, memba, ahn laan moa fahn weh yu di reed eena Gaad Werd. (Josh. 1:8) Afta yu finish reed, pray agen ahn tank Jehoava fi ih Werd di Baibl, an aks ahn fi help yu aplai weh yu reed.

6. Wen yu aks yuself kweschanz ahn rait dong shaat noats, how dat ku help yu wen yu di reed? (Koment pahn di picha.)

⁶ Mek wi luk pahn too moa tingz weh wahn help yu andastan di Baibl beta. Aks yuself kweschanz bowt weh yu reed. Wen yu reed sohnting eena di Baibl, luk fi di ansa tu kweschanz laik dehnya: ‘Hoo da di mayn karakta? Hoo di taak? Hoo dehn di taak tu, ahn wai? Wehpaat ahn wen dis mi hapm?ʼ Rait dong shaat noats bowt weh yu reed. Wen yu rait noats, yu wahn tink bowt weh yu reed eevn moa, an dat help yu fi andastan it beta ahn memba it tu. Yu ku rait dong kweschanz, tingz weh  yu mi fain eena yu risaach, mayn points, er yu ku jos rait dong how yu mi feel wen yu mi-di reed. Wen yu du dat, yu wahn feel laik Gaad mi rait dong da mesij jos fi yoo.

7. Bays pahn Machyu 24:15, weh kwaliti wi need fi ga wen wi di reed wi Baibl, ahn wai?

⁷ Jeezas mi seh dat wi need andastandin fi reed di Baibl. (Reed Machyu 24:15.) Andastandin wahn help wi fi kanek wahn aidyaa wid ada aidyaaz fi mek sohnting klyaa. Ih ku aalso help wi fi si how aidyaaz ku bee difrent fahn eech ada. Dat wahn help wi fi andastan moa dan jos weh di werdz di seh. Jeezas mi aalso shoa wi dat wi need andastandin fi si how Baibl prafesi di kohn chroo. Soh ih impoatant fi mek wi ga dis kwaliti if wi waahn geh di moas owta wi Baibl reedin.

8. Weh yu ku du fi andastan weh yu reed?

⁸ Jehoava help ih servants fi andastan weh dehn reed. Soh pray tu Jehoava an aks ahn fi help yu ga andastandin. (Prov. 2:6) Weh yu ku du fi werk lang wid yu pryaa? Tek taim fi stodi weh yu reed ahn laan how fi kanek it wid tingz weh yu noa aredi. Yu ku yooz di Risaach Gaid fi Jehoava Witnisiz ahn sohn ada poblikayshan fi help yu andastan weh yu reed. Dehn wahn aalso help yu fi fain wayz how yu ku yooz di tingz weh yu laan eena yu laif. (Heeb. 5:14) Wen yu reeli tek taim fi stodi ahn tink bowt weh yu reed, yu wahn andastan di Skripchaz beta.

9. Weh impoatant teechin fahn di Skripchaz di Sadyusee dehn neva pay main tu?

⁹ Di Sadyusee dehn mi noa di fers faiv buk a di Heebroo Skripchaz gud. Bot dehn neva pay main tu sohn impoatant teechin weh dehndeh buk mi gat een.  Mek wi luk pahn how Jeezas mi ansa di Sadyusee dehn wen dehn mi kweschan ahn bowt di rezorekshan. Hihn aks dehn: “Unu neva reed eena di buk a Moaziz, weh Gaad mi tel ahn da di prikl bush? Gaad mi-di taak bowt di rezorekshan wen ih tel Moaziz: ‘Ai da di Gaad a Aybraham ahn di Gaad a Aizak ahn di Gaad a Jaykop.ʼ” (Maak 12:18, 26) Fi shoar, dehn mi reed dehndeh skripchaz wahn lata taim bifoa, bot Jeezas kweschan shoa dat dehn mi ignoar wahn impoatant Baibl teechin, weh da bowt di rezorekshan.—Maak 12:27; Look 20:38. d

10. Weh wi shuda pay atenshan tu wen wi reed di Baibl?

¹⁰ Weh lesn wi laan? Wen wi reed di Baibl, wi waahn pay atenshan tu evri lee ting weh wi ku laan fahn di Baibl pasij. Wi noh onli waahn andastan di eezi tingz, bot wi aalso waahn geh fi andastan deep Baibl teechinz ahn prinsiplz.

11. Akaadn tu 2 Timoti 3:16, 17, how yu ku fain chrezhaz eena di Baibl?

¹¹ How yu ku fain spirichwal chrezhaz wen yu reed di Baibl? Tink bowt weh 2 Timoti 3:16, 17 seh. (Reed.) Noatis dat “evriting weh deh eena di Skripchaz . . . gud” fi (1) teech wi, (2) karek wi, (3) set tingz schrayt, ahn (4) disiplin wi. Eevn Baibl buks weh yu noh reed aal di taim ku help yu eena dehnya foa wayz. Wen yu di reed, meditayt pahn weh ih teech yu bowt Jehoava, ih perpos fi wee, er how fi hihn prinsiplz ku help yu. Tink bowt how ih ku karek yu. Fi du dis, luk pahn how di vers dehn ku help yu fain tingz weh yu need fi werk pan ahn how ih ku help yu geh rid a eni bad habit er atichood. Chrai si how ih ku help yu stay faytful tu Jehoava. Tink bowt how di skripchaz ku help wi set tingz schrayt er karek wahn rang tinkin weh sohnbadi bring op eena di minischri. Luk fi wayz how di vers dehn ku disiplin ahn chrayn yu fi tink laik Jehoava. Wen yu tink bowt dehnya foa tingz wail yu reed di Baibl, yu wahn fain spirichwal chrezhaz weh ku help yu injai yu Baibl reedin eevn moa.

12. Wai Jeezas mi aks di Farisee dehn “Unu neva reed?”

¹² Jeezas mi aks di Farisee dehn di kweschan “Unu neva reed?” fi shoa dat dehn neva ga di rait atichood bowt weh dehn reed eena di Skripchaz. (Mach. 12:1-7) e Di Farisee dehn mi seh dat Jeezas  disaiplz mi brok di Sabat laa. Soh Jeezas gi dehn too egzampl fahn di Skripchaz an ih koat wahn vers fahn di buk a Hosea fi shoa dehn dat dehn neva andastan di point a di Sabat laa ahn dat dehn neva mi-di shoa no mersi fi di peepl. Wai di Farisee dehn neva mek weh dehn reed fahn Gaad Werd chaynj dehn atichood? Bikaaz wen dehn doz reed di Skripchaz, dehn mi ga wahn prowd atichood ahn dehn mi laik kritisaiz weh deh een deh. Fi dehn atichood neva alow dehn fi andastan weh dehn mi-di reed.—Mach. 23:23; Jan 5:39, 40.

13. Weh kaina atichood wi need fi ga wen wi di reed di Baibl, ahn wai?

¹³ Weh Jeezas seh teech wi dat wi need fi ga di karek atichood wen wi di reed di Baibl. Wi noh waahn bee laik di Farisee dehn. Wi haftu “bee hombl an aksep di werd a Gaad . . . weh Gaad plaant eena [wi].” (Jay. 1:21) If wi hombl wi wahn mek Jehoava Werd sink deep dong eena wi haat ahn chaynj wi. Weh di Skripchaz seh bowt mersi, kompashan, ahn lov wahn ku chaynj wi fi di beta if wi noh ga wahn prowd atichood ahn noh laik kritisaiz weh deh een deh.

14. How wi ku noa dat wi di mek Gaad Werd chaynj wi? (Koment pahn di picha dehn.)

¹⁴ Di way wi chreet peepl wahn shoa if wi di alow Gaad Werd fi chaynj wi. Bikaaz di Farisee dehn neva mek Gaad Werd chaynj dehn atichood, dehn mi “kandem di inosent wan dehn.” (Mach. 12:7) Saym way soh, di way wi chreet peepl shoa if wi don mek di Baibl chaynj fi wee atichood. Fi egzampl, wi hori fi si di gud eena adaz, er wi kwik fi joj dehn? Wi shoa mersi ahn redi fi fergiv, er wi laik hoal malis? Wen wi aks wiself dehnya kweschan, wi wahn si if wi reeli di  alow Gaad Werd fi chaynj di way wi tink, feel, an ak.—1 Tim. 4:12, 15; Heeb. 4:12.

15. How wi noa dat Jeezas mi lov di Hoali Skripchaz?

¹⁵ Jeezas mi lov di Hoali Skripchaz. Ahn wi si how Jeezas mi feel bowt Gaad Werd eena Psalm 40:8 weh seh: “Ah feel hapi fi du weh yoo waahn, Oa mi Gaad, yu laa deh deep dong eena mi.” Bikaaz a dat, hihn mi hapi di serv Jehoava. Wi ku ga da saym hapinis ahn kip aan di serv Jehoava if wi reed Gaad Werd ahn laan fi lov it.—Ps. 1:1-3.

16. Weh yu wahn du fi geh di moas owta yu Baibl reedin? (Si di baks “ Jeezas Werdz Ku Help Yu Andastan Weh Yu Reed.”)

¹⁶ Weh Jeezas mi seh an ih egzampl ku help wi geh moa owta wi Baibl reedin. Wi ku andastan wahn Baibl pasij beta if wi pray bifoa wi reed, tek wi taim di reed, aks kweschanz wen wi reed, ahn tek noats. Wi ku yooz wi poblikayshan dehn weh bays pahn di Baibl fi saach fi spirichwal chrezhaz, ahn dat wahn help wi fi andastan weh wi reed fahn di Skripchaz. Dis wahn aalso help wi fi laan fi yooz di Baibl beta ahn fi geh fameelya wid skripchaz weh wi noh reed wahn lat. Wi ku mek Gaad Werd chaynj wi if wi ga di karek atichood wen wi reed it. Wen wi du dehnya tingz, wi wahn geh di moas owta wi Baibl reedin ahn jraa kloasa tu Jehoava.—Ps. 119:17, 18; Jay. 4:8.