1. Wai yoo tankful fi di Baibl?

 WEE soh tankful dat Jehoava gi wi di Baibl! Eena di Baibl, hihn gi wi sohn gud advais weh ku help wi fi noa weh fi du wen wi di goh chroo prablemz. An ih mek wi noa bowt di wandaful hoap fi di fyoocha. Weh moa impoatant da fi geh fi noa weh kaina persn Jehoava chroo di Baibl. Wen wi tink bowt fi hihn wandaful kwalitiz, dat moov wi fi geh kloas tu hihn ahn bee ih fren.—Ps. 25:14.

2. How Jehoava mek peepl geh fi noa ahn?

² Jehoava waahn mek peepl geh fi noa ahn. Eena di paas, hihn mi du dis wen ih sen aynjelz fi giv mesij tu som peepl, ahn wen ih gi jreemz ahn vizhanz tu adaz. (Num. 12:6; Aks 10:3, 4) Wi neva mi wahn geh fi noa bowt dehnya vizhanz, jreemz, er mesij if dehn neva geh rait dong. Soh Jehoava mi mek sohn man rait dehn dong “eena wahn buk.” (Jer. 30:2) Wi ku bee shoar dat dis da di bes way fi mek Jehoava taak tu wi ahn help wi bikaaz “evriting weh di chroo Gaad du perfek.”—Ps. 18:30.

3. Weh Jehoava du fi mek wi ku ga kapiz a di Baibl avaylabl eena fi wee taim? (Isaiah 40:8)

³ Reed Isaiah 40:8. b Fahn way bak, Jehoava di giv ih faytful servants sohn gud advais. Bot how dat pasabl? Dis da wahn gud kweschan bikaaz Gaad Werd mi geh rait dong  towznz a yaaz pahn mateeryal weh eezi fi geh ratn. Bikaaz a dat, non a di orijinal kapi avaylabl tudeh day. Bot Jehoava mi mek shoar dat sohn peepl mi mek sohn kapi a it. Eevn doa di peepl weh mi rait dong di kapiz neva perfek, dehn mi kyaaful a weh dehn mi rait dong. Dis da weh sohnbadi weh stodi Baibl hischri seh bowt di Heebroo Skripchaz: “Dehn noh ga no ada oal buk weh geh kapi eena wahn way weh soh karek.” Soh eevn doa dehn mi rait dong di Baibl lang taim pahn sohn mateeryal weh eezi fi ratn, ahn di peepl weh kapi dehn neva perfek, wi ku bee shoar dat di Baibl bring owt di mesij weh Jehoava waahn mek wi noa.

4. Weh wi wahn diskos eena dis aatikl?

⁴ “Evri gud ahn perfek gif” kohn fahn Jehoava. (Jay. 1:17) Di Baibl da wan a di bes gif weh wi geh fahn Jehoava. Wen sohnbadi gi wi wahn gif, ih shoa wi how gud ih noa wi an ih shoa wi dat di persn noa weh wi need. Wi ku seh di saym bowt Jehoava. Wen wi stodi di Baibl, wi laan wahn lat bowt Jehoava, ahn wi geh fi si how gud ih noa wee ahn weh wi need. Eena dis aatikl, wi wahn geh fi si how di Baibl teech wi bowt Jehoava wizdom, jostis, ahn lov. Mek wi staat aaf di taak bowt how di Baibl shoa dat Jehoava waiz.

5. Wat da wan way how di Baibl proov dat Jehoava waiz?

⁵ Jehoava noa dat wi need ih gud advais. Di gud advais weh deh eena di Baibl ku help wahn lata peepl chaynj dehn laif. Wen Moaziz mi rait di fers fyoo buks a di Baibl, hihn mi tel di Izrelaits: “Dehnya da noh jos werdz, dehnya werdz ku sayv unu laif.” (Deut. 32:47) Soh enibadi weh mi obay weh di Skripchaz seh kuda mi injai wahn gud ahn hapi laif. (Ps. 1:2, 3) Eevn doa wahn lata yaaz don paas, Gaad Werd stil ga di powa fi chaynj peepl laif tudeh. Fi egzampl, pahn jw.org dehn ga wahn seeriz weh naym “Di Baibl Chaynj Peepl Laif.” Rait deh yu wahn fain lata reel-laif ekspeeryens a peepl weh mi staat tu liv wahn beta laif bikaaz dehn obay di Baibl advais.—1 Tes. 2:13.

6. Wai wi ku seh dat di Baibl da noh laik no ada buk?

⁶ Wai wi ku seh dat di Baibl da noh laik no ada buk? Wi ku seh dat bikaaz Jehoava Gaad, di Almaiti weh liv fareva, da di wan weh reeli rait di Baibl, ahn nobadi els waiz laik hihn. Bot peepl weh rait ada buk en op di ded, an afta sohn yaaz di advais weh dehn rait eena dehn buk noh gud. Bot di waiz advais weh kohn fahn di Baibl wahn aalwayz gud. Ih mi help peepl liv wahn beta laif eena di paas an ih stil di help peepl du dat tudeh. Wen wi reed di Baibl ahn reeli tek taim fi tink bowt weh ih seh, Jehoava yooz ih hoali spirit fi help wi si how wi ku yooz it eena wi laif. (Ps. 119:27; Mal. 3:16; Heeb. 4:12) Yes, Jehoava, di wan weh gi wi di Baibl, redi fi help yu. Dat noh mek yu waahn reed di Baibl evri day?

7. How di Baibl mi bring Gaad peepl tugeda eena di paas?

⁷ Di Baibl reeli gat een Gaad wizdom. Wi noa dis bikaaz ih aalso help Gaad peepl fi stay yoonaitid. Wen di Izrelaits enta di Pramis Lan, dehn mi setl dong aal oava di lan. Som a dehn da-mi fishaman, som mi rayz animal, an adaz da-mi  faama. Soh bikaaz di Izrelaits neva liv tugeda agen, ih mi eezi fi mek dehn ferget di ada Izrelaits weh mi liv eena ada paats a di konchri. Jehoava mi araynj fi mek di Izrelaits meet tugeda fi lisn ahn laan bowt ih Laa. (Deut. 31:10-13; Neh. 8:2, 8, 18) Imajin how eech wan a di Izrelait mosi mi feel wen dehn reech da Jeroosalem ahn deh monks milyanz a Jehoava servant fahn aal oava di konchri. Dat da how Jehoava mi help ih peepl fi stay yoonaitid. Yaaz layta, di bradaz ahn sistaz weh mek op di Kristyan kangrigayshan mi taak difrent langwij ahn kohn fahn difrent bakgrong. Som a dehn mi rich ahn ga wahn hai pozishan, ahn som a dehn mi poa. Bot bikaaz dehn mi lov weh dehn mi-di laan fahn di Baibl, dehn mi wership di chroo Gaad tugeda. Dehn wan weh mi staat serv Jehoava kuda mi onli andastan weh di Baibl seh if dehn mi meet tugeda ahn geh help fahn dehn bradaz ahn sistaz.—Aks 2:42; 8:30, 31.

8. How di Baibl yoonait Jehoava peepl tudeh day?

⁸ Op tu tudeh, wi waiz Gaad di yooz di Baibl fi teech ahn yoonait ih peepl. Di Baibl gat een evriting weh wi need fi noa bowt Jehoava. Wi aalwayz meet tugeda da wi meetin, asembli, ahn kanvenshan dehn fi hyaa di bradaz reed, eksplayn, ahn diskos di Skripchaz. Di Baibl da wahn veri impoatant buk weh Jehoava  yooz fi help ih peepl “serv ahn shoalda tu shoalda.”—Zeph. 3:9.

9. Bays pahn Look 10:21, weh kwaliti wi need fi ga fi andastan di Baibl?

⁹ Mek wi kansida sohnting els weh proov dat Jehoava waiz. Wahn lata paats a di Baibl geh rait dong eena wahn way weh onli hombl peepl ku andastan. (Reed Look 10:21.) Peepl aal oava di werl reed di Baibl. Sohnbadi weh stodi Baibl hischri seh dat moa peepl reed di Baibl dan eni ada buk, ahn dat dehn stodi it moa dan eni ada buk tu. Bot onli dehn wan weh hombl wahn reeli andastan ih mesij ahn yooz it eena dehn laif.—2 Kor. 3:15, 16.

10. Wat da wahn nada way how di Baibl proov dat Jehoava waiz?

¹⁰ Mek wi si wahn neks way how wi ku si Jehoava wizdom eena di Baibl. Jehoava noh onli yooz di Skripchaz fi teech aala wi az wahn groop a peepl, bot ih yooz it fi teech ahn komfert eech wan a wi. Wen wi reed di Baibl, wi ku feel dat Jehoava kay fi eech wan a wi. (Isa. 30:21) Yoo eva gaahn chroo wahn prablem ahn yu reed wahn skripcha weh mek yu feel laik ih mi geh rait dong jos fi yoo? Jehoava neva rait di Baibl jos fi wan persn, ih mi rait it fi milyanz a peepl. Ih amayzin fi si dat di infamayshan eena di Baibl op-tu-dayt an ih ku help eech wan a wi fi deel wid wateva prablemz wi di goh chroo. Dis onli pasabl bikaaz di Baibl kohn fahn Jehoava, ahn nobadi waiz laik hihn.—2 Tim. 3:16, 17.

11. How Gaad mi shoa dat hihn chreet evribadi di saym way wen ih mi-di mek peepl rait di Baibl?

¹¹ Jehoava da wahn Gaad a jostis. (Deut. 32:4) Hihn chreet evribadi di saym way. (Aks 10:34, 35; Roam. 2:11) Fi egzampl, hihn mi mek di Baibl geh rait dong eena sohn langwij weh wahn lata peepl mi taak rong dehn taim. Moas a di fers 39 buk a di Baibl mi geh rait dong eena Heebroo, soh ih mi eezi fi mek Gaad peepl andastan it. Bot bai di fers senchri, di langwij weh moas peepl taak da-mi Greek. Soh moas a di laas 27 buk a di Baibl mi geh rait dong eena da langwij. Jehoava neva mek di Baibl jos stay eena wan langwij. Tudeh, bowt ayt bilyan peepl liv pahn di ert ahn dehn taak lata difrent langwij. How aala dehnya peepl ku geh fi laan bowt Jehoava?

12. How di prafesi eena Daniel 12:4 di kohn chroo tudeh?

¹² Jehoava mek Danyel prafesai dat joorin di taim a di en, “nalij a di chroot” weh wi fain eena di Baibl “wahn bee plenti.” Dat meenz dat lata peepl mi wahn geh fi andastan di chroot weh eena di Baibl. (Reed Daniel 12:4.) c Wan way how wi help peepl fi laan di chroot da wen wi chranslayt, print, ahn giv owt Baibl ahn poblikayshanz weh bays pahn di Baibl. Di Baibl da di onli buk weh moas peepl eena di werl ku reed eena dehn oan langwij. Sohn kompani weh chranslayt di Baibl sel it veri ekspensiv. Jehoava Witnisiz don chranslayt di Baibl, er paat a it, eena oava 240 langwij, an enibadi ku geh wahn kapi a it widowt haftu pay. Ahn sayka dat, peepl aal oava di werl di laan bowt di “gud nyooz a di Kingdom” bifoa di en kohn. (Mach. 24:14) Bikaaz Jehoava da wahn Gaad a  jostis, hihn waahn mek evribadi geh fi reed di Baibl ahn geh fi noa hihn. Dis da bikaaz hihn lov wi wahn lat.

13. How di Baibl shoa dat Jehoava lov wi? (Jan 21:25)

¹³ Di Baibl shoa wi how Jehoava da wahn Gaad a lov. Lov da fi hihn nomba wan kwaliti. (1 Jan 4:8) Mek wi luk pahn weh Jehoava put eena di Baibl ahn weh ih lef owt. Eena di Baibl, Jehoava teech wi weh wi need fi du fi ga wahn rilayshanship wid ahn, how wi ku ga wahn hapi laif now, ahn weh wi need fi du fi geh evalastin laif. Bot bikaaz Jehoava lov wi, ih neva gi wi infamayshan weh wi noh need er weh wi kyaahn andastan.—Reed Jan 21:25.

14. Wat da wahn nada way how di Baibl shoa wi dat Jehoava lov wi?

¹⁴ Jehoava shoa dat ih lov wi eena di way how ih kamyoonikayt wid wi. Hihn neva put wahn lang lis a roolz eena di Baibl fi chrai kanchroal evriting eena wi laif. Insteda dat, hihn yooz reel-laif stoari, eksaitin Baibl prafesi, ahn gud advais fi help wi mek gud disizhanz. Dehnya tingz weh eena di Baibl wahn help wi fi lov an obay ahn wid aala wi haat.

15. (a) How di Baibl shoa dat Jehoava kay bowt wi? (b) Eena di picha, wich Baibl karakta di lee gyal, di yong brada, ahn di oalda sista di tink bowt? (Gen. 39:1, 10-12; 2 Ki. 5:1-3; Look 2:25-38)

¹⁵ Di Baibl help wi fi si dat Jehoava kay bowt wi. Di Baibl gat een lata reel-laif stoari bowt tingz weh mi hapm tu peepl eena di paas. Ahn wee ku andastan dehn feelinz bikaaz dehn da peepl “wid feelinz  jos laik wee.” (Jay. 5:17) Soh wen wi reed bowt how Jehoava chreet peepl, ih help wi fi andastan dat “Jehoava ful a mersi ahn kompashan.”—Jay. 5:11.

16. Weh wi laan bowt Jehoava wen wi reed bowt peepl eena di Baibl weh mek mistayks? (Isaiah 55:7)

¹⁶ Wen wi mek wahn mistayk, Jehoava noh lef wi, ahn dat da wahn nada way how Jehoava shoa dat ih lov wi. Di Izrelait dehn mi sin gens Jehoava oava ahn oava agen, bot wen dehn mi shoa dat dehn mi reeli sari hihn mi fergiv dehn. (Reed Isaiah 55:7.) d Di Kristyanz weh mi liv eena di fers senchri mi aalso noa dat Jehoava mi lov dehn. Dehn mi ga wahn man weh mi-di komit wahn seeryos sin bot ih mi reeli sari fi weh ih du, soh Paal mi tel di bradaz eena da kangrigayshan fi “fergiv ahn fahn [dehn] haat ahn giv ahn komfert.” (2 Kor. 2:6, 7; 1 Kor. 5:1-5) Ih amayzin fi si dat Jehoava noh lef ih servants jos bikaaz dehn sin gens ahn. Bot insteda dat, ih help dehn ahn karek dehn eena wahn lovin way ahn welkom dehn bak fi bee ih fren. Hihn pramis fi du di saym ting fi wee tudeh az lang az wi reeli sari fi di sinz weh wi du.—Jay. 4:8-10.

17. Wai wi ku seh dat di Baibl da wahn amayzin gif fahn Jehoava?

¹⁷ Di Baibl da wahn amayzin gif fahn Jehoava. Wai wi seh dat? Bikaaz chroo di Baibl wi laan bowt Jehoava wizdom, jostis, ahn lov. Di Baibl tel wi dat Jehoava waahn mek wi kohn kloas tu ahn an bee ih fren.

18. How wee ku shoa dat wi tankful fi di “perfek gif” weh Gaad gi wi?

¹⁸ Wi noh waahn ferget dat di Baibl da wahn “perfek gif” fahn Jehoava. (Jay. 1:17) Soh mek wi kantinyu shoa dat wi tankful fi di Baibl. Wi du dis wen wi reed it ahn tink bowt how Gaad Werd ku help wi. Soh wen wi reed it, wi ku bee shoar dat Jehoava wahn help wi andastan it soh dat wee ku “fain di nalij a Gaad.”—Prov. 2:5.