Stilyet, Jehoava waahn wi bee payshent ahn wayt fi mek hihn du weh ih seh ih wahn du da di taim weh hihn set. How hihn ku ekspek wi fi du dat? Weh ku help wi fi bee hapi wail wi di wayt?

WAI JEHOAVA EKSPEK WI FI WAYT?

Di Baibl tel wi, “Jehoava di bee payshent an ih di wayt fi bles unu, ahn hihn redi fi shoa unu mersi. Kaaz Jehoava da wahn Gaad a jostis. Di wan dehn weh di wayt pahn hihn hapi.” (Isa. 30:18) Da mesij da-mi fi di haad-hedid Jooz weh mi liv rong di saym taim laik Aizaiya. (Isa. 30:1) Bot som a di Jooz mi faytful, an Aizaiya mesij mi gi dehn hoap. Da mesij gi hoap tu Jehoava faytful servant dehn nowadayz tu.

Jehoava di bee payshent, soh wee need fi bee payshent ahn wayt jos laik hihn. Hihn don set wahn taim fi wen ih wahn en dis sistem weh wi di liv eena rait now, ahn hihn jos di wayt fi mek da day an owa kohn. (Mach. 24:36) Wen da taim kohn, evribadi wahn noa widowt wahn dowt dat aal di tingz weh di Devl seh bowt Jehoava an ih peepl da loan lai. Den Jehoava wahn geh rid a Saytan an enibadi weh tek Saytan said, bot Ih wahn “shoa [wee] mersi.”

Jehoava noh mait fiks aala wi prablemz rait now, bot ih doo pramis wi dat wi kud bee hapi wail wi di wayt. Soh da laik weh Aizaiya seh—wi ku bee hapi eevn if wi reeli kyaahn wayt fi si wen sohnting gud hapm. (Isa. 30:18) a How wi ku bee hapi laik dat? Mek wi luk pahn foa tingz weh ku help wi.

HOW FI BEE HAPI WAIL YU DI WAYT?

Foakos pahn gud tingz. King Dayvid mi si lata wikid tingz hapm joorin fi hihn laiftaim. (Ps. 37:35) Bot hihn mi seh: “Chros eena Jehoava ahn wayt payshent-wan fi hihn. Noh geh beks wen peepl weh du eevl get weh wid weh dehn du.” (Ps. 37:7) Eevn Dayvid mi fala da advais, kaaz hihn mi foakos pahn how Jehoava mi pramis fi sayv ahn, an pahn di blesinz weh ih mi get fahn Jehoava. (Ps. 40:5) Wee ku du weh Dayvid mi du. Wi ku  foakos pahn di gud tingz ahn noh pahn di bad, soh dat noh mata weh sichuwayshan wi deh eena, wi wahn fain it eeziya fi wayt pahn Jehoava.

Kip bizi di prayz Jehoava. Di man weh mi rait Psalm 71, weh da-mi praabli Dayvid, mi tel Jehoava: “Ah wahn kip di wayt pahn yu; Ah wahn prayz yu moa ahn moa.” (Ps. 71:14) How hihn mi wahn prayz Jehoava? Hihn mi wahn tel ada peepl bowt Jehoava ahn sing Jehoava prayz. (Ps. 71:​16, 23) Wee ku bee hapi wail wi di wayt pahn Jehoava, jos laik Dayvid. Wi prayz Jehoava wen wi preech, wen wi taak bowt ahn evri day, ahn wen wi sing fi ahn. Di neks taim yu sing wan a wi Kingdom sang dehn, wai yu noh tink gud bowt di werdz ahn how dehn ku mek yu feel hapi?

Mek yu bradaz ahn sistaz inkorij yu. Wen Dayvid mi-di deel wid prablemz, hihn mi tel Jehoava: “Ah wahn hoap eena yu naym fronta yu laayal wan dehn.” (Ps. 52:9) Wen wee spen taim wid wi bradaz ahn sistaz, wi ku geh lata inkorijment tu. Ahn da noh onli wen wi deh da meetin, bot wi ku inkorij wan anada wen wi spen taim tugeda di du ada tingz tu.—Roam. 1:​11, 12.

Schrentn yu hoap. Psalm 62:5 seh: “Ai di wayt pahn Gaad wid payshens. Hihn da di wan weh gi mi hoap.” Wi reeli need fi ga schrang hoap, espeshali if wi feel laik di en di tek tu lang fi kohn. Wi haftu bee shoar dat Jehoava wahn kip aala ih pramis noh mata how lang wi mait haftu wayt fi si dehn kohn chroo. Fi mek wi ku ga da kaina hoap ahn fayt, wi haftu stodi Gaad Werd. Wi waahn si how difrent prafesi kohn chroo eena di paas, how aala di difrent buks eena di Baibl agree wid wan anada, ahn wi waahn laan aala di lee tingz weh Jehoava teech wi bowt ihself. (Ps. 1:​2, 3) Wi need fi kantinyu ‘mek di hoali spirit gaid wi wen wi prayʼ soh dat wi stay kloas tu Jehoava wail wi di wayt fi wen ih gi wi di evalastin laif weh ih pramis wi.—Jood 20, 21.

Wi need fi fala King Dayvid egzampl. Wi need fi chros dat Jehoava di kip wach oava enibadi weh di wayt pan ahn, an dat hihn wahn shoa ih lov fi dehn. (Ps. 33:​18, 22) Soh kip di bee payshent ahn wayt pahn Jehoava. Foakos pahn di gud tingz, prayz Jehoava, mek yu bradaz ahn sistaz inkorij yu, ahn kip yu preshos hoap fi di fyoocha schrang.