1-2. Weh ku help wi fi andastan how Jehoava feel wen dehn taak bad bowt ahn?

 IMAJIN sombadi weh yu lov seh sohnting bad bowt yu. Eevn doa da noh chroo, ada peepl stil bileev it. Ahn fi mek it wers, dehn spred da lai, ahn moa peepl bileev it. How yu tink dat wuda mek yoo feel? Wel, if yu kay bowt yu gud naym ahn yu frenship wid peepl, den da lai wuda hert yu, noh chroo?—Prov. 22:1.

² Da egzampl ku help wi andastan how Jehoava mi feel wen dehn mi taak bad bowt hihn. Wan a Jehoava aynjel mi tel Eev wahn lai bowt Hihn, ahn shee mi bileev it. Da lai mi mek fi wee fers payrents ton gens Jehoava. Ahn sayka dat, aal hyoomanz sin ahn ded. (Jen. 3:​1-6; Roam. 5:12) Bikaaz a da fers lai weh Saytan mi tel eena di gyaadn da Eedn, di werl tudeh ful op a prablemz. Wi si peepl di ded, wi hyaa bowt waar, ahn lata sofarin deh. Yu tink da lai hert Jehoava? Af koars! Bot eevn doa dat don hapm, Jehoava noh mek dat ga hihn di feel bad aal di taim. Di Baibl seh hihn da “di hapi Gaad.”—1 Tim. 1:11.

3. Weh privilij wi gat?

³ Wen wi obay di koman fi “prayz Jehoava naym,” wi help proov dat Saytan lai bowt Jehoava. (Ps. 113:1) Dat da wahn nais privilij fi wee, noh chroo? Bot how wi ku du dat? Wi du dat wen wi tel peepl di chroot bowt Gaad. Mek wi taak bowt chree reezn wai wi waahn prayz Gaad naym wid aala wi haat.

 WI MEK JEHOAVA HAPI WEN WI PRAYZ IH NAYM

4. How wi mek Jehoava hapi wen wi prayz ahn? Yooz di egzampl eena di paragraaf. (Koment pahn di picha.)

⁴ Wi mek Jehoava feel hapi wen wi prayz ih naym. (Ps. 119:108) Yu tink dis meen Jehoava need wee fi prayz ahn fi mek ih feel gud bowt ihself? No! Gaad da noh laik dat. Tink bowt dis: Imajin wahn lee gyal goh op tu ih pa ahn seh, “Yoo da di bes dadi eena di hoal werl!” Dis mek hihn smail ahn feel soh hapi. Wai yu tink hihn feel soh? Yu tink da bikaaz ih need inkorijment ahn prayz fan ih daata fi mek ih feel gud bowt ihself? No! Hihn feel soh bikaaz ih lov ih daata an ih hapi fi si dat shee lov ahn an apreeshiayt ahn. Ahn hihn noa dat dehnya kwalitiz wahn help shee fi bee hapi wen shee groa op. Dehnya da di saym reezn wai wi Pa, Jehoava, hapi wen wi prayz ahn.

5. Weh wi proov wen wi prayz Jehoava?

⁵ Wen wi prayz wi Pa, Jehoava, wi help proov dat weh Saytan seh bowt wi da wahn lai. Saytan seh dat non a wi wahn stay laayal tu Jehoava ahn difen Jehoava naym. Hihn seh dat wi noh wahn stay faytful wen wi deh anda presha ahn dat wi wahn ton wi bak pahn Jehoava. (Joab 1:​9-11; 2:4) Bot Joab mi proov dat Saytan laiyad bad, bikaaz hihn mi stay faytful tu Jehoava. How bowt yoo? Aala wi ga di privilij fi difen Jehoava naym ahn mek hihn hapi wen wi stay faytful tu ahn. (Prov. 27:11) Dat da wahn aana, noh chroo?

6. How wee ku bee laik King Dayvid ahn di Leevait dehn? (Nehimaiya 9:5)

⁶ Peepl weh lov Jehoava waahn prayz fi hihn naym. King Dayvid mi rait: “Ah waahn prayz Jehoava; Ah waahn prayz fi hihn hoali naym wid aala mi haat.” (Ps. 103:1) Dayvid mi noa dat wen wi prayz Jehoava naym, da Jehoava wi di prayz. Wen wi hyaa Jehoava naym, wi tink bowt weh kaina persn hihn, aala ih byootiful kwalitiz, ahn di amayzin tingz weh hihn du. Dayvid mi waahn prayz Jehoava naym ahn mek it hoali. Ahn hihn mi waahn du dat wid ‘aala ih haat.ʼ Dis da di saym way di Leevait dehn mi prayz Jehoava, ahn dehn mi set di egzampl fi di peepl. Dehn mi hombl an aksep dat noh mata humoch dehn prayz Jehoava naym ih mi wahn aalwayz dizerv moa. (Reed Nehimaiya 9:5.) Fi shoar, di prayz weh dehn giv Jehoava mi mek hihn hapi.

7. How wi ku prayz Jehoava wen wi preech an eena wi evriday laif?

 ⁷ Tudeh wee ku mek Jehoava hapi wen wi taak bowt how tankful wi tankful fi di tingz weh hihn du ahn bowt humoch wi lov ahn. Wen wi preech, wi mayn goal da fi help peepl kohn kloas tu Jehoava ahn help dehn si fi wee lovin Pa di way wee si ahn. (Jay. 4:8) Wi hapi fi shoa peepl how di Baibl diskraib Jehoava az wahn Gaad a lov, jostis, wizdom, ahn powa, ahn fi tel dehn bowt ih ada byootiful kwalitiz. Wahn nada way wi prayz Jehoava ahn mek hihn hapi da wen wi chrai wi bes fi bee laik hihn. (Ifee. 5:1) Wen wi du dat, peepl mait wanda wai wi soh difrent fahn evribadi els eena dis wikid werl. (Mach. 5:​14-16) Ahn sins wi haftu deh rong dehndeh peepl evri day, dis gi wi wahn gud apachooniti fi eksplayn wai wi werk haad fi bee difrent. Dis ku help peepl weh hombl fi waahn geh kloas tu Gaad. Wen wi prayz Jehoava eena dehnya wayz, wi mek fi hihn haat hapi.—1 Tim. 2:​3, 4.

WI MEK JEEZAS HAPI WEN WI PRAYZ JEHOAVA NAYM

8. Wai Jeezas da di bes persn fi shoa wi how fi prayz ih Pa naym?

⁸ Owta aala Jehoava kriyayshan dehn da hevn ahn pahn di ert, nobadi noa Jehoava moa beta dan how Jeezas noa ahn. (Mach. 11:27) Jeezas lov ih Pa, an ih prayz ih Pa naym. (Jan 14:31) Ahn hihn shoa wi how wee ku du di saym ting. Di nait bifoa ih mi ded, hihn mi pray tu ih Pa an ih mi taak bowt di moas impoatant ting weh ih mi du pahn ert. Hihn seh: “Ah teech dehn bowt yu naym.” (Jan 17:26) Weh Jeezas mi meen wen ih seh dat?

9. How Jeezas mi yooz wahn iloschrayshan fi help wi reeli noa weh kaina persn ih Pa?

⁹ Jeezas mi du moa dan jos tel peepl dat Gaad naym da Jehoava. Di Jooz weh Jeezas mi teech mi don noa Gaad naym. Bot Jeezas da “di wan weh . . . eksplayn hoo da Gaad.” (Jan 1:​17, 18) Fi egzampl, di Heebroo Skripchaz shoa wi dat Jehoava da wahn Gaad weh shoa lata mersi ahn weh ga kompashan. (Eks. 34:​5-7) Jeezas shoa wi dat dis da chroo wen ih tel wi bowt di iloschrayshan a di prodigal son an ih pa. Eena dis iloschrayshan, wi laan dat wen dis pa mi si ih son “wail ih mi stil deh wahn distans fahn di hows,” ih ron fi meet ahn, hog op ahn, an fergiv ahn fahn ih haat. Dis mek it klyaa dat Jehoava da wahn Pa weh shoa wahn lata mersi ahn kompashan. (Look 15:​11-32) Jeezas help wi fi reeli noa weh kaina persn Jehoava.

10. (a) How wi noa dat Jeezas yooz ih Pa naym ahn dat ih mi waahn ada peepl yooz it? (Maak 5:19) (Koment pahn di picha.) (b) Weh Jeezas waahn wi du?

¹⁰ Yu tink Jeezas mi waahn ada peepl yooz ih Pa naym? Yes. Maybi sohn rilijos leedaz bak den mi bileev dat nobadi fi yooz Gaad naym kaaz ih soh hoali. Bot Jeezas neva mek rang tinkin laik dat stap hihn fahn yooz an aana ih Pa naym. Tink bowt weh mi hapm eena wahn ayrya rong Jerasa wen ih mi kyoar wahn man weh lata deemonz mi-di kanchroal. Wen di peepl mi si weh Jeezas mi du, dehn mi geh frayd ahn beg ahn fi goh sohnweh els. (Maak 5:​16, 17) Bot Jeezas mi waahn di peepl geh fi noa ih Pa naym. Soh ih mi tel di man weh ih heel fi tel di peepl bowt weh Jehoava mi du far ahn, noh weh hihn, Jeezas, mi du.  (Reed Maak 5:19.) a Jeezas waahn wi du di saym ting tudeh. Hihn waahn wi tel evribadi pahn di ert bowt ih Pa! (Mach. 24:14; 28:​19, 20) Wen wi du dat, wi mek Jeezas, wi King, hapi.

11. Weh Jeezas mi teech ih falowaz fi pray bowt, ahn bays pahn Ezekiel 36:​23, wai dat impoatant?

¹¹ Jeezas mi noa dat Jehoava perpos da fi mek fi Hihn naym hoali, ahn klayr op aal di laiz weh dehn spred bowt Hihn. Dat da wai Jeezas mi teech ih falowaz fi pray: “Hevnli Faada, wi waahn yu naym bee hoali.” (Mach. 6:9) Jeezas andastan dat dis da di moas impoatant ting evribadi da hevn ahn pahn ert need fi noa. (Reed Ezekiel 36:23.) Dehn noh ga no ada kriyayshan eena di hoal yoonivers weh du moa dan weh Jeezas du fi Jehoava naym. Stilyet, wen dehn mi ares Jeezas, da mi bikaaz dehn seh ih taak gens Gaad ahn noh ga no rispek fi Ahn! Bot wi noa fi shoar dat tu Jeezas, dat da-mi di wers sin weh enibadi kuda eva komit. Di fak dat dehn mi akyooz hihn fi du sohnting soh wikid mi reeli bada ahn. Dat kuda mi bee di reezn wai Jeezas mi “deh anda soh moch schres” joorin di laas fyoo owaz bifoa dehn mi ares ahn.—Look 22:​41-44.

12. Wat da di graytis way Jeezas mi shoa rispek fi ih Pa naym?

¹² Jeezas mi waahn proov dat aala di bad tingz weh peepl bileev bowt Jehoava da loan lai. Noh mata humoch dehn mi taacha, insolt, ahn tel lai bowt Jeezas, hihn neva giv op. Hihn mi noa dat ih mi du evriting weh ih Pa aks ahn fi du, soh hihn neva ga notn fi feel shaym bowt. (Heeb. 12:2) Hihn mi aalso noa dat da Saytan mi-di atak ahn joorin dehndeh haad taimz. (Look 22:​2-4; 23:​33, 34) Saytan mi reeli waahn mek Jeezas giv op. Bot dat neva hapm non ataal! Insted, Jeezas mi proov dat Saytan laiyad bad ahn dat Jehoava servants ku bee laayal noh mata weh kaina chraiyalz dehn goh chroo!

13. Weh yoo ku du fi mek Jeezas hapi?

¹³ Yoo waahn mek Jeezas hapi? Den kantinyu prayz Jehoava naym ahn help  peepl fi reeli geh fi noa Jehoava. Wen yu du dat, yu wahn di fala Jeezas egzampl. (1 Peet. 2:21) Jos laik Jeezas, yu wahn di mek Jehoava hapi, ahn yu wahn di proov dat Saytan laiyad bad!

WEN WI PRAYZ JEHOAVA NAYM, WI KU HELP SAYV PEEPL LAIF

14-15. Weh amayzin tingz hapm wen wi teech peepl bowt Jehoava?

¹⁴ Wee help sayv peepl laif wen wi prayz Jehoava naym. How wi du dat? Saytan “blain di main a peepl weh noh ga fayt.” (2 Kor. 4:4) Sayka dat, lata peepl bileev laiz laik Gaad noh reel; er eevn if wahn Gaad egzis, hihn deh faar fahn wi ahn noh kay bowt wi; er Gaad kruwil ahn neva stap ponish peepl fi weh dehn du. Saytan mek op laiz laik dehnya fi chrai gi Jehoava wahn bad naym ahn fi mek nobadi waahn bee Jehoava fren. Bot wen wi preech, wi stap Saytan fahn reech ih goal. Wi teech peepl di chroot bowt wi Pa ahn prayz ih hoali naym. Bot how dis help peepl?

¹⁵ Di chroot weh deh eena di Baibl ga lata powa. Wen wi teech peepl bowt Jehoava ahn help dehn fi reeli geh fi noa ahn, wi geh fi si sohnting wandaful. Wi geh fi si how Jehoava oapm op dehn aiy soh dat dehn noh geh fool op wid Saytan laiz nohmoh. Ahn dehn staat si Jehoava az wahn lovin Pa, jos laik how wee si hihn. Ih sopraiz dehn wen dehn laan bowt di kaina powa Jehoava gat. (Isa. 40:26) Dehn laan fi chros ahn bikaaz hihn ga perfek jostis. (Deut. 32:4) Dehn laan soh moch fahn fi hihn wizdom. (Isa. 55:9; Roam. 11:33) Ahn dehn hapi fi laan dat hihn da lov. (1 Jan 4:8) Di moa dehn geh fi noa Jehoava, di schranga dehn hoap wahn bee dat dehn wahn liv fareva. Da wahn aana fi help peepl jraa kloas tu dehn Pa, Jehoava! Ahn wen wi du dat, wi “werk lang wid Gaad.”—1 Kor. 3:​5, 9.

16. Yooz di egzampl dehn eena di paragraaf fi shoa how peepl laif chaynj wen dehn laan Gaad naym.

¹⁶ Wen wi fers staat teech sohnbadi, wi mait jos teech dehn dat Gaad naym da  Jehoava. Bot eevn dat ku help wahn persn weh ga di rait haat kandishan fi chaynj ih laif. Fi egzampl, wahn yong laydi weh naym Aaliyah b neva groa op az wahn Kristyan. Shee neva satisfai wid di rilijan ih mi deh eena ner feel kloas tu Gaad. Bot afta shee staat stodi wid di Witnisiz, shee staat si Gaad az ih fren. Shee mi shak wen ih fain owt dat dehn tek owt Gaad naym owta lata Baibl chranslayshan ahn put een difrent taitl, laik Laad. Wen shee laan dat Gaad naym Jehoava, dat mi chaynj ih laif. Shee seh: “Mi bes fren ga wahn naym!” How dis mi help ahn? Shee seh: “Ah fainali feel laik Ah ga pees eena mi haat. Da wahn reel privilij fi noa Jehoava naym.” Wahn man weh naym Steve kohn fahn wahn Jooish bakgrong, ahn hihn laik play myoozik. Hihn neva waahn ga notn fi du wid rilijan, kaaz ih mi si dat dehn da-mi hipokrit. Bot afta ih ma mi ded, ih mi disaid fi jain een pahn wahn stodi wid wan a ih fren hoo mi-di stodi wid Jehoava Witnisiz. Wen ih mi laan Gaad naym, dat mi toch ih haat. Hihn seh: “Ah neva hyaa Gaad naym bifoa. Fi di fers taim, Ah si Gaad az wahn reel persn. Now Ah noa Ah fain wahn chroo Fren.”

17. Wai yoo waahn kantinyu fi prayz Jehoava naym? (Koment pahn di picha.)

¹⁷ Wen yu preech ahn teech, yu tel peepl bowt Jehoava hoali naym? Yu help dehn fi si weh kaina persn hihn? Wen yu du dat, yu prayz Gaad hoali naym. Soh mek wi kantinyu prayz Jehoava hoali naym, ahn help peepl fi reeli noa weh kaina persn hihn. Da way deh, yu wahn di help sayv peepl laif. Yu wahn di fala yu Leeda ahn King, Jeezas Krais. Ahn moa impoatant, yu wahn di mek Jehoava, yu Pa, hapi. Soh kip di “prayz [Jehoava] naym fareva an eva”!—Ps. 145:2.