SOHNTAIM di man dehn weh mi rait di Baibl wuda rait sertn tingz oava ahn oava. Mek wi luk pahn chree reezn wai dehn maita mi du dat:

Wen dehn mi rait it. Bak eena di Izrelait dayz, moas peepl neva ga wahn kapi a di Laa. Moas a di taim dehn onli mi hyaa di Laa wen di hoal nayshan wuda gyada tugeda da di tabernakl. (Deut. 31:​10-12) Dehn yoostu stan op ahn lisn fi owaz wen di prees ahn Leevait dehn mi reed di Laa, soh dehn praabli wuda geh taiyad. (Neh. 8:​2, 3, 7) Ahn dehn mi ga lata dischrakshan rong dehn weh mi mek it lee haad fi dehn hyaa an andastan gud. Wen dehn wuda gyada tugeda laik dat, ih mi gud fi mek dehn hyaa impoatant paats a di Laa oava ahn oava agen. Dat wuda mi help dehn fi memba eevn di deetaylz a Jehoava laa dehn ahn fi si how dehn kuda mi fala dehn.—Lev. 18:​4-22; Deut. 5:1.

Di way how dehn mi rait it. Di Baibl gat een lata sang. Fi egzampl, Psalms, Song of Solomon, ahn Lamentations gat een loan sang. Som a di sang dehn ga wahn lain weh ripeet oava ahn oava. Dat mek di teem a di sang klyaa, ahn mek it eezi fi laan di sang bai haat. Tek fi egzampl Psalm 115:​9-11, weh seh: “Oa Izrel, put unu chros eena Jehoava; da hihn help unu ahn protek unu. Unu weh da Ayron disendant dehn, chros eena Jehoava; da hihn help unu ahn protek unu. If yoo ga lata rispek fi Jehoava, den chros eena Jehoava; da hihn help unu ahn protek unu.” Wen wahn singa sing di saym werdz oava ahn oava, ih eeziya fi mek dehndeh preshos Baibl teechinz stay eena ih main ahn haat.

Wai dehn mi rait it? Wen sohnting impoatant, di man dehn weh mi rait di Baibl wuda ripeet it moa dan wan taim. Fi egzampl, Jehoava mi koman di Izrelait dehn noh fi eet blod. Soh fi mek di Izrelaits andastan dat blod stan fi laif, ih mi mek Moaziz eksplayn dis tu dehn oava ahn oava agen. (Lev. 17:​11, 14) Laytaraan, wen di apasl ahn di elda dehn da Jeroosalem mi rait bowt tingz weh Kristyanz fi rijek if dehn waahn pleez Gaad, dehn mi seh agen dat wi noh fi yooz blod.—Aks 15:​20, 29.

Jehoava neva mek dehn rait di Baibl laik dat jos fi mek wee staat tu seh lainz fahn di Baibl oava ahn oava agen. Dat da wai Jeezas mi seh: “Wen yu di pray, noh seh di saym tingz oava ahn oava agen.” (Mach. 6:7) Afta dat ih aalso menshan sohn tingz weh gud fi pray fa. (Mach. 6:​9-13) Soh eevn doa wi noh yooz di saym werdz oava ahn oava agen wen wi pray, ih noh rang fi pray bowt di saym tingz oava ahn oava agen.—Mach. 7:​7-11.

Soh Gaad ga gud reezn wai hihn seh sertn tingz eena di Baibl oava ahn oava agen. Jehoava da wi Grayt Teecha. Ahn dis da jos wan way how hihn di teech wi fi wi oan gud.—Isa. 48:​17, 18.