1. Weh Jehoava peepl eena di paas ahn tudeh wilin fi du?

 YOO lov Jehoava? Fi shoar yu lov ahn, an yu noh deh bai yuself. Fahn way bak, lata peepl mi feel di saym way laik yoo. (Ps. 104:​33, 34) Wahn lata Jehoava peepl shoa dat dehn wilin fi mek sakrifais fi serv ahn. Ahn dat da egzakli weh di Nazarait dehn mi du bak eena Izrel. Bot hoo da di Nazarait dehn? Ahn weh wi ku laan fahn fi dehn egzampl?

2. (a) Hoo da-mi di Nazarait dehn? (Numbers 6:​1, 2) (b) Wai som a di Izrelait dehn mi waahn bee wahn Nazarait?

² Di werd “Nazarait” kohn fahn di Heebroo werd weh meen “Sohnbadi Weh Set Wan Said” er “Sohnbadi Weh Dedikayt Ihself.” Di Nazarait dehn da-mi Izrelaits weh mi waahn du moa fi Jehoava. Soh dehn mi mek sertn sakrifais fi serv ahn eena wahn speshal way. Di Laa weh Gaad mi gi Moaziz mi alow wahn man er wahn laydi fi mek wahn speshal vow. Dehn kuda mi chooz fi liv dehn laif fi wahn set amonk a taim az wahn Nazarait. a (Reed Numbers 6:​1, 2.) b Da vow er pramis mi meenz dat dehn mi ga sertn tingz weh dehn mi haftu du weh di res a Izrelaits neva haftu du. Soh wai wahn Izrelait wuda waahn bee wahn Nazarait? Da bikaaz a ih deep lov fi Jehoava an ih mi tankful fi aala di gud tingz weh Jehoava mi du far ahn.—Deut. 6:5; 16:17.

3. How Gaad peepl tudeh da laik di Nazarait dehn?

 ³ Wen Gaad peepl mi stap fala di Laa weh Gaad mi gi Moaziz ahn staat fala “di laa a di Krais,” dehn kudn mek di speshal vow fi bee wahn Nazarait nohmoh. (Gal. 6:2; Roam. 10:4) Jos laik di Nazarait dehn, Jehoava peepl waahn du moa fi ahn, soh dehn serv ahn wid dehn hoal haat, soal, main, ahn schrent. (Maak 12:30) Wen wi dedikayt wi laif tu Jehoava, wi mek wahn vow er pramis fi serv ahn. Wi liv op tu da vow wen wi du weh Jehoava waahn ahn wen wi mek sakrifais fi pleez ahn. Mek wi si how di Nazarait dehn mi liv op tu dehn vow, ahn weh wi ku laan fahn dehn soh wi ku liv op tu fi wee vow tu. c—Mach. 16:24.

BEE WILIN FI MEK SAKRIFAIS FI JEHOAVA

4. Akaadn tu Numbers 6:​3, 4, weh kaina sakrifais wahn Nazarait mi wilin fi mek?

⁴ Reed Numbers 6:​3, 4. d Wahn Nazarait noh fi eet notn weh kohn fahn wahn grayp vain. Dat meenz ih noh fi jrink eniting weh mek owta grayp, ner eet fresh grayp, ner rayzn. Ada Izrelaits mi jrink alkohol ahn dehn mi eet grayp ahn rayzn, kaaz notn neva rang wid dehndeh tingz. In fak, di Baibl mi eevn seh dat wain da wahn gif fahn Gaad, ahn dat “wain . . . mek [peepl] haat rijais.” (Ps. 104:​14, 15) Di Nazaraits kuda mi injai dehn laif moa if dehn mi eet ahn jrink fahn di grayp vain. Bot dehn mi wilin fi mek di sakrifais ahn giv op dehndeh tingz. e

5. Weh kaina sakrifais Madián ahn Marcela mi mek, ahn wai?

⁵ Wee mek sakrifais fi du moa fi Jehoava tu, jos laik weh di Nazarait dehn yoostu du. Fi egzampl, Madián ahn Marcela mi-di liv wahn sweet laif. f Madián mi ga wahn gud jab ahn dehn kuda mi  afoad fi liv eena wahn nais apaatment. Bot dehn mi waahn du moa eena dehn servis tu Jehoava. Soh dehn disaid fi mek sohn chaynjiz. Dehn seh: “Wi mi kot bak pahn humoch moni wi spen ahn wi moov tu wahn smaala apaatment ahn sel wi kaar.” Madián ahn Marcela neva haftu mek dehndeh sakrifais, bot dehn mi chooz fi du dat bikaaz dehn mi waahn du moa eena dehn minischri. Soh dehn mi hapi wid di disizhan weh dehn mi mek.

6. Wai Kristyanz mek sakrifais? (Koment pahn di picha.)

⁶ Nowadayz, Kristyanz hapi fi giv op tingz eena dehn persnal laif soh dat dehn ku du moa fi Jehoava. (1 Kor. 9:​3-6) Fi egzampl, som a wi mait waahn wahn nais jab, hows, er eevn wahn pet, bot wi giv op dehndeh tingz soh wi ku du moa fi Jehoava. Som a wi mait waahn geh marid er staat wahn famili, bot wi disaid fi wayt soh dat wi ku yooz wi laif now eena Jehoava servis. Ahn som a wi mait chooz fi serv wehpaat dehn need help fi preech di gud nyooz, bot dat mait meen wi haftu liv faar fahn wi famili ahn frenz. Wi noh giv op dehndeh tingz bikaaz sohnting rang wid dehn er bikaaz Jehoava seh wi haftu giv dehn op. Wi giv op dehndeh tingz bikaaz wi waahn giv Jehoava wi bes ahn wi wilin fi du dat. Ahn wi noa dat wen wi mek wahn sakrifais fi du moa fi Jehoava, hihn reeli apreeshiayt it. Soh ih noh mata if da sohnting big er sohnting smaal, wee wilin fi giv op eniting soh wi ku du moa fi Jehoava.—Heeb. 6:10.

NOH FRAYD FI BEE DIFRENT

7. Weh kuda mi mek it haad fi wahn Nazarait kip ih vow? (Numbers 6:5) (Koment pahn di picha.)

⁷ Reed Numbers 6:5. g Paat a di vow weh di Nazarait mek meenz dat ih neva fi kot ih hyaa. Dat da-mi wan a di wayz how ih shoa dat ih put ihself anda Jehoava atariti. If wahn Izrelait mi serv az wahn Nazarait fi wahn wail, den evribadi els mi wahn noatis ih lang hyaa, ahn dehn mi wahn noa di reezn wai. Sohntaim ih neva geh di rispek ahn sopoat fahn adaz, soh ih neva aalwayz eezi fi mek ih kip ih vow az wahn Nazarait. Fi egzampl, eena Aymos dayz, di Izrelaits hoo ton apastayt mi “kip di giv di Nazaraits wain fi jrink.” (Amos 2:12) Dehn praabli mi-di chrai get dehn fi brok dehn vow, soh dehn mi need lata korij fi bee difrent fahn adaz.

8. How Benjamin ekspeeryens inkorij yoo?

 ⁸ If wi pen pahn Jehoava fi help, wee ku ga korij fi bee difrent tu, eevn if wi frayd er nachrali shai. Mek wi luk pahn di egzampl a Benjamin. Hihn da wahn brada fahn Norway an ih ten yaaz oal. Fi shoa sopoat fi di peepl da Ukraine sayka di waar, di pikni da fi hihn skool mi fi jres eena di Ukrainian nashanal kalaz ahn sing wahn sang da wahn ivent weh di skool mi gat. Benjamin mi chrai stay wan said soh dat ih wudn haftu tek paat eena dis ivent. Bot wan a ih teecha mi si ahn an hala fi ahn; shee seh: “Yu haftu kohn jain wi now. Aala wi di wayt pahn yu!” Benjamin gaahn op tu di teecha ahn tel ahn: “Ai noh tek paat eena notn weh ga fi du wid palitiks. In fak, lata Jehoava Witnisiz deh da prizn bikaaz dehn rifyooz fi goh da waar.” Di teecha mi aksep Benjamin eksplanayshan an ih tel ahn dat ih neva haftu tek paat. Bot di ada styoodent dehn staat tu aks ahn wai ih neva jain dehn. Benjamin mi soh nervos dat ih nayli staat tu krai. Bot ih tel ih hoal klaas di saym ting weh ih mi tel ih teecha. Laytaraan, Benjamin mi tel ih payrents dat da Jehoava mi help ahn fi stan op fi weh ih bileev.

9. Eena weh way wi ku mek Jehoava hapi?

⁹ Wen wi chooz fi serv Jehoava, dis mek wee difrent fahn peepl eena dis werl. Soh ih tek lata korij fi mek wi tel wi klaasmayt dehn er peepl weh wi werk wid dat wi da wan a Jehoava Witnisiz. Di way how peepl bihayv di goh fahn bad tu wers. Soh ih ku bee haada fi obay Baibl prinsiplz ahn preech tu peepl bowt di gud nyooz. (2 Tim. 1:8; 3:13) Ih impoatant fi memba dat wi “mek [Jehoava] haat hapi” wen wi shoa dat wi noh frayd fi bee difrent fahn di peepl eena disya werl.—Prov. 27:11; Mal. 3:18.

KANTINYU FI KIP JEHOAVA FERS EENA YU LAIF

10. Wai ih maita mi bee haad fi mek wahn Nazarait obay di koman da Numbers 6:​6, 7?

¹⁰ Reed Numbers 6:​6, 7. h Di Nazaraits mi vow noh fi goh kloas tu wahn ded badi. Dis mait noh bee wahn big deel fi yoo. Bot bak den, if yu da-mi wahn Nazarait dis neva mi wahn bee notn eezi fi yu  du, espeshali if wan a yu famili memba mi ded. Wai? Bikaaz paat a di finaral kostom da-mi fi stay kloas tu di ded badi. (Jan 19:​39, 40; Aks 9:​36-40) Sins di Nazaraits mi waahn kip dehn vow, dehn mi kyaahn stay kloas tu dehn relitiv ded badi. Wen dehn mi du dis, ih mi shoa dat dehn ga schrang fayt. Fi shoar, Jehoava mi help dehn kip dehn vow soh dat dehn ku fays wateva sichuwayshan dehn mi-di goh chroo.

11. Wen ih kohn tu disizhanz bowt di famili, weh wahn Kristyan need fi du? (Koment pahn di picha.)

¹¹ Az Kristyanz, wee noa dat di vow weh wi mek fi serv Jehoava fi di res a wi laif da sohnting seeryos. Soh wi mek shoar dat evriting weh wi du ahn di disizhanz weh wi mek noh goh gens Jehoava raichos standadz. Wi werk haad fi tek kyaa a wi famili, bot wi noh waahn put fi dehn needz heda weh Jehoava waahn fahn wi. (Mach. 10:​35-37; 1 Tim. 5:8) Sohntaimz dat mait meen dat wi wahn mek wahn disizhan weh wi famili noh gree wid soh dat wi ku mek Jehoava hapi.

12. Wen Alexandru mi-di fays wahn haad sichuwayshan, weh hihn mi du ahn weh hihn neva du?

¹² Mek wi luk pahn di egzampl a Alexandru an ih waif, Dorina. Dehn mi-di stodi di Baibl fi bowt wahn yaa, bot Dorina mi disaid dat shee wahn stap stodi di Baibl ahn shee mi-di chrai foas Alexandru fi stap stodi tu. Bot eena wahn nais way hihn mi eksplayn tu shee dat ih neva mi wahn stap stodi. Ih neva eezi fi ahn, bot hihn mi kantinyu stodi di Baibl. Hihn seh dat sohntaimz bikaaz a di way shee mi taak tu ahn, kritisaiz ahn, an seh tingz weh neva nais tu ahn, ih mi feel laik giv op pahn ih Baibl stodi. Bot ih neva giv op. Ih mi kantinyu stodi ahn put Jehoava fers. An ih mi aalso shoa ih waif wahn lata lov ahn rispek eevn wen shee mi-di chreet ahn bad. Aftawodz, shee mi staat ih stodi agen, an ih mi tek di chroot.—Wach di veedyo weh naym Alexandru and Dorina Vacar: “Lov Payshent ahn Kain” pahn jw.org.

13. Weh wi need fi du fi shoa dat wi lov Jehoava ahn wi famili?

¹³ Jehoava da di wan weh mek di famili, soh hihn noa how fi mek di famili bee hapi. (Ifee. 3:​14, 15) If wee waahn bee hapi, wee need fi du tingz di way Jehoava waahnt. Memba dat Jehoava cherish wateva sakrifais yu mek fi serv hihn wans yu di tek kayr a yu famili eena di way hihn waahn.—Roam. 12:10.

 INKORIJ EECH ADA FI BEE LAIK WAHN NAZARAIT

14. Hoo wee shuda chrai haad fi inkorij?

¹⁴ If wi waahn wership Jehoava, wi need fi bee wilin fi mek sakrifais. Wi mek dehndeh sakrifais bikaaz wi lov ahn. Dis noh aalwayz eezi, soh how wi ku help eech ada fi du it? Wen wi seh tingz weh wahn inkorij eech ada. (Joab 16:5) Yoo noa enibadi eena di kangrigayshan weh di chrai liv wahn simpl laif soh dat ih ku du moa fi Jehoava? Er eni yong peepl weh shoa korij ahn noh frayd fi bee difrent soh dehn ku mek Jehoava hapi? Dehn ga eni brada, sista, er wahn Baibl stodi weh di fait haad fi stay faytful eevn doa dehn famili di persikyoot dehn? Mek wi chrai wi bes fi inkorij dehnya bradaz ahn sistaz ahn Baibl stodiz. Mek dehn noa dat yu prowd a dehn fi di korij weh dehn shoa ahn di sakrifais weh dehn mek fi Jehoava.—Fai. 4, 5, 7.

15. How wi ku sopoat wi bradaz ahn sistaz weh deh eena ful-taim servis?

¹⁵ Dehn ga lata difrent wayz how wi ku help wi bradaz ahn sistaz weh deh eena ful-taim servis. (Prov. 19:17; Heeb. 13:16) Fi egzampl, wahn faytful sista weh seventi-siks yaaz oal fahn Sri Lanka mi yooz di lee rayz ih geh fahn ih penshan moni fi pay di foan bil fi too painyaa sistaz evri mont. Dis mi help dehn fi stay eena ful-taim servis. Dis lee oal sista set wahn reeli gud egzampl.

16. Weh di egzampl a di Nazarait dehn teech wi bowt Jehoava?

¹⁶ Wi laan sohnting impoatant bowt Jehoava fahn di gud egzampl a di Nazarait dehn. Ih teech wi dat Jehoava noa dat wi waahn liv op tu wi vow weh wi mek tu ahn an dat wi wilin fi mek eni sakrifais. Hihn gi wi di privilij fi shoa humoch wi lov ahn. (Prov. 23:​15, 16; Maak 10:​28-30; 1 Jan 4:19) Di speshal vow fi bee wahn Nazarait mi shoa dat Jehoava cherish aala di sakrifais weh wi mek fi serv ahn. Soh mek wi kantinyu du wi bes fi shoa Jehoava humoch wi lov ahn.