YOO eva wori bikaaz yu ga wahn prablem bot nobadi dehdeh fi help yu? Di Baibl tel wi fahn way bak dat “laif wahn bee haad” joorin dehnya taimz. (2 Tim. 3:1) Wen wi goh chroo haad taimz, wi mait feel diskorij er laik nobadi dehdeh fi help wi. Bot wi noh haftu goh chroo dehndeh tingz pahn wi oan. Di Baibl tel wi dat ih gud fi ga chroo frenz wen wi di “goh chroo haad taimz.”—Prav. 17:17.

Di apasl Paal mi chravl wid frenz pan ih difrent mishineri chrip, ahn dehndeh frenz mi help ahn eena lata wayz. (Kol. 4:​7-11) Wen Paal mi eena prizn da Roam, ih frenz mi help tek kayr a tingz weh hihn kudn du. Fi egzampl, Epafrodaitos mi kehr tingz weh di bradaz ahn sistaz da Filipai mi sen fi Paal. (Fil. 4:18) Tikikos mi kehr di leta dehn weh Paal mi rait tu difrent kangrigayshanz. (Kol. 4:7; luk op di stodi noat eena di Study Bible.) Tanks tu ih frenz, Paal mi aybl fi inkorij di kangrigayshan dehn eevn wen ih mi deh anda hows ares ahn wen ih mi deh eena prizn. How bowt yoo? How yoo ku bee wahn reel fren?

Wi ga bradaz ahn sistaz weh shoa how reel frenz ku help wan anada. Elisabet, wahn regyula painyaa sista fahn Spain, seh how wahn sista mi help shee wen ih ma fain owt dat ih ga kyansa. Di sista yoostu sen Elisabet wahn lata inkorijin mesij weh bays pahn di Baibl. Elisabet seh, “Wen Ah si ih mesij dehn kom een, Ah mi feel hapi dat sohnbadi mi-di tink bowt mi, ahn dat gi mi di schrent fi mek it chroo di day.”—Prav. 18:24.

Wi ku schrentn wi frenship wid wi bradaz ahn sistaz wen wi help dehn fi goh preech er fi goh da meetin. Fi egzampl, yu tink yu kuda gi wahn oalda brada er sista wahn raid fi goh da meetin er fi goh preech? If yu du dat, den unu wahn ku inkorij wan anada. (Roam. 1:12) Bot som a wi bradaz ahn sistaz kyaahn eevn lef dehn hows. How wi ku bee wahn reel fren tu dehn?

Som a wi bradaz ahn sistaz kyaahn goh da Kingdom Haal, maybi bikaaz dehn ga wahn helt prablem er sohnting els weh mek dehn kyaahn lef hoam. Fi egzampl, wahn brada weh naym Dayvid mi ga kyansa, an ih mi-di tek keemoterapi fi oava siks monts. Joorin da taim, Dayvid an ih waif, Lidia, mi jain dehn meetin oava veedyo kaal.

How di kangrigayshan mi help Dayvid ahn Lidia? Wen di meetin mi don, som a di frenz da di Kingdom Haal wuda chrai jain di veedyo kaal ahn taak tu dehn. Noh onli dat, wen  Dayvid er Lidia gi wahn koment, sohn bradaz ahn sistaz wuda sen dehn wahn lee mesij laytaraan fi tank dehn an inkorij dehn. Dat mi help dehn feel di lov fahn dehn kangrigayshan.

Yu tink yu kuda mek planz fi preech wid bradaz ahn sistaz weh kyaahn lef hoam? If yu mek sohn lee ajosment tu yu skejul, yu ku shoa dehn dat yu noh ferget dehn. (Prav. 3:27) Maybi yu ku du foan witnisin er leta raitin wid dehn. Di eldaz mait mek araynjments fi bradaz ahn sistaz eena dehndeh kaina sichuwayshan fi kanek tu di meetin fi feel servis oava veedyo kaal. Dayvid ahn Lidia mi hapi dat fi dehn kangrigayshan mi du dat. Dayvid seh, “Jos fi spen da lee bit a taim wid di feel servis groop fi di meetin ahn di pryaa mi inkorij wi wahn lat.” Fahn taim tu taim, maybi yu ku aks wahn brada er sista weh kyaahn lef dehn hows if ih wuda bee aarait fi bring wan a yu Baibl styoodent ahn du di stodi da dehn hows.

Wen wi spen taim wid wi bradaz ahn sistaz weh kyaahn lef dehn hows, wi wahn geh fi noa dehn byootiful kwalitiz, ahn dat wahn mek wi frenship groa. Fi egzampl, wen wi wach how dehn teech sohnbadi di chroot fahn di Baibl ahn help dehn fi bee Jehoava fren, wi wahn lov ahn rispek dehn eevn moa. Yu wahn ku mek moa frenz wen yu help yu bradaz ahn sistaz fi goh pahn feel servis ahn fi goh da meetin.—2 Kor. 6:13.

Taitos mi vizit Paal wen Paal mi-di goh chroo wahn rof taim, ahn dat mi komfert Paal. (2 Kor. 7:​5-7) Ih gud fi seh inkorijin tingz tu wi bradaz ahn sistaz. Bot Taitos egzampl teech dat wi ku aalso komfert dehn wen wi spen taim wid dehn ahn du tingz fi help dehn.—1 Jan 3:18.

Wi bradaz ahn sistaz da Russia set wahn byootiful egzampl fi wi eena di way dehn sopoat wan anada. Mek wi luk pahn Sergey an ih waif, Tatyana, egzampl. Polees mi saach dehn hows ahn kehr dehn da stayshan fi kweschan dehn. Dehn mi rilees Tatyana fers, ahn soh shee wan gaahn hoam. Sergey seh: “Az soon az [Tatyana] reech hoam, wahn brayv sista kohn hayl ahn. Soon afta dat, sohn moa bradaz ahn sistaz mi kohn help wi fi fiks op bak wi apaatment, bikaaz di polees mi ton op di plays wen dehn mi-di saach it.”

Den Sergey seh: “Ah laik di skripcha da Praverbz 17:​17, weh seh: ‘Wahn chroo fren shoa lov aal di taim, ahn hihn da laik wahn breda weh dehdeh fi yu wen yu goh chroo haad taimz.ʼ Dis skripcha moa reel tu mi now bikaaz Ah di goh chroo persikyooshan weh Ah kyaahn fays pahn mi oan. Jehoava gi mi brayv frenz weh aalwayz dehdeh fi mi.” a

Joorin dehnya taimz wen laif di geh haada ahn haada, wi need frenz weh wi ku pen pan. Wi wahn need dehn eevn moa joorin di grayt chribyulayshan. Soh mek wi du wi bes fi bee wahn gud fren fahn now!—1 Peet. 4:​7, 8.