LATA peepl eena di werl feel dehn dizerv speshal chreetment, er privilij. Noh mata how moch dehn get, dehn stil feel laik dehn dizerv wahn lat moa. Peepl weh tink laik dat, da selfish peepl ahn dehn noh tankful fi eniting. Di Baibl seh dat peepl wahn bee laik dat eena di laas dayz.—2 Tim. 3:2.

Eevn eena di paas peepl mi selfish. Adam ahn Eev mi wahn chooz fi dehnself weh gud an weh bad. Aala wee sofa bikaa dehn mi selfish. Honjridz a yaaz lata, King Yuzaiya fahn Jooda mi tink hihn ga di rait fi aafa insens da di templ, bot hihn neva ga no rait fi du dat. (2 Chron. 26:​18, 19) Eevn di Farisee ahn Sadyusee dehn mi bileev dat Gaad shuda chreet dehn beta dan ada peepl jos bikaaz dehn kohn fahn Aybraham famili lain.—Mach. 3:9.

Wi liv monks peepl weh selfish ahn ful a dehnself, ahn wi haftu bee kyaaful dat wee noh staat ak laik dehn. (Gal. 5:26) Wi mait staat tink dat wi dizerv wahn sertn privilij er speshal chreetment. Weh wi ku du fi noh tink laik dat? Wi need fi fain owt weh Jehoava tink bowt di sichuwayshan. Too Baibl prinsiplz wahn help wi fi du dat.

Jehoava da di wan weh wahn disaid weh wi get. Tink bowt dehnya egzamplz.

•   Eena di famili, wahn hozban dizerv ih waif rispek, ahn wahn waif dizerv ih hozban lov. (Ifee. 5:33) Hozban ahn waif onli fi shoa romantik lov fi wan anda ahn nobadi els. (1 Kor. 7:3) Payrents dizerv obeedyans fahn dehn pikni, ahn pikni dizerv lata lov ahn rispek fahn dehn payrents.—2 Kor. 12:14; Ifee. 6:2.

• Eena di kangrigayshan, di eldaz dizerv wi rispek. (1 Tes. 5:12) Bot dehn noh ga di rait fi kanchroal weh dehn bradaz ahn sistaz du.—1 Peet. 5:​2, 3.

• Gaad gi hyooman govament di rait fi kalek taks fahn di peepl dehn rool oava, an ih seh dat dehn dizerv aana.—Roam. 13:​1, 6, 7.

Jehoava gi wi moch moa dan wi dizerv. Bikaaz wi da sinaz, di onli ting wee dizerv da fi ded. (Roam. 6:23) Stilyet, Jehoava gi wi lata blesinz bikaaz ih lov wi. (Saa. 103:​10, 11) Hihn gi wi blesinz ahn privilijiz, noh bikaaz wi dizerv it, bot owta di kainis a ih haat.—Roam. 12:​6-8; Ifee. 2:8.

Deh pahn yu gyaad gens di atichood a di peepl a di werl. Wi haftu bee kyaaful fi noh tink dat wi dizerv moa dan adaz. Dat ku hapm widowt wi eevn noatis. Jeezas mi tel wahn stoari fi shoa how eezi dat ku hapm. Eena di stoari, sohn man mi werk da wahn faam. Som a dehn mi staat werk erli an dehn mi werk aal day anda di son-hat. Som mi staat layt. Bot aala dehn mi geh di saym pay. Dehn wan weh mi staat erli mi feel laik dehn mi dizerv moa pay dan dehn wan weh mi staat layt. (Mach. 20:​1-16) Jeezas mi yooz dis stoari fi teech ih disaiplz dat dehn fi bee kantentid wid weh Gaad gi dehn.

Bee tankful, ahn noh diman tingz fahn adaz. (1 Tes. 5:18) Wi ku fala Paal egzampl, hihn neva aks fi mateeryal tingz fahn di bradaz da Korint eevn doa ih mi ga di rait fi du dat. (1 Kor. 9:​11-14) Wi shuda bee tankful fi evri blesin wi get ahn noh bee dimandin.

 Laan fi bee hombl. Wen sohnbadi staat tink tu moch a ihself, ih wuda staat feel laik ih dizerv moa dan weh ih gat. Hyoomiliti da di kee fi avoid dis kaina rang tinkin.

Danyel set wahn gud egzampl fi wi. Hihn mi kohn fahn wahn impoatant famili, ih mi hansom, ih mi smaat, an ih mi ga skilz. Bikaaz a aala dehndeh tingz, hihn kuda mi tink tu moch a ihself ahn feel laik hihn dizerv speshal chreetment. (Dan. 1:​3, 4, 19, 20) Bot Danyel mi stay hombl, ahn dat da wai Jehoava mi lov ahn soh moch.—Dan. 2:30; 10:​11, 12.

Lata peepl eena di werl selfish ahn prowd bot wee noh waahn bee laik dat. Insted wi waahn bee hapi wid evri blesin Jehoava gi wi bikaaz a di kainis a ih haat.