Mary an ih hozban, John, a liv eena wahn konchri wehpaat peepl fahn di Philippines wuda moov fi goh werk. Mary ahn John hapi fi preech tu dehndeh peepl. Joorin di COVID-19 pandemik, Mary mi aybl fi staat Baibl stodiz noh jos wehpaat ih liv bot eena ada konchriz tu. How shee mi du dat?

Mary wuda aks ih Baibl styoodents, “Yoo noa enibadi els weh wuda waahn stodi di Baibl?” If dehn seh yes, shee wuda aks dehn fi inchrojoos ahn tu dehn. Da eezi kweschan bring shee gud rizolts. Yu tink dat ku werk fi yoo? Yes, bikaaz peepl weh laik weh dehn di laan bowt di Baibl yoozhwali waahn shayr it wid dehn famili ahn frenz. Weh hapm wen Mary aks ih styoodents da kweschan?

Wan a Mary Baibl styoodent, Jasmin, mi inchrojoos ahn tu foa peepl weh mi waahn stodi di Baibl. Wan a dehn da-mi Kristine. Shee mi injai ih stodi soh moch dat shee mi aks Mary fi stodi wid ahn twais a week. Wen Mary mi aks ahn if ih noa enibadi els weh wuda waahn stodi di Baibl, Kristine tel ahn dat ih wahn inchrojoos ahn tu som a ih frenz. Joorin di neks fyoo weeks, Kristine mi inchrojoos ahn tu foa a ih frenz weh mi waahn stodi di Baibl. Laytaraan, Kristine mi inchrojoos ahn tu ada frenz weh mi inchrestid. Ahn dehndeh frenz mi inchrojoos ahn tu eevn moa peepl.

Kristine mi waahn ih famili bak hoam da di Philippines laan bowt di Baibl. Soh shee mi taak tu ih daata, Andrea. At fers, shee yoostu tink dat Jehoava Witnisiz da noh wahn gud rilijan, kaaz dehn noh bileev eena Jeezas ahn dehn onli yooz di Oal Testiment. Afta ih finish ih fers stodi, shee si fi ihself dat weh shee mi tink bowt di Witnisiz da neva chroo. Weneva shee laan sohnting nyoo fahn di Baibl, ih wuda seh, “Wans ih deh eena di Baibl, da chroo!”

Afta sohn taim, Andrea mi inchrojoos Mary tu too frenz ahn wahn werkmayt weh mi aalso staat tu stodi wid ahn. Andrea mi ga wahn aanti weh blain weh naym Angela. Ahn Mary neva noa dat evri taim shee wuda stodi wid Andrea, ih aanti wuda deh rait deh di lisn. Den wahn day, Angela aks Andrea fi inchrojoos ahn tu Mary kaaz shee mi waahn stodi di Baibl. Angela mi lov weh shee mi-di laan, an eena jos wahn mont ih laan lata skripchaz bai haat. Ahn noh onli dat, shee mi waahn stodi foa taimz fi di week! Tanks tu Andrea help, Angela kuda mi aten di meetinz chroo veedyo kaal.

 Wen Mary mi noatis dat Kristine hozban, Joshua, wuda deh rong wail dehn di stodi, shee mi aks hihn if ih wuda laik fi jain eena di stodi. Hihn mi seh, “Ah noh main, bot Ah jos wahn lisn. If yu aks mi eni kweschan, Ah wahn waak owt.” Nat eevn faiv minits mi paas ahn hihn mi-di aks moa kweschanz dan Kristine an ih mi inchrestid fi staat wahn Baibl stodi.

Mary aks da eezi kweschan an ih get lata Baibl stodiz. Shee mi mek araynjments wid ada Witnisiz fi tek aan di stodi wid lata dehn. In aal, shee mi staat stodi wid 28 peepl eena foa difrent konchriz.

Memba Jasmin? Shee mi geh baptaiz eena Aypril 2021. Kristine mi geh baptaiz eena May 2022, ahn now shee gaahn bak fi liv wid ih famili da di Philippines. Too ada peepl weh Kristine mi tel Mary bowt mi geh baptaiz tu. Wahn fyoo monts afta dat, Angela mi geh baptaiz ahn now shee di serv az wahn regyula painyaa. Ahn Kristine hozban, Joshua, ahn dehn daata, Andrea, ahn sohn ada Baibl styoodents di kantinyu stodi di Baibl ahn dehn di jraa kloasa tu Jehoava.

Eena di fers senchri, lata peepl mi tel dehn famili ahn frenz weh dehn mi laan bowt Jeezas. (Jan 1:​41, 42; Aks 10:​24, 27, 48; 16:​25-33) How bowt fi wee taim? Enitaim wi taak wid sohnbadi weh inchrestid eena di Baibl, yu ku aks dehn, “Yoo noa enibadi els weh wuda waahn stodi di Baibl?” Yu wuda sopraiz fi si how da wan lee kweschan ku help yu staat wahn lata Baibl stodiz.