1. Wai ih ku bee haad fi andastan wen sohnbadi seh ih fergiv yu?

 HOW yu feel wen sohnbadi tel yu “Ai fergiv yu”? Dat da wahn big rileef, noh chroo? Espeshali if yu noa yu seh er du sohnting weh hert di persn. Bot weh ih reeli meen wen sohnbadi seh “Ai fergiv yu”? Yu tink da persn di seh dat unu da stil frenz? Er maybi di persn di seh dat ih jos noh waahn taak bowt weh hapm, bot tingz da noh di saym bitween unu afta dat. Wen peepl seh dehn fergiv yu, dat ku meen lata tingz. An ih ku bee haad fi andastan weh ih reeli meen.

 2. Weh di Skripchaz teech wi bowt di way how Jehoava fergiv? (Koment pahn di futnoat.)

² Di way Jehoava fergiv wi faar difrent fahn di way wee fergiv wan anada. Nobadi ku fergiv laik Jehoava. Di saamis mi seh: “Bikaaz yoo chrooli fergiv peepl fi dehn sin, dehn si yoo az wahn amayzin Gaad.” a (Saa. 130:4) Jehoava shoa wi weh ih meen fi “chrooli fergiv.” Eena di Heebroo Skripchaz, sohn Baibl raita mi yooz wahn speshal werd fi taak bowt di way how Jehoava fergiv ahn dehn neva eva yooz da werd fi taak bowt how hyoomanz fergiv. Dat shoa wi dat di way hihn fergiv difrent fahn di way wee fergiv.

 3. Weh mek Jehoava fergivnis beta dan di way wee fergiv? (Isaiah 55:​6, 7)

³ Wen Jehoava fergiv sohnbadi, da laik ih irays dehn sin. Dat da weh mek it pasabl fi mek wi ga wahn kloas rilayshanship  wid hihn. Wen Jehoava fergiv wi, da laik if wi neva did komit wahn sin. Wi soh hapi dat hihn redi ahn wilin fi fergiv wi.—Reed Isaiah 55:​6, 7. b

 4. How Jehoava help wi andastan weh ih reeli meen fi fergiv?

⁴ If di way Jehoava fergiv difrent fahn di way wee fergiv, how wee ku andastan wat da chroo fergivnis? Jehoava yooz difrent iloschrayshan fi help wi andastan how hihn fergiv wi. Eena dis aatikl, wi wahn taak bowt som a dehn. Som a dehn shoa wi dat wen wi ripent, Jehoava waip weh wi sinz soh dat wi ku kantinyu bee ih fren. Wen wi tink bowt dehndeh iloschrayshan, dehn wahn help wi fi lov Jehoava eevn moa ahn shoa moa apreeshiayshan far ahn bikaaz hihn fergiv wi eena lata wayz.

JEHOAVA TEK WEH WI SINZ

 5. Weh hapm wen Jehoava fergiv wi sinz?

⁵ Di Baibl taak bowt sin laik da wahn hevi load. Dis da how King Dayvid mi feel bowt ih sin dehn: “Mi sin dehn pail op oava mi hed; da laik wahn hevi load; da tu moch fi mek Ah handl.” (Saa. 38:4) Bot Jehoava fergiv peepl weh ripent. (Saa. 25:18; 32:5) Di Heebroo werd weh chranslayt az “fergiv” eena dehnya vers meenz fi “pik op” er “kehr.” Soh wen Jehoava fergiv wi sinz, hihn akchwali tek weh di gilt weh wi feel. Da laik wi mi-di bak wahn hevi load ahn hihn tek it weh fahn wi.

 6. How faar Jehoava kehr wi sin dehn fahn wi?

⁶ Wahn nada egzampl shoa wi how faar Jehoava kehr wi sin dehn fahn wi. Saam 103:12 tel wi: “Yoo kehr wi sin dehn faar fahn wi; yu kehr dehn az faar az di ees deh fahn di wes.” Ees ahn wes deh eena opozit dairekshan ahn dehn wahn neva meet. Soh dis vers di tel wi dat Jehoava kehr wi sin dehn reeli faar fahn wi. Dis mek wi noa fi shoar dat wen hihn fergiv wi, hihn tek weh wi sin dehn kompleetli.

 7. Weh Jehoava seh hihn du wid wi sin dehn? (Micah 7:​18, 19)

⁷ Afta Jehoava tek weh wi sin dehn ahn kehr dehn faar fahn wi, yu tink hihn wahn stil hoal dehn gens wi? No. King Hezikaiya mi seh: “Yoo chroa aala mi sin dehn bak a yu.” (Isa. 38:​9, 17) Dis meenz dat wen yu ripent, Jehoava chroa weh aala yu sinz ahn noh eevn luk pahn dehn agen. Da laik King Hezikaiya mi-di seh dat afta Jehoava geh rid a ih sinz da laik if dehn neva did hapm eena di fers plays. Jehoava mi seh sohnting simila da Micah 7:​18, 19. (Reed.) c Dehndeh vers seh dat Jehoava chroa wi sin dehn da di batam a di see. Bak den, wen sohnting jrap eena di see, yu wuda neva fain it agen.

 8. Weh wi laan op tu now?

⁸ Di Baibl seh dat wen Jehoava fergiv wi sinz, hihn geh rid a it kompleetli soh dat wi noh haftu feel gilti bowt it nohmoh. Dayvid mi seh: “Enibadi weh geh paadn fi di wikid tingz weh dehn du ahn geh dehn sin kova oava wahn bee hapi. Wahn persn wahn bee hapi if Jehoava  noh hoal ih sin dehn gens ahn.” (Roam. 4:​7, 8) Dat da chroo fergivnis!

JEHOAVA WASH WEH WI SIN

 9. Weh iloschrayshan Jehoava yooz fi eksplayn how kompleetli hihn fergiv wi?

⁹ Jehoava yooz wahn iloschrayshan fi help wi apreeshiayt dat bikaaz a di ransom, hihn wash weh peepl sinz az lang az dehn ripent. Di Baibl tel wi dat da laik Jehoava wash ahn rins weh wi sin dehn. (Saa. 51:7; Isa. 4:4; Jer. 33:8) Ahn dis da weh Jehoava seh wahn hapm afta dat: “Eevn doa da laik unu sin dehn brait red, dehn wahn bee wait laik snoa.” (Isa. 1:18) Ih reeli haad fi wash owt wahn brait red stayn fahn wahn klaat. Wen Jehoava yooz dis iloschrayshan, hihn mi waahn mek wi noa dat wi sinz ku geh soh kleen dat wi kyaahn eevn si dehn agen.

10. How di Baibl diskraib di way how Jehoava fergiv wi?

¹⁰ Laik weh wi taak bowt eena di laas aatikl, wen wi sin da laik wi oa Jehoava. (Mach. 18:​32-35) Sins wi inherit sin fahn Adam, wee baan di oa Jehoava. Soh evri taim wi sin, da laik wi oa Jehoava eevn moa! Bot wen Jehoava fergiv, hihn kyansl aal weh wi oa ahn. Hihn noh wahn kom afta wi fi diman payment fi di sin dehn weh hihn don fergiv. Wi soh hapi fi andastan how kompleetli Jehoava fergiv wi!

11. Weh di Baibl meen wen ih seh dat Jehoava waip weh wi sin dehn? (Aks 3:19)

¹¹ Akaadn tu Aks 3:​19, Jehoava du moa dan jos kyansl wi sinz. (Reed.) Eena di orijinal langwij, di werd fi “fergiv” eena da vers meenz fi waip weh sohnting. How dat ad moa meenin tu weh wi di taak bowt? Imajin yu oa sohnbadi, ahn dehn jos skrach owt weh yu oa dehn. Eevn doa dehn skrach it owt, yu ku stil si di amonk weh yu mi oa. Bot da vers noh di taak bowt skrach owt weh yu oa, ih di taak bowt waip it weh kompleetli. Soh wat da di difrens? Memba dat eena Baibl taimz dehn yoostu yooz wahn kaina ink weh mi eezi fi waip aaf. Dehn kuda tek wahn pees a wet sponj ahn waip weh wateva dehn mi ga rait dong. Wans dehn du dat, ih gaahn fareva. Yu kudn eevn tel dat dehn mi rait dong sohnting deh bifoa. Da laik if yu neva oa notn eena di fers plays. Wi soh hapi fi noa dat wen Jehoava fergiv wi sinz, da laik if dehn neva eevn hapm.—Saa. 51:9.

12. Weh wi laan fahn di iloschrayshan bowt wahn tik klowd?

¹² Jehoava yooz wahn simila iloschrayshan wen ih seh ih wahn waip weh wi sin. Hihn seh: “Ai wahn waip weh unu sin dehn ahn kova dehn wid wahn klowd. Ah wahn waip dehn weh ahn kova dehn wid wahn tik klowd.” (Isa. 44:22) Soh wen Jehoava fergiv wi sinz, da laik if ih yooz wahn tik klowd fi haid wi sin dehn soh dat nobadi ku si dehn, nat eevn Jehoava.

13. How wi feel wen Jehoava fergiv wi sinz?

¹³ Weh dehndeh iloschrayshan meenz fi wi? Ih meenz dat wans wi ripent fahn wi sinz, Jehoava wahn fergiv wi, soh wi noh haftu feel gilti fi di res a wi laif. Jeezas pay fi aala wi sin dehn wen ih sakrifais ih laif fi wi. Soh wen Jehoava fergiv wi sinz, da laik dehn neva did hapm. Now dat da chroo fergivnis!

JEHOAVA AKSEP WI AZ IH FREN AGEN

14. Wai wi ku chros dat Jehoava wahn kompleetli fergiv wi? (Koment pahn di picha dehn.)

¹⁴ Wen Jehoava fergiv wi sinz, wi ku bee shoar dat hihn wahn kantinyu bee wi  fren. Bikaaz Jehoava fergiv wi, wi noh need fi kantinyu feel gilti. Wi noh need fi frayd dat Jehoava stil beks wid wi an ih di luk fi wayz fi ponish wi. Wen Jehoava seh dat hihn fergiv wi, wi ku reeli chros weh ih seh. Jehoava mi tel di prafit Jerimaiya: “Ah wahn fergiv dehn sin, an Ah noh wahn memba dehn sin nohmoh.” (Jer. 31:34) Ahn Paal mi koat Jerimaiya ahn seh: “Ah noh wahn memba dehn sinz nohmoh.” (Heeb. 8:12) Bot weh dat reeli meen?

15. Weh Jehoava meen wen ih seh dat ih noh wahn memba wi sin dehn nohmoh?

¹⁵ Sohntaim di Baibl yooz di werd “memba” fi taak bowt wen yu tink bowt sohnting weh mi hapm eena di paas ahn yu du sohnting bowt it. Fi egzampl, di kriminal weh mi deh pahn di taacha stayk saida Jeezas tel ahn: “Jeezas, memba mi wen yu get eena yu Kingdom.” (Look 23:​42, 43) Eena da vers, di kriminal neva mi-di aks Jeezas fi jos tink bowt ahn, bot ih mi-di aks ahn fi du sohnting far ahn. Bays pahn Jeezas ansa, ih klyaa dat hihn wahn du sohnting fi da kriminal—ih wahn rezorek ahn. Soh den, wen Jehoava seh dat hihn noh wahn memba wi sin dehn nohmoh, dat meenz ih noh wahn du notn bowt dehn. Hihn don fergiv wi, an ih noh wahn bring bak dehndeh sin fi ponish wi laytaraan.

16. How di Baibl help wi andastan how wi feel wen Jehoava fergiv wi?

¹⁶ Di Baibl yooz wahn nada iloschrayshan fi help wi andastan dat wen Jehoava fergiv wi, wi feel free. Ih seh dat wi da laik “slayv tu sin” bikaaz wi noh perfek. Bot wen Jehoava fergiv wi, wi da laik wahn slayv weh geh “set free fahn sin.” (Roam. 6:​17, 18; Rev. 1:5) Wen wi noa dat Jehoava fergiv wi, dat ku mek wi reeli hapi jos laik wahn slayv weh geh set free.

17. How Jehoava fergivnis heel wi? (1 Peeta 2:24)

 ¹⁷ Reed 1 Peeta 2:24. Di Baibl seh dat bikaaz wi da sinaz wi da laik wahn persn weh ga wahn dedli dizeez. Bikaaz a di ransom sakrifais weh Jehoava gi wi chroo ih Son, wi geh heel fahn da dedli dizeez. (Isa. 53:5) Wen wi sin, wi damij wi rilayshanship wid Jehoava. Bot bikaaz a di ransom sakrifais, wi ku geh fergivnis ahn wi ku bee kloas frenz wid Jehoava agen. Soh jos laik how wahn persn wuda feel hapi bikaaz ih geh kyoar fahn wahn dedli dizeez, wi feel hapi bikaaz wi geh heel eena wahn spirichwal way. Sayka dat, wi ku ga wahn gud rilayshanship wid Jehoava.

WEH JEHOAVA FERGIVNIS MEENZ FI WEE?

18. Weh wi laan fahn aala di iloschrayshan dehn bowt Jehoava fergivnis? (Koment pahn di baks weh naym “How Jehoava Fergiv Wi.”)

¹⁸ Fahn owta aala di iloschrayshan bowt Jehoava fergivnis, wi laan dat wen Jehoava fergiv wi sinz da laik wi neva did komit eni sin. Ahn wi ku bee shoar dat hihn noh wahn kom bak ahn ponish wi fi eni a di sin dehn weh hihn don fergiv. Soh wi ku ga wahn gud rilayshanship wid wi Pa, Jehoava. Jehoava noh fergiv wi bikaaz wi dizerv it; hihn du it bikaaz ih lov wi an ih waahn shoa wi grayt kainis.—Roam. 3:24.

19. (a) Bays pahn Roamanz 4:​8, weh wi need fi bee graytful fa? (b) Weh wi wahn diskos eena di neks aatikl?

¹⁹ Reed Roamanz 4:8. Wi soh hapi dat Jehoava chrooli fergiv wi! (Saa. 130:4) Bot if wi waahn Jehoava fergiv wi, wi need fi kapi Jehoava egzampl ahn fergiv adaz tu. Dat da weh Jeezas mi meen wen ih seh: “If unu noh fergiv peepl wen dehn sin gens unu, den unu Faada noh wahn fergiv unu needa.” (Mach. 6:​14, 15) Eena di neks aatikl, wi wahn laan how wi ku bee fergivin laik Jehoava.