1-2. How di egzampl a di yong man eena paragraaf 1 simila tu weh wee di goh chroo tudeh?

 LESGOH seh wahn yong man groa op eena wahn rich famili, bot sodn-wan ih payrents ded eena wahn aksident. Hihn don di goh chroo wahn lat kaaz ih looz ih payrents, ahn den tingz geh eevn wers far ahn. Hihn fain owt dat ih payrents neva lef no moni far ahn. Insted, dehn spen moa dan weh dehn mi gat, soh dehn mi oa lata peepl. Soh now hihn haftu pay bak aal di moni weh dehn mi oa. Ahn di peepl weh ih payrents mi oa waahn dehn moni, bot hihn noh ga how fi pay dehn bak.

² Wi ku seh dat wee di goh chroo sohnting simila. Wi fers payrents, Adam ahn Eev, mi perfek ahn dehn mi liv eena wahn byootiful paradais. (Jen. 1:27; 2:​7-9) Dehn kuda mi liv fareva ahn bee hapi. Bot bikaaz dehn mi sin, Jehoava mi tek dehn owta di gyaadn da Eedn ahn dehn mi looz owt pahn evalastin laif. Soh da weh dehn lef fi wi? Di Baibl seh: “Sin mi fos kom eena di werl sayka wan man [Adam], ahn sin bring det. Soh det spred tu evribadi bikaaz evribadi sin, ahn sayka dat, evribadi ded.” (Roam. 5:12) Wi inherit sin fahn Adam, ahn bikaaz a dat wi ded. Di sin weh wi inherit da laik wahn big amonk a moni weh wi oa weh non a wi ku pay aaf.—Saa. 49:8.

 3. Wai wi ku kompyaa wi sinz tu sohnting weh wi oa?

 ³ Di Baibl kompyaa sin tu sohnting weh wi oa. (Mach. 18:​32-35) Wi oa Jehoava fi evri sin weh wi du. Soh di moa wi sin, di moa wi oa ahn. Ahn wi haftu pay bak weh wi oa tu Jehoava. Bot di onli way wi ku pay fi wi sinz da if wi ded.—Roam. 6:​7, 23.

 4. (a) Weh wuda hapm tu aala wi if wi noh geh help fahn Jehoava? (Saam 49:​7-9) (b) Weh “sin” meenz eena di Baibl? (Koment pahn di baks weh naym “ Sin.”)

⁴ Yu tink wi ku geh bak aal weh Adam ahn Eev mi laas? No. Wi kuda neva du dat pahn wi oan. (Reed Saam 49:​6-9.) Widowt Jehoava help, wi noh ga no hoap fi liv fareva er fi geh rezorek. Wi wuda bee laik animalz weh jos ded ahn noh geh wahn chaans fi eva liv agen.—Ikl. 3:19; 2 Peet. 2:12.

 5. How Jehoava help wi fi pay aaf wi sinz? (Koment pahn di picha.)

⁵ Mek wi tink bowt di yong man weh wi mi taak bowt eena paragraaf wan. How hihn wuda feel if wahn rich man aafa fi pay bak evriting weh ih oa? Fi shoar, hihn wuda bee reeli graytful ahn tek da aafa pahn di spat. Jehoava du sohnting simila fi wee. Hihn gi wi wahn gif weh pay aaf di sin weh wi inherit fahn Adam. Dis da how Jeezas diskraib it: “Gaad lov di werl soh moch dat ih giv ih onli Son, soh dat evribadi weh shoa fayt eena ahn noh wahn geh dischrai bot wahn liv fareva.” (Jan 3:16) Ahn bikaaz a da gif, wi ku aalso ga wahn gud rilayshanship wid Jehoava.

 6. Weh wi wahn taak bowt eena dis aatikl, ahn wai?

⁶ Weh wi need fi du fi benifit fahn dis gif ahn geh fergivnis fi wi sinz? Fi help wi ansa da kweschan, wi wahn luk pahn sohn difrent ekspreshan weh di Baibl yooz ahn wi wahn geh fi andastan weh dehn meen. Wen wi meditayt pahn dehn, wi wahn geh wahn beta andastandin a aal weh Jehoava du fi fergiv wi, ahn wi wahn bee moa tankful tu ahn.

JEHOAVA WAAHN WI GA PEES WID AHN

 7. (a) Wat aal Adam ahn Eev looz owt pan? (b) Az Adam ahn Eev pikni, weh wi need help wid? (Roamanz 5:​10, 11)

⁷ Wen Adam ahn Eev sin, dehn mi kyaahn liv fareva nohmoh. (Look 3:38) Ahn dehn kudn bee Jehoava fren needa. Bifoa dehn sin, dehn da-mi paat a Jehoava famili. Bot wen dehn disobay  Jehoava, dehn kudn bee paat a fi hihn famili nohmoh. Aala dis mi hapm bifoa dehn staat tu ga pikni. (Jen. 3:​23, 24; 4:1) Sayka dat, aala dehn pikni, inkloodin wee, need help fi kohn bak tu Jehoava ahn mek pees wid ahn. (Reed Roamanz 5:​10, 11.) Wi noh waahn bee Jehoava enimi nohmoh; wi waahn bee ih fren. Dat meenz dat wi need fi fiks bak wi rilayshanship wid ahn, an hihn da di wan weh mek it pasabl. How hihn du dat?

JEHOAVA MEK IT PASABL FI WI GA PEES WID AHN

 8. Weh Jehoava du fi mek wi ku fiks bak wi rilayshanship wid ahn?

⁸ Jehoava mek it pasabl fi mek aala wi ku bee ih fren. Hihn mi araynj wahn way fi bai bak weh Adam looz. How hihn du dat? Hihn mi haftu pay wid sohnting weh ga di saym egzak valyu az weh Adam looz. Da araynjment da weh mek it pasabl fi mek wi ga pees wid Jehoava ahn bee ih fren.—Roam. 3:25.

 9. Weh araynjment Jehoava mi mek soh dat hihn kuda mi fergiv di Izrelait dehn sinz?

⁹ Joorin di taim a di Izrelaits, Jehoava mi araynj wahn way fi mek hihn kuda mi fergiv dehn sinz soh dat dehn kuda mi ga wahn gud rilayshanship wid hihn. Wan day owta di yaa, di hai prees wuda aafa op sohn sakrifais fi di peepl. Ada taimz, di Izrelait dehn mi aafa sakrifais fi dehn sinz tu. Bot dehndeh animal sakrifais kuda neva reeli tek weh dehn sinz, bikaaz animalz noh ga di saym valyu az peepl. Stilyet, Jehoava mi wilin fi aksep dehndeh sakrifais ahn fergiv dehn sinz az lang az dehn mi ripent. (Heeb. 10:​1-4) Dehndeh sakrifais mi help di Izrelaits fi memba dat dehn neva perfek ahn dat dehn mi need wahn beta sakrifais fi tek weh dehn sinz fareva.

10. Weh Jehoava mi du soh dat wi ku reeli geh fergivnis fi wi sinz?

¹⁰ Wat da-mi di beta sakrifais weh Jehoava araynj fa? Jehoava mi alow ih Son fi “aafa op ihself jos wan taim fi di sin dehn a lata peepl.” (Heeb. 9:28) Jeezas mi giv “ih laif az wahn ransom fi sayv lata peepl.” (Mach. 20:28) Bot wat da wahn ransom?

JEEZAS SAKRIFAIS PAY DI PRAIS

11. (a) Wai wi need wahn ransom? (b) Weh kaina persn kuda pay di ransom?

¹¹ Wahn ransom da wahn prais weh yu haftu pay fi bai bak sohnting. a Wai wee need wahn ransom? Memba, Adam ahn Eev mi looz dehn perfek laif ahn soh dehn kudn liv fareva nohmoh. Wee inherit sin fahn Adam ahn wi need fergivnis fi wi sinz. Akaadn tu di Baibl, Jehoava disaid dat sohnbadi mi wahn haftu pay wahn ransom fi mek hihn ku fergiv wi sinz ahn fi mek wi ku bee ih fren. Da ransom mi wahn haftu bee eekwal tu weh Adam mi looz. (1 Tim. 2:6) Soh di onli persn weh kuda pay da ransom prais wuda haftu bee wahn perfek man weh kuda mi liv fareva pahn ert ahn weh wuda wilin fi giv op ih laif fi wi. Da onli den da persn laif kuda mi pay di ransom prais.

12. Wai Jeezas kuda mi pay di ransom prais?

¹² Noatis dehnya chree reezn wai Jeezas kuda mi pay di ransom prais. (1) Hihn mi perfek—“hihn neva komit no sin.” (1 Peet. 2:22) (2) Bikaaz hihn mi  perfek, hihn kuda mi liv fareva pahn ert. (3) Hihn mi wilin fi ded ahn giv op ih laif fi wi. (Heeb. 10:​9, 10) Jeezas da-mi wahn perfek man, jos laik how Adam mi stan bifoa ih sin. (1 Kor. 15:45) Soh Jeezas mi giv op fi hihn perfek laif fi pay fi di perfek laif weh Adam laas. (Roam. 5:19) Dat da wai di Baibl kaal Jeezas “di laas Adam.” Bikaaz a weh Jeezas mi du, nobadi els mi need fi kom ahn pay fi weh Adam mi looz. Jeezas “mi onli haftu du dis wan taim,” ahn hihn wahn neva haftu du it agen.—Heeb. 7:27; 10:12.

13. Weh mek it pasabl fi wi ga wahn gud rilayshanship wid Jehoava?

¹³ Weh mek it pasabl fi mek wi ga wahn gud rilayshanship wid Jehoava? Jehoava oapm op wahn way soh dat hihn ku fergiv wi sinz. Ahn Jeezas sakrifais ih perfek laif fi pay di prais, er fi free wi fahn wi sin dehn.—Ifee. 1:7; Heeb. 9:14.

JEHOAVA SET WI FREE FAHN SIN AHN DET AHN KAAL WI RAICHOS

14. Weh wi wahn taak bowt neks?

¹⁴ How wi benifit fahn weh Jehoava mi du fi wi? Fi mek wi ansa da kweschan, wi wahn taak bowt too tingz weh ku help wi andastan how wi ku benifit fahn Jehoava fergivnis.

15-16. (a) Weh di ransom set wi free fram? (b) How yoo feel fi bee free fahn sin ahn det?

¹⁵ Di Baibl seh dat bikaaz di ransom don geh pay, wee ku bee free. Di apasl Peeta mi seh it laik dis: “Kaaz unu noa dat da neva wid tingz weh ku geh dischrai, laik silva er goal, dat Gaad mi reskyu unu [er, set unu free] fahn di wotlis way a laif weh unu ansesta dehn paas aan tu unu. No, bot da mi wid di preshos blod a Krais, di Lam weh neva ga notn rang wid ahn.”—1 Peet. 1:​18, 19.

¹⁶ Bikaaz a di ransom sakrifais, wee ku bee free fahn sin ahn det, weh mek wi sofa. (Roam. 5:21) Soh wi tankful tu Jehoava ahn Jeezas bikaaz dehn reskyu wi wen Jeezas giv ih laif fi wi.—1 Kor. 15:22.

17-18. (a) Weh ih meen wen Jehoava aksep wi az raichos peepl? (b) How wi benifit wen Jehoava aksep wi az raichos peepl?

¹⁷ Di Baibl seh dat Jehoava aksep ih servant dehn az raichos peepl. Dat meenz dat wi ga wahn kleen rekad fronta hihn ahn wi noh haftu pay fi di sin dehn weh wi komit. Stilyet, dat noh meenz dat hihn di goh gens ih oan standadz. Hihn noh kaal wi raichos bikaaz wi dizerv it er bikaaz ih talarayt di sinz weh wi komit. Jehoava mek di araynjments fi set wi free, ahn Jeezas pay di ransom prais. Az lang az wi shoa fayt eena weh Jehoava ahn Jeezas du fi wi, Jehoava wilin fi fergiv wi fi wi sinz.—Roam. 3:24; Gal. 2:16.

¹⁸ How wi benifit wen Jehoava aksep wi az raichos peepl? Owta aala di peepl weh Gaad aksep az raichos, hihn pik som fi rool wid Jeezas da hevn an ih kaal dehn fi hihn chiljren. (Tai. 3:7; 1 Jan 3:1) Hihn don fergiv dehn sinz, ahn da laik if dehn neva komit eni sin. Dat da wai dehn kwalifai fi bee paat a Jehoava Kingdom. (Roam. 8:​1, 2, 30) Ahn di res a peepl weh Gaad aksep az raichos wahn ga di hoap fi liv fareva pahn ert. Jehoava fergiv dehn sinz an ih kaal dehn ih fren. (Jay. 2:​21-23) Di Baibl seh dat wahn big krowd a peepl wahn servaiv Armagedon ahn dat dehn noh wahn eva haftu ded. (Jan 11:26) Di “peepl weh mi raichos” ahn di  “peepl weh neva raichos” weh don ded wahn geh rezorek. (Aks 24:15; Jan 5:​28, 29) Wahn day wahn kohn wen evribadi weh obay Gaad pahn ert wahn “ga di wandaful freedom weh bilangz tu di chiljren a Gaad.” (Roam. 8:21) Wi kyaahn wayt fi da day!

19. How wi laif beta now bikaaz a weh Jehoava ahn Jeezas du fi wi? (Koment pahn di baks weh naym “ Weh Jehoava Fergivnis Meenz fi Wee?”)

¹⁹ Wi yoostu deh eena wahn simila sichuwayshan tu di yong man weh wi mi taak bowt eena paragraaf wan. Bot wi sichuwayshan chaynj bikaaz Jehoava mek wahn araynjment fi mek wi ku geh fergivnis fi wi sinz ahn Jeezas mi pay di ransom fi mek dat pasabl. Wi ku geh set free fahn sin ahn det if wi shoa fayt eena Jeezas Krais. Wen Jehoava fergiv wi sinz, da laik dehn neva did hapm. Bot moa impoatant, wi ku ga wahn gud rilayshanship wid wi lovin hevnli Faada, Jehoava.

20. Weh wi wahn taak bowt eena di neks aatikl?

²⁰ Wen wi tink bowt aal weh Jehoava ahn Jeezas du fi wi, wi feel reeli gud. (2 Kor. 5:15) Widowt fi dehn help, wi neva mi wahn ga no hoap. Eena di neks aatikl, wi wahn taak bowt sohn egzampl weh deh eena di Baibl weh wahn help wi fi si dat wen Jehoava fergiv wi, wi noh need fi kip aan di feel gilti.