SOHNTAIM, yes. Mek wi luk pahn jos wan egzampl. Deuteronomy 24:14, 15 seh: “If yu haiya wahn werkman weh poa ahn need help, yu noh fi chaans ahn op. Ih noh mata if da yu brada er wahn farina weh liv eena di lan . . . Adawaiz, ih mait krai owt tu Jehoava gens yu, ahn yu wahn ga sin.”

Yaaz agoa, kloas tu Ashdod, dehn mi fain wahn rekad a wahn kays jos laik dis. Ih mi rait dong pahn wahn pees a klay pat, an ih dayt aal di way bak tu moa dan 600 yaaz bifoa Jeezas mi baan pahn di ert. Da mi bowt wahn man weh mi-di bayg fi jostis. Ih praabli mi-di werk pahn wahn faam ahn neva finish ih werk pahn taim. Di raitin pahn di klay pat mi seh: “Afta yu servant [di persn weh mi-di bayg fi jostis] mi finish put op aala di haavis wahn fyoo dayz agoa, Hoshayahu, di son a Shobay kom ahn tek weh yu servant kloaz. . . . Aala di ada man dehn weh mi-di werk lang wid mi eena di brailin son hat ku tel yu . . . dat weh Ah di seh da chroo. Ah noh gilti a du notn rang. . . . Eevn if di govna noh feel rispansabl fi mek shoar dehn sen bak mi kloaz, pleez stil du it kaaz yu sari fi mi noh! Pleez noh stay kwaiyet pahn dis mata kaaz Ah need mi kloaz.”

Simon Schama, wahn man weh teech hischri, seh dat weh dis man mi seh “noh jos tel wi humoch di man mi waahn bak [ih kloaz], ih aalso tel wi dat di man mi noa di laa eena di Baibl gud, espeshali di laa eena Leviticus ahn Deuteronomy weh seh noh fi chreet poa peepl bad.”