1. Weh prablemz wi haftu deel wid, bot wai Jehoava hapi wid ih faytful servant dehn? (Koment pahn di picha da di biginin a dis aatikl.)

LAIF eena dis sistem ful a prablemz an ih noh eezi. Lata wi bradaz ahn sistaz di deel wid seeryos siknis. Adaz di tek kayr a oalda famili membaz, eevn doa dehn dehnself oal tu. Adaz di schrogl fi provaid di baysik tingz weh dehn famili need. Ahn wi noa tu dat lata bradaz di deel wid moa dan wan prablem at di saym taim. Dis tek wahn lata taim, enerji, ahn moni. Bot Jehoava wahn help yu. Tingz wahn geh beta bikaaz yu ga fayt eena fi hihn pramis dehn. Dis reeli mek Jehoava hapi!

2. How Isaiah 40:29 ku inkorij wi, bot weh seeryos mistayk wi mait mek?

² Sohntaim wi mait feel laik wi ga soh moch prablemz eena laif dat wi kyaahn bayr op. If yoo feel soh, yu noh deh bai yuself. Di Baibl tel wi dat som a Gaad faytful servants eena di paas mi feel laik dehn kudn kantinyu. (1 Ki. 19:4; Job 7:7) Bot, insteda giv op, dehn mi luk tu Jehoava fi gi dehn di schrent weh dehn mi need. Dehn neva geh diskorij bikaaz Gaad “gi schrent tu di wan weh taiyad.” (Isa. 40:29) Bot ih sad dat som a Gaad peepl tudeh feel laik di bes way fi deel wid dehn prablemz da fi stap serv Jehoava fi wahn lee wail. Dehn  feel laik da wahn berdn fi serv Jehoava, insteda wahn blesin. Soh dehn stap reed di Baibl, goh da meetin, ahn preech. Dat da egzakli weh Saytan waahn dehn du.

3. (a) How wi ku bee schrang eevn doa Saytan di chrai get wi week? (b) Weh wi wahn diskos eena dis aatikl?

³ Di Devl noh waahn wi bee schrang. Ahn hihn noa dat wi geh schranga wen wi stay bizi eena wi servis tu Jehoava. Soh wen yu feel taiyad eena wahn fizikal an imoashanal way, noh jraa weh fahn Jehoava. Insteda dat, jraa kloasa tu Gaad kaaz ‘hihn wahn mek yu stan op schrang.’ (1 Pee. 5:10; Jay. 4:8) Eena dis aatikl wi wahn laan wai Jehoava da di onli Persn weh ku schrentn wi, laik weh Isaiah 40:26-31 seh. Den wi wahn diskos too sichuwayshan weh mait sloa wi dong eena wi servis tu Jehoava. Wi wahn laan how fi yooz Baibl prinsiplz weh wahn help wi noh fi giv op.

4. Weh wi ku laan fahn Isaiah 40:26?

⁴ Reed Isaiah 40:26. * Soh faar, nobadi ku konk aala di staar dehn eena di yoonivers. Saiyentis seh dat 400 bilyan staar deh eena jos di Milki Way galaksi. Ahn stil, Jehoava giv eech staar wahn naym. Weh wi ku laan bowt Jehoava fahn dis? Wel, if Jehoava inchrestid eena di staar dehn, yu noh tink dat hihn inchrestid eena yoo tu? Espeshali bikaaz yu di serv ahn owta lov, ahn noh bikaaz yu haftu! (Ps. 19:1, 3, 14) Jehoava noa evriting bowt yu. Di Baibl seh dat “hihn eevn konk humoch grayn a hyaa deh pahn yu hed.” (Mach. 10:30) Di saamis seh dat Jehoava si weh di raichos wan dehn goh chroo. (Ps. 37:18) Fi shoar, Jehoava si aala yu prablemz, ahn hihn wahn gi yu di schrent fi fays aala dehn.

5. How wi noa dat Jehoava ku schrentn wi?

⁵ Reed Isaiah 40:28. * Aala di enerji ahn powa rong wi da fahn Jehoava. Tink bowt di amonk a enerji di son gat. Wahn saiyens raita weh naym David Bodanis mi seh dat di son ga di saym amonk a enerji az bilyanz a atomik bomz. Wahn nada persn seh dat eena wan sekant, di son ku mek inof enerji fi gi hyoomanz weh dehn wuda need fi di neks 200,000 yaaz! Yoo noh tink dat di Persn weh gi di son soh moch enerji ku gi yoo di schrent fi deel wid yu prablem dehn?

6. How Jeezas yoak eezi fi kehr, ahn how dis mek wi feel?

⁶ Reed Isaiah 40:29. * Wen wi serv Jehoava, ih mek wi feel hapi. Jeezas mi tel ih disaipl dehn: “Jos laik how dehn kow tek dehn wud yoak pahn dehn shoalda, tek mai yoak pahn fi yoo wan.” An ih seh: “Yu wahn fain res fi yu soal. Di yoak weh Ah gi yu noh haad fi bak, ahn di load weh Ah gi yu noh hevi ataal.” (Mach. 11:28-30) Weh di Baibl seh ya da chroo! Sohntaim wi mait feel taiyad fi goh da di meetin er pahn feel servis. Bot how wi feel wen wi goh bak hoam? Wi feel beta, laik wi ga moa enerji fi deel wid wi prablemz. Jeezas yoak eezi fi kehr fi chroo!

7. Gi wahn egzampl weh shoa dat weh Machyu 11:28-30 seh da chroo.

 ⁷ Mek wi luk pahn di egzampl a wan a wi sista dehn. Shee sofa fahn wahn siknis weh mek ih aalwayz feel taiyad [chronic fatigue syndrome], dipreshan, ahn bad hedayk. Soh sohntaim shee fain it haad fi goh da di meetin dehn. Bot wahn day ih mek di lee efoat fi gaahn, an aftawodz ih seh: “Di taak da-mi bowt diskorijment. Di way di brada mi gi di taak, da laik ih mi andastan weh Ah di goh chroo; ih mek Ah krai anaal. Ah riyalaiz dat Ah need fi deh da mi meetin dehn.” Shee mi hapi dat ih mi mek di efoat fi gaahn!

8, 9. Weh di apasl Paal mi meen wen ih seh: “Wen Ah week, da den Ah schrang”?

⁸ Reed Isaiah 40:30. * Wi mait ga lata skilz, bot wi stil kyaahn du evriting pahn wi oan schrent. Dat da wahn lesn aala wi haftu laan. Di apasl Paal kuda mi du wahn lata tingz, bot ih kudn du evriting ih mi waahn du. Wen ih mi tel Jehoava how ih feel, Jehoava tel ahn: “Mai powa werk di bes wen yu week.” Paal mi andastan weh Jehoava mi-di tel ahn. Dat da wai Paal mi seh: “Wen Ah week, da den Ah schrang.” (2 Kor. 12:7-10) Weh ih meen wen ih seh dat?

⁹ Paal riyalaiz dat ih kudn du evriting pan ih oan. Ih mi need help fahn Gaad. Jehoava hoali spirit kuda mi gi Paal powa wen ih mi feel week. An ih kuda mi gi Paal di powa fi du tingz weh ih kudn du pan ih oan schrent. Di saym ting ku hapm tu wee. If Jehoava gi wi fi hihn hoali spirit, wee ku bee schrang!

10. How Jehoava mi help Dayvid fi indyoar ih prablemz?

¹⁰ Di saamis Dayvid yoostu feel di powa a Jehoava spirit . Ih seh: “Wid fi yoo help Ai ku fait wahn gang; wid fi yoo powa Ai ku klaim wahn waal.” (Ps. 18:29) Jos laik how wahn hai waal mait luk impasabl fi klaim, fi wee prablemz mait luk laik dehn soh big dat wi kyaahn deel wid dehn pahn wi oan. Soh, wi need Jehoava help.

11. How di hoali spirit help wi fi deel wid wi prablem dehn?

¹¹ Reed Isaiah 40:31. * Di eegl noh stay eena di skai ahn flai faar pan ih oan. Ih yooz di powa a di waam ayaa weh di goh op fahn di grong fi help ahn stay hai op eena di skai. Dis help ahn fi sayv ih enerji soh ih ku flai fi wahn lang taim. Soh wen yoo di fays wahn prablem weh feel laik da tu moch fi yu handl, memba di eegl. Bayg Jehoava fi gi yu di powa chroo ih ‘hoali spirit.ʼ (Jan 14:26) Wi ku aks Jehoava fi ih spirit enitaim a di day, aal day if wi haftu. An espeshali wen wi di ga prablemz wid wi bradaz er sistaz eena di kangrigayshan, wi ku aks Jehoava fi help. Bot wai wi ga prablemz wid wi bradaz eena di fos plays?

12. Wai wi ga prablemz wid wi bradaz er sistaz?

¹² Wel, wi wahn ga prablemz wid wi bradaz bikaaz wi noh perfek. Af koars, dehn wahn ga taimz wen wi bradaz er sistaz mait seh er du tingz tu wi weh mait mek wi geh beks, er ih ku bee dat da wee get dehn beks. Dis ku bee wahn seeryos tes. Bot ih gi wi wahn apachooniti fi bee laayal tu Jehoava. Wen wi werk tugeda wid wi bradaz ahn sistaz, wi di bee laayal tu Jehoava. Dehn noh perfek, ahn hihn lov dehn jos laik dat. Soh wi fi du di saym ting.

13. Weh wi ku laan bowt Jehoava fahn di egzampl a Joazef?

 ¹³ Wi laan fahn di egzampl a Joazef dat Jehoava noh aalwayz stap difrent tes ahn chraiyalz eena wi laif. Wen Joazef da-mi wahn yong man, ih jelos brada dehn mi sel ahn az wahn slayv. Ih mi en op way da Eejip. (Gen. 37:28) Jehoava mi-di si egzakli weh mi-di hapm ahn mi feel sad fi si how dehn mi-di chreet ih fren, Joazef. Stilyet, ih neva du eniting fi stap it. Laytaraan, wen Potifa waif akyooz Joazef a rayp, ahn Joazef gaahn da jayl, Jehoava stil neva du notn. Bot yu tink Gaad mi faget Joazef? No, az a mata a fak, di Baibl seh dat Jehoava mi bles evriting weh ih mi du.—Gen. 39:21-23.

14. How wi benifit wen wi “noh hoal aan” tu anga?

¹⁴ Wahn nada egzampl da-mi Dayvid. Hihn mi gaahn chroo lata bad chreetment. Moas peepl mait neva noa weh dat feel laik. Bot Dayvid da-mi Gaad fren ahn hihn neva alow ihself fi geh soh beks. Insted, ih seh: “Let goh yu anga ahn noh hoal aan tu it; noh geh soh beks dat yu goh du weh bad.” (Ps. 37:8) Di moas impoatant reezn fi “noh hoal aan” tu anga da bikaaz wi waahn bee laik Jehoava. Hihn “noh deel wid wi akaadn tu wi sin dehn.” (Ps. 103:10) Wi get ada benifit tu wen wi “noh hoal aan” tu anga. Ih ku help wi fi stay helti. Fi egzampl, wen wi eezi fi geh beks, wi ku en op wid hai blod presha, longz prablem, liva prablem, stomok prablem, er damij wi pankriyas. Wen wi geh beks, wi noh tink schrayt. Ahn sohntaim ih ku mek wi en op wid dipreshan. Ih moch beta fi stay kaam. Di Baibl seh: “Wahn kaam haat gi laif tu di badi.”(Prov. 14:30) Soh, weh wi ku du wen wi bradaz hert wi feelinz? Ahn how wi ku mek op bak wid wi brada? Wi haftu fala di advais eena di Baibl.

15, 16. Weh wi ku du if wan a wi bradaz er sistaz hert wi?

¹⁵ Reed Ifeezhanz 4:26. Ih noh sopraiz wi wen peepl eena di werl chreet wi bad. Bot mek wan a wi bradaz er sistaz hert wi—ih bon wi, wi feel soh hert. Wat if wi kyaahn faget weh mi hapm? Wi wahn stay beks fi yaaz ahn yaaz? Er wi wahn fala di waiz advais eena di Baibl ahn setl di prablem rait away? Di langa wi tek fi taak tu wi brada, di haada ih wahn bee fi mek pees.

¹⁶ Sopoaz wahn brada hert yu ahn yu kyaahn stap tink bowt it. Weh yu ku du  fi mek pees? Di fos ting yu ku du da pray tu Jehoava. Aks ahn fi help yu ga wahn gud kanvasayshan wid yu brada. Gaad lov yu brada. Memba, hihn da Jehoava fren tu. (Ps. 25:14) Jehoava kain tu aala ih fren dehn, an ih ekspek wi fi du di saym ting. (Prov. 15:23; Mach. 7:12; Kol. 4:6) Di sekant ting yu ku du da fi goh oava eena yu main weh yu wahn seh. Noh tink dat yu brada mi hert yu fi spait. Maybi da-mi wahn mistayk er yoo neva andastan di sichuwayshan. Bee wilin fi aksep dat maybi yoo da-mi paat a di prablem. Chrai dis wen yu meet wid yu brada, tel ahn: “Maybi Ah tu tin-skin, bot wen yu mi taak tu mi yestudeh, Ah mi feel . . .” If yu noh mek op wid yu brada afta da lee taak, noh giv op. Chrai fain wahn nada taim fi taak tu ahn. Pray fi yu brada. Aks Jehoava fi bles ahn an fi help yu si ih gud wayz. Fi shoar Jehoava wahn bee hapi bikaaz yu di chrai mek pees wid yu brada hoo da wan a Gaad fren.

17. How Jehoava help wi fiks wi rilayshanship wid hihn wen wi sin, ahn wai wi fi aksep ih help?

¹⁷ Som a wi bradaz ahn sistaz feel dat dehn noh dizerv fi serv Jehoava bikaaz a sinz weh dehn mi komit eena di paas. Wen wi aalwayz feel gilti, wi noh ga pees, hapinis, an enerji. King Dayvid mi schrogl wid gilti feelinz. Ih mi seh: “Wen Ah neva seh eniting, mi boan dehn ways weh bikaaz a di payn Ah feel aal day. Day ahn nait yu han mi hevi pahn mi.” Dayvid mi ga di korij fi deel wid ih prablem laik wahn spirichwal man. Ih seh: “Ah fainali kanfes mi sin tu yu, ahn yu fagiv mi sin dehn.” (Ps. 32:3-5) If yu komit wahn seeryos sin, Jehoava wahn help yu fiks yu rilayshanship wid hihn. Bot yu haftu aksep di help weh ih di gi yu chroo di elda dehn. (Prov. 24:16; Jay. 5:13-15) Noh ways taim—noh looz owt pahn evalastin laif! Bot sopoaz yu kanshans stil di taament yu eevn afta Jehoava don fagiv yu? Weh yu ku du?

18. How Paal egzampl help wi if wee feel dat wi noh dizerv fi serv Jehoava?

¹⁸ Dehn mi ga taimz eena Paal laif wen ih mi feel diskorij bikaaz a sinz weh ih mi komit eena di paas. Ih seh: “Ai da di lees a aal di ada apasl dehn. Ai noh eevn fit fi mek dehn kaal mee wahn apasl, kaa Ai mi mek di peepl a Gaad sofa.” Bot ih seh afta dat: “Da sayka di grays a Gaad mek Ai bee hoo mee now.” (1 Kor. 15:9, 10) Jehoava mi noa dat Paal neva perfek. Bot ih mi aksep ahn jos laik dat, an ih mi waahn Paal fi memba dat tu. If yoo ripent fahn di batam a yu haat fi yu sin dehn ahn don taak tu Jehoava ahn kanfes tu di elda dehn, den fi shoar Jehoava wahn fagiv yu. Soh bileev dat Jehoava don fagiv yu an aksep ih fagivnis!—Isa. 55:6, 7.

19. Wat da di yaateks fi 2018, ahn wai wi need it?

¹⁹ Az wi geh kloasa tu di en a dis sistem, wi ku ekspek fi ga moa ahn moa prablemz. Bot wi need fi memba dat Jehoava da di Wan weh “gi schrent tu di wan weh taiyad ahn lata powa tu di wan weh week” soh dat dehn ku kantinyu serv ahn. (Isa. 40:29; Ps. 55:22; 68:19) Wi wahn memba dis impoatant chroot joorin 2018 kaaz evri taim wi kohn da di meetin wi wahn si wi yaateks: “Di wan dehn weh di hoap eena Jehoava wahn get bak dehn schrent.”—Isa. 40:31.