1, 2. Eena 2018, wich ivent wahn yoonait wi eena wahn speshal way? (Koment pahn di picha da di biginin a dis aatikl.)

PAHN Maach 31, 2018, Jehoava Witnisiz ahn milyanz a ada peepl wahn gyada tugeda fi selibrayt Krais Eevnin Meel. Afta di son goh dong, milyanz wahn meet tugeda fi di Memoaryal a Jeezas det. Evri yaa, di Memoaryal da di onli ivent weh yoonait peepl fahn aal oava di werl!

² Wi ku onli imajin how Jehoava ahn Jeezas feel wen dehn si milyanz a peepl rong di werl di goh da dis speshal ivent. Di Baibl mi prafesai dat ‘wahn big big krowd, weh nobadi kuda konk wuda kohn fahn owta evri nayshan, chraib, ahn langwij eena di werl.ʼ Dehn mi wahn di hala owt seh, “Fi wee Gaad, weh sidong pahn di chroan, ahn di Lam, da dehn sayv wee!” (Rev. 7:9, 10) Di Memoaryal bring aana ahn prayz tu Jehoava ahn Jeezas. Dis reeli wandaful fi chroo!

3. Wat da sohn kweschan wi wahn ansa eena dis aatikl?

³ Dis aatikl wahn ansa foa kweschan. (1) How Ai ku pripyaa  fi di Memoaryal soh dat Ah ku benifit fan it? (2) Eena weh way di Memoaryal yoonait aala Gaad peepl? (3) Weh Ai ku du fi sopoat da yooniti? (4) Wen wahn bee di laas Memoaryal?

4. Wai ih impoatant fi mek wi deh da di Memoaryal?

⁴ Ih reeli impoatant fi mek wi deh da di Memoaryal. Memba, wi meetin dehn da paat a wi wership tu Jehoava. Wi noa dat hihn ahn Jeezas si aal hoo mek di efoat fi deh da dis meetin—di moas impoatant wan fi di yaa. Wi waahn Jehoava ahn Jeezas si dat notn wahn stap wi fahn dehdeh. Di onli way wi noh gwehn da di Memoaryal da if ih impasabl fi goh. Wen wi shoa Jehoava dat wi meetin dehn impoatant tu wi, wi gi hihn wan moa reezn fi kip wi naym eena “di buk a laif.” Da buk gat een di naym a di wan dehn weh wahn geh evalastin laif.—Mal. 3:16; Rev. 20:15.

5. Joorin di weeks bifoa di Memoaryal, how wi ku chek wi rilayshanship wid Jehoava?

⁵ Joorin di weeks bifoa di Memoaryal, spen ekschra taim di pray ahn tink bowt wi rilayshanship wid Jehoava. (Reed 2 Korintyanz 13:5.) Di apasl Paal mi tel di Kristyanz bak den fi ‘chek dehn haat gud ahn si if dehn di liv eena fayt fi chroo.ʼ How wi ku du dat? Wi ku aks wiself: ‘Ai reeli bileev dat Ai da paat a di onli aaganaizayshan weh Jehoava pik fi du fi hihn wil? Ai di du mi bes fi preech ahn teech di gud nyooz a di Kingdom? Mai akshanz shoa dat Ai bileev wi di liv eena di laas dayz ahn dat Saytan wahn soon geh dischrai? Ai ga di saym chros eena Jehoava ahn Jeezas laik wen Ah mi fos staat serv Jehoava?ʼ (Mach. 24:14; 2 Tim. 3:1; Heeb. 3:14) Wen wi tink bowt di ansa dehn tu dehndeh kweschan, ih wahn help wi fi ‘tes wiself.ʼ

6. (a) Wat da di onli way fi geh evalastin laif? (b) How wahn elda pripyaa fi di Memoaryal evri yaa, ahn how yu ku fala fi hihn egzampl?

⁶ Wan way yu ku pripyaa fi di Memoaryal da fi reed ahn tink bowt di aatikl dehn weh eksplayn wai dis ivent soh impoatant. (Reed Jan 3:16; 17:3, NW.) * * Di onli way fi geh evalastin laif da fi “geh fi noa” Jehoava ahn fi ‘eksasaiz faytʼ eena Jeezas, Ih onli-bigatn Son. Fi pripyaa fi di Memoaryal, wi ku chooz stodi proajek weh ku help wi jraa kloasa tu Jehoava ahn Jeezas. Noatis weh wahn brada weh di serv az wahn elda fi wahn lang taim du. Fi yaaz, ih sayv eni Wachtowa aatikl weh taak bowt di Memoaryal ahn di lov weh Jehoava ahn Jeezas shoa wi. Evri now an agen, ih ad nyoo aatikl tu weh ih gat aredi. Evri yaa wen hihn du dis lang wid di Memoaryal Baibl reedin, ih fain owt dat ih laan nyoo tingz. Ih geh fi lov Jehoava ahn Jeezas moa ahn moa. Tu hihn, dis da di moas impoatant benifit. If yoo stodi laik dis, ih wahn help yu fi lov an apreeshiayt Jehoava ahn Jeezas eevn moa, ahn yu wahn benifit moa fahn di Memoaryal.

7. (a) Weh Jeezas mi pray fa pahn di nait ih selibrayt di fos Eevnin Meel wid ih disaipl dehn? (b) How wi noa dat Jehoava mi ansa da pryaa?

⁷ Jeezas mi seh wahn speshal pryaa  wid ih apasl dehn di saym nait ih mi selibrayt di Eevnin Meel. Ih mi pray bowt di preshos yooniti weh hihn an ih Faada gat, an ih mi pray dat ih disaipl dehn wuda mi ga da saym yooniti. (Reed Jan 17:20, 21.) Fi shoar Jehoava don ansa Jeezas pryaa, ahn now milyanz a peepl bileev dat Hihn mi sen ih Son fi ded fi wi. Da di Memoaryal, wi reeli geh fi si di yooniti a Jehoava Witnisiz. Pahn da day, peepl fahn aal difrent konchri ahn skin kala meet tugeda aal oava di werl. Eena sohn konchri doh, ih schraynj fi si peepl fahn aal difrent rays di ga wahn rilijos meetin tugeda, ahn sohn peepl tink dat wi noh fi du sohnting laik dat. Bot dat da noh how Jehoava ahn Jeezas feel. Tu dehn, di yooniti da di Memoaryal da sohnting reeli byootiful!

8. Weh Jehoava mi tel Izeekyel bowt yooniti?

⁸ Wi noh sopraiz fi si dis kaina yooniti, aftaraal, wee da Jehoava peepl. Hihn mi seh dis mi wahn hapm. Ih mi tel di prafit Izeekyel fi fain too stik, wan “fi Jooda” ahn wan “fi Joazef.” Den ih mi fi jain dehn tugeda soh dat dehn da wan stik. (Reed Ezekiel 37:15-17.) * Eena di Joolai 2016 Wachtowa, di aatikl “Kweschanz Weh Peepl Aks,” seh: “Chroo di prafit Izeekyel, Jehoava mi prafesai dat fi hihn peepl mi wahn goh bak tu di Pramis Lan ahn dat dehn mi wahn bee yoonaitid az wan nayshan agen. Dis prafesi mi seh tu, dat Gaad peepl wahn bee yoonaitid eena dehnya laas dayz.”

9. How wi si di yooniti weh Izeekyel mi prafesai bowt wen wi ga wi Memoaryal evri yaa?

⁹ Sins 1919, Jehoava di aaganaiz ahn yoonait di anointid bradaz ahn sistaz agen. Dehn da-mi laik di stik “fi Jooda.” Den, moa ahn moa bradaz wid di hoap fi liv fareva pahn di ert jain di anointid bradaz. Dehn da laik di stik “fi Joazef.” Jehoava mi pramis fi jain di too stik dehn tugeda ahn “mek dehn wan stik” eena ih han. (Ezek. 37:19) Di too groop di serv wan King, Jeezas Krais. (Ezek. 37:24, 25) Di too groop da “wan flak.” (Jan 10:16; Zech. 8:23) Wi si dis preshos yooniti bitween di anointid ahn di ‘ada sheepʼ evri yaa wen dehn gyada tugeda fi selibrayt di Memoaryal a Jeezas det! Weh wi ku du fi sopoat dis yooniti ahn mek ih laas fareva?

10. How wi ku sopoat di yooniti weh deh monks Gaad peepl?

¹⁰ Wat da di fos way wi ku sopoat fi wee yooniti? Wi haftu werk haad fi bee hombl. Wen Jeezas mi deh pahn di ert, ih tel ih disaipl dehn dat dehn need fi bee hombl. (Mach. 23:12) If wi hombl, wi noh wahn ak laik peepl eena di werl weh onli tink tu moch a dehnself. Wen wi hombl, wi wahn rispek di bradaz weh di tek di leed eena di kangrigayshan. Da onli den di kangrigayshan wahn bee yoonaitid. If wi stay hombl, Gaad wahn hapi wid wi bikaaz hihn ‘deh gens dehn wan weh prowd, bot ih help dehn wan weh hombl.ʼ—1 Pee. 5:5.

11. How wi sopoat wi yooniti wen wi tink bowt weh di bred ahn wain stan fa joorin di Memoaryal?

¹¹ Wat da di sekant way wi ku sopoat wi yooniti? Tink bowt weh di bred ahn wain stan fa. Wi fi du dis bifoa di  Memoaryal, an espeshali pahn da nait. (1 Kor. 11:23-25) Di bred stan fi Jeezas perfek badi weh ih sakrifais, ahn di wain stan fi ih blod. Bot wi need fi du moa dan jos andastan weh di bred ahn wain stan fa. Wi need fi memba dat chroo di ransom sakrifais, Jehoava ahn Jeezas shoa grayt grayt lov fi wi. Jehoava shoa humoch ih lov wi wen ih sen ih Son fi ded fi wi, ahn Jeezas shoa ih lov fi wi wen ih mi wilin fi giv op ih laif fi wi. Wen wi stap ahn tink bowt humoch dehn lov wi, wee wahn lov dehn di saym way. Ahn di lov weh wee ahn wi bradaz ga, da laik wahn schring weh tai wi tugeda ahn schrentn wi yooniti.

12. Eena di stoari bowt di king an ih slayv dehn, how Jeezas mi shoa dat Jehoava ekspek wi fi fagiv wi brada dehn?

¹² Wat da di terd way wi ku sopoat wi yooniti? Wi haftu fagiv wi bradaz. Wen wi du dis, wi di shoa dat wi apreeshiayt dat Jehoava fagiv wi oan sin dehn. Fi mek wi andastan wai ih impoatant fi fagiv wi bradaz, Jeezas mi gi wahn lee stoari bowt wahn king an ih slayv dehn. Yu ku reed da lee stoari da Machyu 18:23-34. Afta yu don reed it, aks yuself: ‘Ai waahn du weh Jeezas seh fi du? Ai payshent wid mi bradaz ahn shoa dat Ah andastan how dehn feel? Ai redi fi fagiv mi brada er sista if ih hert mi?ʼ Af koars, dehn ga sohn sin weh moa seeryos dan adaz, ahn sohn sin haada fi mek wi fagiv az hyoomanz. Bot, Jeezas lee stoari di teech wi weh Jehoava ekspek fahn wi. (Reed Machyu 18:35.) Jeezas neva beet rong di bush ataal; ih seh dat if wi noh fagiv wi bradaz wen wi ga reezn fi fagiv dehn, den Jehoava noh wahn fagiv wee. Now dat da sohnting fi tink bowt fi chroo! Wi sopoat ahn protek wi preshos yooniti wen wi fagiv wi bradaz laik weh Jeezas teech wi fi du.

13. How wi sopoat yooniti wen wi mek pees wid wi bradaz?

¹³ Wen wi fagiv adaz, wi di shoa dat wi waahn mek pees. Memba di apasl Paal mi seh dat ‘hoali spirit jain wi tugeda eena pees, soh wi fi chrai wid aal wi haat  fi gree tugeda, soh dat wi kud aal ga pees wid wan anada.ʼ (Ifee. 4:3) Soh rong di Memoaryal taim, an espeshali pahn da nait, tink bowt how yu chreet ada peepl. Aks yuself: ‘Ada peepl ku si dat Ai da sombadi weh noh hoal malis? Mi bradaz ahn sistaz ku si dat Ai di chrai haad fi mek pees ahn protek wi yooniti?ʼ Dehnya da sohn seeryos kweschan fi tink bowt dis taim a di yaa.

14. How wi shoa dat wi lov wi bradaz ahn dat wi ga payshens wid dehn?

¹⁴ Wat da di foat way wi ku sopoat yooniti? Fala Jehoava egzampl ahn shoa lov. (1 Jan 4:8) Wi wuda neva waahn seh dis bowt wi bradaz: “Ai haftu lov dehn bikaaz dehn da mi bradaz, bot Ah noh haftu laik dehn”! If wi tink laik dis, wi noh di fala Paal kongsl fi ‘shoa lov ahn ga payshens wid wan anada.ʼ (Ifee. 4:2) Hihn neva jos seh fi “ga payshens wid wan anada” bot ih seh fi ‘shoa lov.ʼ Wai ih seh fi du dis? Wel, eena wi kangrigayshan wi ga aal kaina peepl, ahn da Jehoava jraa dehn tu hihn. (Jan 6:44) Sins da Jehoava jraa dehn tu hihn, den ih si di gud eena dehn. Soh den, how eni wan a wi ku joj wi brada az sombadi weh noh dizerv wi lov? Jehoava koman wi fi lov wi bradaz, soh wi mos lov dehn how hihn seh.—1 Jan 4:20, 21.

15. How wi noa dat wi wahn ga wahn laas Memoaryal?

¹⁵ Wan day wi wahn goh da di Memoaryal an ih wahn bee di laas taim. How wi noa dat? Eena Paal fos leta tu di anointid Kristyanz, ih tel dehn fi memba Jeezas det. Dehn mi fi memba ih det “til hihn kohn bak.” (1 Kor. 11:26) Wen Jeezas mi-di taak bowt di laas dayz, ih mi seh dat ih wahn kohn bak tu. Soh Paal ahn Jeezas mi-di taak bowt di saym ting. Jeezas mi-di taak bowt di grayt chribyulayshan wen ih seh: “Da taim deh di sain dat di Son a Man di kohn wahn apyaa eena di skai, ahn aala di peepl dehn pahn di ert wahn baal. Dehn wahn si di Son a Man di kom eena di klowd dehn a di skai wid powa, ahn ih wahn di shain eena aala ih gloari. Ahn ih wahn sen owt ih aynjel dehn wid wahn big chrompit blaas, ahn dehn wahn gyada aala fi hihn speshal peepl dehn weh hihn pik, fahn wan en a di ert tu di neks.” (Mach. 24:29-31) Dis skripcha seh dat Jeezas wahn “gyada aala fi hihn speshal peepl.” Dis wahn hapm wen aala di anointid Kristyan weh stil deh pahn di ert goh da hevn. Ih wahn hapm afta di fos paat a di grayt chribyulayshan don, bot bifoa Armagedon. Den aala di 144,000 wahn jain Jeezas ahn fait gens di king dehn a di ert. (Rev. 17:12-14) Di Memoaryal weh wi selibrayt bifoa Jeezas gyada di anointid fi goh liv da hevn wahn bee di laas wan, bikaaz den, di prafesi dehn weh taak bowt di taim wen Jeezas wahn kohn bak wahn don kohn chroo.

16. Wai notn fi stap yu fahn goh da di Memoaryal dis yaa?

¹⁶ Soh, noh mek notn stap wi fahn goh da di Memoaryal pahn Maach 31, 2018. Ahn mek wi aks Jehoava fi help wi du fi wee paat fi protek di yooniti a fi hihn peepl! (Reed Psalm 133:1.) * Memba, wan day di Memoaryal wi selibrayt wahn bee di laas wan. Meenwail, mek wi du wi bes fi deh da di Memoaryal, ahn mek wi cherish di byootiful yooniti wi feel pahn da speshal nait.