1. Wai di taim weh wi di liv eena soh difrent fahn di paas?

WI LIV eena wahn taim weh difrent fahn ada taimz eena di paas. Di Baibl mi prafesai dat Jehoava wahn gyada “wahn big big krowd . . . fahn owta evri nayshan eena di werl, fahn owta evri chraib ahn evri langwij eena di werl.” Dis krowd da “wahn maiti nayshan” weh da moa dan ayt milyan hapi peepl weh ‘di serv Gaad day ahn nait eena ih hows.ʼ (Rev. 7:9, 15; Isa. 60:22) Now moa dan eva, wahn lata peepl di geh fi lov Gaad ahn dehn nayba.

2. Weh kaina lov wi si eena peepl weh da noh frenz wid Gaad? (Koment pahn di picha da di biginin a dis aatikl.)

² Di Baibl mi prafesai dat eena fi wee day, peepl weh deh faar fahn Gaad wahn shoa wahn difrent kaina lov—dehn wahn lov dehnself. Di apasl Paal mi seh: “Joorin di laas dayz . . . , peepl wahn lov dehnself, lov moni, . . . ahn lov plezha insteda lov Gaad.” (2 Tim. 3:1-4, NW) Dis kaina lov da di opozit a di kaina lov weh Kristyanz shoa. Peepl weh lov dehnself wahn neva fain di hapinis weh dehn di luk fa. Insted, dehn mek dis werl wahn moa selfish plays. Ih haad  fi deh rong peepl weh onli tink bowt dehnself.

3. Weh wi wahn egzamin eena dis aatikl, ahn wai?

³ Di apasl Paal mi noa dat moa ahn moa peepl wuda lov dehnself, an dat dis mi wahn bee daynjaros fi Kristyanz. Soh ih waan wi fi noh ‘miks op wid dehn peepl.ʼ (2 Tim. 3:5) Bot wi liv eena dis werl ahn wi kyaahn avoid peepl weh da laik dis aal di taim. Soh how wi ku avoid di bad atichood weh deh rong wi ahn chrai fi pleez Jehoava, di Gaad a lov? Mek wi si di difrens bitween di kaina lov wahn Kristyan ga, ahn di kaina lov weh 2 Timoti 3:2-4 taak bowt. Dis wahn help wi fi egzamin wiself ahn si if wi di shoa di kaina lov weh wahn mek wi reeli hapi.

4. Wai ih noh rang fi mek wi lov wiself wahn lee bit?

⁴ Paal mi seh dat “peepl wahn lov dehnself.” Ih noh rang fi mek wi lov wiself. Dis naamal; wi need fi lov wiself. Da soh Jehoava mek wi. Jeezas seh: “Yu fi lov yu nayba sayhn laik how yu lov yuself.” (Maak 12:31) If wi noh lov wiself, wi kyaahn lov wi nayba. Ahn di Baibl seh: ‘Wahn hozban fi lov ih waif jos laik how ih lov ih oan badi. Di man weh lov ih waif lov ihself. Aftaraal, nobadi neva yet hayt ih oan badi. Insted, wi feed wi badi ahn tek kayr a it.ʼ (Ifee. 5:28, 29) Soh ih okay fi lov wiself.

5. How yu wuda diskraib peepl weh ga tu moch lov fi dehnself?

⁵ Wen 2 Timoti 3:2 seh dat “peepl wahn lov dehnself,” ih noh di taak bowt di gud kaina lov weh peepl fi ga fi dehnself. Ih di taak bowt wahn kaina lov weh mek peepl tink onli bowt dehnself ahn tink dehn beta dan ada peepl. (Reed Roamanz 12:3.) Dehn onli kay bowt dehnself ahn noh kay bowt nobadi els. Wen tingz goh rang, dehn blaym adaz insteda dehnself. Peepl laik dat noh hapi non ataal.

6. How wi benifit wen wi ga lov fi Gaad?

⁶ Wai Paal mi put dat peepl mi wahn lov dehnself az di fos ting pahn di lis? Maybi da bikaaz dat da weh wi di si di moas joorin di laas dayz. Wen peepl lov dehnself, dehn du di ada bad tingz weh di res a di skripcha taak bowt. Bot peepl hoo lov Gaad difrent. Di Baibl lis aaf dis kaina lov lang wid hapinis, pees, payshens, kainis, ahn fayt. Dis kaina persn wahn bee hombl, adaz wahn ku pen pahn dehn, ahn dehn wahn ku kanchroal dehnself. (Gal. 5:22, 23) Di saamis seh: “Di peepl hoo ga Jehoava az dehn Gaad wahn bee hapi!” (Ps. 144:15) Jehoava da di hapi Gaad, an ih peepl ga da saym hapinis. Dehn hapi fi du tingz fi adaz. Dehn da noh laik peepl weh lov dehnself ahn noh waahn du notn fi nobadi.—Aks 20:35.

7. Wat da sohn kweschan wi ku aks wiself fi si humoch wi lov Gaad?

⁷ How wi ku fain owt if wi lov wiself moa dan Gaad? Tink bowt di waanin da Filipiyanz 2:3, 4: ‘Unu mosn du notn owta selfishnis er praid. Unu sopoas tu bee hombl ahn noh tink dat unu beta dahn enibadi els. Unu mos luk owt fi wan anada, ahn noh onli fi unu oanself.ʼ Now, mek wi aks wiself dehnya kweschan: ‘Ai di du weh dis  skripcha seh fi du? Ai di chrai help adaz eena di kangrigayshan an eena di minischri?ʼ Ih noh aalwayz eezi fi help adaz. Ih tek wahn lata haad werk ahn sakrifais. Bot wi noa dat di Sovrin a di yoonivers wahn bee hapi wid wi. Notn ku mek wi moa hapi dan dat!

8. Weh som a wi bradaz du bikaaz dehn lov Gaad?

⁸ Som a wi bradaz giv op dehn gud jab fi du moa fi Jehoava bikaaz dehn lov hihn. Fi egzampl, Ericka da wahn dakta weh liv da di U.S. Bot insteda foakos onli pan ih jab, shee staat regyula painyaa. Shee an ih hozban mi serv eena difrent konchri. Shee seh: “Wen Ah luk bak pahn aala di difrent ekspeeryens weh wi geh bikaaz wi di help owt eena wahn difrent langwij, ahn di frenz weh wi mek, wi feel dat wi laif ga moa meenin now. Ah stil werk az wahn dakta, bot Ah geh moa hapinis ahn satisfakshan wen Ah foakos mi taim an enerji pahn help peepl laan bowt Jehoava.”

9. Wai wahn persn hoo lov moni kuda neva reeli bee hapi?

⁹ Paal mi seh dat peepl wahn “lov moni.” Sohn yaaz agoa, wahn painyaa da Ireland mi-di taak tu wahn man bowt Gaad. Di man tek owt sohn moni fahn owta ih walit ahn seh: “Dis da mai gaad!” Eevn doa noh lata peepl wuda seh it laik dat, di werl ful op a peepl weh lov moni ahn di tingz weh moni ku bai. Bot di Baibl waan wi seh: “Wahn persn weh lov silva wahn neva ga inof silva, ahn wahn persn weh lov richiz wahn neva ga inof moni.” (Eccl. 5:10) Peepl laik dis wahn aalwayz waahn moa moni ahn spen dehn hoal laif di chrai get it. Bot dehn onli wahn “brok dehn haat.”—1 Tim. 6:9, 10.

10. Wai Ayger mi seh: “Noh mek Ah bee rich er poa”?

¹⁰ Af koars, aala wi need moni. Ih ku protek wi. (Eccl. 7:12) Bot yu tink wahn persn ku bee hapi if ih onli ga di baysik tingz eena laif? Af koars ih kud! (Reed Ecclesiastes 5:12.) * Ayger son a Jaykeh mi seh: “Noh mek Ah bee rich er poa. Jos mek Ah ga inof food.” Wi ku andastan wai ih wudn waahn bee dert poa. Ayger eksplayn dat ih noh waahn en op di teef notn bikaaz ih rang fi du dat. Bot wai ih mi pray fi noh bee rich? Ih seh: “Soh dat Ah noh bee satisfai ahn ton mi bak pahn yu ahn seh, ‘Da hoo da Jehoava?ʼ” (Prov. 30:8, 9) Yu noa enibadi hoo chros eena dehn moni insteda Gaad?

11. Weh Jeezas mi seh bowt moni?

¹¹ Enibadi weh lov moni kyaahn pleez Gaad. Jeezas mi seh: “Nobadi kyaahn serv too maasta. Eeda yu wahn hayt wan ahn lov di neks, er yu wahn rispek wan ahn kyaahn stan di neks wan. Rait soh, unu kyaahn serv Gaad ahn moni sayhn taim.” Bot bifoa ih mi seh dat, ih seh dis: “Yu noh fi put op yu richiz dong ya pahn dis ert, wehpaa insek ku dischrai it, er weh ih ku geh rosti, er weh teef ku tek it. Insteda du dat, sayv op richiz eena hevn fi unuself, wichpaa insek kyaahn eet it, ih kyaahn geh rosti, ahn teef kyaahn  teef it needa.”—Mach. 6:19, 20, 24.

12. How ih eeziya fi serv Gaad if wi kip wi laif simpl? Pleez koment pahn di egzampl eena di paragraaf.

¹² Wahn lata wi bradaz feel hapiya wen dehn kip dehn laif simpl kaaz ih gi dehn moa taim fi serv Jehoava. Fi egzampl, Jak weh liv da di U.S., sel ih nais big hows ahn bizniz bikaaz ih mi noa dat if ih mi du dat, hihn an ih waif mi wahn ku painyaa. Ih seh; “Ih mi haad fi sel wi hows ahn prapati. Bot fi yaaz Ah wuda get hoam schres owt bikaaz a prablemz da werk. Ahn mi waif, hoo da wahn regyula painyaa, aalwayz hapi. Shee wuda tel mi, ‘Ai ga di bes baas eva!ʼ Now, di too a wi di werk fi di saym Persn, Jehoava.”

13. Wat da sohn kweschan wi ku aks wiself fi si how wi feel bowt moni?

¹³ Wen wi egzamin wiself fi si how wi feel bowt moni, wi haftu bee aanis. Wi ku aks wiself dehnya kweschan: ‘Ai reeli bileev weh di Baibl seh bowt moni? Mai jab kohn fos eena mi laif? Ai kay moa bowt mateeryal tingz dan mi rilayshanship wid Jehoava ahn wid peepl? Ai reeli chros eena Jehoava fi provaid weh Ah need?ʼ Wi noa dat hihn wahn neva disapoint enibadi weh hoap eena hihn.—Mach 6:33.

14. How wi ku shoa dat wi ga wahn balans vyoo a plezha?

¹⁴ Eena dehnya laas dayz, peepl wahn “lov plezha.” Jos laik how notn rang fi ga wahn gud ahn balans vyoo a wiself ahn moni, notn rang fi ga wahn balans vyoo a plezha. Jehoava noh waahn wi geh soh schrik wid wiself dat wi noh ga no fon non ataal. Di Baibl seh: “Goh, eet yu food eena hapinis, ahn jrink yu wain wid wahn hapi haat.”—Eccl. 9:7.

15. Weh kaina plezha 2 Timoti 3:4 di taak bowt?

¹⁵ Di kaina plezha 2 Timoti 3:4 di taak bowt da di kain weh lef owt Gaad. Di vers noh seh dat peepl wahn lov plezha moa dan Gaad kaaz dat wuda  meen dat dehn ga wahn lee bit a lov fi Gaad. Bot di vers seh “insteda Gaad.” Wahn persn weh koment pahn dis vers seh: “Dis vers noh meen dat dehn lov Gaad wahn lee bit tu. Ih meen dat dehn noh lov Gaad non ataal.” Dis da wahn seeryos waanin fi enibadi hoo lov plezha! Peepl weh “lov plezha” da peepl hoo alow ‘di richiz ahn di plezha eena laif fi choak di Werd owta dehn.ʼ—Look 8:14.

16, 17. Weh wi ku laan bowt plezha fahn Jeezas egzampl?

¹⁶ Jeezas mi ga wahn perfek vyoo a plezha. Ih mi gaahn da wahn “wedn” ahn “wahn big bankwit.” (Jan 2:1-10; Look 5:29) Ih mi eevn du wahn mirakl da di wedn; ih ton waata tu wain. Ahn wahn nada taim, wen sohn peepl mi-di kritisaiz ahn fi eet ahn jrink, ih rijek dehn.—Look 7:33-36.

¹⁷ Stilyet, Jeezas neva mek plezha bee di moas impoatant ting eena ih laif. Ih put Jehoava fos ahn werk haad fi help ada peepl. Ih mi wilin fi ded eena wahn paynful way soh dat wi ku liv. Jeezas mi seh dis bowt enibadi weh fala fi hihn egzampl: “Gaad bles unu wen peepl insolt unu ahn haraas unu ahn tel aal kaina lai pahn unu sayka weh unu bilangz tu mee. Memba seh dat da di sayhn way dehn mi chreet di prafit dehn weh mi deh bifoa fi unu taim. Soh unu fi rijais ahn unu fi hapi, kaa Gaad di sayv wahn big riwaad eena hevn fi unu.”—Mach. 5:11, 12.

18. Wat da sohn kweschan weh ku help wi fi noa humoch wi lov plezha?

¹⁸ If wi waahn noa humoch wi lov plezha, wi ku aks wiself dehnya kweschan: ‘Entataynment moa impoatant tu mee dan mi meetin ahn feel servis? Ai wilin fi giv op sohn injaiment eena laif bikaaz Ai waahn serv Gaad? Wen Ai di chooz mi entataynment, Ai stap ahn tink fos bowt how Jehoava feel bowt it?ʼ If wi reeli lov Gaad, wi noh onli wahn avoid di tingz weh ih noh laik, bot eevn di tingz weh wi tink ih noh laik.—Reed Machyu 22:37, 38.

19. Weh kaina peepl kuda neva reeli bee hapi?

¹⁹ Hyoomanz di liv ahn sofa eena Saytan werl fi di paas 6,000 yaaz. Bot ih wahn soon geh dischrai. Di ert ful op wid peepl weh lov dehnself, moni, ahn plezha. Peepl laik dis onli tink bowt weh dehn ku get, ahn foakos onli pahn weh dehn waahn eena laif. Peepl laik dis kuda neva reeli bee hapi. Bot di Baibl seh: “Hapinis bilangz tu di persn hoo ga di Gaad a Jaykop az dehn helpa, di persn hoo put ih hoap eena Jehoava ih Gaad.”—Ps. 146:5.

20. How yu lov fi Gaad di mek yoo hapi?

²⁰ Az Jehoava servants, wi lov hihn moa ahn moa. Evri yaa, lat moa peepl di geh fi laan bowt hihn ahn lov ahn tu. Dis da proof dat Gaad Kingdom di rool ahn dat wi wahn soon injai blesinz pahn dis ert. Wee ku bee reeli hapi wen wi noa dat wi di pleez di Sovrin a di yoonivers ahn di du fi hihn wil. An aal hoo lov Jehoava wahn bee hapi fareva! Eena di neks aatikl, wi wahn taak bowt som a di atichood weh peepl ga wen dehn lov dehnself, ahn wi wahn si how dehndeh atichood difrent fahn di wan dehn weh Jehoava servants gat.