1, 2. Weh chalenj Gaad servant dehn fays tudeh? (Koment pahn di picha da di biginin a dis aatikl.)

WAHN lata dakta ahn ners werk rong peepl weh sik. Som a di dizeez eezi fi spred. Dehn tek kayr a dehn payshents bikaaz dehn waahn help dehn. Bot, dehn need fi protek dehnself soh dat dehn noh kech eni dizeez weh di payshent mait gat. Eena da saym way, wahn lata wi liv ahn werk rong peepl weh ga wayz an atichood weh difrent fahn wahn Kristyan. Dis ku bee wahn chalenj.

² Eena di laas dayz a dis werl, peepl hoo noh lov Gaad noh kay weh Gaad seh bowt rait ahn rang. Eena 2 Timoti, Paal mi seh how peepl hoo noh di serv Gaad wahn bihayv. An ih onli wahn geh wos az di en geh kloasa. (Reed 2 Timoti 3:1-5, 13, NW.) *  Eevn doa wi mait kyaahn bileev dat peepl wuda ak laik dis, wi ku staat tu tink an ak jos laik dehn widowt eevn noa it. (Prov. 13:20) Eena dis aatikl, wi wahn si how di atichood weh peepl ga eena dehnya laas dayz difrent fahn di wan dehn weh Gaad peepl gat. Ahn wi wahn laan how wi ku protek wiself ahn noh ak laik peepl eena di werl wail wi di help adaz geh fi noa Jehoava.

3. Weh kaina peepl 2 Timoti 3:2-5 di taak bowt?

³ Di apasl Paal seh dat “eena di laas dayz, wi wahn di deel wid haad taimz.” Den ih lis aaf 19 difrent atichood weh peepl wahn gat. Dis lis da nayli laik di wan da Roamanz 1:29-31, bot di lis da 2 Timoti lee langa, ahn Paal mi menshan tingz weh yu kyaahn fain no way els eena di Kristyan Greek Skripchaz. Wen Paal mi lis aaf dehnya bad atichood, ih seh dat “peepl” mi wahn bihayv soh. Bot noh evribadi wuda bihayv da way. Kristyanz faar difrent.—Reed Malachi 3:18. *

4. How yu wuda diskraib wahn prowd persn?

⁴ Afta Paal mi seh dat peepl wahn lov dehnself ahn moni, ih seh dat dehn wahn bee boasi, prowd, ahn hai-maindid. Peepl laik dis tink dehn beta dan adaz bikaaz a how dehn luk, weh dehn ku du, dehn pozishan eena laif, er di amonk a moni weh dehn gat. Dehn waahn ada peepl admaiya dehn. Wahn teecha mi seh dat wen wahn persn prowd, da laik dehn ga wahn lee alta eena dehn haat weh dehn bow dong tu ahn wership dehnself.” Som peepl seh dat praid soh disgostin dat eevn peepl weh prowd noh laik si praid eena adaz.

5. How som a Gaad faytful servant dehn mi en op prowd?

⁵ Jehoava hayt praid. (Prov. 6:16, 17) Wahn prowd persn deh faar fahn Gaad. (Ps. 10:4) Praid kohn fahn di Devl. (1 Tim. 3:6) Eevn som a Jehoava faytful servants mi en op geh prowd. Fi egzampl, Yuzaiya da-mi wahn faytful King fi yaaz. Di Baibl seh: “Bot az soon az ih mi geh powaful, ih haat geh prowd. Dis mi leed ahn tu ih oan dischrokshan. Ih neva stay faytful tu Jehoava ih Gaad. Ih gaan eena Jehoava templ ahn bon insens pahn di alta weh da fi insens.” Layta, eevn King Hezikaiya mi geh prowd fi wahn lee wail.—2 Chron. 26:16; 32:25, 26.

6. Weh kuda mi kaaz Dayvid fi geh prowd, bot wai ih mi stay hombl?

⁶ Som peepl geh prowd eeda bikaaz dehn luk gud, er bikaaz evribadi laik dehn. Er maybi dehn ku sing er play wahn inschrument gud, dehn schrang, er dehn ga wahn lee pozishan. Dayvid neva jos ga wan a dehnya tingz, ih mi gat aala dehn; yet ih mi stay hombl ih hoal laif. Afta ih mi kil Golaiyat ahn Saal giv ahn ih daata fi bee ih waif, Dayvid mi seh: “Da hoo mee ahn da hoo mai famili er mai pa famili eena aala Izrel, fi mek Ai ku bee di King son-in-laa?” (1 Sam. 18:18) Weh mi help Dayvid fi stay hombl? Evriting ih mi du, ih gud wayz an ih privilij dehn, da-mi bikaaz Gaad “mi stup dong,” er hombl ihself, fi luk pahn ahn. (Ps. 113:5-8) Dayvid mi noa dat evriting gud weh ih mi gat da-mi fahn Jehoava.—Kompyaa 1 Korintyanz 4:7.

7. Weh wahn help wi fi bee hombl?

⁷ Jos laik Dayvid, Jehoava peepl tudeh  di chrai bee hombl. Ih toch wi haat fi noa dat Jehoava, di graytis Persn eena di yoonivers, da wahn hombl Persn. (Ps. 18:35) Soh wi chrai du weh di Skripcha seh ahn ‘mek wi haat goh owt tu wan anada; bee kain ahn hombl, chreet wan anada gud, ahn ga payshens wid wan anada.ʼ (1 Kor. 13:4) Wi noa dat if wi ga lov, wi noh wahn ‘tink tu moch a wiself ahn bee prowd.ʼ—1 Pee. 3:1.

8. (a) How dis werl inkorij chiljren fi bihayv? (b) Weh di Baibl seh chiljren fi du?

⁸ Paal mi taak bowt how peepl wahn chreet wan anada eena di laas dayz. Ih seh dat chiljren “noh wahn lisn tu dehn payrents.” Nowadayz, wahn lata moovi, T.V. proagram, ahn buks, inkorij chiljren noh fi lisn tu dehn payrents. Bot wen chiljren aalwayz waahn ga dehn oan way ahn noh waahn lisn, ih hert di famili. Ahn wen yu damij di famili, ih damij di kamyooniti. Fahn eva sins, hyoomanz noa dat dis da wahn fak. Fi egzampl, yaaz agoa da Greece, if wahn man wuda nak ih payrents, dehn wuda kik ahn owta di vilij. Ahn da Rome, if wahn persn wuda nak ih pa, di laa wuda deel wid ahn laik if ih mi komit merda. Di Heebroo ahn Greek Skripchaz koman chiljren fi aana dehn payrents.—Ex. 20:12; Ifee. 6:1-3.

9. Weh wahn help yong peepl fi lisn tu dehn payrents?

⁹ Jos laik how wahn ners ku protek ihself fahn kech wahn dizeez, chiljren ku protek dehnself eevn wen adaz rong dehn noh di lisn tu fi dehn payrents. Dehn ku tink bowt aala di gud tingz dehn payrents du fi dehn. Dehn need fi andastan dat Gaad, hoo da evribadi Pa, ekspek dehn fi obay dehn payrents. Wen chiljren seh gud tingz bowt dehn payrents, dehn ku help ada chiljren fi ga moa lov ahn rispek fi fi dehn payrents. Af koars, if payrents noh shoa lov fi dehn chiljren, ih mait bee haad fi mek dehn chiljren lisn tu dehn. Wahn lee yong brada weh naym Austin seh: “Eevn doa Ah du tingz ahn chrai get weh wid it, di roolz weh mi payrents set noh tu schrik, ahn dehn aalwayz eksplayn di reezn wai. Dis help wi fi taak tu wan anada an ih help mi fi lisn tu dehn. Ah ku si dat dehn kay fi mi ahn dis mek Ah waahn pleez dehn.”

10, 11. (a) How peepl shoa dat dehn noh ga lov fi wan anada? (b) Humoch lov chroo Kristyanz fi ga fi ada peepl?

¹⁰ Paal mi taak bowt sohn ada atichood weh shoa dat peepl noh wahn ga lov fi wan anada. Afta ih mi seh dat chiljren “noh wahn lisn tu dehn payrents” ih seh dat peepl wahn bee angraytful. Wen wi tink bowt it, ih mek sens fi chroo, bikaaz dat da weh wi wuda seh bowt sombadi weh noh apreeshiayt wen peepl du tingz fi dehn. Paal mi seh tu dat peepl noh wahn bee laayal. Dehn wahn kyaahn gree wid nobadi. Peepl laik dis noh waahn mek pees wid nobadi. Dehn wahn insolt op ahn bichray wan anada. Peepl laik dis seh kruwil ahn hertful tingz bowt ada peepl ahn bowt Gaad. Den Paal seh dat peepl wahn slanda adaz. Dehnya kaina peepl seh bad tingz bowt adaz fi damij dehn repyutayshan. *

¹¹ Bot Jehoava servants tudeh difrent fahn di peepl rong dehn. Fi hihn servants ga chroo lov fi dehn nayba. Dis da noh sohnting dehn jos staat tu du tudeh. Jeezas mi seh dat lov fi wi nayba da di sekant  moas impoatant komanment eena di Laa weh Jehoava mi gi Moaziz. Di fos wan da lov fi Gaad. (Mach. 22:38, 39) Ahn Jeezas mi seh dat peepl wahn noa chroo Kristyanz bikaaz a dehn lov fi wan anada. (Reed Jan 13:34, 35.) Wahn Kristyan wuda shoa dis kaina lov eevn tu ih enimi.—Mach. 5:43, 44.

12. How Jeezas mi shoa lov fi adaz?

¹² Jeezas mi shoa humoch hihn lov peepl. Ih gaahn fahn siti tu siti di tel dehn di gud nyooz a di Kingdom a Gaad. Ih mi heel peepl weh mi kyaahn waak, si, er hyaa. Ih mi eevn heel peepl wid leprosi ahn rayz di ded. (Look 7:22) Pahn di en, ih ded fi hyoomanz eevn doa som a dehn mi hayt ahn. Di lov weh Jeezas ga fi hyoomanz da di egzak kaina lov Jehoava ga fi wi. Ih kapi ih Faada lov eena wahn perfek way. Aal oava di werl, Jehoava Witnisiz di fala Jeezas egzampl ahn shoa lov fi adaz.

13. Yooz di egzampl eena di paragraaf fi shoa how fi wee lov fi adaz ku jraa sombadi tu Jehoava.

¹³ Di lov wi shoa ku jraa adaz tu wi hevnli Faada. Fi egzampl, wahn man da Thailand mi gaahn da wan a wi reejinal kanvenshan, an ih mi onli laik si how di bradaz reeli lov wan anada. Wen ih gaahn bak hoam, ih seh ih waahn stodi di Baibl too taimz fi di week. Ih staat preech tu aala ih relitiv dehn, ahn siks monts afta da kanvenshan, ih mi giv ih fos Baibl reedin da di Kingdom Haal. Wee di shoa lov fi adaz? Aks yuself: ‘Ai di shoa lov tu mi famili, mi bradaz eena mi kangrigayshan, ahn peepl owt eena di minischri? Ai si peepl di way Jehoava si dehn?ʼ

14, 15. Wat da sohn bad atichood wahn lata peepl ga tudeh? How som a dehn chaynj dehn laif fi di beta?

¹⁴ Eena dehnya laas dayz, wi di si sohn ada terabl atichood eena peepl. Ih mek wi feel laik wi noh waahn ga notn fi du wid dehn. Peepl widowt Gaad hayt weh gud, noh ga self-kanchroal, ahn vishos ahn goh aan laik wail animal. Som a dehn stobant; yu kyaahn tel dehn notn. Peepl  laik dis noh tink bifoa dehn du tingz, ahn dehn noh kay bowt adaz.

¹⁵ Wahn lata peepl hoo yoostu bee laik dis chaynj dehn laif fi di beta. Di Baibl mi prafesai dat peepl wahn mek dis kaina chaynj. (Reed Isaiah 11:6, 7.) * Eena da skripcha, wi reed bowt wail animal laik wulf ahn laiyan weh di liv eena pees wid animal laik lam ahn kow. Wai dehn wahn liv eena pees? Da “bikaaz di ert wahn bee ful op a di nalij a Jehoava.” (Isa. 11:9) Sins di animal dehn kyaahn laan bowt Jehoava, dis prafesi mos di taak bowt di chaynjiz weh hyoomanz wahn mek.

16. How di Baibl help peepl fi chaynj?

¹⁶ Wahn lata wi bradaz da-mi laik vishos wulf, bot now dehn laan fi liv eena pees wid adaz. Yu ku reed som a dehn ekspeeryens eena di seeriz “The Bible Changes Lives” eena di poblik Wachtowa. Peepl weh geh fi noa ahn serv Jehoava da noh peepl weh di priten fi serv Gaad bot noh waahn Gaad tel dehn weh fi du. Insted, wi bradaz weh yoostu bee vishos bifoa, da laik wahn “nyoo persn weh Gaad mek fi bee laik hihn.” Da nyoo persn “liv hoali, ahn du weh rait eena Gaad sait.” (Ifee. 4:23, 24) Di moa wahn persn laan bowt Gaad, di moa ih si dat ih need fi mek chaynjiz eena ih laif ahn liv akaadn tu weh di Baibl seh. Ih mait chaynj weh ih bileev, ih atichood, an ih kandok. Ih noh eezi fi mek dehnya chaynjiz, bot Gaad wahn yooz fi hihn spirit fi help enibadi weh reeli waahn du fi hihn wil.

17. Weh wi ku du soh dat wi noh ga di bad atichood a peepl eena dis werl?

¹⁷ Yu di geh fi si di difrens moa ahn moa bitween wahn persn weh di serv Gaad ahn wahn persn weh noh di serv ahn. Wee weh di serv Gaad doh, haftu bee kyaaful dat wi noh staat ak laik peepl weh noh di serv Gaad. Da fi wi oan gud fi fala di kongsl fi noh ga notn fi du wid di kaina peepl weh 2 Timoti 3:2-5 taak bowt. Af koars, wi kyaahn aalwayz avoid peepl weh ak laik weh di skripcha seh. Wi mait haftu werk lang wid dehn, goh da skool wid dehn, er eevn liv wid dehn. Bot wi noh haftu tink an ak laik dehn. Weh ku help wi? Wi haftu schrentn wi rilayshanship wid Jehoava. Wen wi chooz frenz weh lov hihn ahn kantinyu stodi di Baibl, wi wahn ga wahn schranga rilayshanship wid Jehoava.

18. How weh wi seh ahn du ku help ada peepl fi waahn laan bowt Jehoava?

¹⁸ Wi fi chrai help ada peepl ga wahn rilayshanship wid Jehoava tu. Fain wayz fi witnis tu dehn. Wi ku pray tu Jehoava fi help wi fi seh di rait ting at di rait taim. Tel peepl dat wee da Jehoava Witnisiz. Da way deh, wi kandok wahn bring prayz an aana tu Gaad ahn noh tu wiself. Weh Jehoava teech wi help wi fi noh “liv laik if no Gaad noh deh.” Ih help wi fi ‘giv op di plezhaz a dis sinful werl,ʼ an insted, “liv wahn laif wid self-kanchroal, weh deesent ahn aanis, wan weh wahn pleez Gaad.” (Taitos 2:11-14) If wee bihayv how Jehoava seh fi mek wi bihayv, ada peepl wahn si ahn mait eevn seh: “Wi waahn goh wid unu bikaaz wi hyaa dat Gaad deh wid unu peepl.”—Zech. 8:23.