1, 2. Eena weh way Jehoava jenaros wid wee?

JEHOAVA da wahn jenaros Gaad. Evriting weh wi ga da fahn hihn. Jehoava oan aala di goal ahn silva lang wid evriting els weh deh pahn dis ert, an ih yooz dehn fi gi wi weh wi need fi liv. (Ps. 104:13-15; Hag. 2:8) Eena di Baibl wi ku reed bowt di difrent taim dehn wen Jehoava mi yooz di tingz weh hihn oan fi provaid fi ih peepl.

² Fi egzampl, Jehoava mi gi di Izrelait dehn mana ahn waata fi di 40 yaaz weh dehn mi deh eena di wildanes. (Ex. 16:35) Bikaaz a dat, “dehn neva need notn.” (Neh. 9:20, 21) Wahn nada egzampl da wid di faytful lee wido eena Ilaisha dayz. Jehoava mi mek shoar di lee bit a ail weh shee mi ga neva ron owt. Dis mi help ahn fi pay aaf aala ih bilz ahn ga inof moni fi mek shee an ih son dehn liv. (2 Ki. 4:1-7) Ahn Jehoava mi provaid food ahn moni fi Jeezas wen ih mi need it.—Mach. 15:35-38; 17:27.

3. Weh wi wahn stodi bowt eena dis aatikl?

³ Sins Jehoava oan evriting, hihn ku yooz eniting fi provaid  weh wi need. Ahn yet, hihn invait wee fi yooz weh wi ga fi sopoat di werk a fi hihn aaganaizayshan. (Ex. 36:3-7; reed Proverbs 3:9.) * Wai Jehoava ekspek wee fi yooz weh wi ga fi giv bak tu hihn? How faytful servants eena di paas sopoat fi hihn werk? How wi aaganaizayshan di yooz di doanayshan dehn weh wi get? Dis aatikl wahn ansa dehnya kweschan.

4. Weh wi shoa Jehoava wen wi sopoat fi hihn werk?

⁴ Wi giv tu Jehoava bikaaz wi lov an apreeshiayt weh ih du fi wi. Ih onli toch wi haat wen wi tink bowt weh aal hihn du fi wi. Wen King Dayvid mi-di eksplayn aal weh dehn mi need fi bil di templ, ih seh sohnting weh reeli chroo. Ih seh dat evriting weh wi ga da fahn Jehoava. Ahn wateva wi giv ahn, da fahn weh hihn don mi gi wee aredi.—Reed 1 Chronicles 29:11-14. *

5. How di Skripchaz shoa dat fi bee jenaros da wahn impoatant paat a chroo wership?

⁵ Wi giv tu Jehoava bikaaz da paat a wi wership tu hihn. Eena wahn vizhan, di apasl Jan mi hyaa Jehoava servants da hevn di seh: ‘Wi Laad ahn wi Gaad, onli yoo ga di rait fi geh gloari, aana ahn powa, kaaz yoo da di Wan weh mek evriting. Yu mek dehn ahn gi dehn laif.ʼ (Rev. 4:11) Jehoava dizerv aala di gloari an aana, soh wi waahn giv ahn wi bes. Chroo Moaziz, Jehoava mi koman di nayshan a Izrel fi ga chree festival fi di yaa. Az paat a dehn wership da dehndeh festival, di Izrelait dehn kudn “stan op fronta Jehoava wid notn eena dehn han.” (Deut. 16:16) Di saym ting wid wee tudeh, wen wi giv owta wahn wilin haat, Jehoava seeʼt az paat a wi wership tu hihn.

6. How wi benifit wen wi jenaros? (Koment pahn di picha da di biginin a dis aatikl.)

⁶ Wi benifit wen wi jenaros. Ih gud fi mek wi giv tu adaz ahn noh jos ekspek dehn fi giv tu wee. (Reed Proverbs 29:21.) * Imajin wahn yong pikni goh bai wahn lee gif fi ih payrents owta di lee moni weh dehn mi giv ahn. How yu tink fi hihn payrents feel fi geh da lee gif? Er, imajin wahn yong painyaa weh stil liv hoam giv ih payrents wahn lee moni fi help owt wid bilz rong di hows. Di payrents mait noh ekspek di gif er di moni, bot dehn mait aksep it bikaaz dehn noa da wahn way fi mek chiljren shoa apreeshiayshan. Jos laik dat, Jehoava noa dat wee benifit wen wi giv ahn tingz weh ga valyu tu wee.

7, 8. How Jehoava servants eena di paas set wahn egzampl wen dehn kanchribyoot (a) fi wahn spesifik proajek? (b) fi sopoat Jehoava werk?

⁷ Eena di Baibl, wi laan dat Jehoava peepl mi giv kanchribyooshan fi sopoat fi hihn werk. Sohntaim, dehn mi kanchribyoot fi wahn spesifik proajek, laik wen Moaziz mi aks dehn fi doanayt tuwaadz  di tabernakl, ahn wen King Dayvid mi-di plan fi bil di templ. (Ex. 35:5; 1 Chron. 29:5-9) Joorin King Jehowash taim, di prees dehn mi yooz wateva moni dehn mi geh fi fiks Jehoava hows. (2 Ki. 12:4, 5) Eena di dayz a di apasl dehn, wen di bradaz mi hyaa dat som a di bradaz fahn Judeeya mi-di staav, “dehn disaid fi sen rashan . . . Eech a dehn gi aal weh dehn kuda mi gi.”—Aks 11:27-30.

⁸ Ada taimz, som a Jehoava servants mi sopoat di wan dehn weh di tek di leed eena di werk. Fi egzampl, di Laa weh Jehoava mi gi Moaziz seh dat di Leevait dehn neva mi ga wahn inheritans laik di ada chraib dehn. Bot di ada Izrelait dehn mi fi gi dehn ten persent a weh dehn gat soh dat di Leevait dehn kuda mi foakos pahn dehn werk da di tabernakl. (Num. 18:21) Ahn sohn faytful uman yoostu ‘tek moni fahn owta dehn oan pakit fi tek kayr a Jeezas an ih disaipl dehn.ʼ—Look 8:1-3.

9. Weh som a di kanchribyooshan dehn mi kohn fram?

⁹ Af koars, di doanayshan dehn mi kohn fahn difrent plays. Fi egzampl, wen di Izrelait dehn kanchribyoot tuwaadz di tabernakl, dehn praabli mi doanayt tingz weh dehn mi bring wid dehn fahn Eejip. (Ex. 3:21, 22; 35:22-24) Eena di dayz a di apasl dehn, som a di bradaz mi sel tingz weh dehn mi oan, laik dehn faam er hows, ahn gi di moni tu di apasl dehn. Den, di apasl dehn yooz da moni fi help owt di ada bradaz weh mi need help. (Aks 4:34, 35) Ada Kristyanz put wahn moni wan-said soh dat dehn kuda mi aalwayz ga wahn lee sohnting fi doanayt. (1 Kor. 16:2) Soh evribadi, noh kay if dehn mi rich er poa, kuda mi mek wahn doanayshan.—Look 21:1-4.

10, 11. (a) How wi ku fala di egzampl a Jehoava servants eena di paas? (b) How yoo feel bowt di privilij fi giv bak tu Jehoava?

¹⁰ Nowadayz, wi mait mek wahn doanayshan fi wahn spesifik perpos. Fi egzampl, wat if yu kangrigayshan need wahn nyoo Kingdom Haal? Er wat if dehn need fi du sohn werk pahn yu Kingdom Haal? Er maybi wi hyaa dat di branch aafis need moni fi du werk rong deh, er fi help owt wid di ekspens da wi kanvenshan, er fi help owt wi bradaz afta wahn dizaasta. Wi doanayshan dehn eevn sopoat di bradaz weh di du di werk da di werl hedkwaataz ahn da di difrent branch aafis dehn rong di werl. Wi doanayshan dehn ku sopoat di mishineri, speshal painyaa, ahn serkit oavaseeya dehn. Ahn maybi yu kangrigayshan sen kanchribyooshan evri mont fi help bil Asembli Haal ahn Kingdom Haal fi ada bradaz rong di werl.

¹¹ Aala wi ku du wi lee paat fi sopoat di werk weh Jehoava di du eena dehnya laas dayz. Moas a di taim, wi aaganaizayshan noh noa weh di doanayshan dehn kohn fram. Wen wi put moni eena di kanchribyooshan baks da di Kingdom Haal, er mek wahn doanayshan onlain pahn jw.org., wi noh mek nobadi noa bowt it. Wi mait tink dat di lee bit a moni wi giv kyaahn du notn. Bot, moas a di moni weh di aaganaizayshan yooz, kohn fahn di lata lee doanayshan dehn insteda fahn big amonk. Wahn lata wi bradaz tudeh da jos laik di bradaz fahn Masidoanya weh mi “soh poa,” bot dehn mi bayg fi ga di privilij fi giv, ahn dehn neva stinji needa wen dehn mi giv bak tu Jehoava.—2 Kor. 8:1-4.

12. How wi aaganaizayshan chrai dehn bes fi mek gud yoos a di doanayshan dehn?

 ¹² Di Govanin Badi chrai fi bee faytful ahn waiz wid how dehn yooz di aaganaizayshan moni. (Mach. 24:45) Dehn pray soh dat dehn ku mek gud disizhan ahn plan how fi yooz di moni eena di rait way. (Look 14:28) Eena Baibl taimz, faytful servants a Jehoava weh mi rispansabl fi eni doanayshan mek shoar dat dehndeh doanayshan mi yooz fi chroo wership. Fi egzampl, Ezra ahn sohn ada man mi gaahn bak da Jeroosalem wid wahn doanayshan fahn di King a Perzha. Da King mi doanayt lata goal, silva, an ada preshos mateeryal weh mi wot bowt $100 milyan (U.S.) tudeh-day. Tu Ezra, dehndeh kanchribyooshan da-mi valanteri aafrin tu Jehoava. Soh ih mi gi spesifik inschrokshanz pahn how fi protek di kanchribyooshan dehn, espeshali bikaaz di chrip bak da Jeroosalem mi daynjaros. (Ezra 8:24-34) Di apasl Paal mi kalek moni fi help di bradaz da Judeeya. Ih mek shoar dat di bradaz weh mi wahn kehr di moni da-mi bradaz weh du di ‘rait tingz eena Gaad sait, an eena di sait a peepl tu.ʼ (Reed 2 Korintyanz 8:18-21.) Wi aaganaizayshan di fala Ezra ahn Paal egzampl ahn mek shoar dat aal doanayshan di geh yooz eena di rait way—fi chroo wership.

13. Wai di aaganaizayshan mi mek sohn chaynj wid how dehn spen moni?

¹³ Wahn famili mait mek sohn chaynj wen dehn di chrai mek shoar dehn noh spen moa dan weh dehn mek, er if dehn di chrai du moa fi Jehoava. Wel, da di saym ting wid Jehoava aaganaizayshan. Eena di paas fyoo yaaz, di aaganaizayshan werk pahn wahn lata nyoo proajek. Sohntaim, dehn spen moa moni dan weh di kom een. Soh, dehn chrai fain wayz how fi kot bak pahn ekspens ahn mek di werk eeziya soh dat dehn ku du moa wid yu doanayshan dehn.

14-16. (a) How di aaganaizayshan di yooz yu doanayshan? (b) How yoo di benifit fahn di difrent provizhan dehn?

¹⁴ Wahn lata bradaz ahn sistaz weh di serv Jehoava fi wahn lang taim seh dat dehn neva si soh moch spirichwal provizhan eena dehn laif. Now wi ga jw.org ahn JW Braadkyaastin. Di New World Translation of the Holy Scriptures deh eena lat moa langwij. An eena 2014 ahn 2015, di aaganaizayshan mi plan di  chree-day “Kip Aan Di Aym fi di Kingdom a Gaad Fos!” intanashanal kanvenshan eena 14 difrent siti rong di werl. Evribadi weh mi gaahn mi hapi fi dehdeh.

¹⁵ Wahn lata di bradaz seh humoch dehn apreeshiayt how dehn di benifit fahn weh Jehoava di provaid chroo ih aaganaizayshan. Fi egzampl, wahn kopl weh di serv da Asia seh: “Wi asainment deh eena wahn smaal siti. Soh wi feel laik wi deh bai wiself, an ih eezi fi wi faget how big dis werk. Bot az soon az wi wach di difrent proagram dehn pahn JW Braadkyaastin, wi memba dat wi da paat a wahn werlwaid famili. Wi bradaz rait ya eksaitid bowt JW Braadkyaastin. Afta dehn don wach di difrent proagram dehn fi eech mont, wi aalwayz hyaa dehn seh dat dehn feel kloas tu di Govanin Badi. Now dehn moa prowd fi bee paat a Gaad aaganaizayshan.”

¹⁶ Rait now, di aaganaizayshan di bil er fiks op bak bowt 2,500 Kingdom Haal aal oava di werl. Wen sohn bradaz da Honduras mi geh dehn nyoo Kingdom Haal, dehn seh: “Wi reeli feel hapi fi bee paat a Jehoava famili. Wid di bradaz help, wi kuda mi geh wahn nyoo Kingdom Haal. Dis da sohnting wi mi aalwayz waahn.” Wahn lata bradaz shoa di saym apreeshiayshan wen dehn geh di Baibl an ada poblikayshan eena fi dehn oan langwij, wen dehn geh help afta wahn nachral dizaasta, er wen dehn si weh di hapm eena di poblik witnisin werk eena fi dehn ayrya.

17. How wi noa dat da Jehoava di sopoat dis aaganaizayshan?

¹⁷ Peepl weh da noh Jehoava Witnisiz kyaahn andastan how ih pasabl fi du aal dis werk wid jos doanayshan. Wahn manija fahn wahn big kompani gaahn toar wan a wi printin fakchri. Afta ih don ih toar, ih kudn bileev dat evribadi weh di werk deh noh geh pay, an ih kudn bileev dat dehn noh plan ivent fi rayz moni fi kova ekspens; evriting da wid valanteri doanayshan. Tu hihn, dat noh fi bee pasabl. Wel, dat da chroo! Bot wi noa dat ih pasabl bikaaz Jehoava di sopoat di werk.—Job 42:2.

18. (a) Wat da som a di blesin wi geh wen wi sopoat di Kingdom? (b) How wi ku chrayn wi chiljren ahn di nyoo disaipl dehn fi laan fi giv tu Jehoava?

¹⁸ Jehoava di aana wi wen ih gi wi di apachooniti fi sopoat di Kingdom werk. Ih pramis dat wi wahn geh blesin wen wi sopoat di Kingdom. (Mal. 3:10) Ih pramis dat di persn weh jenaros wahn praspa. (Reed Proverbs 11:24, 25.) * Wen wi gi weh wi gat, wi hapi. Di Baibl seh: “Gaad bles yu moa wen yu gi dahn wen yu get.” (Aks 20:35) Bai wi egzampl ahn bai weh wi seh, wi ku teech wi chiljren ahn di nyoo disaipl dehn fi kanchribyoot tuwaadz dis werk ahn geh lata blesin fahn Jehoava.

19. How dis aatikl mi inkorij yoo?

¹⁹ Evriting wi ga da fahn Jehoava. Wen wi giv tu hihn wi di shoa humoch wi lov hihn an apreeshiayt aal weh ih du fi wi. (1 Chron. 29:17) Wen di Izrelait dehn mi doanayt tuwaadz di templ, dehn “mi hapi bowt dehnya valanteri aafrin bikaaz dehn mi mek dehn valanteri aafrin wid aala dehn haat.” (1 Chron. 29:9) Soh mek wi aalwayz bee hapi ahn giv bak tu Jehoava weh kohn fahn hihn, weh da fan ih oan han.