1-2. (a) Weh Jehoava si wen milyanz a peepl kohn tugeda fi selibrayt Krais Eevnin Meel? (Koment pahn di picha pahn di kova.) (b) Weh wi wahn diskos eena dis aatikl?

IMAJIN weh Jehoava si wen milyanz a peepl aal oava di werl get tugeda fi selibrayt Krais Eevnin Meel. Hihn noh si jos wahn hoal krowd a peepl. Ih noatis eech an evri persn weh dehdeh. Fi egzampl, hihn si peepl weh mek shoar dehn aten evri yaa. Som mait deh da di Memoaryal eevn doa dehn di fays lata persikyooshan. An adaz noh aalwayz kohn da di res a wi meetin dehn, bot dehn kansida di Memoaryal fi bee wahn impoatant ivent weh dehn haftu aten. Jehoava aalso noatis aal hoo kohn da di Memoaryal fi di fos taim, maybi jos fi si how wi selibrayt it.

² Af koars, Jehoava hapi fi si soh moch peepl da di Memoaryal. (Look 22:19) Bot, Jehoava mayn kansaan da noh di amonk a peepl weh dehdeh. Di reezn wai dehn dehdeh moa impoatant tu hihn. Eena dis aatikl, wi wahn diskos wahn veri impoatant kweschan: Wai wi goh da di Memoaryal evri yaa an aala di ada meetin dehn weh Jehoava provaid fi aal hoo lov hihn?

3-4. (a) Wai wi goh da meetin? (b) Weh wi meetin atendans seh bowt wi? (c) Akaadn tu 1 Korintyanz 11:23-26, wai wi noh fi mis di Memoaryal?

³ Di mayn reezn wai wi goh da meetin da fi wership Jehoava. Bot wi aalso goh bikaaz Jehoava teech wi da di  meetin dehn. Prowd peepl noh feel laik dehn need fi laan notn fahn nobadi. (3 Jan 9) Bot wee noh stan laik dat. Wee lov fi laan fahn Jehoava ahn fala di inschrokshan weh wi geh fahn fi hihn aaganaizayshan.—Isa. 30:20; Jan 6:45.

⁴ If wi hombl, wi wahn bee redi ahn wilin fi laan, ahn soh wi wahn mek shoar wi deh da aala di meetin dehn. Wi aten di Memoaryal a Jeezas det bikaaz wi seeʼt az sohnting veri impoatant. Ahn Jeezas mi koman ih falowaz fi “du dat til hihn kohn bak.” If wi hombl wi wahn obay da koman. (Reed 1 Korintyanz 11:23-26.) Di Memoaryal schrentn wi hoap fi di fyoocha, an ih rimain wi humoch Jehoava lov wi. Bot Jehoava noa dat wi need fi geh da inkorijment ahn schrent moa dan wans a yaa. Soh hihn provaid meetinz fi wi evri week, an ih inkorij wi fi aten dehn. If wi hombl wi wahn obay. Ahn soh wi spen lata taim evri week di pripyaa fi di meetin an aten dehn.

5. Wai hombl peepl rispan tu Jehoava invitayshan?

⁵ Evri yaa, Jehoava invait peepl fi laan fahn hihn, ahn lata hombl peepl aksep da invitayshan. (Isa. 50:4) Dehn injai di Memoaryal, ahn den dehn staat goh da di res a meetin dehn tu. (Zech. 8:20-23) Aala wi hapi fi mek Jehoava teech wi ahn gaid wi, kaa hihn da “[wi] helpa ahn di Wan weh reskyu [wi].” (Ps. 40:17) Jehoava ahn Jeezas invait wi fi goh da meetin soh dat wi ku laan fahn dehn. Notn moa impoatant er mek wi moa hapi dan fi aksep da invitayshan!—Mach. 17:5; 18:20; 28:20.

6. How hyoomiliti mi help wahn man fi aten di Memoaryal?

⁶ Evri yaa, wi chrai fi invait az moch peepl az wi kud fi aten di Memoaryal a Jeezas det. Lata hombl peepl benifit wen dehn aksep wi invitayshan. Kansida di egzampl a wahn man weh mi geh wahn invitayshan fi goh da di Memoaryal sohn yaaz abak. Hihn mi tel di brada weh mi invait ahn dat ih kudn mek it. Bot, pahn di nait a di Memoaryal, di brada mi sopraiz fi si da sayhn man shoa op da di Kingdom Haal. Di man mi soh impres bai di waam welkom weh di bradaz mi giv ahn, dat ih mi staat aten aala di meetin dehn. Az a mata a fak, hihn onli mi mis chree meetin joorin di hoal yaa afta di Memoaryal. Wai hihn mi aten aala di meetin dehn? Hihn mi hombl inof fi chaynj ih main. Laytaraan, di brada weh mi invait ahn seh: “Hihn da wahn veri hombl man.” Da Jehoava mi jraa dis man fi wership ahn, ahn now hihn da wan a wi bradaz.—2 Sam. 22:28; Jan 6:44.

7. How di meetin dehn ahn wi Baibl reedin help wi fi bee hombl?

⁷ Weh wi laan da di meetin dehn ahn fahn wi Baibl reedin ku help wi fi bee hombl. Joorin di weeks bifoa di Memoaryal, wi meetin dehn foakos wahn lat pahn Jeezas hombl egzampl ahn how ih mi wilin fi giv op ih laif fi wi. Ahn joorin di dayz bifoa di Memoaryal, wi shuda reed weh di Baibl seh bowt weh mi hapm rong di taim wen Jeezas mi ded ahn wen ih mi geh rayz op bak. Weh wi laan da wi meetin dehn ahn weh wi reed eena di Baibl wahn mek wi moa tankful fi di ransom. Ih wahn schrentn wi dizaiya fi kapi Jeezas egzampl an obay Jehoava, eevn wen dat haad fi du.—Look 22:41, 42.

8. How Jeezas mi shoa korij?

⁸ Wi chrai fi kapi Jeezas egzampl a korij tu. Tink bowt how hihn mi shoa korij eena di dayz bifoa ih mi ded. Hihn mi wel ahn noa dat ih enimi dehn mi wahn shaym ahn, beet ahn, ahn kil ahn. (Mach. 20:17-19) Stil, hihn mi wilin fi giv op ih laif. Wen di taim mi kohn, hihn mi tel ih faytful apasl dehn hoo mi deh wid ahn da Getsemani: ‘Unu get op ahn lesgoh! Di wan weh sel mi owt di kohn.ʼ (Mach. 26:36, 46) Ahn wen di krowd mi kohn wid aal kaina wepan fi ares ahn, hihn mi step op, tel dehn da hihn dehn mi-di luk fa, ahn tel di soalja dehn fi lef ih disaipl dehn loan. (Jan 18:3-8) Dat da reel korij! Nowadayz, di anointid Kristyan dehn ahn di ada sheep chrai haad fi kapi Jeezas egzampl a korij. How dehn du dat?

9. (a) Wai wi mait need korij fi kip di goh da di meetin dehn? (b) How fi wee egzampl ku afek wi bradaz weh eena prizn kaaz a dehn fayt?

⁹ Fi kip di goh da di meetin dehn wi mait haftu shoa korij eena sohn haad sichuwayshan. Som a wi bradaz ahn sistaz kip di goh da meetin eevn doa dehn di sofa bikaaz sohnbadi weh dehn lov mi ded, tingz eena laif diskorij dehn, er dehn ga helt prablemz. Som a dehn ga di korij fi goh da meetin eevn wen dehn famili er di govament chrai haad fi stap dehn. Tink bowt how fi wee egzampl ku afek wi bradaz ahn sistaz weh eena prizn sayka dehn fayt. (Heeb. 13:3) Wen dehn hyaa dat wee kip aan di serv Jehoava eevn wen wi deh anda chraiyal, dat schrentn fi dehn fayt ahn korij soh dat dehn noh giv op. Sohnting simila mi hapm tu di apasl Paal. Wen hihn mi deh anda hows ares da Roam, ih mi hapi wen ih hyaa dat ih bradaz ahn sistaz mi stay faytful tu Gaad. (Fil. 1:3-5, 12-14) Paal mi rait wahn leta tu di Heebroo bradaz ahn sistaz rong di taim wen ih mi geh set free. Eena da leta ih mi inkorij dehn faytful Kristyanz fi “kip aan di lov wan anada laik bradaz ahn sistaz” ahn noh fi mek it wahn habit fi mis meetin.—Heeb. 10:24, 25; 13:1.

10-11. (a) Hoo wi shuda invait tu di Memoaryal? (b) Weh reezn Ifeezhanz 1:6, 7 gi wi fi invait dehn?

¹⁰ Ih tek korij fi invait famili, peepl wi werk wid, ahn wi nayba dehn fi kohn da di Memoaryal. Wai wi invait dehn? Wi soh tankful fi weh Jehoava ahn Jeezas du fi wi dat wi noh waahn nobadi mis owt. Soh wi noh hoal bak fahn invait peepl tu di Memoaryal. Wi waahn dehn geh di chaans fi laan how dehn ku benifit fahn di “lov ahn kainis weh wi noh dizerv” weh Jehoava shoa wi chroo di ransom.—Reed Ifeezhanz 1:6, ftn., 7; Rev. 22:17.

¹¹ Wen wi shoa korij ahn meet tugeda,  wi shoa wahn nada preshos kwaliti. Gaad an ih Son set di bes egzampl a dis kwaliti.

12. (a) How wi meetin dehn schrentn wi lov fi Jehoava ahn Jeezas? (b) Eena weh way 2 Korintyanz 5:14, 15 inkorij wi fi kapi Jeezas egzampl?

¹² If wi lov Jehoava ahn Jeezas, wi wahn chrai haad fi deh da aala di meetin dehn. Ahn weh wi laan da di meetin dehn schrentn wi lov fi Jehoava an ih Son. Lata taim di meetin dehn rimain wi a weh dehn mi du fi wi. (Roam. 5:8) Di Memoaryal rimain wi a humoch dehn lov peepl, eevn peepl weh noh andastan yet how impoatant di ransom. Wan way wi ku shoa wi apreeshiayshan da fi kapi Jeezas egzampl eena di way wi liv wi laif. (Reed 2 Korintyanz 5:14, 15.) Pahn tap a dat, wi prayz Jehoava fahn wi haat bikaaz ih gi wi di ransom. Wan way wi ku prayz ahn da fi koment fahn wi haat da di meetin dehn.

13. How wi ku shoa Jehoava ahn Jeezas humoch wi lov dehn? Pleez eksplayn yu ansa.

¹³ Wi shoa Jehoava ahn Jeezas humoch wi lov dehn wen wi wilin fi mek sakrifais fi dehn. Lata taim, wi haftu mek sakrifais soh dat wi ku deh da di meetin dehn. Lata kangrigayshan ga wan a dehn meetin da nait, wen moas a wi taiyad fahn wahn lang day da werk. Wahn neks meetin yoozhwali jrap pahn di weeken, ahn lata peepl tek da taim fi res. Yu tink Jehoava noatis wen wi goh da meetin eevn wen wi feel taiyad? Af koars hihn noatis! Az a mata a fak, Jehoava noatis an apreeshiayt evriting weh wi du fi mek shoar wi deh da di meetin dehn.—Maak 12:41-44.

14. How Jeezas set di bes egzampl a lov?

¹⁴ Jeezas set di bes egzampl fi wi a how fi shoa lov. Hihn mi wilin fi ded fi ih disaipl dehn. Pahn tap a dat, hihn mi liv evri day eena wahn way weh put fi dehn inchres heda ih oan. Fi egzampl, hihn mi meet wid ih disaipl dehn eevn wen hihn mi taiyad er schres owt. (Look 22:39-46) Ahn hihn mi foakos pahn weh hihn kuda mi gi ada peepl. Ih neva foakos pahn weh hihn kuda mi get fahn dehn. (Mach. 20:28) Wen fi wee lov fi Jehoava ahn fi wi  bradaz ahn sistaz schrang laik dat, wi wahn du evriting weh wi kud fi goh da di Memoaryal an aala di ada kangrigayshan meetin dehn.

15. Hoo wi waahn help di moas?

¹⁵ Wee bilangz tu di onli chroo Kristyan famili, ahn wi hapi fi spen az moch taim az wi kud di invait nyoo peepl fi jain wi. Bot eevn moa dan dat, wi waahn help “wi oan bradaz ahn sistaz” hoo stap preech er goh da di meetin dehn. (Gal. 6:10) Wi proov wi lov fi dehn wen wi kip di inkorij dehn fi kohn da di meetin dehn, espeshali di Memoaryal. Laik Jehoava ahn Jeezas, wi veri hapi wen sombadi kohn bak tu Jehoava, wi lovin Faada ahn Shepad.—Mach. 18:14.

16. (a) How wi ku inkorij wan anada, ahn how wi meetin dehn ku help wi? (b) Wai ih gud fi memba weh Jeezas mi seh da Jan 3:16 rong Memoaryal taim?

¹⁶ Joorin di neks kopl weeks, invait az moch peepl az yu kud fi kohn da di Memoaryal pahn Fraideh eevnin, Aypril 19, 2019. (Si di baks “ Yu Wahn Invait Dehn?”) Ahn bitween now ahn di neks Memoaryal, mek wi kantinyu fi goh da aala di meetin dehn weh Jehoava provaid soh dat wi ku inkorij wan anada. Az di en a dis sistem geh kloasa ahn kloasa, wi need wi meetin dehn fi help wi stay hombl, fi ga korij, ahn fi shoa lov fi wan anada. (1 Tes. 5:8-11) Mek wi shoa wid aala wi haat humoch wi apreeshiayt di lov weh Jehoava ahn Jeezas shoa fi wi!—Reed Jan 3:16.