PAHN Wenzdeh maanin, Janiweri 24, 2018, di United States ahn Canada Betel famili dehn mi geh wahn speshal anonksment: Brada Kenneth Cook, Jr. mi geh apointid fi bee paat a di Govanin Badi a Jehoava Witnisiz.

Brada Cook mi baan ahn rayz da Pennsylvania, U.S.A. Hihn mi laan di chroot fahn wan a ih klaasmayt jos bifoa ih grajuayt fahn hai skool. Ih mi geh baptaiz pahn Joon 7, 1980 an ih mi staat ful-taim servis az wahn regyula painyaa pahn Septemba 1, 1982. Afta ih mi painyaa fi too yaaz, Brada Cook mi geh invaitid fi serv da Betel. Ih fos asainment mi deh da Wallkill, New York, an ih mi staat pahn Aktoaba 12, 1984.

Fi di neks 25 yaaz, Brada Cook mi geh sohn difrent asainment eena di Printin Fakchri ahn Betel Aafis. Ih mi marid ih waif, Jamie, eena 1996, ahn shee mi jain ahn eena Betel servis da Wallkill. Eena Disemba 2009, Brada ahn Sista Cook mi geh asain tu di Watchtower Educational Center da Patterson, New York, wehpaa Brada Cook mi werk eena di Writing Correspondence Department. Eena Aypril 2016, afta dehn mi gaahn bak tu Wallkill fi wahn lee wail, Brada ahn Sista Cook mi geh asain tu Brooklyn, New York. Faiv monts layta, dehn mi geh asain tu di werl hedkwaataz da Warwick, New York. Eena Janiweri 2017, Brada Cook mi geh apointid fi serv az wahn helpa tu di Raitin Komiti a di Govanin Badi.