1-2. Weh amayzin ivent mi hapm pahn di day a Pentikaas 33 C.E.?

DA-MI Sondeh maanin pahn di day a Pentikaas 33 C.E. eena Jeroosalem. Wahn groop a bowt 120 disaiplz mi gyada tugeda eena wahn room eena wahn opstayz hows. (Aks 1:13-15; 2:1) Wahn fyoo dayz erliya, Jeezas mi gi dehn inschrokshanz fi stay da Jeroosalem bikaaz dehn mi wahn geh wahn speshal gif. (Aks 1:4, 5) Weh mi hapm neks?

² “Sodn-wan, dehn yehr wahn naiz fahn di skai weh mi song laik wahn haad breez di bloa. Di song ful op di hoal hows wehpaa dehn mi deh. Den dehn si sohnting weh mi luk laik faiya weh divaid op ihself eena lata lee flaym ahn kohn dong ahn setl pahn eech a dehn. Aala dehn mi geh ful op wid di Hoali Spirit ahn dehn staat taak eena aal kaina difrent tongz.” (Aks 2:2-4) Jehoava mi poar owt ih hoali spirit pahn dehn eena dis amayzin way. (Aks 1:8) Dehn da-mi di fos wanz fi geh anointid bai hoali spirit * ahn geh di hoap fi rool wid Jeezas da hevn.

3. Wai di 120 disaiplz neva ga no dowt dat dehn mi anointid bai hoali spirit?

³ If yoo da-mi wan a dehn disaipl weh mi gyada opstayz eena da room da day, yoo neva mi wahn ferget it. Sohnting  weh mi luk laik faiya mi kohn ahn setl pahn yu hed, ahn yu mi staat tu taak eena difrent langwij! (Aks 2:5-12) Yoo wuda mi bee shoar dat yu mi anointid wid hoali spirit. Bot noh evribadi hoo geh anointid bai hoali spirit geh anoint eena wahn amayzin way laik dat. How wi noa dis? Ahn da wen dehn mi geh anointid?

4. Da wen di bradaz ahn sistaz weh mi liv joorin di taim a di apasl dehn mi geh anointid?

⁴ Mek wi diskos wen wahn persn mait geh anointid. Di 120 Kristyanz weh mi gyada opstayz eena di room da neva di onli wanz weh mi geh anointid pahn Pentikaas, 33 C.E. Layta da day, bowt 3,000 moa peepl mi geh di hoali spirit weh Jeezas mi pramis fi sen. Dehn mi geh anointid wen dehn mi geh baptaiz. (Aks 2:37, 38, 41) Bot eena di yaaz afta dat, noh aal anointid Kristyanz mi geh anoint wen dehn mi geh baptaiz. Di Samaritan dehn neva geh anointid til sohntaim afta dehn mi geh baptaiz. (Aks 8:14-17) An eena di kays a Kerneelyos an ih famili, dehn mi geh anointid bifoa dehn mi eevn geh baptaiz.—Aks 10:44-48.

5. Akaadn tu 2 Korintyanz 1:21, 22, weh hapm wen sombadi geh anointid bai hoali spirit?

⁵ Mek wi luk pahn weh hapm wen sombadi geh anointid bai hoali spirit. At fers, sohn peepl weh anointid mait fain it haad fi aksep dat Jehoava chooz dehn. Dehn mait wanda, ‘Wai Gaad mi chooz mee?ʼ Adaz mait noh feel laik dat. Bot, wateva da di kays, di apasl Paal eksplayn weh hapm tu evribadi weh geh anointid. Hihn seh: “Afta unu mi bileev eena Krais, Gaad put wahn seel * pahn unu wid di hoali spirit weh ih mi pramis, an ih yooz Krais fi du dis. Di hoali spirit da laik wahn dong payment weh mek wi shoar dat wi wahn geh weh Gaad pramis wi.” (Ifee. 1:13, 14, NW) Soh Jehoava yooz ih hoali spirit fi mek it klyaa tu dehnya Kristyan dat hihn chooz dehn. Eena dis way,  di hoali spirit da wahn “dong payment,” er wahn pramis weh dehn geh fi kanvins dehn dat eena di fyoocha dehn wahn liv fareva da hevn ahn noh pahn ert. Reed 2 Korintyanz 1:21, 22, NW. *

6. Weh wahn anointid Kristyan need fi du fi geh ih hevnli riwaad?

⁶ If wahn Kristyan anointid, dat noh meenz dat hihn definaytli gwehn da hevn. Hihn shoar dat Jehoava chooz hihn fi goh da hevn. Bot, hihn need fi memba di kongsl weh seh: “Bradaz, du unu bes fi stay faytful soh dat unu ku kantinyu fi bee monks di wan dehn weh Gaad kaal ahn chooz. If unu du unu bes, unu wahn definaytli geh dis privilij.” (2 Peet. 1:10, NW) Soh, eevn doa wahn Kristyan geh anointid, er geh pik, fi goh da hevn, hihn gwehn da hevn onli if ih stay faytful.—Fil. 3:12-14; Heeb. 3:1; Rev. 2:10.

7. How wahn Kristyan noa if ih anointid?

⁷ Bot how wahn Kristyan noa if hihn er shee anointid? Wi ku fain di ansa eena Paal werdz tu dehn wan da Roam weh Gaad “pik fi bee ih hoali peepl.” Hihn mi tel dehn: “Kaa Gaad spirit noh mek unu bee wahn slayv ahn bee frayd nohmoh, insteda dat, di spirit adap wi fi bee chiljren a Gaad, ahn da spirit gi wi di powa fi krai owt ahn seh: ‘Aba, Faada!ʼ Gaad Spirit mek it klyaa tu wi eena fi wee haat dat wee da Gaad chiljren.” (Roam. 1:7; 8:15, 16. NW) Soh Gaad yooz ih hoali spirit fi mek it klyaa tu anointid Kristyanz dat hihn pik dehn fi goh da hevn.—1 Tes. 2:12.

8. How 1 Jan 2:20, 27 shoa dat anointid Kristyanz noh need nobadi fi tel dehn dat dehn akchwali anointid?

⁸ Dehn wan weh geh dis invitayshan fi goh da hevn, noh ga no dowt eena dehn main ahn haat; Jehoava mek it klyaa tu dehn. (Reed 1 Jan 2:20, 27.) Af koars, anointid Kristyanz need fi geh teech bai Jehoava chroo di kangrigayshan jos laik evribadi els. Bot dehn noh need nobadi fi tel dehn dat dehn akchwali anointid. Jehoava yooz di moas powaful foas eena di yoonivers, ih hoali spirit, fi mek it klyaa tu dehn dat dehn anointid!

9. Akaadn tu Ifeezhanz 1:18, wen sombadi geh anointid, weh chaynj da persn goh chroo?

⁹ Tudeh, moas a Gaad servants mait fain it haad fi andastan weh hapm tu sombadi wen Gaad anoint dehn. Di reezn wai dehn fain it haad fi andastan da bikaaz dehn noh anointid. Gaad mi kriyayt hyoomanz fi liv pahn ert, noh da hevn. (Gen. 1:28; Ps. 37:29) Bot Jehoava chooz sohn hyoomanz fi liv da hevn. Soh wen hihn anoint dehn, hihn chaynj dehn hoap ahn di way dehn tink big taim, soh dat dehn luk faawod fi liv da hevn.—Reed Ifeezhanz 1:18.

10. Weh ih meen fi “baan agen”? (Koment pahn di futnoat.)

¹⁰ Wen Kristyanz geh anointid bai hoali spirit, dehn “baan agen.” * Jeezas mi aalso seh dat ih noh pasabl fi eksplayn tu sombadi weh noh anointid egzakli how ih feel fi “baan agen,” er fi “baan fahn hoali spirit.”—Jan 3:3-8, NW.

11. Eksplayn how wahn Kristyan staat tu tink difrent wen ih geh anointid.

 ¹¹ How wahn Kristyan staat tu tink eena wahn difrent way wen ih geh anointid? Bifoa Jehoava mi anoint dehnya Kristyanz, dehn yoostu chrezha di hoap fi liv pahn ert fareva. Dehn doz kyaahn wayt fi di taim wen Jehoava wahn mek di ert wahn paradais ahn geh rid a wikidnis. Maybi dehn doz picha dehnself di welkom bak wahn famili memba er fren hoo ded. Bot afta dehn mi geh anointid, dehn staat tu tink difrent. Wai? Da noh bikaaz dehn staat tu tink dat fi liv pahn ert noh gud inof agen. Dehn noh chaynj dehn dizaiya bikaaz dehn feel dipres er bikaaz dehn di sofa wahn lat. Da noh bikaaz aal af a sodn dehn staat tu feel laik dehn wuda fain it boarin fi liv pahn ert fareva. Insted, Jehoava yooz ih hoali spirit fi chaynj di way dehn tink ahn fi chaynj di hoap weh dehn mi-di hoal aan tu.

12. Akaadn tu 1 Peeta 1:3, 4, how anointid Kristyanz feel bowt dehn hoap?

¹² Sombadi weh anointid mait feel laik dehn noh dizerv wahn preshos privilij laik dat. Bot dehn noh ga no dowt dat Jehoava chooz dehn. Dehn reeli hapi ahn tankful wen dehn tink bowt dehn hoap fi liv da hevn.—Reed 1 Peeta 1:3, 4.

13. How anointid Kristyanz feel bowt dehn laif pahn ert?

¹³ Soh yu tink dis meenz dat anointid Kristyanz waahn ded? Di apasl Paal ansa da kweschan. Hihn mi kompyaa dehn badi tu wahn tent wen ih mi seh: “Wi groan wail wi deh eena disya tent, bikaaz da laik wi di bak wahn hevi berdn. Wi noh waahn tek it aaf, bot wi waahn put aan di neks wan, soh dat evalastin laif wahn swala op dis badi weh ku ded.” (2 Kor. 5:4, NW) Anointid Kristyanz noh feel laik laif tu boarin pahn ert ahn waahn ded kwik. No, dehn injai laif ahn dehn waahn yooz eech day fi serv Jehoava lang wid dehn famili ahn frenz. Stil, noh mata weh dehn di du, dehn aalwayz memba di wandaful hoap weh dehn ga fi di fyoocha.—1 Kor. 15:53; 2 Peet. 1:4; 1 Jan 3:2, 3; Rev. 20:6.

14. If sombadi ga schrang zeel fi di preechin werk er si proof dat Jehoava di help dehn, yu tink dis meenz dat dehn anointid bai hoali spirit? Pleez eksplayn yu ansa.

¹⁴ Maybi yoo di wanda if yoo mi geh anointid bai hoali spirit. If dat da di kays, tink bowt dehnya impoatant kweschan: Yoo ga wahn schrang dizaiya fi du Jehoava wil? Yoo feel dat yoo ga wahn schrang zeel fi di preechin werk? Yoo injai fi stodi di Baibl ahn fi laan bowt “di deep tingz a Gaad”? (1 Kor. 2:10, NW) Yoo feel dat Jehoava gi yoo wandaful rizolts eena di preechin werk? Yoo feel wahn grayt rispansabiliti fi help adaz laan bowt Jehoava? Yoo si proof dat Jehoava di help yoo eena spesifik wayz eena yu laif? If yoo ansa yes tu aala dehnya kweschanz, yu tink dis meenz dat yoo anointid? No, ih noh meenz dat yu anointid. Wai nat? Bikaaz aala Gaad servants ku feel laik dis, weda dehn anointid er nat. Jehoava ku yooz ih hoali spirit fi help eni a ih servants fi du dehnya tingz, noh mata wat da dehn hoap. Az a mata a fak, if yoo di wanda if yu anointid, di ansa da no. Wai nat? Bikaaz dehn wan weh Jehoava anoint noh wanda weda er nat dehn anointid! Dehn noa dat dehn anointid!

15. How wi noa dat noh aal hoo Gaad gi ih hoali spirit tu geh pik fi goh da hevn?

 ¹⁵ Aal chroo di Baibl, wi ga wahn lata egzampl a faytful man weh Gaad mi gi ih hoali spirit tu. Stil, dehn neva geh di hoap fi liv da hevn. Fi egzampl, hoali spirit mi gaid Dayvid. (1 Sam. 16:13) An ih mi help ahn fi andastan di deep tingz bowt Jehoava. Hoali spirit mi aalso dairek hihn fi rait paat a di Baibl. (Maak 12:36) Bot eevn wid aala dat, di apasl Peeta mi seh dat Dayvid neva “gaan op da hevn.” (Aks 2:34) Jan di Baptis mi “ful op a di Hoali Spirit.” (Look 1:13-16) Jeezas mi seh dat dehn noh ga nobadi weh mi grayta dan Jan, bot den ih mi seh dat Jan neva mi wahn bee paat a di Kingdom a hevn. (Mach. 11:10, 11) Jehoava mi yooz ih hoali spirit fi gi dehnya faytful man di powa fi du sohn amayzin tingz, bot ih neva yooz da spirit fi chooz dehn fi liv da hevn. Yu tink dis meenz dat dehn neva az faytful az dehn wan weh Gaad mi pik fi rool da hevn? No. Ih jos meenz dat Jehoava wahn bring dehn bak tu laif eena Paradais pahn ert.—Jan 5:28, 29; Aks 24:15.

16. Weh hoap moas a Gaad servants luk faawod tu tudeh?

¹⁶ Tudeh, moas a Gaad servants pahn ert noh ga di hoap fi liv da hevn. Laik Aybraham, Sayra, Dayvid, Jan di Baptis, ahn lata ada faytful man an uman fahn Baibl taimz, dehn di luk faawod fi liv pahn ert wen Gaad Kingdom wahn rool oava dehn.—Heeb. 11:10.

17. Weh kweschanz wi wahn kansida eena di neks aatikl?

¹⁷ Tudeh, dehn stil ga sohn anointid Kristyanz monks wi, soh wi mait ga sohn kweschan. (Rev. 12:17) Fi egzampl, how anointid wanz shuda vyoo dehnself? If sombadi eena yu kangrigayshan staat tu eet di bred ahn jrink di wain da di Memoaryal, how wi shuda chreet dehn? Ahn wat if di amonk a peepl weh eet di bred ahn jrink di wain da di Memoaryal kip di goh op? Yoo shuda wori bowt it? Eena di neks aatikl, wi wahn ansa dehnya kweschan.