1-2. Weh wahn aynjel mi tel di uman dehn weh mi deh da Jeezas grayv, ahn weh inschrokshanz Jeezas mi gi dehn?

DA-MI erli eena di maanin pahn Naisan 16, 33 C.E. Sohn uman weh sad ahn weh reeli lov Gaad mi-di waak goh da di bering grong. Dehn mi-di goh da di grayv wehpaat Jeezas badi mi geh beri bowt wahn day an a haaf erliya. Di uman dehn mi waahn put sohn ail pahn Jeezas badi, bot wen dehn reech da di grayv, dehn noatis dat di grayv mi emti! Wahn aynjel mi tel di uman dehn seh: ‘Jeezas don rayz op bak fahn di ded an ih gwehn heda unu da Gyalilee. Unu wahn si ahn deh.ʼ—Mach. 28:1-7; Look 23:56; 24:10.

² Afta di uman dehn mi lef di grayv, Jeezas mi apyaa tu dehn ahn gi dehn dis inschrokshan: “Goh goh tel mi brada dehn fi goh da Gyalilee ahn dehn wahn si mi deh.” (Mach. 28:10) Jeezas mi araynj wahn meetin wid ih disaiplz rait afta Jehoava mi rezorek ahn fahn di ded. Da da meetin, Jeezas mi gi ih disaiplz sohn veri impoatant inschrokshanz!

3-4. Wai wi ku seh dat di koman weh wi fain da Machyu 28:19, 20 da neva onli fi di apasl dehn? (Koment pahn di picha pahn di kova.)

³ Reed Machyu 28:16-20. Da di meetin weh Jeezas mi araynj, hihn mi tel ih disaiplz bowt di impoatant werk weh dehn mi wahn haftu du joorin da taim, ahn wee di du si saym werk tudeh. Jeezas mi seh: “Unu goh ahn chrayn peepl fahn owta aala di nayshan dehn, . . . ahn teech dehn fi du evriting weh Ah tel unu.”

⁴ Jeezas neva gi di koman fi preech tu onli 11 a ih faytful apasl dehn. Hihn waahn aala ih falowaz fi preech. How wee  ku bee shoar a dis? Wel, wen Jeezas mi gi di koman fi goh ahn chrayn peepl fi bee ih disaiplz, da neva onli di apasl dehn mi deh pahn di mongtin da Gyalilee. How wi noa dis? Memba dat di aynjel mi tel di uman dehn: “Unu  wahn si ahn [da Gyalilee].” Soh moa dan laikli, sohn faytful uman mi aalso deh da da meetin tu. Bot dat da noh aal weh hapm. Di apasl Paal mi seh dat Jeezas mi “apyaa tu moa dan faiv honjrid a wi bradaz ahn sistaz dehn sayhn taim.” (1 Kor. 15:6) Wehpaat aala dehn mi deh?

5. Wai wi bileev dat di werdz weh wi fain da 1 Korintyanz 15:6 di rifaa tu di meetin weh menshan eena di buk a Machyu chapta 28?

⁵ Wi ga gud reezn fi bileev dat eena 1 Korintyanz 15:6, Paal mi-di rifaa tu di saym meetin da Gyalilee weh menshan eena di buk a Machyu chapta 28. Wai? Fos, moas a Jeezas disaiplz da-mi fahn Gyalilee. Soh ih mi wahn bee eeziya fi ga wahn meetin wid wahn lata peepl pahn wahn mongtin da Gyalilee raada dan fi meet da sombadi hows da Jeroosalem. Sekant, afta Jeezas mi geh rezorek, hihn mi aredi meet wid ih 11 apasl eena sombadi hows da Jeroosalem. If Jeezas mi waahn giv di inschrokshan fi goh preech ahn baptaiz peepl onli tu ih apasl dehn, hihn kuda mi du it da Jeroosalem insteda aks di uman dehn an ada peepl fi meet ahn da Gyalilee.—Look 24:33, 36.

6. How Machyu 28:20 shoa wi dat di koman fi chrayn peepl fi bee Krais disaiplz aplai tu wee tudeh, ahn how peepl di obay da koman now?

⁶ Noatis di terd impoatant reezn wai wi ku seh dat di koman weh Jeezas mi giv da neva onli fi ih 11 faytful apasl. Jeezas mi finish gi ih inschrokshanz di tel dehn dat hihn wahn aalwayz deh wid dehn eevn op tu di en a dis sistem a tingz. (Mach. 28:20) Jos laik weh Jeezas mi seh, wahn lata peepl tudeh di chrayn adaz fi bee fi hihn disaiplz. Tink bowt it! Evri yaa, nayli 300,000 peepl kohn fi bee Krais disaiplz, geh baptaiz, ahn kohn fi bee wan a Jehoava Witnisiz. Dat reeli amayzin!

7. Weh wi wahn diskos eena dis aatikl, ahn wai?

⁷ Wahn lata peepl weh stodi di Baibl mek proagres ahn den kwalifai fi geh baptaiz. Pahn di ada han, dehn ga sohn peepl weh stodi di Baibl wid wi bot hoal bak fahn geh baptaiz. Dehn injai di stodi, bot dehn noh mek no proagres fi geh baptaiz. Aala wi weh ga Baibl stodiz waahn help dehn fi put intu praktis weh dehn di laan ahn geh baptaiz. Eena dis aatikl, wi wahn diskos how wi ku help wi Baibl styoodents fi lov Jehoava ahn fi mek spirichwal proagres. Wai dis da sohnting weh wi need fi diskos? Bikaaz wan day wi mait haftu disaid weda wi wahn kantinyu fi stodi wid sombadi er nat.

8. Wai sohntaim ih haad fi help wi Baibl styoodents fi lov Jehoava?

⁸ Jehoava waahn peepl fi serv ahn owta lov. Soh wi goal da fi help wi Baibl styoodents andastan dat Jehoava reeli kay bowt dehn ahn dat ih lov dehn wahn lat. Wi waahn help dehn fi si Jehoava az wahn “pa tu dehn wan weh noh ga wahn pa ahn [az] di wan weh gi protekshan tu di wido dehn.” (Ps. 68:5) Wen yu Baibl styoodents get fi si humoch Gaad lov dehn, dehn wahn staat tu lov ahn tu. Sohn Baibl styoodents mait fain it haad fi si Jehoava az wahn lovin Faada bikaaz fi dehn oan pa neva shoa dehn lov an afekshan. (2 Tim. 3:1, 3) Az yu stodi di Baibl wid adaz, foakos pahn Jehoava wandaful kwalitiz. Help yu Baibl styoodents fi andastan dat wi lovin Gaad, Jehoava, waahn dehn liv fareva, ahn dat hihn redi fi help dehn soh dat dehn ku reech da goal. Wat els wi ku du?

9-10. Weh poblikayshanz wi fi yooz wen wi di stodi di Baibl wid sombadi, ahn wai wi shuda yooz dehn poblikayshanz?

 ⁹ Di poblikayshanz wi fi yooz da di “Weh di Baibl Ku Teech Wi?” ahn di “How fi Stay Eena di Lov a Gaad” buk. Dehndeh poblikayshanz dizain eena wahn way soh dat wi ku help wi Baibl styoodents fi kohn fi lov Jehoava. Fi egzampl, chapta 1 a di buk Weh di Baibl Ku Teech Wi? ansa dehnya kweschan: Yu tink Gaad kay bowt wi er yu tink ih kruwil?, How Gaad feel wen peepl sofa?, ahn Yu tink yu ku bee Jehoava fren? Ahn di buk How fi Stay Eena di Lov a Gaad wahn help di Baibl styoodent fi andastan dat wen ih praktis weh ih di laan fahn di Baibl eena ih laif, ih laif wahn geh beta an ih wahn geh kloasa tu Jehoava. Eevn if yu stodi dehnya buk wid adaz bifoa, yu need fi pripyaa gud fi eech stodi soh dat yu ku foakos pahn weh di persn need.

¹⁰ Bot weh yu ku du if yu Baibl styoodent inchrestid eena wahn tapik weh deh eena wahn poblikayshan weh noh deh eena wi Teechin Toolbaks? Maybi yu ku inkorij ahn fi reed da poblikayshan pan ih  oan soh dat yu ku kantinyu fi stodi wid ahn fahn wan a di buk dehn weh wi mi menshan erliya.

11. Wen wi shuda staat tu pray wid wahn Baibl styoodent, ahn how wi ku help ahn fi andastan wai dis impoatant?

¹¹ Staat di stodi wid wahn pryaa. Yoozhwali, ih bes fi staat tu pray wid wahn persn az soon az yu staat wahn regyula stodi wid ahn. Wi need fi help wi Baibl styoodent fi si dat di onli way wi ku andastan di Baibl da wid di help a Gaad hoali spirit. Sohn bradaz ahn sistaz reed Jaymz 1:5 fi bring op di tapik a pryaa tu dehn Baibl styoodent. Da skripcha seh: “If eni a unu noh ga di wizdom weh Gaad gi, yu mos aks Gaad fi gi yu.” Den, dehn wuda aks di styoodent: “How wi ku aks Gaad fi wizdom?” Moa dan laikli, di Baibl styoodent wahn agree dat wi shuda pray tu Gaad.

12. How yu wuda yooz Psalm 139:2-4 fi help wahn Baibl styoodent du beta eena di way ih pray?

¹² Teech yu Baibl styoodent how fi pray. Mek ih noa dat Jehoava waahn hyaa ih sinsyaa pryaaz. Eksplayn tu ahn dat eena wi persnal pryaaz, wi ku tel Jehoava how wi feel ahn wi ku aalso tel ahn tingz weh wi wudn tel enibadi els. Memba dat Jehoava noa weh deh deep dong eena wi haat. (Reed Psalm 139:2-4.) * Wi ku aalso inkorij wi Baibl styoodent fi aks Gaad fi help ahn get oava eni bad habits ahn fi chaynj eni rang tinkin weh ih mait ga. Fi egzampl, wat if sombadi weh yu di stodi wid fi wahn wail stil laik Krismos? Hihn noa dat ih rang bikaaz ih bays pahn paygan kostomz, bot ih jos lov som a di tingz bowt di selibrayshan. Weh yoo ku du eena dis sichuwayshan? Yu ku inkorij ahn fi tel Jehoava egzakli how ih feel ahn fi bayg Jehoava fi help soh dat ih ku lov onli weh Jehoava lov.—Ps. 97:10.

13. (a) Wai ih impoatant fi mek wi invait wi Baibl styoodents rait away fi goh da di meetin dehn? (b) How wi ku mek wahn Baibl styoodent feel moa komfatabl da di Kingdom Haal?

¹³ Invait yu Baibl styoodent rait away fi goh da di meetin dehn. Weh ih hyaa ahn weh ih si da wi Kristyan meetin dehn ku moov ahn fi waahn serv Jehoava. Yu ku shoa ahn di veedyo Weh Aal Hapm da Wahn Kingdom Haal? an invait ahn fi goh wid yu da di meetinz. If yu kud, aafa ahn wahn raid er waak tugeda fi goh da di meetinz. Ih aalso gud fi invait difrent bradaz ahn sistaz fi goh wid yu pahn di stodi. Eena da way, di Baibl styoodent wahn staat tu get fi noa adaz eena di kangrigayshan, ahn moa dan laikli, ih wahn staat tu feel komfatabl wen ih goh da wi meetin dehn.

14. Weh ku moov wahn Baibl styoodent fi mek spirichwal proagres?

¹⁴ Wi goal da fi help wi Baibl styoodent mek spirichwal proagres. (Ifee. 4:13) Wen sombadi aksep fi mek wi stodi di Baibl wid dehn, dehn mait onli di tink bowt how di stodi ku benifit dehn. Bot az dehn lov fi Jehoava groa, dehn wahn staat tu tink bowt how dehn ku help ada peepl, eevn dehn wan weh da don paat a di kangrigayshan. (Mach. 22:37-39) Wen di rait taim kohn, noh frayd fi mek yu Baibl styoodent noa dat wi ga di privilij fi sopoat di Kingdom werk wid eni amonk a moni weh wi waahn giv.

15. How wi ku help wi Baibl styoodent fi du di rait ting wen ih ga wahn prablem?

¹⁵ Teech yu Baibl styoodent weh fi du wen ih fays prablemz. Fi egzampl, sopoaz  yu Baibl styoodent, weh da wahn poblisha weh noh baptaiz, tel yu dat sombadi eena di kangrigayshan ofen ahn. Weh yu wahn du? Raada dan tek said, yu ku eksplayn tu ahn weh di Baibl seh ih sopoas tu du. Hihn ku eeda fagiv di brada ahn faget bowt di mata, er if ih kyaahn du dat, hihn ku goh taak tu di persn eena wahn kain ahn lovin way wid di goal fi mek pees wid ahn. (Kompyaa Machyu 18:15.) Help yu Baibl styoodent fi praktis weh fi seh. Shoa ahn how fi yooz di JW Library^® ap, di Risaach Gaid fi Jehoava Witnisiz, ahn di jw.org^® websait fi mek ih ku laan difrent wayz fi deel wid di prablem. If ih laan how fi solv ih prablemz wid adaz bifoa ih geh baptaiz, ih wahn moa dan laikli ga gud rilayshanship wid adaz eena di kangrigayshan afta ih geh baptaiz.

16. Wai ih gud fi invait ada poblishaz fi goh wid yu pahn yu stodi?

¹⁶ Invait adaz fahn di kangrigayshan fi goh wid yu pahn yu stodi, ahn yu ku aalso invait di serkit oavaseeya wen hihn di vizit di kangrigayshan. Wai? Pahn tap a di reezn dehn weh wi menshan erliya, ada poblishaz mait ku help yu Baibl styoodent eena wayz weh yoo mait kyaahn help ahn. Fi egzampl, wat if yu Baibl styoodent di chrai fi stap smoak bot ih jos kyaahn stap? Yu ku invait wahn brada er sista weh mi schrogl wid dis prablem eena di paas fi goh wid yu pahn di stodi. Da brada er sista mait ku giv di Baibl styoodent sohn veri gud advais weh ih need fi hyaa. If yu noh feel komfatabl fi kandok di stodi fronta wahn ekspeeryens brada, yu ku aks ahn fi mek hihn kandok di stodi insted. Wen yu invait adaz fi goh wid yu pahn yu stodi, yu di gi yu Baibl styoodent di apachooniti fi laan fahn ada peepl ekspeeryens. Memba, wi goal da fi help wi Baibl styoodent fi mek spirichwal proagres ahn kohn fi lov Jehoava.

17-18. Weh yu shuda tink bowt bifoa yu disaid if yu wahn stap stodi wid sombadi?

¹⁷ If yu Baibl styoodent noh di mek chaynjiz eena ih laif, soona er layta yu wahn haftu aks yuself if yu shuda stap stodi di Baibl wid ahn. Bifoa yu mek wahn disizhan, yu shuda tink bowt di persn abiliti. Sohn peepl mait tek langa dan adaz fi mek proagres. Bot aks yuself dehnya kweschan: ‘Mai Baibl styoodent di mek proagres akaadn tu ih persnal sichuwayshan?ʼ ‘Ih di staat tu put intu praktis weh ih di laan?ʼ (Mach. 28:20) Eevn doa ih mait tek sohn taim fi mek wahn Baibl styoodent kohn fi bee wan a Jeezas disaipl, ih haftu kip di mek chaynjiz eena ih laif.

¹⁸ Wat if yu di stodi wid sombadi fi wahn lang taim an dehn stil noh shoa dat di stodi impoatant tu dehn? Weh yu shuda du? Imajin dat yu finish stodi di Baibl Teech buk wid ahn, ahn yu eevn staat stodi di buk How fi Stay Eena di Lov a Gaad, bot hihn noh gaahn da wahn singl meetin yet, nat eevn  di Memoaryal! An ih aalwayz di mek ekskyoos fi wai ih kyaahn stodi. If dat da di kays, den yu wuda haftu ga wahn seeryos taak wid yu Baibl styoodent. *

19. Weh yu mait seh tu wahn Baibl styoodent if ih luk laik ih stodi noh impoatant tu ahn, ahn weh yu wuda need fi tink bowt?

¹⁹ Yu mait staat aaf di aks ahn: ‘Weh yu tink wuda bee di haadis ting fi yu du fi bee wan a Jehoava Witnisiz?ʼ Di Baibl styoodent mait seh: ‘Ai noh main stodi di Baibl, bot Ai wahn neva bee wan a Jehoava Witnisiz!ʼ If dis da di atichood weh di persn ga afta ih di stodi fi soh lang, yu tink ih mek eni sens fi kantinyu di stodi? Pahn di ada han, maybi yu Baibl styoodent tel yu fi di fos taim weh di hoal ahn bak fahn mek proagres. Fi egzampl, maybi ih feel laik hihn kuda neva preech fahn hows tu hows. Now dat yu noa how ih feel, yu wahn noa how fi help ahn.

20. How Aks 13:48 ku help wi wen wi di disaid weda er nat wi wahn kantinyu fi stodi wid wi Baibl styoodent?

²⁰ Sad fi seh, sohn Baibl styoodents da laik di Izrelait dehn eena Izeekyel day. Dis da weh Jehoava mi tel Izeekyel bowt dehn: “Luk! Yu da laik wahn romantik lov sang tu dehn, weh sombadi weh ga wahn byootiful vais sing ahn weh dehn play pahn wahn schring inschrument. Dehn wahn hyaa weh yu seh, bot nobadi wahn du weh yu tel dehn.” (Ezek. 33:32) Ih mait bee haad fi tel sombadi dat wi wahn stap stodi wid dehn. Bot wi haftu memba dat “di taim shaat” weh lef. (1 Kor. 7:29) Raada dan spen taim di stodi wid sombadi weh noh di mek spirichwal proagres, wi need fi saach fi peepl weh shoa dat dehn “gat di rait haat kandishan fi evalastin laif.”—Reed Aks 13:48, NW. *

21. Wat da wi yaateks fi 2020, ahn weh ih wahn help wi fi du?

²¹ Aal chroo di yaa 2020, wi yaateks wahn help wi fi foakos pahn how fi du beta wen wi di chrayn peepl fi bee Krais disaiplz. Ih gat een som a di werdz weh Jeezas mi menshan da da impoatant meetin pahn di mongtin da Gyalilee. Jeezas mi tel dehn fi goh ahn chrayn peepl fi bee fi hihn disaiplz ahn baptaiz dehn.—Mach. 28:19.