1. Weh sichuwayshanz di diskorij wahn lata Jehoava faytful servants?

AAL oava di werl, wahn lata Jehoava servants di goh chroo sohn rof sichuwayshanz weh mek dehn feel diskorij. Yoo si dis di hapm eena fi yoo kangrigayshan? Som a wi bradaz ahn sistaz sik bad er dehn sad bikaaz sombadi weh dehn lov ded. Adaz reeli sad bikaaz wan a dehn famili memba er dehn kloas fren chooz fi stap serv Jehoava. Ahn dehn ga adaz weh di sofa bikaaz a nachral dizaasta. Aala wi bradaz ahn sistaz weh eena dehnya sichuwayshan need komfert. How wee ku help dehn?

2. Wai di apasl Paal mi need komfert sohntaim?

² Di apasl Paal mi fays wahn lata daynja eena ih laif. (2 Kor. 11:23-28) Hihn mi aalso gaahn chroo sohnting weh mi feel laik “wahn big prikl eena [ih] badi.” Da “prikl” kuda mi bee wahn siknis. (2 Kor. 12:7) Ahn hihn mi reeli disapointid wen Deemas mi stap werk wid ahn “bikaaz Deemas [mi] lov di ting dehn weh eena dis werl soh moch.” (2 Tim. 4:10) Paal da-mi wahn anointid Kristyan weh mi brayv ahn wilin fi help adaz, bot hihn mi feel diskorij sohntaim tu.—Roam. 9:1, 2.

3. How Jehoava mi provaid komfert ahn sopoat fi Paal?

³ Paal mi geh di komfert ahn sopoat weh ih mi need. How? Jehoava mi yooz Ih hoali spirit fi komfert ahn. (2 Kor. 4:7) Bot Jehoava mi yooz ada Kristyanz fi komfert ahn tu. Paal mi seh dat som a ih bradaz da-mi “wahn big help.” (Kol. 4:11) Aristarkos, Tikikos, ahn Maak mi deh monks dehn wan weh Paal mi menshan bai naym. Dehn mi  inkorij Paal ahn dat mi help ahn fi bayr op. Weh kwalitiz mi help dehnya chree Kristyanz fi bee aybl fi komfert Paal? How wee ku kapi fi dehn egzampl wen wi di chrai fi komfert wan anada?

4. How Aristarkos mi shoa dat hihn da-mi wahn laayal fren tu Paal?

⁴ Aristarkos, wahn Masidoanyan Kristyan fahn Tesalonaika, mi shoa dat hihn da-mi wahn laayal fren tu Paal. Di fos taim wi mi reed bowt Aristarkos eena di Baibl da-mi wen Paal mi deh pahn ih terd mishineri chrip di vizit Efisos. Wail Aristarkos mi deh wid Paal, wahn krowd mi kyapcha ahn. (Aks 19:29) Wen dehn mi fainali let ahn goh, hihn neva lef Paal bai ihself soh dat hihn kuda mi kip owta daynja. Sohn monts layta, da Grees, eevn doa Paal enimi dehn mi kantinyu fi chretn ahn, Aristarkos mi stil stay wid Paal. (Aks 20:2-4) Wen Paal mi gaahn da Roam az wahn prizna rong 58 C.E., Aristarkos mi gaahn wid ahn tu. Pahn dehn way tu Roam, dehn mi ekspeeryens shiprek. (Aks 27:1, 2, 41) Ih luk laik wen dehn mi reech da Roam, Aristarkos mi spen sohn taim da prizn wid Paal. (Kol. 4:10) Ih noh sopraiz wi fi noa dat Paal mi geh inkorijment fan ih chroo fren!

5. Akaadn tu Proverbs 17:17, how wi ku bee wahn laayal fren?

⁵ Wee ku bee wahn laayal fren jos laik Aristarkos if wi stik tu wi bradaz ahn sistaz noh onli eena gud taimz bot eevn “wen taimz haad.” (Reed Proverbs 17:17) * Eevn afta wi bradaz ahn sistaz get oava dehn chraiyalz, dehn mait stil need komfert. Karol * pa mi ded fahn kyansa ahn den chree monts afta dat, ih ma mi ded fahn di sayhn ting. Shee seh: “Ah tink dat haad taimz ku mek wi sofa fi wahn lang taim. Ai reeli apreeshiayt mi laayal frenz weh memba dat Ah stil di sofa eevn doa sohn taim don paas sins mi payrents ded.”

6. If wi laayal, weh wi wahn du?

 ⁶ Frenz weh laayal sakrifais dehn taim an enerji fi help dehn bradaz ahn sistaz. Fi egzampl, wahn dakta mi tel wahn brada weh naym Peeta dat ih mi ga wahn siknis weh mi-di geh wers ahn weh mi wahn kil ahn. Ih waif, weh naym Kachrin, seh: “Wahn kopl fahn wi kangrigayshan mi kehr wi da di haaspital fi di apointment wen wi mi fain owt bowt Peeta siknis. Rait away, dehn mi tel wi dat dehn neva mi wahn mek wi goh chroo dis paynful sichuwayshan bai wiself. An fahn den, dehn aalwayz dehdeh fi wi wen wi need dehn.” Ih soh komfertin fi ga chroo frenz hoo ku help wi bayr op wen wi di goh chroo haad taimz!

7-8. Akaadn tu Koloashanz 4:7-9, how Tikikos mi shoa dat adaz kuda mi chros ahn?

⁷ Tikikos, hoo da-mi wahn Roaman Kristyan fahn di dischrik a Aysha, mi shoa dat hihn da-mi wahn laayal fren tu Paal. (Aks 20:4) Rong 55 C.E., Paal mi aaganaiz di kalekshan a moni fi help di Kristyanz da Judeeya, an ih mosi mi mek Tikikos help ahn wid da impoatant asainment. (2 Kor. 8:18-20) Layta, wen dehn mi lak op Paal da Roam fi di fos taim, hihn mi yooz Tikikos fi bee ih mesinja. Tikikos mi kehr Paal leta dehn an inkorijin mesij dehn tu di kangrigayshanz da Aysha.—Kol. 4:7-9.

⁸ Tikikos mi kantinyu fi bee wahn chroo fren weh Paal kuda mi chros. (Taitos 3:12) Bak den, yu mi kyaahn chros aal Kristyanz laik how yu kuda mi chros Tikikos. Rong 65 C.E., dehn mi lak op Paal da prizn fi di sekant taim. Paal mi rait dat wahn lata di Kristyanz da Aysha neva mi waahn spen taim wid ahn. Wai? Maybi da mi bikaaz dehn mi frayd dat adaz mi wahn persikyoot dehn. (2 Tim. 1:15) Pahn di ada han, Paal kuda mi pen pahn Tikikos ahn dats wai ih mi giv ahn wahn neks asainment. (2 Tim. 4:12) Fi shoar, Paal mi reeli apreeshiayt fi ga wahn gud fren laik Tikikos.

9. How wi ku kapi Tikikos egzampl?

 ⁹ Fi bee wahn fren weh adaz ku chros, wi need fi kapi Tikikos egzampl. Fi egzampl, wi noh jos waahn pramis dat wi wahn help wi bradaz weh need help bot wi aalso waahn du tingz fi help dehn owt. (Mach. 5:37; Look 16:10) Ih komfert peepl weh need help wen dehn noa dat dehn ku pen pahn wi. Wahn sista eksplayn wai dis da chroo, shee seh: “Ih komfert yu bikaaz yu noh haftu wori weda er nat di persn weh aafa fi help wahn dehdeh pahn taim fi du egzakli weh ih pramis fi du.”

10. Akaadn tu Proverbs 18:24, wehpaat wi ku fain komfert wen wi di fays wahn chraiyal er disapointment?

¹⁰ Ih naamali komfertin tu dehn wan weh di fays wahn chraiyal er disapointment wen dehn ku taak tu wahn fren weh dehn ku chros. (Reed Proverbs 18:24) * Beejay mi reeli disapointid wen ih oaldis son mi geh disfeloship. Hihn mi seh: “Ah mi need fi taak bowt how Ah mi-di feel wid sombadi weh Ah ku chros.” Bikaaz Carlos mi mek wahn mistayk, hihn mi kyaahn serv eena di kangrigayshan laik how hihn mi yoostu. Hihn seh: “Ah mi need fi fain sombadi fi poar owt mi haat tu weh neva mi wahn joj mi.” Carlos mi gaahn tu di eldaz ahn dehn mi help ahn fi get oava ih prablem. Ih mi aalso komfert hihn bikaaz hihn mi noa dat di eldaz neva mi wahn gasip tu adaz bowt weh hihn mi tel dehn.

11. How wi ku bee wahn fren weh adaz ku chros?

¹¹ Fi mek wi ku bee wahn fren weh adaz ku chros, wi haftu ga payshens. Afta Zanna hozban mi lef ahn, shee mi fain komfert wen ih mi tel ih kloas frenz how ih mi-di feel. Shee seh: “Eevn doa Ah mosi mi seh di saym tingz oava an oava, dehn mi ga payshens az dehn mi lisn tu mi.” Yoo ku aalso shoa dat yoo da wahn gud fren if yu wilin fi lisn gud.

12. Hoo da-mi Maak, ahn how hihn mi shoa dat hihn mi wilin fi serv adaz?

¹² Maak da-mi wahn Jooish Kristyan fahn Jeroosalem. Fi hihn kozn Baanabas da-mi wahn mishineri weh evribadi mi noa gud. (Kol. 4:10) Maak famili mi ga lata moni, bot Maak neva mek moni bee di moas impoatant ting eena ih laif. Aal chroo ih laif, hihn mi shoa dat hihn mi wilin fi help adaz ahn hihn mi hapi fi serv dehn tu. Fi egzampl, wahn lata taim hihn mi serv wid di apasl Paal ahn di apasl Peeta wail dehn mi deh eena dehn asainment, hihn mosi mi help dehn wid dehn fizikal needz. Maybi hihn wuda fain dehn wahn plays fi stay, bai food fi dehn, ahn du ada tingz laik dis. (Aks 13:2-5; 1 Peet. 5:13) Paal mi seh dat Maak da-mi wan a dehn wan weh mi-di “werk fi Gaad Kingdom lang wid [ahn]” ahn hoo da-mi “wahn big help tu [ahn].”—Kol. 4:10, 11.

13. How 2 Timoti 4:11 shoa wi dat Paal mi apreeshiayt Maak faytful servis?

¹³ Maak mi geh fi bee wan a Paal kloas frenz. Fi egzampl, bowt rong 65 C.E., wen Paal mi geh lak op da Roam fi di laas taim, hihn mi rait wahn leta tu Timoti. Eena da leta, Paal mi aks Timoti fi “goh pik op Maak ahn bring ahn lang wid [ahn] wen [ih] di kohn” da Roam. (2 Tim. 4:11) Paal mi reeli apreeshiayt how Maak mi laayal tu ahn eena di paas, soh ih mi aks fi mek Maak deh wid ahn chroo da impoatant taim. Maak mi help Paal eena wahn lata wayz, maybi ih mi giv ahn food er di tingz  weh ih mi need fi rait ih letaz. Di sopoat an inkorijment weh Paal mi get mi moa dan laikli help ahn fi bayr op til di day dehn mi kil ahn.

14-15. Weh Machyu 7:12 ku teech wi bowt how fi help adaz eena praktikal wayz?

¹⁴ Reed Machyu 7:12. Wen wi di goh chroo haad taimz, wi reeli apreeshiayt dehn wan weh aafa fi help wi owt eena praktikal wayz! Fi egzampl, Ryan pa mi ded eena wahn terabl aksident. Ryan seh: “Wen wi di sofa, wi feel laik wi kyaahn du lata tingz weh wi wuda du evri day. Bot wen sombadi du sohnting fi wi, eevn if da jos sohnting smaal, ih komfert wi wahn lat.”

¹⁵ Wen wi pay atenshan tu lee deetaylz, wi moa dan laikli wahn fain praktikal wayz fi mek wi ku help adaz. Fi egzampl, di sista weh mi disaid fi help Peeta ahn Kachrin, weh wi mi menshan erliya, mi help dehn soh dat dehn kuda mi get da aala dehn dakta apointment. Needa Peeta ner Kachrin kuda mi jraiv agen, soh di sista mi mek wahn skejul soh dat frenz fahn di kangrigayshan ku valantyaa fi kehr dehn weh dehn mi need fi goh. Yu tink di plan mi werk? Kachrin seh: “Wi mi feel laik dehn mi tek wahn hevi load fahn aafa wi shoalda.” Aalwayz memba dat eevn di lee tingz weh yu di fi adaz ku komfert dehn.

16. Weh impoatant lesn wi laan fahn Maak egzampl bowt how fi gi komfert?

¹⁶ Di disaipl Maak, hoo mi liv joorin Jeezas taim, da-mi wahn bizi Kristyan. Hihn mi ga sohn reeli impoatant tingz fi du fi Jehoava, inkloodin fi rait di Gaspl buk weh naym afta hihn. Eevn doa Maak mi haftu du dat, hihn mi tek taim owta ih bizi skejul fi komfert Paal ahn dat mi mek Paal feel komfatabl fi aks Maak fi help. Wen sombadi mi merda Angela grani, Angela mi reeli apreeshiayt dehn wan weh mi wilin fi komfert ahn. Shee seh: “Wen sombadi waahn help owt, dehn eezi fi taak tu, dehn mek yu feel laik dehn waahn help yu ahn dehn noh frayd fi du it.” Wi ku aks wiself: ‘Peepl noa mi az sombadi weh wilin fi komfert mi bradaz ahn sistaz eena praktikal wayz?ʼ

17. How 2 Korintyanz 1:3, 4 help wi fi komfert adaz?

¹⁷ Ih eezi fi fain bradaz ahn sistaz hoo need komfert. Wi ku eevn yooz som a di sayhn werdz weh adaz mi shayr wid wi fi komfert dehn. Wahn sista weh naym Nino, weh mi looz ih grani eena det, seh: “If wi wilin, Jehoava ku yooz wi fi komfert adaz.” (Reed 2 Korintyanz 1:3, 4.) Karol, weh wi mi menshan erliya, seh: “Di werdz eena 2 Korintyanz 1:4 da chroo. Wi ku yooz di sayhn werdz weh adaz mi yooz wid wi er du di sayhn tingz weh dehn mi du fi wi fi komfert adaz”

18. (a) Wai som peepl mait bee frayd fi komfert adaz? (b) How wi ku reeli komfert adaz? Yooz di egzampl eena di paragraaf.

¹⁸ Wi need fi luk fi wayz fi help adaz eevn if wi frayd. Maybi wi feel laik wi noh noa weh fi seh er weh fi du fi sombadi hoo need komfert. Wahn elda weh naym Paal mi memba how sohn bradaz ahn sistaz mi chrai komfert ahn afta ih pa mi ded. Hihn seh: “Ai mi noa dat ih neva eezi fi mek dehn mi kom op tu mi fi taak tu mi. Dehn neva noa weh fi seh. Bot Ah stil apreeshiayt dat dehn mi wilin fi komfert ahn sopoat mi.” Wahn brada weh naym Taj, weh mi gaahn chroo wahn terabl ertkwayk, seh: “Fi tel yu di chroot, Ah noh memba evri singl mesij weh di frenz mi sen mi afta di ertkwayk mi hapm, bot Ah doo memba dat dehn mi kay fi mi bikaaz dehn mi chek op pahn mi.” Fi reeli giv komfert, wi need fi shoa dat wi kay.

19. Wai yoo mek op yu main fi komfert adaz?

¹⁹ Bikaaz wi deh kloas tu di en a dis sistem a tingz, di werl wahn kantinyu fi geh wos ahn laif wahn geh haada. (2 Tim. 3:13) Ahn wi wahn aalwayz need komfert bikaaz wi imperfek ahn wi kip di mek mistayks. Wan a di reezn wai di apasl Paal kuda mi stay faytful ahn bayr op tu di en, da bikaaz a di komfert weh hihn mi geh fan ih Kristyan bradaz ahn sistaz. Mek wi bee wahn laayal fren laik Aristarkos, sombadi weh adaz ku chros laik Tikikos, ahn mek wi bee wilin fi serv adaz jos laik Maak. If wi du dehnya tingz, wi wahn help wi bradaz ahn sistaz fi kantinyu bee faytful tu Jehoava.—1 Tes. 3:2, 3.