1-2. Weh sichuwayshanz wahn lata Jehoava peepl fays, ahn how dat ku afek dehn?

TINK bowt dehnya neks chree sichuwayshan: Wahn yong brada fain owt dat ih ga wahn terabl dizeez weh wahn mek ahn weeka ahn weeka. Wahn haad-werkin brada weh eena ih 50ʼs looz ih jab, an eevn doa ih chrai reeli haad fi fain wahn nyoo jab, ih kyaahn fain non. Wahn oalda sista kyaahn du az moch az weh ih yoostu du eena ih servis tu Jehoava.

² If yoo di goh chroo wahn simila prablem laik di wan dehn weh wi jos menshan, yoo mait feel laik yu noh yoosful nohmoh. Prablemz laik dehndeh ku tek weh yu jai, dehn ku mek yu feel bad bowt yuself, ahn dehn ku mek yu kyaahn get lang wid adaz.

3. How Saytan ahn dehn wan weh fala hihn feel bowt laif?

³ Dis werl shoa how Saytan vyoo laif. Hihn aalwayz chreet hyoomanz laik dehn yoosles ahn laik dehn noh impoatant. Bikaaz hihn kruwil, hihn mi tel Eev dat shee wuda mi bee free if shee mi disobay Gaad. Bot hihn mi wel ahn noa dat dat mi wahn kaas shee ih laif. Fahn eva sins, Saytan da di wan weh di kanchroal di bizniz, di politikal, ahn di rilijos paat a dis werl. Soh ih shudn sopraiz wi ataal dat wahn lata bizniz peepl, politishanz, ahn rilijos leedaz noh valyu laif er noh kay bowt how peepl feel.

4. Weh wi wahn diskos eena dis aatikl?

⁴ Pahn di ada han, Jehoava waahn wi feel gud bowt wiself, ahn hihn help wi wen wi di fays sichuwayshanz weh  ku mek wi feel yoosles. (Ps. 136:23; Roam. 12:3) Eena dis aatikl, wi wahn diskos how Jehoava help wi eena dehnya chree sichuwayshan: (1) Wen wi geh sik, (2) wen wi fain it haad fi mek inof moni, ahn (3) wen wi feel laik wi noh ga notn yoosful fi aafa Jehoava bikaaz a oal ayj. Bifoa wi diskos dehnya chree sichuwayshan, doh, mek wi fos diskos wai wi ku bee shoar dat eech wan a wi preshos tu Jehoava.

5. Weh kanvins yoo dat hyoomanz preshos tu Jehoava?

⁵ Eevn doa Jehoava mek wee fahn dos, wee faar moa preshos dan dert. (Gen. 2:7) Tink bowt jos som a di reezn wai wi noa dat wee preshos tu Jehoava. Hihn mi kriyayt hyoomanz wid di abiliti fi kapi fi hihn kwaliti dehn. (Gen. 1:27) Bikaaz hihn du dat, dat mek hyoomanz beta dan evriting els weh hihn mi kriyayt pahn ert. Hihn mi aalso put hyoomanz in chaaj a di ert ahn di animalz.—Ps. 8:4-8.

6. Weh ada proof wi ga weh shoa dat hyoomanz preshos tu Jehoava?

⁶ Eevn afta Adam mi sin, hyoomanz mi kantinyu fi bee preshos tu Jehoava. Wee soh preshos tu Jehoava dat hihn mi sen ih Son, Jeezas, weh ih lov soh moch, fi ded az wahn ransom fi wi sinz. (1 Jan 4:9, 10) Bikaaz a da ransom, Jehoava wahn rezorek dehn wan weh ded bikaaz a di sin weh dehn inherit fahn Adam. Hihn wahn rezorek “di raichos ahn di [wan dehn weh noh raichos].” (Aks 24:15) Di Baibl shoa wi dat wee preshos tu Jehoava eevn if wi sik, poa, er oal.—Aks 10:34, 35.

7. Weh ada reezn Jehoava servants ga fi bileev dat dehn preshos tu hihn?

⁷ Wi ga ada reezn fi bileev dat wee preshos tu Jehoava. Hihn jraa wi tu hihn ahn hihn tek noatis a how wi rispan tu di gud nyooz. (Jan 6:44) Az wi mi staat tu geh kloas tu Jehoava, hihn mi kohn kloasa tu wi. (Jay. 4:8) Jehoava aalwayz put een di taim ahn di efoat fi teech wi. Dat shoa dat wee preshos tu hihn. Hihn noa how wi stan rait now, ahn hihn noa di taip a persn wi ku bee eena di fyoocha. Aalso, Jehoava disiplin wi kaaz ih lov wi. (Prov. 3:11, 12) Dehndeh da schrang proof dat wee preshos tu Jehoava!

8. How di werdz da Psalm 18:27-29 ku afek di way wi vyoo wi prablemz?

⁸ Eevn doa sohn peepl mi kansida King Dayvid fi bee yoosles, hihn mi noa dat Jehoava mi lov ahn sopoat ahn. Bikaaz Dayvid mi noa dis, ih mi help ahn fi ga di rait atichood az ih mi bayr op chroo ih sichuwayshan. (2 Sam. 16:5-7) Wen wi feel dipres er di fays chalenjiz, Jehoava ku help wi fi si tingz eena wahn difrent way an ih ku aalso help wi get oava eni prablem. (Reed Psalm 18:27-29.) * Bikaaz Jehoava ga wi bak, notn ku tek weh di jai weh wi geh wen wi serv hihn. (Roam. 8:31) Now, wi wahn luk pahn dehn chree spesifik sichuwayshan wen wi espeshali need fi memba dat Jehoava lov wi ahn dat wee preshos tu hihn.

9. How siknis mait afek di way wi vyoo wiself?

⁹ Siknis ku afek wi imoashanz, ahn mek wi feel laik wi noh yoosful tu enibadi. Wi mait feel shaym wen peepl noatis dat sohnting rang wid wi er wen wi haftu pen  pahn adaz fi help. Eevn if adaz noh noa dat wi sik, wi mait staat tu feel shaym bikaaz wi kyaahn du som a di tingz weh wi yoostu du. Wen wi feel diskorij laik dis, da den Jehoava inkorij wi. How hihn du dat?

10. Akaadn tu Proverbs 12:25, weh ku help wi wen wi sik?

¹⁰ Wen wi sik, “wahn gud werd” ku mek wi feel beta. (Reed Proverbs 12:25.) * Eena di Baibl, Jehoava tel wi wahn lata gud tingz weh rimain wi dat wi preshos tu hihn eevn if wi sik. (Ps. 31:19; 41:3) If wi reed di Baibl oava an oava, Jehoava wahn help wi fi deel wid di woriz weh wi ga bikaaz a wi siknis.

11. How wahn brada mi geh help fahn Jehoava?

¹¹ Kansida Jorge ekspeeryens. Az wahn yong man, Jorge mi divelop wahn dizeez weh mi geh wers kwik-wan ahn dat mi mek ih feel yoosles. Jorge seh: “Ah neva pripyaa fi how mi siknis mi mek Ah feel ner fi di shaym Ah mi feel bikaaz a di way peepl luk pahn mi. Az mi kandishan mi geh wers, Ah mi tink bowt how mi laif mi wahn chaynj. Ah mi reeli sad, an Ah mi bayg Jehoava fi help.” How Jehoava mi help Jorge? Hihn seh: “Bikaaz ih mi haad fi mek Ah foakos, Ah wuda reed jos wahn fyoo vers fahn Psalms evri day weh shoa dat Jehoava kay fi ih servant dehn. Ah wuda reed dehn skripchaz oava an oava evri day. Dehndeh skripchaz mi reeli komfert mi. Afta wahn wail, ada peepl mi staat tu noatis dat Ah mi-di smail moa ahn moa. Dehn mi eevn seh dat mai pazitiv atichood mi inkorij dehn. Ah mi riyalaiz dat Jehoava mi ansa mi pryaaz! Hihn mi help mi fi chaynj di way Ah yoostu vyoo miself. Ah mi staat tu foakos  pahn weh fi hihn Werd seh bowt how hihn vyoo mee eevn doa Ah sik.”

12. Weh yu ku du fi geh Jehoava help wen yu di deel wid wahn siknis?

¹² If yoo di deel wid wahn siknis, yu ku bee shoar dat Jehoava noa weh yu di goh chroo. Bayg hihn fi help soh dat yu ku ga di rait vyoo a yu sichuwayshan. Den fain di komfertin mesij weh Jehoava put eena di Baibl fi yoo. Foakos pahn skripchaz weh shoa humoch Jehoava valyu ih servants. Az yu du dat, yu wahn si dat Jehoava sopoat aala dehn wan weh faytful tu hihn.—Ps. 84:11.

13. How wahn famili hed mait feel if ih looz ih jab?

¹³ Evri famili hed waahn provaid weh ih famili need fi liv. Bot wahn brada ku looz ih jab, eevn if hihn noh du notn rang. Hihn mait chrai reeli haad fi fain wahn neks jab bot ih mait noh fain non. Bikaaz dis hapm tu ahn, ih mait feel laik ih yoosles. If hihn foakos pahn Jehoava pramis dehn, how dat ku help ahn?

14. Wai Jehoava kip ih pramis dehn?

¹⁴ Fi wahn lata difrent reezn, Jehoava aalwayz kip ih pramis dehn. (Josh. 21:45; 23:14) Wan reezn da bikaaz fi hihn gud naym, er repyutayshan, deh pahn di lain. Jehoava pramis dat hihn wahn tek kayr a ih laayal servants, ahn hihn feel laik hihn haftu fulfil da pramis. (Ps. 31:1-3) Pahn tap a dat, Jehoava noa dat wee wuda bee sad ahn disapointid if hihn noh tek kayr a wee an adaz weh da paat a fi hihn famili. Jehoava aalso pramis dat hihn wahn provaid weh wi need fi liv ahn weh wi need fi kantinyu serv ahn, ahn notn wahn stap hihn fahn mek da pramis kohn chroo!—Mach. 6:30-33; 24:45.

15. (a) Weh chalenj di Kristyanz weh mi liv joorin di taim a di apasl dehn mi fays? (b) Weh Psalm 37:18, 19 help wi fi bee shoar a?

 ¹⁵ Wen wi memba wai Jehoava kip ih pramis dehn, wee ku bee shoar dat hihn wahn help wi wen wi fain it haad fi mek inof moni. Kansida di egzampl a di Kristyanz bak eena di taim a di apasl dehn. Wen persikyooshan mi staat op gens di kangrigayshan da Jeroosalem, “aal di bileeva dehn, eksep di apasl dehn, mi skyata.” (Aks 8:1) Tink bowt di haad taimz weh di Kristyanz mi fays! Moa dan laikli, dehn mi looz dehn hoam ahn dehn jab er bizniz. Bot stil, Jehoava neva abandan dehn ahn dehn neva looz dehn jai. (Aks 8:4; Heeb. 13:5, 6; Jay. 1:2, 3) Jehoava mi sopoat dehn faytful Kristyanz, ahn hihn wahn sopoat wee tu.—Reed Psalm 37:18, 19. *

16. Weh ku mek wi tink dat wi wership noh preshos tu Jehoava?

¹⁶ Az wi geh oalda, wi mait staat tu feel laik wi noh ga moch fi gi tu Jehoava. King Dayvid maita mi feel di saym way az hihn mi geh oalda. (Ps. 71:9) How Jehoava ku help wi?

17. Weh wi ku laan fahn di egzampl a wahn sista weh naym Mayvis?

¹⁷ Kansida di egzampl a wahn sista weh naym Mayvis *. Shee mi geh invaitid fi goh da wahn meetin da di Kingdom Haal fi geh chraynin fi du mantaynans, bot shee neva waahn goh. Shee mi seh: “Ai don oal, Ai da wahn wido, ahn pahn tap a  dat, Ai nat eevn ga wan skil weh Jehoava kud yooz fi dis mantaynans werk. Ai jos yoosles.” Di nait bifoa di chraynin, shee mi poar owt ih haat tu Jehoava. Wen shee mi reech da di Kingdom Haal di neks day, shee stil mi-di wanda weda er nat shee shuda dehdeh. Joorin di meetin, wan a di brada mi menshan dat di moas impoatant skil wi ku ga da fi bee wilin fi mek Jehoava teech wi. Mayvis seh: “Ah mi seh tu miself, ‘Ai ga da skil!ʼ Ah mi staat tu krai wen a riyalaiz dat Jehoava mi-di ansa mi pryaaz. Hihn mi-di mek Ah noa dat Ai stil ga sohnting preshos fi aafa hihn ahn dat hihn mi wilin fi teech mee!” Now, dis da weh Mayvis seh: “Ah mi waak eena da meetin di feel nervos, diskorij, ahn yoosles. Bot Ah mi waak owt di feel kanfident, inkorij, ahn preshos!”

18. How di Baibl shoa dat wi wership tu Jehoava kantinyu fi bee preshos tu hihn eevn az wi di geh oalda?

¹⁸ Az wi geh oalda, wee ku bee shoar dat Jehoava stil ga werk fi mek wi du. (Ps. 92:12-15) Jeezas mi teech wi dat eevn if di tingz weh wi ku du noh luk impoatant tu wee, Jehoava valyu wateva wi ku du eena fi hihn servis. (Look 21:2-4) Soh foakos pahn weh yu ku du. Fi egzampl, yu ku taak bowt Jehoava, yu ku pray fi yu bradaz, an yu ku inkorij adaz fi stay faytful. Jehoava kansida yoo fi bee ih felo werka, noh bikaaz a weh yoo ku du, bot bikaaz yu wilin fi obay hihn.—1 Kor. 3:5-9.

19. Weh Roamanz 8:38, 39 help wi fi bee shoar a?

¹⁹ Wi soh tankful dat wee di wership Jehoava, wahn Gaad weh reeli valyu wi servis tu hihn! Hihn mi kriyayt wi fi du fi hihn wil, ahn dat mek wi feel reeli hapi. (Rev. 4:11) Eevn doa di werl mait si wi az yoosles, Jehoava noh vyoo wi da way (Heeb. 11:16, 38) Wen wi feel diskorij bikaaz a siknis, moni prablemz, er oal ayj, wi waahn memba dat notn ku mek Gaad stap lov wee.—Reed Roamanz 8:38, 39.