1. How di laif a wahn yong man mi chaynj afta ih mi hyaa wahn taak da wahn kanvenshan eena 1935?

WAHN yong man mi geh baptaiz eena 1926 wen ih mi 18 yaaz oal. Ih payrents da-mi Baibl Styoodents, * ahn dehn mi ga chree son ahn too daata weh dehn mi rayz fi serv Jehoava ahn fi fala Jeezas Krais. Laik weh aal Baibl Styoodents mi du bak den, dis faytful yong man yoostu eet di bred ahn jrink di wain evri yaa da Krais Eevnin Meel. Bot ih hoal laif mi chaynj eena 1935 wen ih hyaa wahn impoatant taak weh Brada Joseph Rutherford mi giv da wahn kanvenshan da Washington, D.C., U.S.A. Di taak mi naym “The Great Multitude.” Weh di Baibl Styoodents mi laan da di kanvenshan?

2. Weh eksaitin nyoo andastandin Brada Rutherford mi eksplayn eena ih taak?

² Eena ih taak, Brada Rutherford mi eksplayn hoo da di “big krowd” weh Jan menshan da Revilayshan 7:9. Dis mi inchrestin bikaaz di Baibl Styoodents yoostu bileev dat di big krowd da-mi wahn groop a peepl weh neva az faytful az di anointid Kristyanz, bot dehn mi stil gwehn da hevn. Brada Rutherford mi yooz di Skripchaz fi eksplayn dat di big krowd noh wahn liv da hevn. Insteda dat, dehn da di saym groop weh Jeezas kaal di “ada sheep” * weh wahn servaiv  “di grayt chribyulayshan” ahn liv fareva pahn di ert. (Rev. 7:14) Jeezas mi seh: “Ai ga ada sheep, weh da noh paat a dis flak; an Ai wahn aalso leed dehn, ahn dehn wahn lisn tu mi vais, ahn dehn wahn bee wan flak, anda wan shepad.” (Jan 10:16) Di ada sheep weh Jeezas taak bowt eena dis skripcha da laayal Witnisiz a Jehoava hoo ga di hoap fi liv fareva eena Paradais pahn ert. (Mach. 25:31-33, 46) Mek wi si how wi nyoo andastandin a dehndeh skripchaz mi chaynj di laif a wahn lata Jehoava peepl, inkloodin da 18-yaa-oal brada weh mi geh baptaiz eena 1926.—Ps. 97:11; Prov. 4:18.

3-4. Da di kanvenshan eena 1935, weh towznz a peepl mi geh fi andastan bowt dehn hoap fi di fyoocha, ahn wai?

³ Da mi wahn eksaitin taim da di kanvenshan wen Brada Rutherford aks evribadi eena di aadyans fi stan op if dehn ga di hoap fi liv fareva pahn di ert. Wahn brada weh mi deh da di kanvenshan seh dat moa dan haaf a di peepl weh mi deh eena di aadyans stan op, ahn pahn da day bowt 20,000 peepl mi dehdeh. Den Brada Rutherford seh: “Luk! Di big krowd!” Ahn den evribadi eena di aadyans staat tu hala owt haad bikaaz dehn mi soh hapi. Evribadi weh stan op mi noa dat Jehoava neva chooz dehn fi goh liv da hevn. How dehn mi noa dat? Bikaaz dehn noa dat Gaad neva anoint dehn wid fi hihn hoali spirit. Pahn di neks day a di kanvenshan, 840 nyoo Witnisiz mi geh baptaiz, ahn moas a dehn da-mi membaz a di ada sheep.

⁴ Afta di taak, di yong brada weh wi menshan eena paragraaf wan ahn towznz a ada peepl stap eet di bred ahn jrink di wain da Krais Eevnin Meel. Wahn hombl brada mi seh dis: “Di Memoaryal eena 1935 da-mi di laas taim Ah mi eet di bred ahn jrink di wain. Ah mi riyalaiz dat Jehoava neva anoint mee wid fi hihn hoali spirit ahn gi mi di hoap fi goh liv da hevn. Insted, Ah mi ga di hoap fi liv pahn di ert ahn fi help ton it intu wahn paradais.” Hihn da neva di onli wan weh mi feel da way; wahn lata ada bradaz ahn sistaz mi feel laik dat. (Roam. 8:16, 17; 2 Kor. 1:21, 22) Sins 1935, lat moa peepl kwalifai fi bee membaz a di big krowd ahn dehn werk said bai said wid di anointid Kristyanz weh stil deh ya pahn di ert.

5. How Jehoava feel bowt bradaz ahn sistaz hoo stap eet di bred ahn jrink di wain?

⁵ How Jehoava feel bowt bradaz ahn sistaz hoo mi stap eet di bred ahn jrink di wain afta 1935? Ahn wat if wahn brada er sista tudeh bileev dat dehn shuda eet di bred ahn jrink di wain da di Memoaryal, bot den laytaraan dehn riyalaiz dat Jehoava neva anoint dehn wid hoali spirit? (1 Kor. 11:28) Som bradaz ahn sistaz eet di bred ahn jrink di wain bikaaz dehn noh reeli andastan dehn hoap fi di fyoocha. Bot if dehn wilin fi admit dat dehn mek wahn mistayk, stap eet di bred ahn jrink di wain, ahn stay faytful ahn kantinyu serv Jehoava, den hihn wahn definaytli aksep dehn az membaz a di ada sheep. Eevn doa dehn noh eet di bred ahn jrink di wain nohmoh, dehn stil goh da di Memoaryal bikaaz dehn reeli apreeshiayt weh Jehoava ahn Jeezas du fi dehn.

6. Weh Jeezas mi koman di aynjel dehn fi du?

⁶ Bikaaz di grayt chribyulayshan wahn  hapm veri soon, ih wuda bee gud fi mek wi diskos wat els Revilayshan chapta 7 seh bowt anointid Kristyanz ahn di big krowd a ada sheep. Jeezas mi koman di aynjel dehn fi hoal bak di foa haad breez fahn di ert soh dat di ert noh geh dischrai til aal anointid Kristyanz geh wahn seel fahn Jehoava. Da seel meenz dat hihn joj dehn az faytful. (Rev. 7:1-4) Bikaaz dehn stay faytful tu Gaad, Krais anointid bradaz wahn bee king ahn prees wid hihn da hevn. (Rev. 20:6) Jehoava, Jeezas, ahn di aynjelz wahn bee veri hapi wen di 144,000 anointid Kristyanz geh dehn riwaad da hevn.

7. Da hoo Jan si eena di vizhan da Revilayshan 7:9, 10, ahn weh dehn di du? (Koment pahn di picha pahn di kova.)

⁷ Afta Jan tel wi bowt di 144,000 king ahn prees, ih si sohnting els eksaitin. Ih si wahn “big krowd” weh wahn servaiv Armagedon. Dehnya too groop a peepl difrent fahn eech ada bikaaz di big krowd ga faar moa peepl dan jos 144,000. Az a mata a fak, wi noh noa di egzak nomba. (Reed Revilayshan 7:9, 10.) Di membaz a di big krowd “gat aan wait roab,” ahn dat meenz dat dehn noh alow ‘notn eena Saytan werl fi get dehn doti,ʼ ahn dat dehn stay laayal tu Gaad ahn tu Krais. (Jay. 1:27) Dehn showt owt wid wahn lowd vais bikaaz dehn geh salvayshan sayka weh Jehoava ahn di Lam a Gaad, Jeezas, du fi dehn. Pahn tap a dat, dehn di hoal sohn paam branch eena dehn han, ahn dis shoa dat dehn hapi fi aksep Jeezas az di King weh Jehoava chooz.—Kompyaa Jan 12:12, 13.

8. Weh Revilayshan 7:11, 12 tel wi bowt Jehoava, Jeezas, di aynjelz, an di anointid Kristyanz weh deh da hevn?

⁸ Reed Revilayshan 7:11, 12. Weh wahn hapm da hevn wen evribadi si di big krowd? Jan seh dat evribadi da hevn wahn bee hapi ahn staat prayz Gaad wen dehn si di big krowd. Soh Jehoava, Jeezas, di aynjelz, ahn di anointid Kristyanz wahn rijais fi si dis prafesi kohn chroo wen di big krowd servaiv di grayt chribyulayshan.

9. Akaadn tu Revilayshan 7:13-15, weh di membaz a di big krowd di du rait now?

⁹ Reed Revilayshan 7:13-15. Jan mi rait dat membaz a di big krowd “wash dehn roab eena di blod a di Lam ahn dehn roab geh wait.” Dis meenz dat dehn ga wahn kleen kanshans ahn dat Jehoava pleez wid dehn. (Isa. 1:18) Dehn da Kristyanz hoo dedikayt dehn laif tu Gaad ahn geh baptaiz. Dehn ga schrang fayt eena Jeezas sakrifais ahn ga wahn rilayshanship wid Jehoava. (Jan 3:36; 1 Peet. 3:21) Bikaaz a dat, dehn kwalifai fi stan op fronta Gaad chroan ahn “wership hihn day ahn nait” rait yasoh pahn di ert. Rait now, dehn shoa dat dehn eega fi preech bowt di Kingdom ahn mek disaiplz a Krais. In fak, da dehn di du moas a dis werk, bikaaz notn moa impoatant tu dehn dan Gaad Kingdom.—Mach. 6:33; 24:14; 28:19, 20.

10. Da hoo wahn tek kayr a di big krowd, ahn weh pramis dehn wahn si kohn chroo?

¹⁰ Da Gaad wahn tek kayr a di big krowd weh servaiv di grayt chribyulayshan, bikaaz di aynjel tel Jan dat “di Wan weh di sidong pahn di chroan wahn protek dehn.” Di ada sheep di wayt lang taim fi si wahn wandaful pramis kohn chroo, an ih wahn fainali hapm. Dis da di pramis: “[Gaad] wahn waip weh dehn tyaaz fahn dehn aiy, nobadi noh wahn ded nohmoh, nobadi noh wahn feel saro ner payn nohmoh  ner krai bikaaz a sadnis. Di tingz weh yoostu hapm noh wahn egzis nohmoh.”—Rev. 21:3, 4.

11-12. (a) Akaadn tu Revilayshan 7:16, 17, weh blesinz di big krowd wahn get eena di fyoocha? (b) Weh di ada sheep ku du da di Memoaryal, ahn wai?

¹¹ Reed Revilayshan 7:16, 17. Rait now, som a Jehoava peepl hongri bikaaz dehn noh ga inof moni fi bai food er bikaaz a prablemz eena dehn konchri er bikaaz a waar. Som a wi bradaz ahn sistaz deh da jayl bikaaz a weh dehn bileev. Bot dehn hapi fi noa dat afta Saytan wikid werl geh dischrai, dehn wahn aalwayz ga lata fizikal ahn spirichwal food. Wen Jehoava dischrai Saytan wikid werl, Hihn wahn mek shoar fi protek di big krowd fahn fi hihn anga. Afta di grayt chribyulayshan, Jeezas wahn gaid di wan dehn weh servaiv tu di “waata springz weh gi laif.” Jos imajin: Di big krowd ga wahn wandaful hoap. Owta aala di bilyanz a hyoomanz weh eva liv pahn dis ert, dehn mait neva eva ded. Now dat da sohnting amayzin fi chroo!—Jan 11:26.

¹² Di ada sheep chrooli tankful tu Jehoava ahn Jeezas fi di wandaful hoap weh dehn gat! Aldoa Jehoava neva chooz dehn fi liv da hevn, hihn lov dehn saym laik how ih lov anointid Kristyanz. Membaz a di too groop ku prayz Gaad ahn Krais. Wan way how dehn du dis da wen dehn goh da Krais Eevnin Meel.

13-14. Wai di anointid ahn di ada sheep shuda goh da di Memoaryal a Krais det?

¹³ Tudeh day, bowt 1 persn owta evri 1,000 peepl weh goh da di Memoaryal eet di bred ahn jrink di wain. Dat meenz dat moas a di kangrigayshan dehn rong di werl noh ga nobadi weh eet di bred ahn jrink di wain da di Memoaryal. Moas a di peepl weh goh da di Memoaryal ga di hoap fi liv pahn di ert. Soh den, wai dehn goh da Krais Eevnin Meel? Dehn goh fi di saym reezn wai wahn persn wuda goh tu wan a ih fren wedn. Dehn goh da di wedn fi shoa dat dehn lov ahn sopoat di kopl weh di geh marid. Eena di saym way, di ada sheep goh da di Memoaryal bikaaz dehn waahn shoa dat dehn lov ahn  sopoat Krais ahn di anointid Kristyanz. Di ada sheep aalso goh fi shoa dat dehn apreeshiayt Jeezas sakrifais, di saym sakrifais weh mek it pasabl fi mek dehn liv fareva pahn di ert.

¹⁴ Wahn neks reezn wai di ada sheep goh da di Memoaryal da bikaaz dehn waahn obay Jeezas koman. Wen Jeezas mi fers shayr da speshal meel wid ih faytful apasl dehn, ih mi tel dehn: “Kip aan di du dis fi memba mi.” (1 Kor. 11:23-26) Soh di ada sheep wahn kip di goh da Krais Eevnin Meel az lang az som anointid Kristyanz stil di liv pahn di ert. In fak, di ada sheep invait evribadi fi goh da di Memoaryal lang wid dehn.

15. How wi ku prayz Gaad ahn Krais da di Memoaryal?

¹⁵ Wi ga di apachooniti fi prayz Gaad ahn Krais da di Memoaryal wen wi sing ahn pray tugeda. Di taak weh di brada wahn giv da di Memoaryal dis yaa naym “Bee Tankful fi Weh Gaad ahn Jeezas Krais Du fi Yu!” Dis taak wahn help wi fi bee moa tankful tu Jehoava ahn tu Krais. Soh wen wi paas di bred ahn di wain, mek wi tink bowt weh dehn stan fa—Jeezas badi an ih blod. Ahn mek wi tink bowt di lov weh Jehoava shoa wi; hihn mi alow ih Son fi ded soh dat wee ku ga laif. (Mach. 20:28) Evribadi weh lov wi hevnli Faada ahn fi hihn Son wahn definaytli waahn goh da di Memoaryal.

16. Eena weh wayz di anointid ahn di ada sheep simila tu eech ada?

¹⁶ Eena som wayz, di anointid ahn di ada sheep simila tu eech ada. Jehoava noh lov wan groop moa dan di ada. Di too groop impoatant tu hihn. Wi noa dis bikaaz di prais weh ih pay fi bai di anointid ahn di ada sheep da di saym—di laif a ih preshos Son. Di onli ting weh mek dehn difrent fahn eech ada da di hoap weh dehn gat. Bot di too groop a peepl haftu stay laayal tu Gaad ahn tu Krais. (Ps. 31:23) Ahn memba dat Jehoava giv ih hoali spirit tu eech persn akaadn tu weh da persn need, noh mata if da persn anointid er if ih da wahn memba a di ada sheep.

17. Weh anointid Kristyanz hoo stil di liv pahn di ert di luk faawod tu?

¹⁷ Anointid Kristyanz noh baan wid di hoap fi goh da hevn. Gaad gi dehn da hoap. Dehn tink bowt dehn hoap, pray bowt it, ahn luk faawod fi geh dehn riwaad da hevn. Dehn kyaahn eevn imajin weh dehn badi wahn luk laik wen dehn get da hevn. (Fil. 3:20, 21; 1 Jan 3:2) Bot noh mata wat, dehn luk faawod fi meet Jehoava, Jeezas, di aynjelz, ahn di res a di  anointid wan dehn. Dehn reeli luk faawod fi deh wid dehn eena di Kingdom da hevn.

18. Weh di ada sheep di luk faawod tu?

¹⁸ Di ada sheep luk faawod tu di taim wen dehn wahn liv fareva pahn di ert. Aftaraal, dis da di dizaiya weh aal hyoomanz gat. (Eccl. 3:11) Dehn luk faawod tu di day wen dehn ku help ton di hoal ert intu wahn paradais. Dehn lang fi di day wen dehn wahn ku bil dehn oan hows, plaant dehn oan gyaadn, ahn rayz dehn chiljren wid perfek helt. (Isa. 65:21-23) Dehn luk faawod fi si ahn laan nyoo tingz bowt di mongtin, di faris, ahn di oashan dehn, ahn fi stodi bowt aala di tingz weh Jehoava mek. Moa dan eniting els, doh, dehn eksaitid fi noa dat dehn frenship wid Jehoava wahn kantinyu fi geh schranga ahn schranga.

19. Weh apachooniti eech wan a wi gat da di Memoaryal, ahn wen wi wahn ga di Memoaryal dis yaa?

¹⁹ Jehoava gi eech wan a ih servant dehn wahn wandaful hoap fi di fyoocha. (Jer. 29:11) Eech wan a wi weh goh da di Memoaryal a Krais det ga wahn wandaful apachooniti fi prayz Gaad ahn Krais fi weh dehn du fi wi soh dat wi ku injai laif fareva. Di Memoaryal da di moas impoatant meetin weh chroo Kristyanz gat eech yaa. Dis yaa, ih wahn bee pahn Satideh, Maach 27, afta di son goh dong. Wahn lata peepl liv eena ayryaz weh ih eezi fi mek dehn goh da di Memoaryal. Bot adaz liv wehpaat ih haad fi mek dehn goh. Som a wi bradaz wahn eevn haftu selibrayt di Memoaryal da jayl. Wi pray dat eech persn, eech groop, an eech kangrigayshan ga wahn wandaful Memoaryal selibrayshan az Jehoava, Jeezas, di aynjelz, ahn di anointid wan dehn weh deh da hevn luk aan!