1. Weh shoa dat wahn lata famili nowadayz noh ga lov fi wan anada?

DI BAIBL prafesai dat eena di laas dayz, peepl “noh wahn ga no afekshan fi wan anada.” (2 Tim. 3:1, 3) Wi ku si dis prafesi di kohn chroo nowadayz. Fi egzampl, lata payrents geh divoas er separayt fahn eech ada, soh dehn aalwayz beks wid wan anada, ahn dat mek di chiljren dehn feel laik nobadi lov dehn. Sohn ada famili disaid fi stay tugeda ahn liv eena di saym hows bot dehn noh kloas tu eech ada; dehn mait az wel bee schraynjaz. Dis da weh wahn famili kongsla seh: “Di ma, di pa, ahn di pikni dehn noh taak tu wan anada, ahn dehn spen moas a dehn taim pahn wahn kompyoota, tablet, foan, er di play veedyo gaym. Aldoa dehn liv eena di saym hows, dehn bayli noa wan anada.”

2-3. (a) Akaadn tu Roamanz 12:10, hoo wi need fi ga lov fa? (b) Weh wi wahn taak bowt eena dis aatikl?

² Peepl eena dis werl noh ga no lov, ahn wee noh waahn bee laik dehn non ataal. (Roam. 12:2) Insted, wi need fi laan fi ga moa lov fi wi famili membaz ahn fi wi bradaz ahn sistaz eena di kangrigayshan. (Reed Roamanz 12:10.) Weh kaina lov dis skripcha di taak bowt? Da di kaina lov weh famili membaz feel wen dehn ga wahn kloas ahn lovin rilayshanship wid wan anada. Dis da di kaina lov weh wi shuda ga fi wi spirichwal famili, wi Kristyan bradaz ahn sistaz. Wen wi shoa dis kaina lov, wi help evribadi fi serv Jehoava tugeda ahn bee hapi.—Mic. 2:12.

³ Soh now, mek wi taak bowt sohn Baibl egzampl weh ku help wi ga dis kaina lov ahn shoa it tu adaz.

4. Weh Jaymz 5:11 tel wi bowt Jehoava lov?

⁴ Di Baibl tel wi wahn lat bowt Jehoava wayz. Fi egzampl, ih tel wi dat “Gaad da lov.” (1 Jan 4:8) Wen wi laan tingz laik dis bowt Jehoava, wee waahn bee ih fren, noh chroo? Bot di Baibl aalso tel wi dat Jehoava ‘ful a kompashan.ʼ (Reed Jaymz 5:11.) Dis da wahn byootiful way fi tel wi bowt di kaina lov weh Jehoava feel tuwaadz wi!

5. How Jehoava shoa mersi, ahn how wi ku fala fi hihn egzampl?

⁵ Noatis dat Jaymz 5:11 menshan Jehoava kompashan lang wid wahn nada kwaliti weh mek wi lov ahn moa—ih mersi. (Ex. 34:6) Wan way how Jehoava shoa mersi tuwaadz wi da wen ih fergiv wi fi di mistayk dehn weh wi mek. (Ps. 51:1) Eena di Baibl, mersi meen faar moa dan jos fi fergiv sombadi fi sohnting weh dehn du. Mersi da wahn schrang feelin weh kohn fahn eensaida wahn persn wen ih si sombadi weh need help an den du sohnting fi help ahn. Jehoava seh dat di schrang dizaiya weh hihn ga fi help wi eevn schranga dan wahn ma dizaiya fi help ih pikni. (Isa. 49:15) Soh wen wi need help, Jehoava mersi moov ahn fi help wi. (Ps. 37:39; 1 Kor. 10:13) How wi ku fala Jehoava egzampl? Wi ku shoa mersi tu wi bradaz ahn sistaz wen wi fergiv dehn ahn noh hoal malis tuwaadz dehn. (Ifee. 4:32) Wahn nada impoatant way wi shoa mersi da wen wi help an sopoat wi bradaz weh di goh chroo chraiyalz. Wen lov moov wi fi shoa mersi tu adaz, wi di fala Jehoava egzampl, kaaz hihn da di bes egzampl a sohnbadi weh ful a mersi ahn kompashan.—Ifee. 5:1.

6. Weh kaina frenship Janatan ahn Dayvid mi gat?

⁶ Di Baibl tel wi bowt som a Jehoava servants hoo da-mi kloas frenz wid wan anada, eevn doa dehn neva perfek. Mek  wi taak wahn lee bit bowt di egzampl a Janatan ahn Dayvid. Di Baibl seh: “Janatan ahn Dayvid mi geh fi bee kloas frenz wid wan anada. Ahn Janatan mi staat tu lov Dayvid az moch az ih lov ihself.” (1 Sam. 18:1) Jehoava mi chooz Dayvid fi bee di neks king afta Saal. Afta dat, Saal staat tu jelos Dayvid ahn chrai fi kil ahn. Bot Saal son, Janatan, neva sopoat ih pa wen ih pa mi waahn kil Dayvid. Insted, Janatan ahn Dayvid mi pramis fi aalwayz stay kloas tu eech ada an aalwayz sopoat wan anada.—1 Sam. 20:42.

7. Wat da sohnting weh kuda mi stap Janatan ahn Dayvid fahn bee frenz wid wan anada?

⁷ Ih amayzin dat Janatan ahn Dayvid da-mi soch gud frenz wid wan anada bikaaz lata tingz kuda mi stap dehn fahn bee frenz. Fi egzampl, Janatan mi bowt 30 yaaz oalda dan Dayvid. Soh Janatan kuda mi tink dat hihn kudn bee kloas wid sohnbadi weh yonga dan hihn ahn weh ga les ekspeeryens eena laif. Bot Janatan neva tink da way. Hihn mi ga lata rispek fi Dayvid.

8. Wai Janatan kuda mi bee soch a gud fren tu Dayvid?

⁸ Janatan kuda mi bee jelos a Dayvid. Yu si, Janatan da-mi King Saal son, an ih kuda mi insis dat hihn ga di rait fi bee di neks king. (1 Sam. 20:31) Bot Janatan mi hombl, an ih mi laayal tu Jehoava. Soh hihn mi sopoat Jehoava disizhan fi chooz Dayvid az di neks king. An eevn doa Saal mi geh beks, Janatan mi stil laayal tu Dayvid.—1 Sam. 20:32-34.

9. How wi noa dat Janatan neva jelos Dayvid?

⁹ Janatan mi lov Dayvid, soh ih neva jelos ahn. Janatan mi brayv an ih mi fait eena lata difrent waar an ih kuda mi yooz wahn boa an aro veri gud. Az a mata a fak, peepl yoostu seh dat Janatan an ih pa “mi faasa dan wahn eegl,” ahn dat dehn “mi schranga dan wahn laiyan.” (2 Sam. 1:22, 23) Soh Janatan kuda mi bee bregin ahn boasi bowt aala di brayv tingz weh ih mi du. Bot hihn neva chrai bee beta dan Dayvid, an ih neva jelos a di gud tingz weh Dayvid mi du needa. Fi egzampl, afta Dayvid mi kil Golaiyat, Janatan mi geh kloasa tu Dayvid. How wi ku shoa dat wi lov wi bradaz ahn sistaz az moch az Janatan mi lov Dayvid?

10. Weh ih meen fi ga “deep lov fi wan anada”?

¹⁰ Di Baibl tel wi fi ga “deep lov fi wan anada.” (1 Peet. 1:22) Jehoava set di egzampl fi wi. Fi hihn lov soh schrang dat if wi laayal tu hihn, ih wahn neva stap lov wi. (Roam. 8:38, 39) Di Greek werdz weh wi chranslayt az “deep lov,” gi di aidyaa dat sombadi haftu werk reeli haad fi shoa lov tu adaz. Sohntaim ih noh eezi fi shoa dis kaina lov tu wi bradaz ahn sistaz. Soh wen adaz du er seh sohnting weh ofen wi, wi need fi shoa lov ahn put op wid dehn. Wi need fi reeli werk haad fi ‘kip di yooniti weh di spirit gi wi,ʼ ahn fi “liv eena pees wid wan anada.” (Ifee. 4:1-3) Wen wi werk haad fi “liv eena pees” wid wi bradaz ahn sistaz, wi noh wahn foakos pahn dehn faalts. Wi wahn chrai wi bes fi si dehn di way Jehoava si dehn.—1 Sam. 16:7; Ps. 130:3.

11. Wai ih ku bee haad fi shoa lov sohntaim?

¹¹ Ih noh aalwayz eezi fi shoa lov tu wi bradaz ahn sistaz, espeshali wen wi noa dehn faalts. Eevn eena di dayz a di apasl dehn, dis da-mi wahn chalenj fi Kristyanz. Fi egzampl, Yoadya ahn Sintiki  praabli neva ga no prablem di werk lang wid Paal fi preech di gud nyooz. Bot fi som reezn, ih mi haad fi mek dehndeh too sista werk wid wan anada. Soh Paal mi haftu bayg dehn fi “tink eena di saym way, bikaaz dehn da wan wid di Laad.”—Fil. 4:2, 3.

12. Weh wi ku du if wi waahn ga wahn kloas ahn lovin frenship wid wi bradaz ahn sistaz?

¹² Weh wi ku du if wi waahn ga wahn kloas ahn lovin frenship wid wi bradaz ahn sistaz? If wi tek di taim fi get fi noa dehn, wi mait fain dat ih eeziya fi mek wi andastan dehn ahn fi ga lov fi dehn. Wi ku bee frenz wid dehn eevn if dehn oalda dan wee, if dehn yonga dan wee, er if dehn kohn fahn wahn difrent kolcha. Memba dat Janatan mi bowt 30 yaaz oalda dan Dayvid; yet hihn mi ga wahn kloas frenship wid Dayvid. Yu tink yoo kuda bee frenz wid sombadi eena yu kangrigayshan weh oalda er yonga dan yoo? If yu du dis, yu wahn shoa dat yu ga lov fi yu bradaz “weh deh aal oava di werl.”—1 Peet. 2:17.

13. Wai wi mait feel kloasa tu som bradaz ahn sistaz dan tu adaz?

¹³ Yu tink dat if wi ga lov fi wi bradaz ahn sistaz dat meenz dat wi wahn ga wahn kloas frenship wid evri singl persn eena di kangrigayshan? No, dat noh pasabl. Ih naamal fi feel kloasa tu som peepl dan tu adaz. Aftaraal, wi yoozhwali geh fi bee frenz wid peepl hoo inchrestid eena di saym tingz laik wee. Jeezas mi kaal aala ih apasl dehn ih “frenz,” bot owta aala dehn, ih mi veri kloas tu Jan. (Jan 13:23; 15:15; 20:2) Bot dat noh meenz dat Jeezas mi chreet Jan beta dan di adaz. Fi egzampl, wen Jan an ih breda Jaymz mi aks Jeezas fi mek hihn gi dehn wahn impoatant pozishan eena Gaad Kingdom, Jeezas tel dehn: “Da noh mee fi disaid hoo wahn sidong pahn mi rait han said er mi lef han said.” (Maak 10:35-40) Soh jos laik Jeezas, wi noh waahn chreet wi kloas fren dehn beta dan adaz eena di kangrigayshan. (Jay. 2:3, 4) If wi chreet wi fren dehn beta dan adaz,  den wi noh di help di kangrigayshan fi ga pees.—Jood 17-19.

14. How Filipiyanz 2:3 help wi fi noh kompeet wid wan anada?

¹⁴ Wen wi ga lov fi wan anada, wi noh wahn chrai kompeet wid wan anada; dis protek evribadi eena di kangrigayshan. Memba dat Janatan neva jelos Dayvid, an ih neva chrai kompeet wid Dayvid fi bee king. Aala wi ku fala Janatan egzampl. Wi wuda neva waahn bee jelos a wi bradaz ahn sistaz ner chrai kompeet wid dehn. Insteda dat, wi waahn ‘kansida ada peepl fi bee moa impoatant dan wee.ʼ (Reed Filipiyanz 2:3.) Memba dat eech persn eena di kangrigayshan ga sohnting gud fi aafa. Soh if wi stay hombl, wi wahn si di gud eena wi bradaz ahn sistaz, ahn wi wahn benifit fahn fi dehn faytful egzampl.—1 Kor. 12:21-25.

15. Weh wi ku laan fahn weh mi hapm tu Tanya an ih famili?

¹⁵ Wen sohnting bad hapm eena wi laif, Jehoava komfert wi chroo di lov ahn di help weh wi get fahn wi bradaz ahn sistaz. Kansida weh mi hapm tu wahn famili wen dehn mi-di goh bak da dehn hotel afta di Satideh proagram a wan a wi 2019 “Lov Laas Fareva!” Intanashanal Kanvenshan da di United States. Tanya, wahn sista wid chree chiljren seh: “Wi mi-di jraiv bak tu wi hotel wen wahn veekl laas kanchroal ahn krash intu wi. Nobadi mi geh hert, bot wi get owta di kaar ahn stan op eena di midl a chrafik ahn wi mi deh eena shak. Den wi noatis sombadi pahn di said a di road di wayv tu wi ahn tel wi mek wi kom oava tu fi hihn kaar fi mek wi bee sayf. Da mi wan a wi bradaz hoo mi jos lef di kanvenshan tu. Ahn hihn da neva di onli wan  weh mi stap. Faiv a wi bradaz ahn sistaz fahn Sweden weh mi jos lef di kanvenshan mi stap tu. Di sistaz hog op mee ahn mi daata, ahn dat mek wi feel beta! Ah tel dehn noh fi wori ahn dat wi wahn bee okay, bot dehn neva lef wi bai wiself ataal. Dehn stay wid wi eevn afta di ambyulans mi reech, ahn dehn mek shoar dat wi mi ga evriting weh wi mi need. Chroo dis hoal chraiyal, wi mi feel Jehoava lov. Dis ekspeeryens weh wi gaahn chroo mek wi feel moa lov fi wi bradaz ahn sistaz ahn moa lov an apreeshiayshan fi Jehoava.” How bowt yoo? Yu ku tink a wahn taim wen yoo mi need help ahn wan a yu bradaz er sistaz mi shoa lov tu yu?

16. Weh reezn wi gat fi shoa lov tu wi bradaz ahn sistaz?

¹⁶ Tink bowt di gud tingz weh ku hapm wen wi shoa lov fi wan anada. Wi komfert wi bradaz ahn sistaz wen dehn di goh chroo prablemz. Wi schrentn di yooniti weh dehn monks Gaad peepl. Wi proov dat wee da Jeezas disaipl dehn, ahn dis mek sinsyaa peepl waahn kohn serv Jehoava lang wid wi. Ahn moa dan eniting els, wi gi gloari tu Jehoava, “di Faada weh ga lata mersi ahn di Gaad weh aal komfert kohn fram.” (2 Kor. 1:3) Wi waahn kantinyu shoa moa ahn moa lov fi wan anada wid aala wi haat!