1. How ih mek yu feel fi noa dat Gaad lov yoo?

DI APASL Jan mi rait dat “Gaad da lov.” (1 Jan 4:8) Dehndeh chree lee werdz rimain wi a wahn veri impoatant chroot: Laif kohn fahn Gaad, ahn lov kohn fahn hihn tu. Jehoava lov wi! Ahn di lov weh hihn ga fi wi mek wi feel sayf, hapi, ahn kantentid.

2. Akaadn tu Machyu 22:37-40, wat da di too moas impoatant komanment, ahn wai ih mait bee haada fi obay di sekant wan?

² Kristyanz kyaahn chooz weda er nat dehn wahn shoa lov. Wai? Bikaaz da wahn komanment. (Reed Machyu 22:37-40.) Wen wi reeli geh fi noa Jehoava, ih mait bee eeziya fi mek wi obay di fers komanment, weh da fi ‘lov hihn wid wi hoal haat, soal, ahn main.ʼ Di reezn wai da bikaaz Jehoava perfek. Ih kay bowt wi an ih kain tu wi. Bot ih mait bee haada fi obay di sekant komanment, weh da fi ‘lov wi nayba jos laik how wi lov wiself.ʼ Wai? Bikaaz wi bradaz ahn sistaz da di naybaz weh wi kloasis tu. Dehn noh perfek, soh sohntaim dehn mait seh er du tingz weh mek wi feel laik dehn noh kay bowt wi ahn dat dehn meen tu wi. Jehoava mi noa dat ih wahn bee haad fi mek wi obay da koman. Soh dat da wai ih yooz som a di peepl weh mi rait di Baibl fi teech wi wai wi shuda shoa lov tu wan anada ahn how wi ku du dat. Wan a di peepl weh ih mi yooz da-mi Jan.—1 Jan 3:11, 12.

3. Weh Jan mi aalwayz seh bowt lov?

³ Eena di buk dehn weh Jan mi rait, ih mi aalwayz seh how Kristyanz haftu shoa lov. In fak, eena di buk weh Jan mi rait bowt Jeezas laif, ih taak bowt lov moa dan di ada  chree gaspl raita dehn put tugeda. Jan mosi mi bowt wan honjrid yaaz oal wen ih mi rait di buk a Jan, an aalso Fers, Sekant, ahn Terd Jan. Dehndeh Baibl buk teech wi dat wi shuda shoa lov eena evriting weh wi du. (1 Jan 4:10, 11) Bot ih mi tek sohn taim fi mek Jan laan da lesn.

4. Jan mi aalwayz shoa lov tu ada peepl?

⁴ Wen Jan da-mi wahn yong man, hihn neva aalwayz shoa lov tu ada peepl. Fi egzampl, wan taim Jeezas an ih disaipl dehn mi-di chravl chroo Samayrya pahn dehn way tu Jeroosalem. Di peepl eena wan a di vilij weh dehn paas chroo mi rifyooz fi welkom dehn. Weh Jan mi waahn du neks neva lovin ataal. Hihn mi aks Jeezas if ih mi waahn mek dehn kaal dong faiya fahn hevn fi kil aala di peepl eena da vilij! (Look 9:52-56) Ahn wahn nada taim, Jan neva shoa lov fi di ada apasl dehn. Hihn an ih breda Jaymz get dehn ma fi aks Jeezas if dehn ku sidong saida ahn eena ih Kingdom da hevn. Wen di ada apasl dehn mi fain owt weh Jaymz ahn Jan mi du, dehn mi beks bad! (Mach. 20:20, 21, 24) Bot eevn doa Jan mi mek wahn lata mistayk, Jeezas mi stil lov ahn.—Jan 21:7.

5. Weh wi wahn diskos eena dis aatikl?

⁵ Eena dis aatikl, wi wahn luk pahn Jan egzampl, ahn wi aalso gwehn oava som a di tingz weh hihn mi rait bowt lov. Az wi du dat, wi wahn laan how wi ku shoa lov tu wi bradaz ahn sistaz, ahn wi wahn aalso laan bowt wahn impoatant way how wahn famili hed ku proov dat ih lov ih famili.

6. How Jehoava shoa dat ih lov wi?

⁶ Wi mait tink dat fi lov peepl meenz wi onli need fi tink gud tingz bowt dehn er seh nais tingz tu dehn. Bot if wi reeli lov peepl, wi wahn du kain tingz fi dehn fi shoa dehn dat wi lov dehn. (Kompyaa Jaymz 2:17, 26.) Fi egzampl, Jehoava lov wi. (1 Jan 4:19) Ahn hihn tel wi dat ih lov wi eena fi hihn Werd di Baibl. (Ps. 25:10; Roam. 8:38, 39) Bot wee noa fi shoar dat Gaad lov wi, noh jos bikaaz a weh ih seh, bot aalso bikaaz a weh ih du. Jan mi rait: “Dis da how Gaad mi shoa ih lov tu wi: Hihn mi sen ih onli Son eena di werl soh dat wee ku geh laif chroo hihn.” (1 Jan 4:9) Jehoava mi alow ih preshos Son fi sofa ahn ded fi wi. (Jan 3:16) Soh wee noa fi wahn fak dat Jehoava reeli lov wi.

7. Weh Jeezas du fi proov dat ih lov wi?

⁷ Jeezas mi tel ih disaipl dehn dat ih lov dehn. (Jan 13:1; 15:15) Ahn hihn mi proov humoch ih lov dehn, noh jos  bai weh ih seh, bot aalso bai weh ih du. Jeezas mi tel dehn: “Nobadi ga grayta lov dan di persn weh giv op ih laif fi ih fren dehn.” (Jan 15:13) Wen wi tink bowt evriting weh Jehoava ahn Jeezas don du fi wi, weh wi shuda waahn du?

8. Weh 1 Jan 3:18 tel wi fi du?

⁸ Wi proov dat wi lov Jehoava ahn Jeezas wen wi obay dehn. (Jan 14:15; 1 Jan 5:3) Ahn Jeezas gi wi wahn klyaa koman fi lov wan anada. (Jan 13:34, 35) Bot wi noh fi jos tel wi bradaz ahn sistaz dat wi lov dehn, wi haftu shoa dehn dat wi lov dehn bai di tingz weh wi du. (Reed 1 Jan 3:18.) Wat da sohn tingz weh wi ku du fi proov dat wi lov dehn?

9. Weh Jan mi du bikaaz a lov?

⁹ Jan kuda mi kantinyu mek moni di werk lang wid ih pa az wahn fishaman. Bot insted, ih mi disaid fi yooz di res a ih laif fi help ada peepl laan di chroot bowt Jehoava ahn Jeezas. Di laif weh Jan mi chooz fi liv da neva wahn eezi wan. Peepl mi persikyoot ahn, an wen hihn mi geh oal, dehn mi foas ahn fi liv az wahn prizna pahn di ailan a Patmos. (Aks 3:1; 4:1-3; 5:18; Rev. 1:9) Eevn wen hihn mi deh eena prizn sayka weh ih mi-di preech bowt Jeezas, Jan mi proov dat hihn mi lov peepl. Fi egzampl, wail ih mi deh da Patmos, hihn mi rait di buk a Revilayshan ahn sen it tu di kangrigayshan dehn jos soh dat dehn wuda noa “weh wahn soon hapm.” (Rev. 1:1) Den, moa dan laikli afta ih mi geh set free fahn Patmos, Jan mi rait ih Gaspl bowt Jeezas laif ahn minischri. Hihn mi aalso rait chree letaz fi inkorij ahn schrentn ih bradaz ahn sistaz. How yoo ku kapi Jan egzampl ahn shoa dat yu lov peepl moa dan yuself?

10. How yu ku proov dat yu lov peepl?

¹⁰ Yu ku proov dat yu lov peepl bai di way how yu chooz fi liv yu laif. Saytan werl wuda waahn yu spen aala yu taim an enerji pahn yuself, di chrai mek moni ahn di chrai bee faymos. Bot Kristyanz aal oava di werl mek wahn lata sakrifais soh dat dehn ku spen dehn taim di preech di gud nyooz a di Kingdom ahn di help peepl jraa kloas tu Jehoava. Som Kristyanz ku eevn preech ahn teech ful-taim.

11. How wahn lata faytful poblishaz proov dat dehn lov Jehoava ahn dehn bradaz ahn sistaz?

¹¹ Wahn lata laayal Kristyanz haftu ga wahn ful-taim jab soh dat dehn ku tek kayr a dehnself ahn dehn famili. Bot dehnya faytful bradaz ahn sistaz stil chrai du eniting weh dehn kud fi sopoat Gaad aaganaizayshan. Fi egzampl, som a dehn ku help owt eena dizaasta rileef werk er pahn difrent kanschrokshan proajek. Bot eevn if dehn kyaahn help owt eena dehndeh wayz, evribadi ku mek wahn doanayshan tu di werlwaid werk. Dehn du dehnya tingz bikaaz dehn lov Jehoava ahn dehn lov ada peepl. Evri week, wi proov tu wi bradaz ahn sistaz dat wi lov dehn wen wi goh da wi meetin dehn ahn wen wi tek paat eena dehn. Eevn if wi taiyad, wi stil goh da wi meetin dehn. Eevn if wi nervos, wi stil gi wahn koment. An eevn doa aala wi ga wi oan prablemz, wi stil inkorij adaz bifoa an afta di meetin. (Heeb. 10:24, 25) Wi soh tankful fi di werk weh wi bradaz ahn sistaz du!

12. Wat da wahn nada way how Jan mi proov dat ih lov ih bradaz ahn sistaz?

¹² Jan mi proov dat ih lov ih bradaz ahn sistaz, noh onli wen ih komen dehn, bot  aalso wen ih kongsl dehn. Fi egzampl, eena di letaz weh Jan mi rait, ih mi komen ih bradaz ahn sistaz fi di fayt weh dehn mi gat ahn fi di gud tingz weh dehn mi du. Bot ih mi aalso gi dehn schrang kongsl bowt sin. (1 Jan 1:8–2:1, 13, 14) Saym way soh, wi need fi komen wi bradaz ahn sistaz fi di gud tingz weh dehn du. Bot if sohnbadi staat tu ga wahn bad atichood er dehn staat du sohnting weh ku damij dehn frenship wid Jehoava, wi ku shoa dehn dat wi lov dehn wen wi tel dehn eena wahn kain way weh dehn need fi hyaa. Ih aalwayz tek wahn lata korij fi kongsl wahn fren, bot di Baibl tel wi dat jos laik how aiyan shaapm aiyan, da rait soh wahn persn shaapm, er karek, ih fren.—Prov. 27:17.

13. Weh wi shudn du?

¹³ Sohntaim, wi ku proov tu wi bradaz ahn sistaz dat wi lov dehn bai di tingz weh wi noh du. Fi egzampl, wi noh wahn geh beks eezi if dehn seh sohnting weh wi noh laik. Tink bowt weh mi hapm lee wail bifoa Jeezas mi giv op ih laif fi wi. Hihn mi tel ih disaipl dehn dat if dehn mi waahn geh evalastin laif, dehn mi haftu eet ih flesh ahn jrink ih blod. (Jan 6:53-57) Wahn lata Jeezas disaipl dehn neva laik weh ih mi seh, soh dehn mi stap fala ahn. Bot fi hihn reel frenz mi stay rait bai ih said, ahn Jan da-mi wan a dehn. Dehn neva andastan weh Jeezas mi-di seh, ahn dat da praabli wai dehn mi sopraiz wen dehn hyaa weh ih seh. Bot Jeezas reel frenz neva kwik fi tink dat weh ih mi seh mi rang ahn geh beks wid ahn. Insted, dehn mi chros ahn bikaaz dehn mi noa dat eniting weh hihn mi seh da chroo. (Jan 6:60, 66-69) Ih veri impoatant dat wi noh eezi fi geh beks fi di tingz weh wi frenz seh! Insted, wi gi dehn wahn chaans fi eksplayn wai dehn seh weh dehn seh.—Prov. 18:13; Eccl. 7:9.

14. Wai wi shuda neva hayt wi bradaz ahn sistaz?

¹⁴ Jan mi aalso tel wi dat wi noh fi hayt wi bradaz ahn sistaz. If wi noh obay da advais, wi di alow Saytan fi tek advantij a wi. (1 Jan 2:11; 3:15) Dat da egzakli weh mi hapm tu som a wi bradaz ahn sistaz da di en a di fers senchri C.E. Saytan mi-di chrai ih bes fi mek Gaad peepl hayt eech ada ahn fi divaid dehn. Bai di taim Jan mi rait ih leta dehn, sohn man weh mi-di chrai fi du di saym ting weh Saytan  mi-di du mi en op di bee paat a di kangrigayshan. Fi egzampl, Daiyachrifeez mi-di kaaz sohn seeryos divizhan eena wahn kangrigayshan. (3 Jan 9, 10) Hihn neva ga no rispek fi di eldaz weh di govanin badi mi sen fi inkorij di kangrigayshan. An if enibadi mi shoa haspitaliti tu peepl weh hihn neva laik, hihn mi eevn chrai fi chroa dehn owta di kangrigayshan. Hihn da-mi wahn terabl persn! Saytan stil di chrai haad fi divaid Gaad peepl tudeh. Bot wi shuda neva mek eniting kaaz wi fi hayt wi bradaz ahn sistaz ahn stap sopoat dehn.

15. Weh wahn famili hed need fi memba?

¹⁵ Wahn impoatant way how wahn famili hed proov dat ih lov ih famili da wen ih giv ih famili evriting weh dehn need fi liv. (1 Tim. 5:8) Bot ih haftu memba dat di moas impoatant ting weh ih need fi du fi help ih famili da mek shoar dat dehn ga wahn gud rilayshanship wid Jehoava. (Mach. 5:3) Mek wi luk pahn di gud egzampl weh Jeezas mi set fi evri famili hed. Akaadn tu di Gaspl weh Jan mi rait, wail Jeezas mi deh pahn di taacha stayk, hihn stil mi-di tink bowt ih famili. Jan mi-di stan op neks tu Jeezas ma, Mayri, da di plays wehpaat dehn mi nayl Jeezas pahn di stayk. Eevn doa Jeezas mi deh eena lata payn, ih mi stil aks Jan fi tek kayr a Mayri. (Jan 19:26, 27) Fi shoar, Jeezas mi ga bradaz ahn sistaz weh mi wahn tek kayr a dehn ma ahn mek shoar dat ih gat evriting weh ih need. Bot joorin da taim, non a dehn da-mi Jeezas disaipl yet. Soh Jeezas mi waahn mek shoar dat sohnbadi mi wahn dehdeh fi tek kayr a Mayri an inkorij ahn fi kip aan di serv Jehoava tu.

16. Weh difrent rispansabiliti Jan mi gat?

¹⁶ Jan mi ga lata rispansabiliti. Bikaaz hihn da-mi wahn apasl, hihn mi haftu tek di leed eena di preechin werk. Hihn mi praabli marid tu, soh dat meenz hihn mi wahn haftu provaid fi ih famili an aalso help ih famili fi ga wahn gud rilayshanship wid Jehoava. (1 Kor. 9:5) Weh lesn di famili hed dehn ku laan fahn Jan egzampl tudeh?

17. Wai wahn famili hed need fi mek shoar dat ih famili ga wahn gud rilayshanship wid Jehoava?

¹⁷ Wahn brada hoo da di hed a wahn famili mait ga wahn lata impoatant rispansabiliti. Fi egzampl, ih haftu werk haad  wen ih deh da ih jab soh dat nobadi ga notn bad fi seh bowt Jehoava. (Ifee. 6:5, 6; Tai. 2:9, 10) Ahn hihn mait ga lata difrent rispansabiliti eena di kangrigayshan tu, laik fi shepad di bradaz ahn sistaz ahn fi tek di leed eena di preechin werk. Ahn pahn tap a dat, ih need fi stodi di Baibl wid ih waif ahn pikni dehn. Dehn wahn reeli apreeshiayt evriting weh ih du fi kip dehn helti ahn hapi, ahn fi help dehn kip aan di serv Jehoava.—Ifee. 5:28, 29; 6:4.

18. Weh Jan mi noa fi shoar?

¹⁸ Jan mi liv wahn lang laif weh ful op a lata eksaitin ekspeeryens. Hihn mi gaahn chroo lata haad taimz weh kuda mi mek ih fayt geh week. Bot hihn mi aalwayz du ih bes fi obay Jeezas komanment dehn, inkloodin di koman fi lov ih bradaz ahn sistaz. Bikaaz a dat, Jan mi noa fi shoar dat Jehoava ahn Jeezas mi lov ahn, an dat dehn mi wahn giv ahn di schrent fi bayr op chroo eni chraiyal. (Jan 14:15-17; 15:10; 1 Jan 4:16) Notn weh Saytan an ih werl mi du kuda mi stap Jan fahn shoa lov tu ih bradaz ahn sistaz bai di tingz weh ih seh ahn du.

19. Weh 1 Jan 4:7 inkorij wi fi du, ahn wai?

¹⁹ Jos laik Jan, wi liv eena wahn werl weh Saytan di rool oava, ahn Saytan noh lov nobadi. (1 Jan 3:1, 10) Hihn di chrai get wi fi stap lov wi bradaz ahn sistaz, bot dat ku onli hapm if wee alow hihn fi du dat. Wi waahn mek it wi goal fi lov wi bradaz ahn sistaz ahn fi shoa dehn dat wi lov dehn bai di tingz weh wi seh ahn du. Wen wi shoa da kaina lov, wi wahn bee hapi fi bee paat a Jehoava famili, ahn wi wahn di liv di bes laif eva!—Reed 1 Jan 4:7.