EENA di Bible Lands Museum da Jeroosalem, dehn ga wahn oal oal stoan wid sohn raitin pan it weh praabli dehdeh sins 700-600 B.C.E. Dehn mi fain di stoan eena wahn kayv weh peepl mi yooz az wahn toom; di kayv noh deh tu faar fahn Heebron eena Izrel. Di werdz weh deh pahn di stoan seh: “Mek Yahweh Sabaot kers Hagaf, di son a Hagav.” How dehnya werdz sopoat di Baibl? Ih shoa dat bak den peepl mi noa ahn yooz Gaad naym Jehoava (YHWH eena Heebroo letaz) eena dehn evriday laif. In fak, peepl yoostu aalwayz rait Gaad naym, lang wid ada peepl naym weh mi bays pahn di naym Jehoava, pahn di waal dehn a dehndeh kayv.

Noatis weh Dakta Rachel Nabulsi a di University a Georgia seh bowt dehndeh raitinz: “Di naym YHWH deh eena dehnya raitinz wahn lat, soh dis meenz dat di naym impoatant. . . . Dehnya raitinz shoa dat di naym YHWH mi impoatant tu peepl weh mi liv eena Izrel ahn Jooda.” Dis sopoat di Baibl, weh gat een Gaad naym towznz a taimz az YHWH eena di Heebroo langwij. Eevn di way som peepl mi spel dehn naym mi bays pahn di spelin a Gaad naym.

Di werdz “Yahweh Sabaot,” weh deh pahn di stoan, meen “Jehoava, di Komanda a di hevnli aamiz.” Dis meen, den, dat peepl neva jos yooz di naym Jehoava, bot dehn mi aalso yooz ada frayz ahn taitl weh mi gat een di naym, laik “Jehoava, di Komanda a di hevnli aamiz.” Ih aalso sopoat di fak dat di Baibl yooz di frayz “Jehoava, di Komanda a di hevnli aamiz,” bowt 283 taimz eena di paat a di Baibl weh deh eena Heebroo, moasli eena di buks a Isaiah, Jeremiah, ahn Zechariah.