STODI AATIKL 1
“Dehn Wan Weh Chros Eena Jehoava Noh Wahn Lak Notn Gud”
WI YAATEKS FI 2022: “Dehn wan weh chros eena Jehoava noh wahn lak notn gud.”—PS. 34:10.
SANG 4 “Jehoava Da Mai Shepad”
WEH WI WAHN DISKOS? *
Dayvid mi feel laik hihn mi ‘lak notn gudʼ eevn wen ih mi-di fays haad taimz (Paragraaf 1-3) *
1. Weh haad sichuwayshan Dayvid mi deh eena?
DAYVID mi-di ron fi ih laif. Saal, di powaful king a Izrel, da di wan weh mi waahn kil ahn. Wen Dayvid mi need food, ih stap da di siti a Nob, an ih mi onli aks fi faiv loaf a bred. (1 Sam. 21:1, 3) Laytaraan, hihn an ih soalja dehn mi shelta eena wahn kayv. (1 Sam. 22:1) How Dayvid mi en op eena da sichuwayshan?
2. Weh bad tingz Saal mi du fi put ihself eena wahn daynjaros sichuwayshan? (1 Samuel 23:16, 17)
2 Saal mi veri jelos a Dayvid bikaaz Dayvid da-mi sohnbadi weh lata peepl mi laik an ih mi win wahn lata waar. Saal mi noa dat Jehoava mi rijek ahn bikaaz hihn neva obay Jehoava, an ih mi aalso noa dat Jehoava mi chooz Dayvid fi bee di fyoocha king. (Reed 1 Samuel 23:16, 17.) * Bot Saal da-mi stil di king a Izrel, an ih mi ga wahn big aami ahn lata peepl mi sopoat ahn, soh Dayvid mi haftu ron fi ih laif. Saal mi reeli tink dat hihn kuda mi fait gens Gaad disizhan fi mek Dayvid king? (Isa. 55:11) Di Baibl noh seh, bot wee ku bee shoar a dis: Saal mi-di put ihself eena wahn daynjaros sichuwayshan. Enibadi weh fait gens Gaad aalwayz looz!
3. How Dayvid mi feel eevn doa ih mi deh eena wahn haad sichuwayshan?
3 Dayvid da-mi wahn hombl man. Hihn neva chooz fi bee di king a Izrel. Da mi Jehoava chooz ahn fi bee di king. (1 Sam. 16:1, 12, 13) Saal mi reeli hayt Dayvid. Bot Dayvid neva blaym Jehoava fi di daynja weh ih mi deh eena, an ih neva komplayn wen ih mi ga lee bit a food ahn wen ih mi haftu haid eena wahn kayv. Da mi praabli wail ih mi deh eena da sayhn kayv dat ih mi rait di byootiful sang a prayz weh gat een di werdz fi wi teem teks: “Dehn wan weh chros eena Jehoava noh wahn lak notn gud.”—Ps. 34:10.
4. Weh kweschanz wi wahn kansida, ahn wai dehn impoatant?
4 Tudeh wahn lata Jehoava servants sohntaim noh ga inof food er ada tingz weh dehn need fi liv. * Wahn lata Jehoava servants di goh chroo dis bikaaz a di COVID-19 pandemik. Ahn tingz wahn geh haada az wi di geh kloasa tu di “grayt chribyulayshan.” (Mach. 24:21) Soh ih wahn bee gud fi fain di ansaz tu dehnya foa kweschan: How Dayvid neva “lak notn gud”? Wai wi need fi laan fi bee kantentid wid weh wi gat? Wai wi ku chros dat Jehoava wahn tek kayr a wi? Ahn how wi ku pripyaa now fi di fyoocha?
“AH NOH WAHN LAK NOTN”
5-6. How Psalm 23:1-6 help wi fi andastan weh Dayvid mi meen wen ih mi seh dat Gaad servant dehn “noh wahn lak notn gud”?
5 Weh Dayvid mi meen wen ih mi seh eena Psalm 34 dat Gaad servant dehn “noh wahn lak notn gud”? Wen Dayvid mi rait Psalm 23, hihn mi yooz simila werdz. Soh dis Psalm ku help wi andastan weh hihn mi meen. (Reed Psalm 23:1-6.) * Dayvid staat aaf da Psalm di seh: “Jehoava da mai Shepad. Ah noh wahn lak notn.” Eena di res a di Psalm, Dayvid menshan tingz weh reeli impoatant laik di gud tingz weh Jehoava giv ahn bikaaz hihn mi aksep Jehoava az fi hihn Shepad. Jehoava mi gaid hihn “eena di wayz a raichosnis,” ahn Jehoava mi laayal tu Dayvid an ih mi sopoat ahn eena gud taimz an eena bad taimz. Dayvid mi andastan dat fi hihn laif eena Jehoava “feel weh ga green graas” neva mi wahn bee widowt prablemz. Sohntaim Dayvid kuda mi geh diskorij, laik if ih mi-di waak “eena wahn vali weh reeli daak,” ahn hihn mi did ga enimiz. Bot wid Jehoava az fi hihn Shepad, Dayvid neva mi wahn “frayd fi notn weh ku hert [ahn].”
6 How Dayvid neva “lak notn gud”? Dis da di ansa: Hihn mi ga evriting weh ih mi need fi stay kloas tu Jehoava. Hihn neva need fi ga wahn lata mateeryal tingz fi bee hapi. Dayvid mi kantentid wid weh Jehoava mi giv ahn. Di moas impoatant ting tu hihn da-mi dat Jehoava mi bles ahn, an protek ahn.
7. Akaadn tu Look 21:20-24, weh chalenjin sichuwayshan di fers-senchri Kristyanz weh mi liv da Judeeya mi haftu fays?
7 Fahn Dayvid werdz wi ku si dat ih veri impoatant fi mek mateeryal tingz noh bee di moas impoatant ting eena wi laif. Wee kud injai wateva mateeryal tingz wi mait gat, bot wi shudn mek dat bee di moas impoatant ting eena wi laif. Dat da-mi wahn impoatant chroot weh di fers-senchri Kristyanz weh mi liv da Judeeya mi kohn fi andastan. (Reed Look 21:20-24.) Jeezas mi waan dehn dat di taim wahn kohn wen “soaljaz wahn di kyamp” rong Jeroosalem. Wen dat hapm, dehn wuda need fi “staat ron tu di mongtin dehn.” If dehn mi lef di siti a Jeroosalem, dehn wuda kantinyu liv, bot dehn wuda mi haftu lef bihain lata tingz. Sohn yaaz agoa, The Watchtower mi seh dis: “Dehn mi lef dehn feel ahn dehn hows, dehn lef evriting bihain. Dehn mi chros dat Jehoava wuda protek ahn help dehn, ahn dehn mi put dehn wership tu Jehoava heda eniting els weh mi luk impoatant.”
8. Weh impoatant lesn wi ku laan fahn weh mi hapm tu di fers-senchri Kristyanz weh mi liv da Judeeya?
8 Weh impoatant lesn wi ku laan fahn weh mi hapm tu di fers-senchri Kristyanz weh mi liv da Judeeya? Di saym Watchtower weh wi mi menshan eena paragraaf 7 mi seh: “Eena di fyoocha, wi mait geh tes fi si if mateeryal tingz moa impoatant tu wi, er if ih moa impoatant fi mek wi geh sayv bikaaz wi laayal tu Gaad. Wen di en kohn, wi mait haftu bayr op ahn mek sohn sakrifais. Wi wahn haftu bee wilin fi du eniting jos laik dehn Kristyanz weh mi ron weh fahn Judeeya.” *
9. How di kongsl weh di apasl Paal mi gi tu di Heebroo Kristyanz ku inkorij wi?
9 Yoo ku imajin how haad ih mi haad fi mek dehn Kristyanz lef evriting weh dehn mi gat ahn staat wahn nyoo laif da wahn difrent plays? Dehn mi haftu ga schrang fayt ahn dehn mi haftu chros dat Jehoava mi wahn help dehn fi geh di tingz weh dehn mi need. Bot dehn mi ga sohnting weh kuda mi help dehn. Faiv yaaz bifoa di Roamanz mi kyamp rong Jeroosalem, di apasl Paal mi gi di Heebrooz sohn gud advais; hihn mi seh: “Unu noh fi lov moni, rada unu fi bee kantentid wid weh unu gat. Kaaz Gaad tel wi: ‘Ai wahn neva lef unu, an Ai wahn neva stap help unu.ʼ Soh mek wi noh bee frayd, insted, mek wi seh: ‘Jehoava da di wan weh help mi, soh Ah noh wahn frayd. Da weh enibadi ku du tu mee?ʼ” (Heeb. 13:5, 6) Ih mi eeziya fi dehn wan weh mi obay Paal fi mek dehn bee kantentid wid di lee bit weh dehn mi gat eena dehn nyoo hoam. Dehn mi shoar dat Jehoava mi wahn gi dehn weh dehn need. Paal werdz help wi fi bee shoar dat Jehoava wahn gi wee evriting weh wi need.
“WI WAHN BEE KANTENTID”
10. Wat da di “seekrit” weh Paal shayr wid wi?
10 Paal mi gi simila kongsl tu Timoti, ahn dat inklood wee tu. Hihn mi seh: “Soh, az lang az wi ga food fi eet ahn kloaz fi wayr wi wahn bee kantentid.” (1 Tim. 6:8) Yu tink dat meenz dat wi kyaahn eet nais food, ga wahn nais hows, er bai nyoo kloaz sohntaim? Dat da noh weh Paal mi-di chrai seh. Hihn mi-di seh dat wi shuda bee kantentid wid weh wi gat. (Fil. 4:12) Dat da-mi Paal “seekrit.” Di moas impoatant ting fi wee da wi rilayshanship wid Gaad, noh di mateeryal tingz weh wi gat.—Hab. 3:17, 18.
Di Izrelait dehn “lak notn” joorin di 40 yaaz wen dehn mi deh eena di wildanes. Yu tink wee ku bee kantentid wid weh wi ga now? (Paragraaf 11) *
11. Weh lesn wi ku laan fahn weh Moaziz mi seh tu di Izrelaits bowt weh ih meenz fi bee kantentid?
11 Di tingz weh wee tink wi need mait noh bee di saym tingz weh Jehoava noa wi need. Tink bowt weh Moaziz mi tel di Izrelaits afta dehn mi spen 40 yaaz eena di wildanes. Hihn mi seh: “Jehoava unu Gaad don bles unu eena aal weh unu du. Hihn noa dat unu di waak chroo di grayt wildanes. Dehnya 40 yaaz Jehoava unu Gaad deh wid unu, an unu noh lak notn.” (Deut. 2:7) Joorin dehndeh 40 yaaz, Jehoava mi gi di Izrelaits mana fi eet. Dehn kloaz—di sayhn kloaz weh dehn mi lef Eejip wid—neva geh oal. (Deut. 8:3, 4) Eevn doa sohn peepl mi feel laik dehnya tingz neva inof, Moaziz mi rimain di Izrelaits dat dehn mi ga evriting weh dehn mi need. Jehoava wahn pleez wid wi if wi laan fi bee kantentid. Hihn waahn wi bee tankful fi eevn di smaalis tingz weh ih gi wi, an ih waahn wi andastan dat dehndeh tingz da wahn gif fahn hihn.
CHROS DAT JEHOAVA WAHN TEK KAYR A YU
12. How Dayvid mi shoa dat ih mi chros Jehoava ahn noh ihself?
12 Dayvid mi noa dat Jehoava laayal an ih kay bowt dehn wan weh lov Ahn. Wen hihn mi rait Psalm 34, Dayvid fayt eena Jehoava mi soh schrang dat hihn mi noa fi shoar dat “di aynjel a Jehoava” mi-di kyamp “aal rong” ahn. (Ps. 34:7) Maybi Dayvid mi-di kompyaa Jehoava aynjel tu wahn soalja weh di kyamp eena di feel, weh aalwayz di wach owt fi ih enimi. Dayvid da-mi wahn soalja weh mi ga korij, ahn Jehoava mi pramis ahn dat hihn mi wahn bee king. Bot Dayvid neva foakos pahn di fak dat hihn kuda mi fling wahn stoan er yooz ih soad fi fait gens ih enimi. (1 Sam. 16:13; 24:12) Dayvid mi put ih chros eena Gaad, ahn hihn mi noa fi shoar dat Jehoava aynjel mi wahn ‘sayv dehn wan weh fyaa Hihn.ʼ Af koars, wee noh ekspek Jehoava fi du wahn mirakl fi protek wi tudeh. Bot wee noa dat aala dehn wan weh chros Jehoava wahn geh evalastin laif eevn if dehn ded tudeh.
Joorin di grayt chribyulayshan, Gag a Maygag mait kohn atak wi da wi hows. Bot wee ku bee shoar dat Jeezas an ih aynjel dehn wahn si weh di hapm ahn dehn wahn difen wi ahn protek wi (Paragraaf 13)
13. Wai wee wahn luk week wen Gag a Maygag atak wi, bot wai wi noh fi frayd? (Koment pahn di picha pahn di kova.)
13 Wee chros dat Jehoava wahn protek wi, bot eena di fyoocha da chros weh wi ga wahn geh tes. Wen Gag a Maygag, wahn groop a nayshan, atak Gaad peepl, wi mait tink dat dehn wahn ku kil wi. Bot wi wahn need fi bee shoar dat Jehoava ga di powa fi sayv wi ahn dat da egzakli weh hihn wahn du. Di nayshan dehn wahn luk pahn wee laik sheep weh noh ga nobadi fi protek wi. (Ezek. 38:10-12) Wi noh wahn ga no wepan ahn wi noh wahn noa how fi fait. Di nayshan dehn wahn tink dat ih wahn bee eezi fi kil wi owt. Dehn noh noa dat Jehoava aynjel dehn redi fi difen wi. Bot wee noa dis bikaaz wi ga fayt. Af koars, di nayshan dehn wahn kyaahn si di aynjelz bikaaz dehn noh ga no fayt eena Gaad. Dehn wahn sopraiz wen di hevnli aami fait fi wi!—Rev. 19:11, 14, 15.
PRIPYAA NOW FI DI FYOOCHA
14. Weh wi ku du now fi pripyaa fi di fyoocha?
14 Weh wi ku du now fi pripyaa fi di fyoocha? Wi shudn tink dat mateeryal tingz veri impoatant tu wi, bikaaz wan day wi wahn haftu lef dehndeh tingz bihain. Wi aalso need fi bee kantentid wid weh wi gat, ahn wi shuda bee veri hapi bikaaz wi ga wahn rilayshanship wid Jehoava. Di moa wi geh fi noa wi Gaad, di moa kanvins wi wahn bee dat hihn ku protek wi wen Gag a Maygag atak wi.
15. Weh tingz weh mi hapm tu Dayvid wen hihn mi yong mi teech ahn dat Jehoava mi wahn aalwayz help ahn?
15 Mek wi kansida wat els mi help Dayvid ahn weh ku help wee tu fi pripyaa fi chraiyalz eena di fyoocha. Dayvid mi seh: “Tays ahn si how gud Jehoava gud; di man weh pen pahn hihn wahn bee hapi.” (Ps. 34:8) Dehndeh werdz eksplayn wai Dayvid mi noa fi shoar dat hihn ku pen pahn Jehoava sopoat. Dayvid mi pen pahn Jehoava, ahn fi hihn Gaad neva did let ahn dong. Wen Dayvid mi yong, hihn mi haftu fait gens di Filisteen jaiyant Golaiyat. Dis da weh hihn mi tel da powaful wariya: “Tudeh Jehoava wahn han yu oava tu mi.” (1 Sam. 17:46) Layta, wen Dayvid mi serv King Saal, lata taim Saal mi chrai kil ahn. Bot “Jehoava mi deh wid” Dayvid. (1 Sam. 18:12) Bikaaz Dayvid mi si how Jehoava mi help ahn eena di paas, hihn mi noa fi shoar dat Jehoava mi wahn help ahn wid di prablemz weh ih mi-di fays.
16. How wi ku “tays ahn si how gud Jehoava gud”?
16 Di moa wi pen pahn Jehoava fi gaid wi now, di moa kanfident wi wahn bee dat hihn wahn ku sayv wi eena di fyoocha. Wi need fi ga fayt ahn wi need fi bee wilin fi pen pahn Jehoava wen wi aks wi baas fi taim aaf soh dat wi ku goh da wi asembli ahn kanvenshan dehn. Er wen wi aks wi baas fi chaynj wi skejul soh dat wi ku goh da aala wi meetin dehn ahn spen moa taim eena di minischri. Sopoaz wi baas noh gi wi di taim aaf ahn wi en op di looz wi jab? Yoo tink dat wi wahn chros dat Jehoava wahn neva lef wi er abandan wi, ahn dat hihn wahn aalwayz gi wi di tingz weh wi need fi liv? (Heeb. 13:5) Wahn lata bradaz ahn sistaz weh deh eena ful-taim servis si dat Jehoava neva abandan dehn ahn dat hihn mi help dehn wen dehn mi need hihn di moas. Jehoava faytful fi chroo!
17. Wat da di yaateks fi 2022, ahn how ih ku help wi?
17 Wid Jehoava pahn wi said, wi noh wahn frayd fi weh wahn hapm eena di fyoocha. Fi wee Gaad wahn neva abandan wi az lang az wi put di Kingdom fers eena wi laif. Dat da wai di Govanin Badi chooz Psalm 34:10 az wi yaateks fi 2022: “Dehn wan weh chros eena Jehoava noh wahn lak notn gud.” Dis wahn help wi fi pripyaa now fi di haad taimz weh wi wahn fays eena di fyoocha ahn fi chros dat Jehoava wahn neva abandan wi.
SANG 38 Gaad Wahn Mek Yu Schrang
^ Wi yaateks fi 2022 kohn fahn Psalm 34:10: “Dehn wan weh chros eena Jehoava noh wahn lak notn gud.” Lata Jehoava faytful servants onli ga lee bit a moni ahn mateeryal tingz. Soh wai wi ku seh dat dehn “noh wahn lak notn gud”? An if wi andastan weh dis vers meenz, how ih ku help wi pripyaa fi di haad taimz weh di kohn eena di fyoocha?
^ 1 Samuel 23:16, 17: “Saal son, Janatan, gaahn da Dayvid da Hoaresh an ih help ahn fain schrent eena Jehoava. 17 Hihn mi tel ahn: ‘Noh bee frayd bikaaz mai pa Saal noh wahn fain yu; yoo wahn bee king oava Izrel, an Ai wahn sopoat yu; ahn mai pa Saal noa dat tu.ʼ”
^ Si “Questions From Readers” eena di Septemba 15, 2014, kapi a The Watchtower.
^ Psalm 23:1-6: “Jehoava da mai Shepad. Ah noh wahn lak notn. 2 Hihn mek Ah lidong eena wahn feel weh ga green graas; Hihn kehr mi da wahn plays fi res wehpaat plenti waata deh. 3 Hihn schrent mi. Hihn gaid mi eena di wayz a raichosnis fi di sayk a ih naym. 4 Eevn doa Ah waak eena wahn vali weh reeli daak, Ah noh frayd fi notn weh ku hert mi, bikaaz yoo deh wid mi; yu rad mek Ah feel sayf. 5 Yu gi mi lata food ahn yu set it fronta mi enimi dehn. Ah feel rifresh wen yu grees mi hed wid ail; yu ful op mi kop gud. 6 Ah noa fi shoar dat gudnis ahn laayal lov wahn deh wid mi aal di dayz a mi laif, aala di dayz a mi laif Ah wahn liv eena Jehoava hows.”