STODI AATIKL 2
Laan Fahn Jeezas Yonga Breda
“Jaymz, wahn slayv a Gaad an a di Laad Jeezas Krais.” —JAY. 1:1.
SANG 88 Teech Mi Yu Wayz
WEH WI WAHN DISKOS? *
1. How yu wuda diskraib Jaymz famili?
JAYMZ, di breda a Jeezas, mi ga lata blesinz. Hihn mi rayz eena wahn famili weh mi faytful tu Jehoava. * Fi hihn payrents, Joazef ahn Mayri, mi lov Jehoava wahn lat ahn dehn mi du dehn bes fi serv Hihn. Pahn tap a dat, Jaymz mi ga wahn nada wandaful blesin—fi hihn oalda breda mi geh fi bee di Mesaiya. Jaymz mi ga di wandaful privilij fi bee paat a da famili!
Wen Jaymz mi-di groap wid Jeezas, Jaymz mi geh fi noa ih oalda breda reeli gud (Paragraaf 2)
2. Wat da sohn reezn Jaymz mi ga fi rispek ih oalda breda?
2 Jaymz mi ga lata reezn fi rispek ih oalda breda. (Mach. 13:55) Fi egzampl, bai di taim Jeezas mi 12 yaaz oal, hihn mi noa di Skripchaz soh gud dat hihn mi impres di teechaz weh deh da Jeroosalem. (Look 2:46, 47) Aalso, Jaymz mosi mi noa Jeezas reeli gud bikaaz dehn mi praabli du sohn kyaapenta werk tugeda. Brada Nathan Knorr yoostu aalwayz seh, “Yu laan wahn lat bowt wahn persn wen yu werk lang wid ahn.” * Jaymz mi aalso si dat “Jeezas kantinyu fi groa, ih geh waiza ahn waiza, ahn Gaad an evribadi mi lov ahn.” (Look 2:52) Bikaaz a aala dehndeh reezn, wi wuda tink dat Jaymz da wan a Jeezas fers disaiplz. Bot yu tink dat da-mi di kays? Mek wi fain owt.
3. How Jaymz mi riyak wen Jeezas mi staat ih minischri?
3 Joorin Jeezas minischri pahn ert, Jaymz neva geh fi bee wan a ih disaiplz. (Jan 7:3-5) Jaymz da-mi praabli wan a di relitiv dehn weh mi tink dat Jeezas “noh soh karek eena ih hed.” (Maak 3:21) Ahn dehn noh ga no proof weh shoa dat Jaymz mi deh wid ih ma, Mayri, wen Jeezas mi geh kil pahn di taacha stayk.—Jan 19:25-27.
4. Wat da sohn lesn weh wi wahn kansida?
4 Laytaraan, Jaymz mi put fayt eena Jeezas ahn hihn [Jaymz] en op di bee wahn elda eena di Kristyan kangrigayshan weh evribadi mi rispek. Eena dis aatikl, wi wahn kansida too lesn weh wi ku laan fahn Jaymz: (1) wai wi need fi stay hombl ahn (2) how wi ku bee wahn gud teecha.
STAY HOMBL LAIK JAYMZ
Jaymz mi hombl ihself wen Jeezas mi apyaa tu ahn, hihn mi aksep Jeezas az di Mesaiya, ahn fahn den aan ih mi geh fi bee wahn faytful disaipl a Krais (Paragraaf 5-7)
5. Weh Jaymz mi du wen Jeezas mi apyaa tu ahn afta Jeezas mi geh rezorek?
5 Da wen Jaymz mi en op di bee wan a Jeezas disaipl? Afta Jeezas rezorekshan, “ih mi apyaa tu Jaymz ahn den tu aala di apasl dehn.” (1 Kor. 15:7) Afta da meetin, Jaymz mi en op di bee wan a Jeezas disaipl. Hihn mi deh wid di ada apasl dehn eena di room wen dehn mi-di wayt fi di hoali spirit da Jeroosalem. (Aks 1:13, 14) Laytaraan, Jaymz mi ga di privilij fi serv az wahn memba a di govanin badi eena di fers senchri. (Aks 15:6, 13-22; Gal. 2:9) Ahn sohn taim bifoa 62 C.E., Jehoava mi mek Jaymz rait wahn leta tu di anointid Kristyanz. Weda wi ga di hoap fi liv da hevn er pahn ert, wee ku benifit fahn da leta tudeh. (Jay. 1:1) Akaadn tu Joseefos, di fers-senchri hischri raita, di Jooish Hai Prees Ananaiyas di son a Anas mi aada fi mek dehn kil Jaymz. Jaymz mi stay faytful tu Jehoava ih hoal laif rait ya pahn ert.
6. How Jaymz mi difrent fahn di rilijos leedaz eena fi hihn day?
6 Jaymz mi hombl. Wai wi ku seh dat? Mek wi tink bowt di way how Jaymz mi rispan wen hihn mi si proof dat Jeezas da Gaad Son. Hihn mi hombl inof fi aksep it. Bot di rilijos leedaz mi tu prowd, dehn neva waahn aksep dat Jeezas da-mi Gaad Son ahn dat hihn mi rayz op Lazaros fahn di ded. Insteda dat, dehn mi waahn kil Jeezas ahn Lazaros. (Jan 11:53; 12:9-11) Laytaraan, wen Jehoava mi rezorek Jeezas, di rilijos leedaz mi fain wayz fi haid da chroot fahn di peepl. (Mach. 28:11-15) Bikaaz di rilijos leedaz mi soh prowd, dehn mi rijek Jeezas az di Mesaiya.
7. Wai wi noh fi bee prowd?
7 Wat da di lesn? Noh bee prowd, ahn bee wilin fi mek Jehoava teech yu. Jos laik how wahn siknis ku kaaz sohnbadi haat fi geh haad ahn noh werk gud, sayhn way soh, if wi prowd wi haat ku geh soh haad dat wi noh wahn obay di dairekshan weh kohn fahn Jehoava. Di Farisee dehn mi soh prowd dat dehn mi rijek eni proof dat Jeezas da-mi Gaad Son ahn dat Jehoava mi-di dairek ahn wid ih hoali spirit. (Jan 12:37-40) Fi dehn praid da-mi wahn veri bad ting bikaaz ih mi stap dehn fahn geh evalastin laif. (Mach. 23:13, 33) Soh ih veri impoatant fi mek wi alow Gaad Werd an ih hoali spirit fi chaynj wi persnaliti ahn help wi eena di way how wi tink ahn di disizhanz weh wi mek! (Jay. 3:17) Bikaaz Jaymz mi hombl, hihn mi alow Jehoava fi teech ahn. Ahn, laik weh wi wahn si, bikaaz hihn mi hombl hihn mi geh fi bee wahn gud teecha.
BEE WAHN GUD TEECHA JOS LAIK JAYMZ
8. Weh wahn help wi fi bee gud teechaz?
8 Jaymz neva ga lata ejukayshan. Di rilijos leedaz eena fi hihn day mosi mi si hihn az sohnbadi weh onli ga wahn “baysik ejukayshan,” jos laik di apasl Peeta ahn Jan. (Aks 4:13) Bot Jaymz mi laan fi bee wahn gud teecha, ahn wi si dis wen wi reed di Baibl buk a Jaymz. Jos laik Jaymz, wi noh mait ga lata ejukayshan. Bot, wid di help a Jehoava hoali spirit ahn di help a fi hihn aaganaizayshan, wee ku bee gud teechaz tu. Mek wi kansida di egzampl weh Jaymz mi set az wahn teecha ahn si weh difrent lesn wi ku laan.
9. How yu wuda diskraib di way how Jaymz mi teech?
9 Jaymz neva yooz big werdz er eksplayn tingz eena wahn way weh mi haad fi andastan. Bikaaz a dis, enibadi weh mi lisn tu ahn mi noa weh dehn mi need fi du ahn how dehn mi fi du it. Tink bowt how Jaymz mi eksplayn tu di Kristyanz dat dehn mi need fi bee wilin fi sofa injostis ahn stil bee hapi. Hihn mi rait: “Wen peepl sofa ahn dehn noh giv op, wi seh dehn hapi. Unu hyaa bowt Joab an aal weh ih gaahn chroo, ahn how ih neva giv op. Ahn bikaaz a weh Jehoava mi du far ahn pahn di en, unu noa dat Jehoava ful a mersi ahn kompashan.” (Jay. 5:11) Noatis dat weh Jaymz mi teech ih bradaz da-mi bays pahn di Skripchaz. Hihn mi yooz Gaad Werd fi help peepl si dat Jehoava mi aalwayz bles dehn wan weh mi laayal tu hihn, jos laik Joab. Jaymz neva yooz big werdz fi help di bradaz andastan weh ih mi-di teech. Eena dis way, hihn mi jraa atenshan tu Jehoava ahn noh tu ihself.
10. Wat da wan way how wi ku kapi Jaymz wen wi di teech?
10 Wat da di lesn? Teech eena wahn way weh eezi fi andastan, ahn teech fahn Gaad Werd. Wen wi di teech adaz, fi wee goal da noh fi chrai shoa dehn humoch wee noa, bot wi waahn shoa dehn humoch Jehoava noa ahn humoch hihn kay bowt dehn. (Roam. 11:33) Wi ku reech da goal wen wi aalwayz yooz di Skripchaz fi teech. Fi egzampl, insteda tel wi Baibl styoodents weh wee wuda du if wi mi deh eena fi dehn sichuwayshan, wi waahn yooz di egzampl dehn fahn di Baibl fi help dehn andastan how Jehoava tink ahn feel. Den dehn wahn du weh dehn laan eena dehn laif bikaaz dehn waahn pleez Jehoava, noh wee.
11. Wat da sohn prablemz weh sohn Kristyanz mi gat eena Jaymz day, ahn weh advais hihn mi gi dehn? (Jaymz 5:13-15)
11 Jaymz mi andastan di prablemz weh ih bradaz ahn sistaz mi gat. Fahn fi hihn leta, ih klyaa fi si dat Jaymz mi noa wat da som a di prablemz weh di bradaz ahn sistaz mi gat, ahn hihn mi gi dehn advais pahn weh dehn need fi du fi help dehn deel wid dehn prablemz. Fi egzampl, sohn Kristyanz neva redi fi lisn tu advais. (Jay. 1:22) Som a dehn mi shoa dat dehn onli laik rich peepl. (Jay. 2:1-3) Adaz mi fain it haad fi kanchroal weh dehn seh. (Jay. 3:8-10) Dehnya bradaz ahn sistaz mi ga sohn seeryos prablemz, bot Jaymz neva giv op pahn dehn. Hihn mi kain bot schrayt op wen ih mi gi dehn kongsl. An ih mi inkorij dehn wan weh spirichwali week fi goh tu di eldaz an aks dehn fi help soh dat dehn ku mek chaynjiz eena dehn laif.—Reed Jaymz 5:13-15.
12. How wi ku ga wahn pazitiv atichood wen wi di help wi Baibl styoodents?
12 Wat da di lesn? Andastan weh adaz di goh chroo, ahn ga wahn pazitiv atichood bowt dehn. Wahn lata peepl weh wi di stodi di Baibl wid mait fain it haad fi du weh dehn laan eena dehn laif. (Jay. 4:1-4) Ih mait tek dehn wahn wail fi stap dehn bad habits ahn liv wahn Kristyan way a laif. Jos laik Jaymz, wi need fi ga di korij fi tel wi styoodents eena weh wayz dehn need fi du beta. Wi aalso need fi ga wahn pazitiv atichood ahn chros dat Jehoava wahn jraa dehn wan weh hombl tu hihn, ahn dat hihn wahn gi dehn di schrent weh dehn need fi mek chaynjiz eena dehn laif.—Jay. 4:10.
13. Laik weh Jaymz 3:2 seh, weh Jaymz mi rekonaiz?
13 Jaymz mi ga di prapa vyoo a ihself. Jaymz mi neva feel dat fi hihn famili er di asainment weh ih mi gat mi mek hihn speshal er beta dan fi hihn bradaz ahn sistaz. Hihn mi rifaa tu ih bradaz ahn sistaz az “mi dyaa bradaz.” (Jay. 1:16, 19; 2:5) Hihn neva chrai mek adaz tink dat hihn mi perfek. Insteda dat, hihn mi inklood ihself wen ih mi seh: “Aala wi mek mistayk lata taim.”—Reed Jaymz 3:2.
14. Wai wi haftu bee wilin fi admit wi mistayk dehn?
14 Wat da di lesn? Wi haftu memba dat aala wi da sinaz. Wi noh fi tink dat wi beta dan wi Baibl styoodent. Wai? If wi mek wi Baibl styoodent tink dat wi noh mek no mistayk, ih ku geh diskorij an ih ku staat tu feel laik ih kuda neva serv Gaad eena wahn perfek way. Bot wen wi aanis ahn wi mek dehn noa dat ih noh aalwayz eezi fi fala Baibl prinsiplz, ahn wi eksplayn how Jehoava mi help wi fi mek chaynjiz eena wi laif, wi wahn help wi styoodent fi si dat ih ku serv Jehoava tu.
Jaymz iloschrayshanz mi eezi fi andastan, dehn mi klyaa, an ih mi help ahn teech di lesn gud (Paragraaf 15-16) *
15. How yu wuda eksplayn di iloschrayshanz weh Jaymz mi yooz? (Jaymz 3:2-6, 10-12)
15 Jaymz mi yooz iloschrayshanz weh mi toch peepl haat. Wi noa fi shoar dat Jehoava hoali spirit mi help ahn, bot moa dan laikli hihn mi laan wahn lat bowt how fi teech wen ih mi stodi di iloschrayshanz weh ih oalda breda, Jeezas, mi yooz. Di iloschrayshanz weh Jaymz mi yooz mi mek di lesn weh ih di teech klyaa an eezi fi andastan.—Reed Jaymz 3:2-6, 10-12.
16. Wai wi shuda yooz iloschrayshanz weh eezi fi andastan?
16 Wat da di lesn? Yooz iloschrayshanz weh eezi fi andastan. Wen yu yooz iloschrayshanz weh eezi fi andastan, yu help peepl fi si di lesn weh yu waahn dehn laan. Dis ku help yu Baibl styoodent memba di difrent Baibl chroots. Jeezas da di perfek egzampl a sombadi weh yooz iloschrayshanz weh eezi fi andastan, ahn fi hihn breda Jaymz mi fala fi hihn egzampl. Mek wi kansida wan a Jaymz iloschrayshanz, ahn mek wi si wai ih mi eezi fi andastan.
17. Wai di iloschrayshan da Jaymz 1:22-25 mi eezi fi andastan?
17 Reed Jaymz 1:22-25. Di iloschrayshan weh Jaymz mi yooz bowt di miro mi eezi fi andastan. Hihn mi-di teech dat if wi waahn benifit fahn Gaad Werd, wi no fi onli reed it, bot wi haftu du weh ih tel wi fi du. Jaymz mi noa dat di peepl weh ih mi-di taak tu kuda mi andastan wahn iloschrayshan bowt wahn persn weh di luk pan ihself eena wahn miro. Weh lesn hihn mi-di chrai teech? Hihn mi-di teech dat ih noh mek no sens if wahn man wuda luk eena di miro, si dat ih need fi fiks sohnting pan ihself, an ih noh fiks it. Da di sayhn ting wid wee, ih noh mek no sens if wi wuda reed Gaad Werd, si sohnting weh wi need fi chaynj eena wi laif, ahn noh mek di chaynjiz weh wi need fi mek.
18. Weh chree tingz wi haftu du wen wi di yooz wahn iloschrayshan?
18 Wen wi di yooz wahn iloschrayshan, wi ku fala di egzampl weh Jaymz mi set fi wee ahn du chree tingz: (1) Wi ku mek shoar dat di iloschrayshan weh wi di yooz wahn help wi bring owt di lesn weh wi waahn teech. (2) Wi ku yooz wahn iloschrayshan weh eezi fi andastan. (3) Wi ku mek shoar dat di peepl weh wi taak tu andastan di lesn weh wi di teech. If yu fain it haad fi tink bowt gud iloschrayshanz, goh da di Watch Tower Publications Index. Anda di hedin “Illustrations,” yu ku fain wahn lata egzampl weh yu ku yooz. Memba dat iloschrayshanz da laik wahn maik—ih wahn mek evribadi andastan di lesn weh yu di chrai teech lowd ahn klyaa. Soh mek shoar dat yu yooz iloschrayshanz weh wahn bring owt di impoatant lesn dehn weh yu waahn yu Baibl styoodent laan. Af koars, di moas impoatant reezn wai wi waahn teech beta, da noh fi bring atenshan tu wiself, bot fi help az moch peepl az wi kud fi bee paat a Jehoava hapi famili.
19. How wi shoa dat wi lov wi bradaz ahn sistaz?
19 Jaymz mi ga di privilij fi ga wahn perfek breda. Eevn doa wee noh ga da privilij, wee ga di aana fi serv Jehoava lang wid wahn big famili a Kristyan bradaz ahn sistaz. Wi shoa dat wi lov wi bradaz ahn sistaz wen wi spen taim wid dehn, wen wi laan fahn dehn, ahn wen wi werk lang wid dehn eena di preechin ahn teechin werk. Wen wi chrai wi bes fi fala Jaymz egzampl eena wi atichood, wi kandok, ahn di way how wi teech, wi bring aana tu Jehoava ahn wi help peepl weh reeli waahn geh fi noa Hihn fi jraa kloas tu ahn.
SANG 114 “Ga Payshens”
^ Jaymz mi groa op eena di saym famili az Jeezas. Kompyaa tu ada peepl, Jaymz mi noa di Son a Gaad reeli gud. Eena dis aatikl, wi wahn diskos weh wi ku laan fahn Jeezas yonga breda weh mi geh fi bee wahn brada weh mi tek di leed eena di erli Kristyan kangrigayshan.
^ Jaymz da-mi akchwali Jeezas haaf breda ahn hihn da-mi di wan weh rait di buk weh ga fi hihn naym. Eena dis aatikl, wi wahn rifaa tu ahn az Jeezas breda.
^ Brada Nathan Knorr da-mi wahn memba a di Govanin Badi. Hihn mi finish ih laif pahn ert eena 1977.
^ DI PICHA: Jaymz mi yooz wahn egzampl a wahn smaal faiya. Hihn mi yooz dis iloschrayshan fi eksplayn how daynjaros ih ku bee wen wi yooz wi tong eena di rang way. Dat da-mi wahn iloschrayshan weh eezi fi andastan bikaaz evribadi mi noa wat da-mi wahn smaal faiya.