1. How wi ku spen taim wid Jehoava?

 WI LOV spen taim wid peepl wi kay bowt. Wahn hozban ahn waif injai spen taim wid eech ada. Yong peepl laik spen taim wid dehn kloas frenz. An aala wi injai spen taim wid wi bradaz ahn sistaz. Bot moa impoatant, wi lov spen taim wid wi Gaad. Wi ku du dis wen wi pray tu ahn, wen wi reed fi hihn Werd, ahn wen wi meditayt pahn fi hihn perpos fi hyoomanz an ih byootiful kwalitiz. Di taim wi spen wid Jehoava veri preshos fi chroo!—Ps. 139:17.

2. Wai ih noh eezi fi spen taim wid Jehoava?

² Eevn doa wi injai di pray tu Jehoava ahn stodi di Baibl, ih noh aalwayz eezi. Aala wi bizi, ahn dat ku mek it haad fi mek wi fain taim fi wership Jehoava. Wi jab, wi famili, ahn di ada tingz weh wi haftu du ku tek soh moch a wi taim dat wi feel dat wi tu bizi fi pray, stodi, er meditayt.

3. Wat da sohnting els weh ku tek op moas a wi taim?

³ Dehn ga sohnting els weh ku tek op moas a wi taim. If wi noh kyaaful, wi ku geh bizi di du tingz weh noh mait bee rang, bot ih ku tek op soh moch a wi taim dat ih ku mek it haad fi mek wi jraa kloasa tu Jehoava. Fi egzampl, ih impoatant fi mek wi spen taim di rilaks er di du fon tingz. Bot if wi spen tu moch taim di du dat, wi noh wahn ga inof taim fi wership Jehoava. Wi need fi memba wat  da di moas impoatant ting eena wi laif.—Prov. 25:27; 1 Tim. 4:8.

4. Weh wi wahn diskos eena dis aatikl?

⁴ Eena dis aatikl, wi wahn diskos wai wi need fi disaid weh moa impoatant eena wi laif. Wi wahn aalso fain owt how wi ku mek di bes yoos a wi taim wid Jehoava ahn how wi ku benifit wen wi yooz wi taim da way.

5. How Ifeezhanz 5:15-17 ku help wahn yong persn fi mek di bes disizhan eena laif?

⁵ Chooz di bes laif. Yong peepl aalwayz wori bowt weh dehn wahn du wid dehn laif. Skool teechaz ahn famili membaz weh da noh Jehoava Witnisiz mait inkorij dehn fi goh da yooniversiti soh dat dehn ku geh wahn gud jab ahn mek lata moni. Bot da kaina ejukayshan wahn tek op wahn lata dehn taim. Dehn payrents ahn di frenz eena di kangrigayshan mait inkorij dehn fi yooz dehn taim eena Jehoava servis. Weh ku help wahn yong persn weh lov Jehoava fi mek di bes disizhan? Ih wuda bee gud fi mek ih reed ahn meditayt pahn Ifeezhanz 5:15-17. (Reed.) Afta ih reed dehnya vers, wahn yong persn mait aks ihself: ‘Wat da “Jehoava wil”? Weh disizhan wahn mek Jehoava hapi? Weh disizhan wahn help mee fi mek di bes yoos a mi taim?ʼ Memba, “di dayz weh wi di liv eena wikid,” ahn dis werl weh Saytan di rool wahn soon en. Ih wahn bee waiz if wi yooz wi laif di du tingz weh mek Jehoava hapi.

6. Weh disizhan Mayri mi mek, ahn wai dat da-mi wahn waiz disizhan?

⁶ Put di moa impoatant tingz fers plays eena laif. Sohntaim, fi mek di bes yoos a wi taim, wi mait need fi disaid bitween too tingz weh noh akchwali rang. Wi ku si dis fahn weh mi hapm wen Jeezas mi vizit Mayri ahn Marta. Marta mi soh hapi fi ga Jeezas di vizit dehn dat shee mi pripyaa wahn big meel far ahn. Bot Mayri mi sidong wid Jeezas ahn lisn tu weh ih mi ga fi seh. Weh Marta mi du neva rang. Bot Jeezas mi seh dat Mayri mi “pik di bes poarshan.” (Look 10:38-42, ftn.) Afta sohn taim, Mayri mosi mi ferget weh food dehn mi eet da day, bot wi ku bee shoar dat shee neva ferget weh shee mi laan fahn Jeezas. Jos laik how Mayri mi chrezha di taim weh shee mi spen wid Jeezas, wee chrezha di taim wi spen wid Jehoava. How wi ku mek di bes yoos a da taim?

7. Wai ih veri impoatant fi pray, stodi, ahn meditayt?

⁷ Yu fi andastan dat wen wi pray, stodi, ahn meditayt da paat a wi wership tu Jehoava. Wen wi pray, wi di taak tu wi hevnli Faada weh lov wi wahn lat. (Ps. 5:7) Wen wi stodi di Baibl, wi di laan fahn Gaad, di waizis Persn eena di yoonivers. (Prov. 2:1-5) Wen wi meditayt bowt di tingz weh wi laan bowt Jehoava, wi tink bowt ih byootiful kwalitiz ahn wi memba di amayzin tingz weh ih waahn du fi wi ahn fi aal hyoomanz. Dis da di veri bes way wi ku yooz wi taim. Bot weh ku help wi fi du dis?

8. Weh lesn wi ku laan fahn how Jeezas mi yooz ih taim eena di wildanes?

⁸ If ih pasabl, goh da wahn kwaiyet plays. Kansida di egzampl a Jeezas.  Bifoa ih mi staat ih minischri rait ya pahn ert, Jeezas mi spen 40 dayz eena di wildanes. (Look 4:1, 2) Rait deh, Jeezas kuda mi pray tu Jehoava ahn meditayt pahn weh ih Pa mi waahn ih du. Dis mi help Jeezas fi mek shoar dat ih mi redi fi di tes ih wuda soon fays. How yoo ku benifit fahn Jeezas egzampl? If yu da paat a wahn big famili, ih mait noh aalwayz pasabl fi mek yu fain wahn kwaiyet plays hoam. Eena da kays, yu mait luk fi wahn kwaiyet plays owtsaid. Dat da weh Julie du wen shee waahn pray tu Jehoava. Shee an ih hozban liv eena wahn smaal apaatment da France, an ih haad fi mek ih deh bai ihself. Julie seh: “Ai wuda goh fi wahn waak eena di paak evri day. Da way deh, Ah ku deh bai miself, Ah ku foakos, an Ah ku reeli taak tu Jehoava.”

9. Eevn doa Jeezas mi bizi, how hihn mi shoa dat ih mi chrezha ih rilayshanship wid Jehoava?

⁹ Jeezas da-mi wahn veri bizi persn. Joorin ih minischri rait ya pahn ert, wahn krowd a peepl mi fala ahn fahn plays tu plays, an aala dehn mi waahn spen taim wid ahn. Wan taim, “aala di peepl fahn di siti mi gyada tugeda rait deh da di doa” fi si ahn. Eevn soh, Jeezas mi mek shoar dat ih aalwayz ga taim fi pray tu Jehoava. Bifoa di son goh op, hihn mi “fain wahn plays weh ih kuda mi deh bai ihself” wehpaat ih kuda mi spen taim wid ih Pa.—Maak 1:32-35.

10-11. Akaadn tu Machyu 26:40, 41, weh kongsl Jeezas mi gi ih disaiplz da di gyaadn a Getsemani, bot weh mi hapm?

¹⁰ Pahn di nait bifoa Jeezas mi ded, az ih minischri mi-di kohn tu wahn en, agen Jeezas mi luk fi wahn kwaiyet plays wehpaat ih kuda meditayt ahn pray. Hihn mi gaahn da di gyaadn a Getsemani. (Mach. 26:36) Rait deh, Jeezas mi tel ih disaiplz sohnting veri impoatant weh dehn mi need fi hyaa bowt pryaa.

¹¹ Noatis weh mi hapm. Wen dehn mi reech da di gyaadn a Getsemani, ih mi veri layt, maybi eevn paas midnait. Jeezas mi aks ih apasl dehn fi “kip wach,” ahn den ih gaahn pray. (Mach. 26:37-39) Bot wail ih mi-di pray, dehn mi faal asleep. Wen ih mi fain dehn di sleep, agen Jeezas mi kongsl dehn fi “kip pahn di lukowt an aalwayz pray.” (Reed Machyu 26:40, 41.) Hihn mi riyalaiz dat dehn mi deh anda lata schres ahn dat dehn mi taiyad. Jeezas mi ga kompashan fi dehn an ih tel dehn dat dehn “badi mait noh ga di schrent fi du it.” Stilyet, doh, too moa taim Jeezas  gaahn pray, ahn wen ih kohn bak, ih fain ih disaipl dehn di sleep insteda di pray.—Mach. 26:42-45.

12. Weh wi ku du if sohntaim wi feel schres owt er tu taiyad fi pray?

¹² Chooz di rait taim. Sohntaim wi feel schres owt er tu taiyad fi pray. If dat eva hapm tu yu, memba dat dehn ga lata peepl weh feel di saym way. Bot weh yoo ku du? Sohn peepl weh ga di habit fi pray tu Jehoava da di en a di day fain it helpful fi chaynj dehn taim ahn pray lee erliya eena di eevnin wen dehn noh tu taiyad. Adaz fain dat dehn foakos beta wen dehn pray eena sertn pozishan, fi egzampl, wen dehn sidong er neel dong. Bot wat if yu feel tu angshos er tu diskorij fi pray? Tel Jehoava how yu feel. Yoo ku bee shoar dat wi mersiful Faada wahn andastan yu.—Ps. 139:4.

13. How wi ilekchranik divais ku dischrak wi wen wi pray, stodi, er goh da di meetin dehn?

¹³ Noh geh dischraktid wen yu stodi. Pryaa da noh di onli way how wi frenship wid Jehoava ku geh schranga. Wen wi stodi Gaad Werd ahn goh da wi kangrigayshan meetin dehn, ih ku help wi fi jraa kloasa tu Gaad. Dehn ga eniting weh yoo ku du fi mek yu yooz yu taim eena wahn waiz way wen yu di stodi er goh da di kangrigayshan meetin dehn? Aks yuself, ‘Weh dischrak mi joorin di meetin dehn er wen Ai di chrai stodi?ʼ Maybi da wahn kaal, eemayl, er teks mesij pahn yu foan er sohn ada ilekchranik divais di dischrak yu. Tudeh bilyanz a peepl ga dehnya divais. Sohn peepl weh du risaach seh dat wen wi di chrai fi foakos, wi kud geh dischraktid eevn if wi jos ga wahn foan kloas bai. Wahn ekspert seh: “Yu noh reeli di foakos pahn weh yu di du. Yu di tink bowt sohnting els.” Bifoa wi asembli ahn kanvenshan dehn staat, dehn yoozhwali rimain wi fi ajos wi ilekchranik divais eena wahn setin weh noh wahn disterb adaz. Yu tink wi ku du di sayhn ting wen wi deh bai wiself soh dat wi divais noh disterb wee wen wi di spen taim wid Jehoava?

14. Akaadn tu Filipiyanz 4:6, 7, how Jehoava wahn help wi foakos?

¹⁴ Aks Jehoava fi help yu foakos. Wen  yu noatis dat yu di staat tu tink bowt ada tingz wail yu di du persnal stodi er wen yu deh da wahn kangrigayshan meetin, aks Jehoava fi help yu. If yu feel laik yu di wori er if yu feel angshos, ih noh eezi fi stap tink bowt yu woriz ahn foakos pahn Gaad Werd, bot ih veri impoatant fi mek yu du dat. Pray fi di kaina pees weh noh onli wahn protek yu haat bot aalso yu “tinkin.”—Reed Filipiyanz 4:6, 7; ftn.

15. Wat da wan way how wee benifit wen wi pray, stodi, ahn goh da meetin?

¹⁵ If yu tek di taim fi taak tu, lisn tu, ahn tink bowt Jehoava, yoo wahn benifit wahn lat. How? Fers, yu wahn mek beta disizhanz. Di Baibl pramis wi dat “di persn weh di waak wid waiz peepl wahn geh waiz.” (Prov. 13:20) Soh az yu spen taim wid di waizis Persn weh da Jehoava, yu wahn geh waiza. Yu wahn andastan beta how fi mek hihn hapi ahn yu noh wahn mek disizhanz weh wahn hert ahn.

16. Wen wi pray, stodi, ahn goh da meetin, how dat wahn help wi fi bee wahn beta teecha?

¹⁶ Sekant, yu wahn bee wahn beta teecha. Wen wi di stodi di Baibl wid sohnbadi, fi wee moas impoatant goal da fi help wi styoodent jraa kloas tu Jehoava. Di moa wi pray tu Jehoava ahn laan bowt ahn, di moa wi lov fi hihn wahn groa, ahn wi wahn bee redi fi teech wi styoodent fi lov Hihn tu. Tink bowt Jeezas egzampl. Hihn mi taak bowt Jehoava eena wahn lovin way ahn dat mi help ih disaiplz fi lov Jehoava tu.—Jan 17:25, 26.

17. How wi ku ga schranga fayt wen wi pray ahn stodi?

¹⁷ Terd, yu wahn ga schranga fayt. Tink bowt weh hapm wen yu aks Gaad fi gaidans, komfert, er sopoat. Evri taim Jehoava ansa dehndeh pryaaz, yu fayt eena hihn groa schranga. (1 Jan 5:15) Wat els ku help yu fi ga schranga fayt? Persnal stodi. Memba dat “peepl haftu hyaa di mesij bifoa dehn ku ga fayt.” (Roam. 10:17) Bot fi mek wi ga schranga fayt, wi need fi du moa dan jos laan tingz. Wat els wi need fi du?

18. Gi wahn egzampl weh shoa wai wi need fi meditayt pahn weh wi di laan.

¹⁸ Wi need fi meditayt pahn weh wi di laan. Kansida di ekspeeryens a di raita a Psalm 77. Hihn mi schres owt bikaaz ih mi feel laik hihn ahn di ada Izrelaits neva ga Jehoava blesin. Hihn mi kyaahn sleep da nait bikaaz ih mi-di wori wahn  lat bowt dat. (Vers 2-8) Weh ih mi du? Ih mi tel Jehoava: “Ah wahn tink bowt aal di tingz weh yu du ahn di way how yu du tingz.” (Vers 12) Af koars, di saamis mi wel ahn noa bowt di tingz weh Jehoava mi don du fi ih peepl eena di paas, bot ih mi stil wanda: “Gaad ferget fi shoa kompashan tu wi, er ih anga mek ih mersi goh weh?” (Vers 9) Di saamis mi meditayt pahn weh Jehoava mi don du ahn pahn di fak dat Hihn mi shoa mersi ahn kompashan eena di paas. (Vers 11) Wat da-mi di rizolt? Di saamis mi kanvins dat Jehoava wuda neva abandan Ih peepl. (Vers 15) Sayhn way soh, fi yoo fayt wahn groa schranga az yu meditayt pahn weh Jehoava du fi ih peepl eena di paas ahn weh ih don du fi yoo persnali.

19. How els wi benifit wen wi pray, stodi, ahn goh da di meetin dehn?

¹⁹ Di foat ahn moas impoatant way how yu benifit da dat yu lov fi Jehoava wahn groa schranga. Lov da di kwaliti weh wahn moov yu fi obay Jehoava, fi mek sakrifais weh wahn mek hihn hapi, ahn fi mek yu noh giv op wen yu di goh chroo eni chraiyal. (Mach. 22:37-39; 1 Kor. 13:4, 7; 1 Jan 5:3) Notn ku bee moa preshos dan wahn kloas frenship wid Jehoava!—Ps. 63:1-8.

20. How yu wahn mek taim fi pray, stodi, ahn meditayt?

²⁰ Memba dat wen yu pray, stodi, ahn meditayt, yu di wership Jehoava. Jos laik Jeezas, luk fi wahn kwaiyet plays fi spen taim wid Jehoava. Geh rid a eniting weh ku dischrak yu. Aks Jehoava fi help yu foakos wen yu di tek paat eena spirichwal tingz. If yu mek di bes yoos a yu taim now, Jehoava wahn bles yu wahn lat ahn yu wahn injai laif fareva eena Gaad nyoo werl.—Maak 4:24.