STODI AATIKL 4
Wai Wi Goh Da di Memoaryal
“Kip aan di du dis fi memba mi.”—LOOK 22:19.
SANG 20 Yu Sen Yu Preshos Son
WEH WI WAHN DISKOS? *
1-2. (a) Wen wi wuda naamali memba wahn famili er fren weh ded? (b) Weh Jeezas mi staat op di nait bifoa ih mi ded?
EEVN if wi famili er frenz weh wi lov ded fi wahn lang taim, wi stil memba dehn. Wi wuda tink bowt dehn evri yaa, espeshali pahn di day wen dehn mi ded.
2 Eech yaa, wee ahn milyanz a peepl rong di werl gyada tugeda fi memba di aniversri a di det a sombadi weh wi lov wahn lat—Jeezas Krais. (1 Peet. 1:8) Wi gyada tugeda fi memba di wan weh gi ih laif az wahn ransom fi sayv wi fahn sin ahn det. (Mach. 20:28) In fak, Jeezas mi waahn ih falowaz memba ih det. Di nait bifoa ih mi ded, hihn mi staat op wahn speshal eevnin meel an ih mi koman ih disaipl dehn: “Kip aan di du dis fi memba mi.”—Look 22:19.
3. Weh wi wahn diskos eena dis aatikl?
3 Wahn smaal amonk a peepl weh goh da di Memoaryal a Krais det ga di hoap fi liv da hevn. Bot milyanz a peepl weh jain fi selibrayt Krais det ga di hoap fi liv pahn ert. Eena dis aatikl, wi wahn kansida sohn reezn wai dehn wan weh ga di hoap fi liv da hevn ahn dehn wan weh ga di hoap fi liv pahn ert luk faawod fi goh da di Memoaryal evri yaa. Wi wahn aalso diskos how wee benifit wen wi goh da di Memoaryal. Fers, mek wi diskos sohn reezn wai di anointid dehn goh da di Memoaryal.
WAI ANOINTID BRADAZ AHN SISTAZ GOH DA DI MEMOARYAL
4. Wai anointid bradaz ahn sistaz eet di bred ahn jrink di wain da di Memoaryal?
4 Eech yaa, anointid bradaz ahn sistaz luk faawod fi goh da di Memoaryal fi eet di bred ahn jrink di wain. Wai di anointid Kristyanz eet di bred ahn jrink di wain? Fi mek wi ansa da kweschan, mek wi kansida weh mi hapm di nait bifoa Jeezas mi ded. Afta di Paasoava meel, Jeezas mi staat op weh wi noa tudeh az di Laad Eevnin Meel. Hihn mi paas di bred ahn di wain tu fi hihn 11 faytful apasl dehn an ih mi tel dehn fi eet di bred ahn jrink di wain. Jeezas mi taak bowt too kovenant, er agreement. Hihn mi taak bowt di nyoo kovenant ahn di Kingdom kovenant. * (Look 22:19, 20, 28-30) Dehndeh kovenant mi mek it pasabl fi mek onli wahn sertn amonk a peepl, inkloodin di apasl dehn, bee king ahn prees da hevn. (Rev. 5:10; 14:1) Soh onli di anointid Kristyanz weh stil alaiv pahn ert, ahn weh da paat a dehndeh too kovenant fi eet di bred ahn jrink di wain da di Memoaryal.
5. Weh di anointid noa bowt di hoap weh Gaad gi dehn?
5 Dehn ga wahn nada reezn wai di anointid Kristyanz di luk faawod fi goh da di Memoaryal, ih gi dehn di apachooniti fi tink bowt dehn hoap. Jehoava gi dehn wahn wandaful hoap. Da hevn, dehn wahn neva ded ahn dehn badi wahn neva geh ratn ahn dehn wahn serv langsaid Jeezas Krais ahn di res a di 144,000. Pahn tap a dat, dehn wahn deh rait fronta Jehoava Gaad! (1 Kor. 15:51-53; 1 Jan 3:2) Di anointid noa dat Jehoava invait dehn fi injai dehndeh wandaful privilij da hevn. Bot fi mek dehn ku goh da hevn, dehn haftu stay faytful til dehn ded. (2 Tim. 4:7, 8) Di anointid Kristyanz veri hapi fi tink bowt dehn hoap fi goh da hevn. (Taitos 2:13) Bot how bowt di “ada sheep”? (Jan 10:16) Wat da sohn reezn wai dehn goh da di Memoaryal?
WAI DI ADA SHEEP GOH DA DI MEMOARYAL
6. Wai di ada sheep goh da di Memoaryal evri yaa?
6 Di ada sheep hapi fi goh da di Memoaryal, bot dehn noh eet di bred er jrink di wain. Eena 1938, di bradaz ahn sistaz weh mi ga di hoap fi liv pahn ert mi geh invaitid fi goh da di Memoaryal fi di fers taim. The Watchtower a Maach 1, 1938, mi seh: “Ih wahn bee di rait ting fi mek di [ada sheep] deh da di Memoaryal ahn fi si weh hapm. . . . Ih shuda bee wahn hapi okayzhan fi dehn tu.” Jos laik how wahn ges geh invaitid fi goh da wahn wedn serimoni an ih hapi fi dehdeh, di ada sheep hapi fi goh da di Memoaryal eevn doa dehn noh eet di bred er jrink di wain.
7. Wai di ada sheep luk faawod fi di Memoaryal taak?
7 Jos laik di anointid, di ada sheep tink bowt dehn hoap. Dehn luk faawod tu di Memoaryal taak bikaaz ih foakos pahn weh Krais ahn di 144,000 anointid Kristyanz wahn du fi faytful hyoomanz joorin Krais Towzn-Yaa Rool. Anda di roolaship a dehn King Jeezas Krais, di 144,000 roolaz wahn help mek di ert intu wahn paradais ahn dehn wahn help hyoomanz fi geh perfek. Ih eksaitin fi di milyanz a bradaz ahn sistaz weh ga di hoap fi liv pahn ert fi imajin di fyoocha wen dehnya Baibl prafesi wahn kohn chroo, laik di wan eena Isaiah 35:5, 6; 65:21-23; ahn Revilayshan 21:3, 4. Wen dehn imajin dehnself ahn dehn famili ahn frenz weh dehn lov eena da nyoo werl, fi dehn hoap fi di fyoocha wahn geh schranga an ih wahn help dehn fi mek op dehn main fi neva stap serv Jehoava.—Mach. 24:13; Gal. 6:9.
8. Wat da wahn neks reezn wai di ada sheep goh da di Memoaryal?
8 Kansida wahn nada reezn wai di ada sheep goh da di Memoaryal. Dehn waahn shoa dehn lov ahn sopoat fi di anointid Kristyanz. Gaad Werd mi seh dat di anointid ahn di bradaz ahn sistaz weh ga di hoap fi liv pahn ert wahn werk kloas tugeda. How dehn wahn du dis? Mek wi diskos wahn fyoo egzampl.
9. Weh di prafesi da Zechariah 8:23 seh bowt di way di ada sheep feel bowt di anointid?
9 Reed Zechariah 8:23. * Eena wahn byootiful way, dis prafesi diskraib di way di ada sheep feel bowt di anointid bradaz ahn sistaz. Di werdz “wahn Joo” an “unu peepl” rifaa tu di saym groop a anointid Kristyanz weh liv pahn ert tudeh. (Roam. 2:28, 29) Di “ten man owta aala di langwij a di nayshan dehn” reprizent di ada sheep. Dehn “hoal aan tait” ahn stik tu dehn soh dat dehn ku jain dehn eena chroo wership. Soh pahn di nait a di Memoaryal, di ada sheep shoa dat dehn noh let goh fahn di anointid wen dehn goh da di Memoaryal.
10. Weh Jehoava don du fi mek di prafesi da Ezekiel 37:15-19, 24, 25 kohn chroo?
10 Reed Ezekiel 37:15-19, 24, 25. * Jehoava mi mek dis prafesi kohn chroo wen ih mek di anointid ahn di ada sheep werk kloas tugeda. Di prafesi menshan too stik. Dehn wan weh ga di hoap fi liv da hevn da laik di stik “fi Jooda” (weh da di chraib fahn weh di king dehn a Izrel kohn fram), ahn dehn wan weh ga di hoap fi liv pahn ert da laik di stik “a Eefrayim.” * Jehoava wuda jain di too groop soh dat dehn wuda bee laik “wan stik.” Dis meenz dat dehn wahn serv eena wahn yoonaitid way anda di dairekshan a dehn King, Jeezas Krais. Evri yaa, di anointid ahn di ada sheep goh da di Memoaryal, noh az too separayt groop, bot az “wan flak” anda “wan shepad.”—Jan 10:16.
11. How “di sheep” weh geh menshan da Machyu 25:31-36, 40 shoa dat dehn sopoat Krais bradaz?
11 Reed Machyu 25:31-36, 40. “Di sheep” weh Jeezas mi taak bowt reprizent raichos peepl weh liv joorin di taim a di en weh ga di hoap fi liv pahn ert—dehn da di ada sheep. Dehn laayal tu di res a di anointid Kristyanz weh liv pahn ert ahn dehn sopoat dehn eena di preechin ahn teechin werk di mek disaiplz aal rong di werl.—Mach. 24:14; 28:19, 20.
12-13. Wat da sohn ada wayz how di ada sheep shoa dat dehn sopoat Krais bradaz?
12 Evri yaa joorin di weeks bifoa di Memoaryal, di ada sheep shoa dat dehn sopoat Krais bradaz. Dehn du dis wen dehn du dehn bes ahn tek paat eena wahn werlwaid kampayn fi invait peepl weh inchrestid tu di Memoaryal. (Si di baks “ Yoo Di Plan Heda Taim fi di Memoaryal?”) Dehn aalso mek shoar dat evriting redi fi di Memoaryal, eevn if nobadi eena dehn kangrigayshan anointid. Di ada sheep soh eksaitid fi sopoat Krais bradaz eena dehndeh wayz. Di ada sheep noa dat Jeezas si weh dehn du fi fi hihn anointid bradaz laik if dehn mi-di du it fi hihn persnali.—Mach. 25:37-40.
13 Wat da sohn ada reezn wai aala wi goh da di Memoaryal noh mata wat da wi hoap?
WAI AALA WI GOH DA DI MEMOARYAL
14. How Jehoava ahn Jeezas shoa dat dehn lov wi wahn lat?
14 Wi tankful fi di lov weh Jehoava ahn Jeezas ga fi wi. Jehoava shoa di lov weh hihn ga fi wi eena wahn lata wayz. Bot di graytis way how hihn shoa ih lov fi wi da wen ih sen ih preshos Son fi sofa ahn ded fi wi. (Jan 3:16) Ahn Jeezas mi aalso shoa dat hihn ga lata lov fi wi wen ih mi wilin fi giv ih laif fi wi. (Jan 15:13) Wee kuda neva pay bak Jehoava ahn Jeezas fi di lov weh dehn shoa wi. Bot wi ku shoa dehn dat wi tankful bai di way how wi liv wi laif evri day. (Kol. 3:15) Ahn wi goh da di Memoaryal bikaaz wi waahn tink bowt di lov weh dehn ga fi wi ahn wi waahn shoa dehn humoch wee lov dehn.
15. Wai di anointid ahn di ada sheep tankful fi di gif a di ransom?
15 Wi veri tankful fi di gif a di ransom. (Mach. 20:28) Di ransom veri preshos tu di anointid bikaaz ih mek fi dehn wandaful hoap pasabl. Bikaaz a dehn fayt eena Krais sakrifais, Jehoava si dehn az raichos ahn hihn adap dehn az fi hihn chiljren. (Roam. 5:1; 8:15-17, 23) Di ada sheep tankful fi di ransom tu. Bikaaz dehn ga fayt eena Krais sakrifais, Gaad si dehn az kleen, dehn ku gi hihn saykrid servis, ahn dehn ga di hoap fi kom owta “di grayt chribyulayshan.” (Rev. 7:13-15) Wan way how di anointid ahn di ada sheep shoa dat dehn tankful fi di ransom da wen dehn goh da di Memoaryal evri yaa.
16. Wat da wahn nada reezn wai wi goh da di Memoaryal?
16 Wahn nada reezn wai wi goh da di Memoaryal da bikaaz wi waahn obay Jeezas. Noh mata wat da wi hoap fi di fyoocha, eech wan a wi waahn obay Jeezas koman weh hihn mi gi di nait wen hihn mi staat op di Memoaryal: “Kip aan di du dis fi memba mi.” —1 Kor. 11:23, 24.
HOW AALA WI BENIFIT WEN WI GOH DA DI MEMOARYAL
17. How di Memoaryal help wi fi jraa kloasa tu Jehoava?
17 Wi jraa kloasa tu Jehoava. (Jay. 4:8) Laik weh wi laan, di Memoaryal gi wi wahn apachooniti fi tink bowt di hoap weh Jehoava gi wi ahn fi meditayt pahn di grayt lov weh hihn shoa wi. (Jer. 29:11; 1 Jan 4:8-10) Wen wi tink bowt humoch Gaad lov wi ahn di hoap weh ih gi wi fi di fyoocha, wi lov fi hihn wahn geh schranga ahn wi wahn ga wahn kloasa frenship wid ahn.—Roam. 8:38, 39.
18. Wen wi meditayt pahn Jeezas egzampl, weh dat mek wi waahn du?
18 Wi waahn kapi Jeezas egzampl. (1 Peet. 2:21) Joorin di dayz bifoa di Memoaryal, wi foakos pahn Baibl akonks bowt Jeezas laas dayz pahn ert, ih det, an ih rezorekshan. Den pahn di eevnin a di Memoaryal, di Memoaryal taak rimain wi a di lov weh Jeezas ga fi wi. (Ifee. 5:2; 1 Jan 3:16) Wen wi reed ahn meditayt pahn di egzampl weh Jeezas set fi wi bowt how fi shoa lov tu adaz, wi feel laik wi haftu “liv jos laik how Jeezas mi liv.”—1 Jan 2:6.
19. How wi ku kantinyu fi bee Jehoava fren?
19 Wi mek op wi main fi kantinyu bee Gaad fren. (Jood 20, 21) Wi kantinyu fi bee Jehoava fren wen wi du aal weh wi kud fi obay ahn, fi mek ih naym hoali, ahn fi mek hihn hapi. (Prov. 27:11; Mach. 6:9; 1 Jan 5:3) Di Memoaryal help wi fi mek op wi main fi liv eech day eena wahn way laik if wi di tel Jehoava, ‘Ai waahn bee fi yoo fren fareva!ʼ
20. Wat da sohn gud reezn wi gat fi goh da di Memoaryal?
20 Weda wi hoap da fi liv fareva da hevn er pahn ert, wi ga lata gud reezn fi goh da di Memoaryal. Evri yaa wen wi gyada tugeda pahn da day, wi memba di det a sombadi weh wi lov, Jeezas Krais. Bot moa impoatant, wi memba di lov weh Jehoava shoa wi wen ih gi wi ih Son az wahn ransom. Dis da di graytis way enibadi shoa lov tu adaz. Dis yaa, di Memoaryal wahn bee pahn Fraideh, Aypril 15, 2022 afta di son goh dong. Wi lov Jehoava an ih Son, soh pahn di aniversri a Jeezas det, notn shuda bee moa impoatant tu wee dan fi deh da di Memoaryal.
SANG 16 Prayz Jah fi Ih King an Ih Kingdom!
^ Weda wi hoap fi liv da hevn er da Paradais rait ya pahn ert, wi luk faawod fi goh da di Memoaryal evri yaa. Dis aatikl wahn diskos gud reezn fahn di Baibl wai wi goh da di Memoaryal ahn how wi benifit wen wi goh da di Memoaryal.
^ Fi moa infamayshan bowt di nyoo kovenant ahn di Kingdom kovenant, si di aatikl “You Will Become ‘a Kingdom of Priestsʼ” eena di Aktoaba 15, 2014, kapi a The Watchtower, payj 15-17.
^ Zechariah 8:23: “‘Dis da weh Jehoava a aamiz seh, “Eena dehn dayz ten man owta aala di langwij a di nayshan dehn wahn hoal aan tait, yes, dehn wahn hoal aan tait tu di roab a wahn Joo, di seh: ‘Wee waahn goh wid unu peepl, bikaa wi don hyaa dat Gaad deh wid unu peepl.’”’”
^ Ezekiel 37:15-19, 24, 25: “Di werd a Jehoava mi kohn tu mi agen di seh: 16 ‘Az tu yoo, son a man, tek wahn stik ahn rait pan it, “Fi Jooda ahn? di peepl a Izrel weh deh wid ahn. “Den tek wahn nada stik ahn rait pan it, ‘Fi Joazef, di stik a Eefrayim, ahn fi aal di hows a Izrel hoo deh wid ahn.ʼ 17 Den jain dehn tugeda soh dat dehn da wan stik eena yu han. 18 Wen yu peepl dehn aks yu, “Yu noh wahn tel wi weh dehnya ting meen?” 19 tel dehn, ‘Dis da weh di Savrin Laad Jehoava seh: “Ai wahn tek di stik a Joazef, weh deh eena di han a Eefrayim, ahn di chraib dehn a Izrel weh deh wid hihn, an Ai wahn jain dehn tu di stik a Jooda; an Ai wahn mek dehn wan stik, ahn dehn wahn bee wan eena mai han.”’ 24 “‘“Mai servant Dayvid wahn bee fi dehn king, an aala dehn wahn ga wan shepad. Dehn wahn waak eena mi komanment dehn ahn fala mi laa dehn. 25 Dehn wahn liv eena di lan weh Ai mi giv tu mi servant, Jaykop. Dehn wahn liv wehpaat yu ansesta dehn mi liv, ahn dehn wahn liv deh fareva. Dehn ahn dehn chiljren ahn fi dehn chiljren pikni; ahn Dayvid mi servant wahn bee fi dehn prins fareva.”’”’”
^ Fi moa infamayshan bowt di prafesi a di too stik weh deh eena Ezekiel chapta 37, si di buk Pure Worship of Jehovah—Restored At Last!, payj 130-135, par. 3-17.
