STODI AATIKL 3
Wat Da Sohn Lesn Wi Ku Laan Fahn Wen Jeezas Mi Krai?
“Jeezas staat tu krai.”—JAN 11:35.
SANG 17 Laan Fahn Jeezas fi Bee Wilin
WEH WI WAHN DISKOS? *
1-3. Wat da sohn tingz weh ku mek Jehoava peepl krai?
WEN da di laas taim yoo mi krai? Sohntaim wi krai bikaaz wi hapi. Bot moas a di taim, wi krai bikaaz wi feel reeli sad. Fi egzampl, wi mait krai wen sohnbadi weh wi lov ded. Wahn sista weh naym Lorilei, weh liv da di United States, mi seh: “Dehn ga taimz wen Ah feel soh sad bowt di det a mi daata dat Ah feel laik notn ku bring mi komfert. Joorin dehn taimz, Ah neva noa how Ah kuda mi handl da payn.” *
2 Wi mait ga ada reeznz wai wi krai. Hiromi, wahn painyaa sista da Japan, seh: “Sohntaim Ah geh sad bikaaz di peepl weh wi preech tu noh inchrestid fi hyaa di mesij fahn di Baibl. Ahn den Ah wuda krai an aks Jehoava fi help mi fain sombadi weh reeli wahn laan di chroot.”
3 Yoo eva feel di saym way how dehndeh sistaz mi feel? Fi shoar wahn lata wi feel laik dat. (1 Peet. 5:9) Wi waahn “rijais az wi di serv Jehoava.” Sohntaim, doh, wi mait krai bikaaz sombadi weh wi lov ded, wi mait feel diskorij, er wi mait goh chroo wahn prablem weh mek it haad fi mek wi stay laayal tu Jehoava. (Ps. 6:6; 100:2) Weh wi ku du wen wi feel dis way?
4. Weh wi wahn diskos eena dis aatikl?
4 Weh wi ku laan fahn di egzampl a Jeezas? Dehn mi ga taimz wen hihn mi feel soh sad dat hihn anaal mi “staat tu krai.” (Jan 11:35; Look 19:41; 22:44; Heeb. 5:7) Mek wi luk pahn di difrent taimz wen hihn mi krai, ahn wi wahn si weh wi ku laan bowt Jeezas an ih Pa, Jehoava. Wi wahn aalso si weh wee ku du wen wi di goh chroo sichuwayshanz weh wuda mek wi krai.
JEEZAS KRAI BIKAAZ IH KAY FI IH FRENZ
Jos laik weh Jeezas mi du, sopoat dehn wan weh mi looz wahn famili memba er fren eena det (Paragraaf 5-9) *
5. Weh wi ku laan bowt Jeezas fahn Jan 11:32-36?
5 Da mi joorin winta taim eena 32 C.E., wen Jeezas gud fren Lazaros mi geh sik ahn ded. (Jan 11:3, 14) Lazaros mi ga too sista weh naym Mayri ahn Marta, ahn Jeezas mi lov dis lee famili wahn lat. Di too sistaz mi reeli sad bikaaz dehn breda ded. Afta Lazaros mi ded, Jeezas gaahn da di vilij a Betani, wehpaat Mayri ahn Marta mi liv. Wen Marta mi hyaa dat Jeezas mi-di kohn da dehn vilij, shee hori gaahn meet ahn. Tink bowt how sad shee mosi mi feel wen ih seh: “Laad, mai breda neva mi wahn ded if yoo mi deh ya.” (Jan 11:21) Rait afta Jeezas mi si Mayri ahn di adaz di krai, hihn anaal mi “staat tu krai.”—Reed Jan 11:32-36.
6. Wai Jeezas mi krai eena da sichuwayshan?
6 Wai Jeezas mi krai eena da sichuwayshan? Di buk Insight on the Scriptures seh: “Wen Jeezas mi si dat ih fren Lazaros mi ded, ahn wen ih si Lazaros sista dehn di krai, ih mi mek hihn ‘feel wahn deep sadnis eena ih haat ahn den hihn mi staat tu krai.ʼ” * Jeezas mosi mi-di tink bowt di payn weh ih kloas fren Lazaros mi gaahn chroo joorin ih siknis an ih mosi mi imajin how Lazaros mi feel wen ih mi riyalaiz dat ih wahn soon ded. Wen Jeezas mi si dat Mayri ahn Marta mi soh sad bikaaz dehn breda mi ded, dis mosi mi moov Jeezas fi krai tu. If yoo don looz wahn kloas fren er famili memba eena det, fi shoar yu mi feel da kaina sadnis. Mek wi luk pahn chree lesn weh wi ku laan fahn dis sichuwayshan.
7. Weh wi ku laan bowt Jehoava fahn di way how Jeezas mi krai fi ih frenz?
7 Jehoava andastan how yoo feel. Jeezas “ga di saym wayz” laik ih Pa. (Heeb. 1:3) Wen Jeezas mi krai, hihn mi-di shoa wi how Jehoava feel wen sombadi weh wi lov ded. (Jan 14:9) If sombadi weh yu lov ded, yoo ku bee shoar dat Jehoava noh onli noatis weh yu di goh chroo, bot ih aalso feel sari fi yu. Jehoava waahn help yu deel wid di sadnis weh deh eena yu haat.—Ps. 34:18; 147:3.
8. How wi ku bee shoar dat Jeezas wahn rezorek wi famili ahn frenz weh ded?
8 Jeezas waahn rezorek wi famili ahn frenz weh ded. Jos bifoa ih mi staat tu krai, Jeezas mi tel Marta: “Yu breda wahn rayz op bak.” Marta mi bileev weh Jeezas seh. (Jan 11:23-27) Marta da-mi wahn faytful servant a Jehoava, soh fi shoar shee mi noa bowt di rezorekshan dehn weh di prafit Ilaija an Ilaisha mi du sohn yaaz erliya. (1 Ki. 17:17-24; 2 Ki. 4:32-37) Ahn moa dan laikli, shee mi don hyaa bowt di rezorekshan dehn weh Jeezas mi du. (Look 7:11-15; 8:41, 42, 49-56) Soh yoo ku bee shoar tu dat yu famili ahn frenz weh ded wahn kom bak tu laif agen. Weh wi ku laan fahn di fak dat Jeezas mi krai wen hihn mi-di komfert ih fren dehn weh mi-di krai? Wi laan dat hihn waahn rezorek wi famili ahn frenz weh ded!
9. Jos laik Jeezas, how yoo ku help sombadi weh looz wahn famili memba er fren eena det? Yooz di egzampl eena di paragraaf.
9 Yoo ku help dehn wan weh looz wahn famili memba er fren eena det. Jeezas neva onli krai wid Marta ahn Mayri, bot ih mi aalso lisn tu dehn ahn gi dehn komfert. Wee ku du di saym ting fi dehn wan weh looz wahn famili memba er fren eena det. Dan, wahn elda weh liv da Australia, seh: “Afta Ah mi looz mi waif eena det, Ai mi need help. Wahn lata bradaz ahn dehn waif mi aalwayz redi fi lisn tu mi. Dehn mi dehdeh fi mi ahn dehn neva stap mi wen Ah mi shoa how sad Ah mi feel, ahn dehn neva feel shaym wen dehn si mi krai. Dehn aalso help mi eena difrent wayz, fi egzampl, dehn wash mi kaar, dehn gaahn bai mi groashriz, ahn dehn kuk fi mi wen Ah mi feel laik Ah kudn du dehnya tingz fi miself. Ahn dehn mi pray wid mi aal di taim. Dehn proov fi bee chroo frenz ahn bradaz ‘weh baan fi wen taimz haad.ʼ”—Prov. 17:17.
JEEZAS MI KRAI BIKAAZ IH MI KAY BOWT IH NAYBAZ
10. Akaadn tu Look 19:36-40, weh mi hapm wen Jeezas mi reech Jeroosalem?
10 Jeezas mi reech da Jeroosalem pahn Naisan 9, 33 C.E. Az hihn mi-di reech kloas tu di siti, wahn big krowd a peepl weh mi dehdeh staat tu spred dehn kloaz owt pahn di road fi shoa dat Jeezas da-mi dehn King. Dis da-mi wahn reeli hapi taim. (Reed Look 19:36-40.) Soh ih disaipl dehn neva ekspek weh mi wahn hapm neks. “Wen [Jeezas] mi nayli reech Jeroosalem, ih luk pahn di siti an ih staat tu baal oava it.” Wail ih mi-di krai, Jeezas mi tel dehn bowt di terabl tingz weh mi wahn soon hapm tu di peepl da Jeroosalem.—Look 19:41-44.
11. Wai Jeezas mi krai fi di peepl weh liv da Jeroosalem?
11 Jeezas mi feel sad bikaaz eevn doa dehn mi-di giv ahn wahn waam welkom, hihn mi noa dat moas a di Jooz neva mi wahn aksep di Kingdom mesij. Bikaaz a dis, Jeroosalem mi wahn geh dischrai an eni Joo weh mi servaiv di dischrokshan a di siti mi wahn bee slayv. (Look 21:20-24) Sad fi seh, jos laik weh Jeezas mi seh, moas a di peepl rijek ahn. Eena di ayrya wehpaat yoo liv, how moas a di peepl rispan tu di Kingdom mesij? If jos wahn lee bit a peepl shoa inchres eena di Baibl chroots weh yoo di teech, weh yu ku laan fahn Jeezas wen ih mi krai fi ih naybaz? Mek wi luk pahn chree moa lesn weh wi ku laan.
12. Weh wi ku laan bowt Jehoava fahn di way how Jeezas mi krai fi ih naybaz?
12 Jehoava kay bowt peepl. Di taim wen Jeezas mi krai fi ih naybaz shoa wi dat Jehoava reeli kay bowt peepl. “Ih noh waahn nobadi geh dischrai, bot ih waahn evribadi geh di chaans fi ripent.” (2 Peet. 3:9) Tudeh, wi shoa dat wi lov wi naybaz wen wi chrai help dehn laan di gud nyooz bowt di Kingdom.—Mach. 22:39. *
Jos laik weh Jeezas mi du, chaynj op di taim wen yu goh preech (Paragraaf 13-14) *
13-14. How Jeezas mi shoa kompashan fi peepl, ahn how wi ku fala fi hihn egzampl?
13 Jeezas mi werk haad eena di minischri. Hihn mi shoa lov fi peepl wen ih mi yooz evri apachooniti fi teech dehn. (Look 19:47, 48) Jeezas mi du dis bikaaz hihn mi ga kompashan fi peepl. Dehn mi ga taimz wen peepl mi waahn hyaa weh Jeezas mi ga fi seh dat hihn an ih disaipl dehn “neva eevn ga wahn chaans fi eet wahn meel.” (Maak 3:20) Wen wahn man mi waahn taak tu Jeezas da nait, Jeezas mi wilin fi meet wid ahn. Jeezas mi wilin fi taak tu da man da wahn taim weh mi gud far ahn. (Jan 3:1, 2) Moas a di peepl weh mi lisn tu Jeezas neva geh fi bee ih disaiplz. Bot aala dehn wan weh mi lisn tu ahn mi geh fi hyaa bowt di gud nyooz. Tudeh, wi waahn gi evribadi di apachooniti fi hyaa bowt di gud nyooz. (Aks 10:42) Bot fi mek wi du dis, wi praabli need fi chaynj di way wi preech.
14 Bee wilin fi chaynj op di taim wen yu preech. If wi aalwayz preech da di sayhn taim, wi mait noh meet sohn peepl weh wuda laik fi laan bowt di gud nyooz. Wahn painyaa sista weh naym Matilda seh: “Mee ahn mi hozban chrai chaynj op di taim wen wi preech. Erli da maanin, wi du bizniz teritori. Eena di aftanoon wen wahn lata peepl deh pahn di schreet, wi du kyaat werk. An eena di eevnin, wi fain it beta fi preech tu peepl da dehn hows.” Wi noh onli fi preech da wahn taim weh gud fi wee. Wi shuda bee wilin fi chaynj op di taim wen wi preech soh dat wi ku preech tu moa peepl. Wen wi du dat, wi ku bee shoar dat Jehoava wahn bee hapi wid wi.
JEEZAS MI KRAI BIKAAZ IH MI KAY BOWT JEHOAVA NAYM
Jos laik weh Jeezas mi du, pray tu Jehoava wen yu di wori (Paragraaf 15-17) *
15. Akaadn tu Look 22:39-44, weh mi hapm pahn di nait bifoa Jeezas mi ded?
15 Pahn di nait a Naisan 14, 33 C.E., Jeezas mi gaahn da di gyaadn a Getsemani. Ahn rait deh ih mi poar owt ih haat tu Jehoava. (Reed Look 22:39-44.) Jeezas mi “bayg Gaad wid wahn lowd vais, lang wid tyaaz.” (Heeb. 5:7) Weh Jeezas mi pray fa di nait bifoa ih mi ded? Hihn mi pray fi di schrent fi stay laayal tu Jehoava ahn fi du fi Hihn wil. Jehoava mi hyaa ih Son pryaa an ih mi noatis how schres owt ih mi schres owt, ahn bikaaz a dat ih mi sen wahn aynjel fi schrentn ahn.
16. Wai Jeezas mi-di wori wahn lat wen ih mi-di pray eena di gyaadn a Getsemani?
16 Jeezas mi-di krai eena di gyaadn a Getsemani bikaaz ih mi-di wori dat peepl wuda si ahn az sohnbadi weh noh ga no rispek fi Gaad naym. Hihn mi noa how impoatant ih mi impoatant fi stay laayal tu Jehoava ahn fi klayr Ih naym. If yoo di fays wahn sichuwayshan weh di wori yu ahn weh ku tes yu laayalti tu Jehoava, weh yu ku laan fahn wen Jeezas mi krai? Mek wi luk pahn chree moa lesn weh wi ku laan.
17. Weh wi ku laan bowt Jehoava fahn di way how hihn ansa Jeezas pryaaz?
17 Jehoava lisn tu yu pryaaz. Jehoava mi lisn tu Jeezas wen ih mi aks ahn fi help. Wai? Bikaaz Jeezas mayn foakos da-mi fi stay laayal tu ih Pa ahn fi klayr Ih naym. If fi wee mayn foakos da fi stay laayal tu Jehoava ahn fi klayr ih naym, hihn wahn ansa fi wee pryaaz wen wi aks ahn fi help.—Ps. 145:18, 19.
18. Eena weh way Jeezas da wahn kain fren weh andastan how wi feel?
18 Jeezas andastan how wi feel. Wen wi di wori, wi hapi fi ga wahn fren weh andastan how wi feel, espeshali if dehn don gaahn chroo sohnting laik weh wee di goh chroo. Jeezas da wahn fren laik dat. Hihn andastan how wi feel wen wi feel week ahn need help bikaaz hihn don gaahn chroo sohnting laik dat. Hihn wahn mek shoar dat wi geh di help weh wi need “da di rait taim.” (Heeb. 4:15, 16) Jos laik how Jeezas mi aksep help fahn wahn aynjel eena di gyaadn a Getsemani, Jehoava ku help wee eena wahn lata wayz. Ih ku help wi chroo wahn poblikayshan, wahn veedyo, wahn taak, er wahn inkorijin vizit fahn wahn elda er wahn brada er sista. Wi shuda bee wilin fi aksep da help fahn Jehoava.
19. Weh ku schrentn yu wen yu di fays wahn chraiyal weh ku tes yu laayalti tu Gaad? Yooz di egzampl eena di paragraaf.
19 Jehoava wahn gi yu “wahn kaina pees weh peepl kyaahn andastan.” How Jehoava ku schrentn wi? Wen wi pray, Jehoava wahn gi wi “wahn kaina pees weh peepl kyaahn andastan.” (Fil. 4:6, 7) Di pees weh Jehoava gi wi kaam wi haat ahn help wi fi tink schrayt. Wahn sista weh naym Luz mi seh dat dis da chroo. Shee seh: “Wahn lata taimz Ah feel loanli. Sohntaim wen Ah feel laik dat, Ah feel laik Jehoava noh lov mi. Bot wen dat hapm, rait away Ah tel Jehoava how Ah feel. Pryaa help mee fi mek Ah feel beta.” Jos laik weh di sista mi seh, wee ku geh pees wen wi pray.
20. Wat da sohn lesn wi mi laan fahn di taimz wen Jeezas mi krai?
20 Di lesn dehn weh wi mi laan fahn di taimz wen Jeezas mi krai komfert wi wahn lat! Ih rimain wi fi sopoat wi frenz weh looz wahn famili memba er fren eena det, ahn fi chros dat Jehoava ahn Jeezas wahn sopoat wee wen dat hapm tu wi. Wi waahn shoa kompashan wen wi di preech ahn teech bikaaz Jehoava Gaad ahn Jeezas Krais shoa dis saym wandaful kwaliti. An ih komfert wi fi noa dat Jehoava an ih Son andastan how wi feel, dehn andastan aala wi weeknis, ahn dehn waahn help wi fi bayr op. Mek wi kantinyu yooz weh wi don laan til wen Jehoava mek ih pramis fi “waip weh [wi] tyaaz fahn [wi] aiy” kohn chroo!—Rev. 21:4.
SANG 120 Ga Wahn Jentl, Hombl Haat Laik Krais
^ Eena di Baibl, wi reed dat sohntaim Jeezas mi geh soh sad dat ih mi krai. Eena dis aatikl, wi wahn diskos chree difrent taimz wen Jeezas mi krai ahn wat da sohn lesn wee ku laan fahn wen Jeezas mi krai.
^ Som a di naym dehn chaynj.
^ Si di buk Insight on the Scriptures, Volume 2, payj 69.
^ Di Greek werd fi “nayba” eena Machyu 22:39 da noh jos fi peepl weh liv eena di saym ayrya, bot ih di rifaa tu enibadi weh wahn persn mait taak tu.
^ DI PICHA: Jeezas mi waahn komfert Mayri ahn Marta. Wee ku du di sayhn ting fi dehn wan weh looz dehn famili ahn frenz eena det.
^ DI PICHA: Jeezas mi wilin fi teech Nikodeemos da nait. Wee shuda bee wilin fi stodi di Baibl wid peepl da wahn taim weh gud fi dehn.
^ DI PICHA: Jeezas mi pray fi di schrent fi stay laayal tu Jehoava. Wee shuda du di sayhn ting wen wi di goh chroo chraiyalz.