1-2. Weh wi need fi kantinyu du afta wi geh baptaiz? Pleez eksplayn yu ansa.

 HOW aafn yu kleen yu hows? Maybi wen yu fers moov een, yu kleen it gud. Bot wat if afta dat yu neva kleen it agen? Ih wuda geh doti bad, noh chroo? Soh fi mek wi hows aalwayz luk neet ahn kleen, wi haftu kleen it regyula.

² Saym way soh, wi haftu kantinyu werk haad fi karek wi tinkin ahn persnaliti. Bifoa wi mi geh baptaiz, wi mi werk haad fi mek chaynjiz eena wi laif soh dat wi ku “kip wiself kleen fahn eniting weh ku mek wi badi er wi spirit doti.” (2 Kor. 7:1) Bot now wi need fi fala di advais weh di apasl Paal gi wi wen ih seh fi “kantinyu chaynj.” (Ifee. 4:23) Wai wee need fi kantinyu du dis? Wi haftu werk haad fi mek chaynjiz bikaaz wi noh waahn mek di werl afek wi ahn mek wi doti eena Gaad sait. Soh wi need fi chek wi tinkin, wi persnaliti, ahn wi dizaiyaz.

3. Weh Roamanz 12:2 meen wen ih seh “unu haftu chaynj di way unu tink”?

³ Weh wi need fi du fi chaynj di way wi tink? (Reed Roamanz 12:2.) Fi “chaynj di way [wi] tink,” wi haftu egzamin wiself ahn mek chaynjiz weh shoa dat wi di  obay Jehoava standadz. Soh wi noh jos waahn du tingz fi luk gud fronta adaz. Wi reeli waahn chaynj hoo wee pahn di eensaid. Dis da sohnting wi need fi kip aan di du aal di taim.

4. How wi ku mek shoar dat di werl noh chaynj di way wi tink an ak?

⁴ Wen wi geh perfek, wi wahn ku pleez Jehoava eena evriting weh wi du. Bot fi now wi haftu werk haad fi mek wi ku pleez Jehoava. Paal mi seh da Roamanz 12:2 dat wi need fi chaynj di way wi tink soh dat wi ku noa weh Gaad waahn. Wi need fi luk pahn wiself gud fi mek shoar wi di tink di way Jehoava tink ahn noh di way di werl tink wen ih kohn tu di disizhanz weh wi mek er di goalz weh wi set eena laif.

5. How wi ku shoa dat wi aalwayz memba dat Jehoava day deh kloas? (Koment pahn di picha.)

⁵ Kansida wahn egzampl. Jehoava waahn mek wi memba “dat di day a Jehoava di kom an ih deh kloas.” (2 Peet. 3:12) Aks yuself: ‘Di way how Ai di liv mi laif shoa dat Ah andastan dat wi reeli deh kloas tu di en a dis sistem? Wen ih kohn tu ejukayshan ahn werk, mai disizhanz shoa dat mi servis tu Jehoava da di moas impoatant ting eena mi laif? Ai chros dat Jehoava wahn gi mee ahn mi famili weh wi need, er Ai aalwayz wori bowt mateeryal tingz?ʼ Jehoava hapi wen ih si dat wi di du wi bes fi obay ahn eena evriting weh wi du.—Mach. 6:25-27, 33; Fil. 4:12, 13.

6. Weh wi need fi kip aan di du?

⁶ Wi need fi kip aan di chek di way how wi tink ahn den mek di chaynjiz weh wi need fi mek. Paal mi tel di Korintyanz: “Unu mos kip di chek unuself fi noa if unu di hoal aan tait tu di fayt. Unu fi  kip di proov tu unuself weh kaina peepl unu.” (2 Kor. 13:5) Fi mek wi “hoal aan tait tu di fayt,” wi need fi du moa dan jos goh da meetin ahn preech sohntaim. Ih aalso ga fi du wid how wi tink, how wi feel, ahn weh wi du. Wi kantinyu chaynj di way wi tink wen wi reed Gaad Werd, laan fi tink laik hihn, ahn mek eni chaynjiz wi need fi mek fi pleez Jehoava.—1 Kor. 2:14-16.

7. Laik weh Ifeezhanz 4:31, 32 seh, wat els wi need fi du, ahn wai dis mait bee haad?

⁷ Reed Ifeezhanz 4:31, 32. Wahn nada impoatant chaynj weh wi need fi mek da “fi put aan di nyoo way a laif.” (Ifee. 4:24) Dat wahn tek wahn lata werk. Wi ga lata bad kwalitiz fi chaynj, laik haytful bitanis, anga, ahn raat. Dis mait bee haad fi du, bikaaz sohn bad kwalitiz haad fi chaynj. Fi egzampl, di Baibl seh dat sohn peepl “eezi fi geh beks.” (Prov. 29:22) Ih wahn tek wahn lata werk fi geh rid a dehndeh bad kwalitiz eevn afta wi geh baptaiz. Mek wi luk pahn wahn ekspeeryens.

8-9. How di ekspeeryens a Stephen shoa dat wi need fi kip aan di geh rid a di oal way a laif?

⁸ Ih mi haad fi wahn brada weh naym Stephen fi kanchroal ih anga. Hihn seh: “Eevn afta Ah mi geh baptaiz, Ai mi haftu werk haad fi kanchroal mi anga. Fi egzampl, wahn taim wen Ah mi-di preech fahn hows tu hows, Ah mi chays afta wahn man weh mi jos teef di rayjo owta mi kaar. Az Ah geh kloasa tu ahn, ih jrap di rayjo ahn ron weh. Wen Ah tel di bradaz ahn sistaz weh mi deh wid mi how Ah geh bak mi rayjo, wahn elda aks mi, ‘Stephen, weh yoo mi wahn du if yu mi kech di man?ʼ Da kweschan mi mek Ah tink an ih help mi fi kip aan di werk fi ga pees wid adaz.” b

⁹ Stephen egzampl shoa wi dat sohn negitiv kwaliti weh wi ga mait kom op widowt wi eevn noatis, eevn doa wi mi tink wi don geh rid a it. If dat hapm tu yoo, noh geh diskorij ahn tink dat yoo da wahn bad Kristyan. Paal mi gaahn chroo sohnting laik dat. Hihn seh: “Wen Ah waahn du weh rait, badnis deh eena mi.” (Roam. 7:21-23) Aala wi haftu werk haad fi geh rid a bad habits weh kip di kohn bak, jos laik how wi haftu werk haad fi kleen op eni dos ahn dert weh kohn eena wi hows. How wi ku du dat?

10. Akaadn tu 1 Jan 5:14, 15, weh ku help wi fait bad habits?

¹⁰ Pray tu Jehoava bowt di schrogl weh yu di ga fi chaynj yu persnaliti. Chros dat hihn wahn hyaa yu wen yu pray tu ahn, an ih wahn help yu. (Reed 1 Jan 5:14, 15.) Jehoava noh wahn du wahn mirakl fi geh rid a eni bad kwaliti weh wi gat, bot hihn wahn gi wi di schrent fi fait it. (1 Peet. 5:10) Weh wi ku du fi werk lang wid wi pryaaz? Wi noh fi du tingz weh wahn mek di oal persn kohn bak ahn shoa ih oagli fays. Fi egzampl, chrai noh wach moovi, TV proagram, er reed eniting weh mek ih luk laik ih aarait fi ga di bad kwaliti weh wi di fait fi get rid a. Ahn noh alow yuself fi stay di tink bowt bad tingz.—Fil. 4:8; Kol. 3:2.

11. Weh wi haftu du fi kip di put aan di nyoo persn?

 ¹¹ Wen wi di geh rid a di oal persn, ih impoatant fi mek wi kip di werk haad fi put aan di nyoo persn. Bot how wi ku du dat? Mek it wahn goal fi geh fi noa Jehoava ahn kapi fi hihn kwaliti dehn. (Ifee. 5:1, 2) Fi egzampl, wen yu reed wahn Baibl pasij weh taak bowt Jehoava fergivnis, yu ku aks yuself, ‘Ai redi fi fergiv adaz?ʼ Ahn wen yu reed wahn Baibl pasij weh taak bowt Jehoava kompashan fi dehn wan weh need help, aks yuself, ‘Ai shoa bai weh Ah du dat Ah ga da saym kaina kompashan fi mi bradaz ahn sistaz weh poa ahn need help?ʼ Kip di chaynj di way yu tink ahn put aan di nyoo persn, an az yu du dat, bee payshent wid yuself.

12. How Stephen egzampl proov dat di Baibl ga di powa fi chaynj peepl laif?

¹² Memba Stephen? Hihn mi noatis dat hihn kuda mi put aan di nyoo persn lee bit bai lee bit. Hihn seh: “Sins Ah geh baptaiz, Ah fain miself eena sevral sichuwayshanz weh Ah mi reeli haftu kanchroal mi anga. Soh Ah wuda eeda waak weh fahn di sichuwayshan er Ah wuda chrai noh mek ih geh wers. Lata peepl, inkloodin mi waif, komen mi fi di way how Ah riyak now, an eevn mee miself sopraiz wid how Ah kanchroal mi anga! Non a dis kuda mi hapm widowt Jehoava help. Ai reeli bileev dat aala dis proov dat di Baibl ga di powa fi chaynj peepl laif.”

13. How Galayshanz 5:16 ku help wi du weh rait?

¹³ Reed Galayshanz 5:16. Jehoava redi fi gi wi ih hoali spirit fi help wi fait fi du weh rait. Wen wi stodi di Baibl, wi di alow Gaad hoali spirit fi help wi. Wahn neks way how wi geh hoali spirit da wen wi goh da meetin. Da wi meetinz, wi geh fi spen taim wid wi bradaz ahn sistaz weh di chrai haad fi du weh rait, jos laik wee, ahn dat veri inkorijin. (Heeb. 10:24, 25; 13:7) Ahn wen wi pray tu Jehoava ahn bayg ahn fi help wi wid wi weeknis dehn, hihn wahn gi wi ih hoali spirit fi mek wi kip di fait fi du weh rait. Da chroo, dehnya tingz mait noh mek wi rang dizaiyaz goh weh, bot dehn wahn gi wi di schrent fi mek wi noh kip di du dehn. Laik weh Galayshanz 5:16 seh, if wi alow di hoali spirit fi gaid di way wi liv, wi “noh wahn fala weh [wi] sinful badi waahn.”

14. Wai ih impoatant fi kip di du weh rait?

¹⁴ Wen wi staat du tingz weh wahn help wi fi ga wahn gud rilayshanship wid Jehoava, ih impoatant fi mek wi stik tu wi spirichwal skejul ahn kip di du weh rait. Wai? Bikaaz wi ku geh temtid enitaim fi du weh rang. In fak, eevn afta wi geh baptaiz, wi mait geh temtid fi du tingz weh wi noa wi noh sopoas tu du, laik gyambl, geh jronk, er wach poarnografi. (Ifee. 5:3, 4) Dis da weh wahn yong brada admit: “Wan a mai bigis schrogl da dat Ai laik ada man. Ai mi tink dat dehnya feelinz wuda goh weh afta wahn wail, bot Ah stil di fait dehnya  feelinz.” Weh ku help yoo if yu di fait wahn rang dizaiya ahn yu feel laik da tu moch fi mek yu deel wid?

15. Wai ih inkorijin fi noa dat rang dizaiyaz da sohnting weh “evribadi els goh chroo”? (Koment pahn di picha.)

¹⁵ Wen yu di fait fi kanchroal wahn rang dizaiya, da laik yu deh gens wahn schrang enimi, bot memba dat yu noh deh bai yuself. Di Baibl seh: “Eni temtayshan weh unu goh chroo da di saym laik weh evribadi els goh chroo.” (1 Kor. 10:13a) Paal mi rait dehnya werdz tu bradaz ahn sistaz weh mi liv da Korint. Som a dehn yoostu komit adolchri, som a dehn yoostu bee homosekshwal, ahn som a dehn yoostu bee jronkad. (1 Kor. 6:9-11) Yu tink dehn neva haftu fait eni rang dizaiya afta dehn mi geh baptaiz? Da chroo, dehn da-mi anointid Kristyanz, bot dehn mi stil imperfek. Soh fi shoar dehn mi haftu fait dehnya rang dizaiyaz now an agen. Dat shuda bee inkorijin fi wee. Wai? Bikaaz ih shoa wi dat adaz don fays dehnya saym tingz weh wee di schrogl wid, ahn dehn mi win di fait. Soh wee ku “ga schrang fayt,” bikaaz wi noa dat wi bradaz di sofa “di saym kaina tingz laik [wee].”—1 Peet. 5:9.

16. Weh daynja wi waahn avoid, ahn wai?

¹⁶ Ih daynjaros fi tink dat nobadi ku andastan wi weeknis dehn. Dis kaina tinkin ku mek wi feel laik wi sichuwayshan hoaples ahn dat wi kyaahn du notn fi fait wi weeknis. Bot di Baibl seh: “Gaad faytful, ahn hihn noh wahn mek di temtayshan geh soh bad dat unu kyaahn bayr it. Bot wen di temtayshan kohn, hihn wahn mek wahn way owt soh dat unu ku bayr it.” (1 Kor. 10:13b) Soh eevn wen wahn rang dizaiya soh schrang  dat wi feel laik wi kyaahn deel wid it, wee kud stay faytful tu Jehoava. Wid Jehoava help, wee kud fait it ahn noh du weh rang.

17. Eevn if wi ga rang dizaiyaz, weh wi ku du fi kanchroal dehn?

¹⁷ Mek wi aalwayz memba dat sins wi imperfek, rang dizaiyaz wahn kip di kom op. Bot wen dat hapm, wi ku rijek dehn kwik-wan, jos laik weh Joazef mi du wen ih mi haftu ron weh fahn Potifa waif. (Gen. 39:12) Wi noh haftu du weh wi sinful badi waahn!

18-19. Weh kweschanz wi waahn aks wiself az wi di chaynj di way wi tink?

¹⁸ Fi mek wi chaynj di way wi tink, wi need fi kantinyu werk haad fi pleez Jehoava bai di way how wi tink an ak. Dat da wai wi shuda chek wiself regyula an aks: ‘Di way Ai ak shoa dat Ai noa wi di liv eena di laas dayz? Ai di werk haad fi put aan di nyoo persn? Ai di alow Jehoava hoali spirit fi gaid mi soh dat Ah ku fait rang dizaiyaz?ʼ

¹⁹ Wen yu chek yuself, noh ekspek perfekshan, bot bee hapi wid di proagres weh yu mek. If yu si dat yu need fi du beta, noh geh diskorij. Insted, fala di kongsl weh deh da Filipiyanz 3:16: “Wateva proagres wi don mek, mek wi kantinyu eena di saym way a laif.” Wen yu du dat, fi shoar Jehoava wahn bles evriting weh yu du fi chaynj di way yu tink.