STODI AATIKL 3
Jehoava Di Help Yu fi Mek Evriting Werk Owt Gud
“Jehoava mi deh wid Joazef . . . . Jehoava mi-di mek evriting weh ih du werk owt gud.”—GEN. 39:2, 3.
SANG 30 Jehoava Da Mi Faada, Mai Gaad ahn Fren
WEH WI WAHN DISKOS? a
1-2. (a) Wai wi ekspek fi fays chraiyalz? (b) Weh wi wahn kansida eena dis aatikl?
ENIBADI weh serv Jehoava noa dat dehn wahn fays prablemz eena laif. Wi noa dis bikaaz di Baibl seh “wi wahn haftu paas chroo lata chribyulayshan bifoa wi get eena di Kingdom a Gaad.” (Aks 14:22) Wi aalso noa dat som a wi prablemz noh wahn geh fiks til wi liv eena Paradais, wehpaat “nobadi noh wahn ded nohmoh, nobadi noh wahn feel saro ner payn nohmoh ner krai bikaaz a sadnis.”—Rev. 21:4.
2 Jehoava noh geh rid a wi prablemz, bot hihn gi wi di schrent weh wi need fi bayr op. Noatis weh di apasl Paal mi rait tu di bradaz da Roam. Fers, hihn mi taak bowt som a di prablemz weh hihn ahn di bradaz mi-di goh chroo. Den ih seh: “Wid di help a di Wan weh lov wi, wi ga vikchri oava aala dehnya tingz.” (Roam. 8:35-37) Dis meenz dat Jehoava ku help wi fi mek tingz werk owt gud wen wi di goh chroo prablemz. Mek wi si how Jehoava mi help Joazef ahn how Hihn ku help yoo tu.
WEN TINGZ CHAYNJ SODN-WAN
3. How Joazef laif mi chaynj sodn-wan?
3 Ih mi playn fi si dat Jaykob mi lov ih son Joazef wahn lat. (Gen. 37:3, 4) Sayka dat, Joazef oalda breda dehn mi geh jelos. Ahn wen di apachooniti kom op, dehn mi sel Joazef tu wahn groop a Midyanait biznizman. Dehnya man mi kehr Joazef way da Eejip, ahn dehn sel ahn dis taim tu Potifa, di cheef a Fayro gyaad dehn. Joazef laif mi chaynj sodn-wan. Ih da-mi ih pa fayvrit son, bot den ih en op di bee wahn slayv da Eejip!—Gen. 39:1.
4. Weh kaina prablemz wee mait fays tudeh weh simila tu di wan dehn weh Joazef mi fays?
4 Di Baibl seh dat “bad tingz hapm tu evribadi.” (Eccl. 9:11, Holy Bible—Easy-to-Read Version) Sohntaim wi mait goh chroo prablemz weh “evribadi els goh chroo.” (1 Kor. 10:13) Er wi mait sofa jos bikaaz wi da wan a Jeezas disaipl. Fi egzampl, peepl mait mek fon a wi, goh gens wi, er eevn persikyoot wi fi weh wi bileev eena. (2 Tim. 3:12) Noh mata weh prablem wi fays, Jehoava ku help wi soh dat evriting werk owt gud. Mek wi si how Jehoava mi mek tingz werk owt gud fi Joazef.
Jehoava mi mek evriting werk owt gud fi Joazef eevn wen dehn mi sel ahn az wahn slayv da Eejip (Paragraaf 5)
5. Akaadn tu Genesis 39:2-6, weh Potifa mi riyalaiz wen tingz mi werk owt gud fi Joazef?
5 Reed Genesis 39:2-6. Potifa mi noatis dat Joazef da-mi wahn smaat ahn haad-werkin yong man. Hihn mi noa dat “Jehoava mi-di mek evriting weh [Joazef] du werk owt gud.” b Noh tu lang afta dat, Potifa mi mek Joazef fi hihn persnal atendant an ih put ahn in chaaj a ih hoal hows. Sayka dat, tingz mi werk owt reeli gud fi Potifa. c
6. How Joazef mosi mi feel bowt ih sichuwayshan?
6 Chrai imajin how Joazef mosi mi feel. Yu tink Joazef mi waahn mek Potifa si weh ih mi-di du ahn riwaad ahn fi ih haad werk? Moa dan laikli, Joazef mi waahn bee free soh dat ih ku goh bak hoam ahn deh wid ih pa. Aftaraal, noh kay humoch privilij Joazef mi ga, hihn stil da-mi wahn slayv tu sohnbadi weh noh wership Jehoava. Jehoava neva mek Potifa set Joazef free, ahn tingz mi wahn geh eevn wers fi Joazef.
IF TINGZ GEH WERS
7. Akaadn tu Genesis 39:14, 15 how tingz mi geh eevn wers fi Joazef?
7 Laik weh wi mi reed eena Genesis chapta 39, Potifa waif mi laik si Joazef, ahn shee mi chrai temp Joazef fi ga seks wid ahn, bot evritaim Joazef yoostu tel ahn no. Wel, shee en op di geh beks bad wid Joazef, an ih mi tel wahn lai bowt ahn dat hihn mi waahn rayp ahn. (Reed Genesis 39:14, 15.) d Wen Potifa hyaa weh mi hapm, ih mi put Joazef eena jayl, ahn hihn mi stay eena jayl fi sohn yaaz. (Gen. 39:19, 20) How laif mi stan fi Joazef eena jayl? Di Heebroo werd weh Joazef mi yooz fi “prizn” ku meen sohnting laik wahn “jrai wel” er wahn “deep hoal.” Soh ih song laik di plays weh Joazef mi deh mi daak, ahn dis mosi mi mek ih feel laik ih neva ga no hoap. (Gen. 40:15; ftn.) Di Baibl mi aalso seh dat fi wahn wail Joazef fut ahn nek mi deh chayn op. (Ps. 105:17, 18) Soh tingz mi geh eevn wers fi Joazef. Fahn wahn slayv weh ih maasta chros, Joazef mi en op eena jayl az wahn prizna.
8. Weh wi ku shoar bowt eevn wen wahn sichuwayshan geh wers?
8 Yoo eva eena wahn bad sichuwayshan weh geh wers eevn afta yu don pray bowt it? Dis ku hapm tu eni wan a wi. Jehoava noh protek wi fahn chraiyalz weh wi fays eena Saytan werl. (1 Jan 5:19) Bot wi ku bee shoar bowt wan ting, dat Jehoava noa weh aal yu di goh chroo ahn hihn kay bowt yoo. (Mach. 10:29-31; 1 Peet. 5:6, 7) Jehoava aalso pramis: “Ai wahn neva lef unu, an Ai wahn neva stap help unu.” (Heeb. 13:5) Jehoava ku help yu bayr op eevn wen ih luk laik no hoap deh. Dat da egzakli weh mi hapm tu Joazef.
Jehoava mi deh wid Joazef eevn wen hihn da-mi wahn prizna ahn wen hihn mi in chaaj a aala di ada priznaz (Paragraaf 9)
9. Akaadn tu Genesis 39:21-23, weh shoa dat Jehoava mi deh wid Joazef joorin ih taim da prizn?
9 Reed Genesis 39:21-23. e Eevn wen Joazef mi deh da prizn, Jehoava mi mek evriting weh Joazef du werk owt gud. How Jehoava mi du dat? Joazef mi werk haad fi win oava di chros ahn rispek a di cheef aafisa, jos laik weh ih mi du wid Potifa. Noh lang afta dat, di cheef aafisa mi put Joazef in chaaj a aala di ada priznaz. In fak, di Baibl seh dat “di cheef aafisa a di prizn neva wori bowt notn weh Joazef mi-di du.” Now Joazef mi ga tingz fi kip ahn bizi. Tink bowt dis: How ih eevn pasabl fi mek wahn prizna weh dehn akyooz dat ih rayp wahn hai ofishal waif geh wahn pozishan wid soh moch atariti? Dis da sohnting weh nobadi wuda ekspek. Dehn onli ga wan way fi eksplayn dis. Eena Genesis 39:23, ih seh: “Jehoava mi deh wid Joazef ahn Jehoava mi mek ih ga sokses eena evriting weh ih mi du.”
10. Wai Joazef mosi mi feel dat tingz neva werk owt gud far ahn?
10 Mek wi chrai put wiself eena Joazef sichuwayshan wan moa taim ahn si how hihn mosi mi feel. Afta Joazef gaahn da prizn bikaaz a wahn lai, yu tink hihn mi feel laik tingz mi werk owt gud far ahn eena evriting weh ih du? Weh yoo tink hihn mi waahn moa dan eniting els? Yu tink hihn mi waahn win oava di chros ahn rispek a di cheef aafisa a di prizn? Weh Joazef mosi mi reeli waahn da fi mek dehn klayr ih naym ahn set ahn free. In fak, hihn mi eevn aks wahn nada prizna weh dehn mi wahn set free fi taak tu Fayro soh dat ih ku kom owta da terabl plays. (Gen. 40:14) Bot wen di man kom owt, ih neva gaahn taak tu Fayro rait away, ahn soh Joazef mi stay lak op fi too moa yaaz. (Gen. 40:23; 41:1, 14) Bot, tanks tu Jehoava, evriting weh Joazef du werk owt gud. How dat mi hapm?
11. Weh speshal abiliti Jehoava mi giv Joazef, ahn how dat mi help ahn fi du weh Jehoava mi waahn?
11 Wen Joazef mi deh eena prizn, Jehoava mi mek di king a Eejip ga too jreem. Dehndeh jreem mi mek di king feel schres owt, soh Fayro mi reeli waahn noa weh dehn too jreem meen. Di king mi sen fi Joazef wen ih laan dat Joazef kuda mi tel ahn weh ih jreem dehn meen. Wid Jehoava help, Joazef neva onli tel ahn weh aal ih jreem meen, bot ih aalso tel ahn weh aal ih mi need fi du. Aala dis mi impres di king, espeshali wen ih noatis dat Joazef ga Jehoava help. Ahn soh hihn put dis yong man in chaaj a aal di food weh mi deh eena Eejip. (Gen. 41:38, 41-44) Sohn yaaz layta, wahn grayt famin mi afek noh onli Eejip bot aalso Kaynan, wehpaat Joazef famili mi liv. Now wid dis nyoo pozishan weh Joazef mi ga hihn kuda mi sayv ih famili, ahn soh di Mesaiya kuda baan layta az wan a fi dehn disendant.
12. How Jehoava mi mek tingz werk owt gud fi Joazef?
12 Mek wi tink bowt aal weh mi hapm eena Joazef laif. Yu noh tink Jehoava mek Potifa pay main tu Joazef, hoo da-mi wahn slayv? Yu noh tink Jehoava mek di cheef aafisa a di prizn help Joazef wail hihn da-mi wahn prizna? Yu noh tink Jehoava giv Fayro dehndeh jreem weh onli Joazef kuda mi eksplayn di meenin? Ahn yu noh tink da Jehoava weh mi mek Fayro apoint Joazef az di wan in chaaj a aala di food da Eejip? (Gen. 45:5) Af koars Jehoava da di wan weh mek tingz werk owt gud fi Joazef. Eevn doa Joazef breda dehn mi waahn kil ahn, Jehoava mi chaynj Joazef sichuwayshan soh dat hihn kuda mi du weh Jehoava waahn.
HOW JEHOAVA MEK TINGZ WERK OWT GUD FI YOO
13. Yu tink Jehoava kanchroal evriting weh hapm tu wi? Pleez eksplayn yu ansa.
13 Weh wi laan fahn Joazef laif? Yu tink Jehoava kanchroal evriting soh dat sohnting gud kom owta evri bad sichuwayshan? No, dat da noh weh di Baibl teech. (Eccl. 8:9; 9:11) Bot wi doo noa dat wen wi fays wahn chraiyal, Jehoava noa bowt it ahn hihn hyaa wi wen wi bayg ahn fi help. (Ps. 34:15; 55:22; Isa. 59:1) Noh onli dat, hihn ku help wi bayr op wen wi di goh chroo wahn chraiyal. How hihn du dat?
14. How Jehoava help wi wen wi goh chroo haad taimz?
14 Jehoava komfert wi an inkorij wi da di rait taim. (2 Kor. 1:3, 4) Dis da weh Brada Eziz fahn Turkmenistan mi noatis. Bikaaz a ih fayt, hihn mi gaahn da prizn fi too yaaz. Ih seh: “Di maanin wen Ah mi wahn ga mi koat kays, wahn brada mi shoa mi Isaiah 30:15, weh seh: ‘Yu wahn bee powaful if yu stay kaam ahn chros [Gaad].ʼ Dehndeh werdz mi help mi fi stay kaam ahn chros eena Jehoava fi evriting. Bikaaz Ah mi meditayt pahn dis vers, ih mi help mi di hoal wail Ah mi deh da prizn.” Yoo ku tink bowt wahn taim eena yu laif wen Jehoava mi komfert yu an inkorij yu egzakli wen yu mi need it?
15-16. Weh yu laan fahn Tori ekspeeryens?
15 Yoozhwali wi noh noatis how Jehoava help wi chroo wahn prablem til afta wi goh chroo it. Sista Tori agree wid dat. Fi shee son, Mason, mi ded afta ih mi fait kyansa fi siks yaaz. Dat mi mek shee reeli sad. Shee seh: “Ah noh tink dehn ga eniting wers fi mek wahn ma goh chroo. Ah shoar dat ada payrents wuda agree dat wen yu si yu pikni sofa, dat wers dan wen yoo sofa.”
16 Eevn doa Tori gaahn chroo aala dis payn ahn si ih son sofa, ih mi tink bowt wayz how Jehoava mi help ahn chroo dis terabl chraiyal. Shee seh, “Wen Ah tink bowt da terabl taim eena mi laif, Ah ku si how Jehoava mi kain tu mi an ih mi help mi di hoal wail mi son mi sik. Fi egzampl, eevn wen Mason mi sik bad ahn kudn spen taim wid peepl weh kohn si ahn, bradaz ahn sistaz stil wuda jraiv bowt too owaz fi reech da di haaspital jos fi si ahn. Sohnbadi mi aalwayz deh da di waytin room—redi ahn wilin fi help. Wi mi aalwayz ga di tingz weh wi mi need, eevn wen tingz mi veri haad.” Jehoava mi giv Tori ahn Mason evriting weh dehn mi need fi noh giv op.—Si di baks “ Jehoava Mi Gi Wi Egzakli Weh Wi Need.”
NOH FERGET HOW JEHOAVA BLES YU
17-18. Weh wahn help wi fi noatis ahn bee tankful fi Jehoava help joorin haad taimz? (Psalm 40:5)
17 Reed Psalm 40:5. f Wen sohnbadi di bil wahn hows, ih goal da fi finish it ahn fi goh liv een deh. Bot az di persn di kompleet dis proajek, ih wuda chek now an agen fi si how tingz di goh. Saym way soh, wi ku chek ahn si how Jehoava di help wi chroo wahn chraiyal. Da di en a eech day, yu ku aks yuself: ‘How Jehoava help mi tudeh? Eevn doa di prablem stil egzis, how Jehoava help mee fi noh giv op?ʼ Chrai fain at lees wan ting weh Jehoava du fi help yu.
18 Da chroo yu mait di pray fi mek wahn chraiyal goh weh er fi mek Jehoava tek it weh fahn yu. (Fil. 4:6) Bot wi aalso waahn noatis di blesinz weh wi ga rait now. Aftaraal, Jehoava pramis wi dat ih wahn gi wi di schrent fi noh giv op. Soh mek wi aalwayz bee graytful fi aal weh Jehoava du fi wi. If yu du dat, hihn wahn mek tingz werk owt gud fi yu, eevn wen yu goh chroo chraiyalz. Hihn wahn help yu, jos laik how ih mi help Joazef.—Gen. 41:51, 52.
SANG 32 Tek Jehoava Said!
a Wen wi di goh chroo prablemz, ih mait haad fi si how Jehoava di help wi. Wi mait tink dat di onli taim wen tingz di “werk owt gud” da wen wi noh ga prablemz. Wi ku laan sohn impoatant lesn fahn Joazef laif. Fi hihn egzampl wahn help wi fi si how Jehoava ku help eevn wen wi di goh chroo chraiyalz.
b Eevn doa di Baibl menshan som a di tingz weh chaynj eena Joazef laif wen hihn da-mi wahn slayv eena jos wahn fyoo vers, dehndeh chaynjiz mi praabli hapm joorin sevral yaaz.
c Genesis 39:2-6: “Bot Jehoava mi deh wid Joazef. An bikaaz a dat, hihn mi ga sokses ahn dehn mi put hihn in chaaj a di hows a ih maasta, di Eejipshan. 3 An ih maasta mi noatis dat Jehoava mi deh wid hihn ahn dat Jehoava mi-di mek evriting weh ih du werk owt gud. 4 Joazef mi pleez ih maasta, ahn hihn mi kohn fi bee ih persnal atendant. Soh Potifa mi put hihn in chaaj a ih hows an evriting weh da-mi fi hihn. 5 Fahn di taim wen ih mi put hihn in chaaj a ih hows an aal weh da-mi fi hihn, Jehoava mi kip di bles di hows a di Eejipshan bikaaz a Joazef, ahn Jehoava blesin mi deh pahn aal weh hihn mi gat eena di hows ahn eena di feel. 6 An oava taim hihn mi lef evriting weh mi bilangz tu hihn anda Joazef kyaa, an ih neva wori bowt notn eksep bowt di food weh ih mi-di eet. Joazef mi groa op fi bee schrapin ahn hansom.”
d Genesis 39:14, 15: “Shee staat tu baal owt tu di servant dehn ahn tel dehn: ‘Luk! Hihn bring dis Heebroo man ya, fi mek ih bring shaym pahn wi. Hihn kohn chrai sleep wid mi, bot Ai staat tu baal owt pahn di tap a mai vais. 15 Den az soon az hihn hyaa Ai mi-di rayz mai vais ahn di skreem, hihn lef ih kloaz saida mi ahn ron owtsaid.ʼ”
e Genesis 39:21-23: “Bot Jehoava mi deh wid Joazef an ih mi kip aan di shoa laayal lov tu ahn, an ih bles ahn mek di cheef aafisa a di prizn pleez wid ahn. 22 Soh di cheef aafisa a di prizn mi put Joazef in chaaj a aala di prizna dehn eena di prizn, ahn hihn mi in chaaj a evriting weh mi-di hapm dehsoh. 23 Di cheef aafisa a di prizn neva wori bowt notn weh Joazef mi-di du deh, bikaaz Jehoava mi deh wid Joazef ahn Jehoava mi mek ih ga sokses eena evriting weh ih mi du.”
f Psalm 40:5: “Yu don du wahn lata tingz, Oa Jehoava mi Gaad, yu wandaful werk ahn weh yu tink bowt wi. Notn ku kompyaa tu yoo; if Ai wuda chrai tel adaz bowt dehn er taak bowt weh yu don du, dehn wuda bee tu moch fi mek Ah tel evribadi!”
