1. Weh ku mek wi feel frayd sohntaim?

 AALA wi feel frayd sohntaim. Af koars, di tingz weh wi laan fahn di Baibl help wi fi noh feel frayd fi ded peepl, deemonz, er weh mait hapm eena di fyoocha. Bot rait now dehn ga lata tingz weh ku mek wi feel frayd, laik waar, vailens, er dizeez. (Look 21:11) Wi mait aalso frayd bikaaz a persikyooshan fahn govament er eevn famili membaz weh noh laik dat wi di serv Jehoava. Som a wi mait wori bowt weda er nat wi wahn ku stay faytful tu Jehoava now an eena di fyoocha.

2. Wai Dayvid mi feel frayd wen ih mi deh da Gat?

² Sohntaim Dayvid mi feel frayd tu. Fi egzampl, wan taim Dayvid mi-di ron fi ih laif bikaaz King Saal mi waahn kil ahn, soh ih gaahn da wahn Filisteen siti weh naym Gat, wehpaat Aykish da-mi king. Noh lang afta dat, Aykish mi fain owt dat Dayvid da-mi wahn schrang wariya. Peepl mi eevn sing wahn sang bowt Dayvid, weh seh dat ih kil “tenz a towznz” a Filisteen soalja. Soh Dayvid mi “geh frayd bad” fi King Aykish. (1 Sam. 21:​10-12) Hihn mi staat tu wori bowt weh di king wuda du ahn. Bot weh mi help Dayvid fi ga korij eevn doa ih mi feel frayd?

3. Akaadn tu Psalm 56:​1-3, 11, weh mi help Dayvid fi stap bee frayd?

³ Eena Psalm 56, wi ku reed bowt how Dayvid mi feel wen ih mi deh da Gat. Dayvid neva hoal bak fahn tel wi how frayd ih mi frayd, bot ih tel wi weh mi help ahn fi stap bee frayd tu. Wen hihn mi frayd, ih mi chros Jehoava. (Reed Psalm 56:​1-3, 11.) Ahn dat da-mi wahn waiz disizhan, bikaaz Jehoava mi help ahn kom op wid wahn smaat plan. Hihn mi ak laik ih mi krayzi! Dat da how Dayvid mi  en op di eskayp, bikaaz King Aykish neva tink dat hihn da-mi wahn daynjaros man.—1 Sam. 21:13–22:1.

4. How wi ku schrentn wi chros eena Jehoava? Yooz di egzampl eena di paragraaf.

⁴ Jos laik Dayvid, wi noh wahn bee frayd if wi chros Jehoava. Weh ku help wi schrentn wi chros eena Jehoava wen wee feel frayd? Tink bowt dis egzampl. Lesgoh seh yu fain owt dat yu ga wahn seeryos siknis. At fers, yu mait feel frayd. Bot yu wahn feel kaam if yu chros yu dakta, noh chroo? Maybi yu ku tink bowt humoch peepl ih don help wid da saym siknis. Maybi hihn lisn tu evriting weh yu ga fi seh, ahn dat mek yu feel laik ih andastan yu. Maybi hihn tel yu ih ku gi yu wahn chreetment weh mi help ada peepl. Saym way soh, wee ku schrentn wi chros eena Jehoava wen wi tink bowt weh aal hihn don du fi wi, weh ih di du fi wi rait now, ahn weh ih wahn du fi wi eena di fyoocha. Dat da weh Dayvid mi du. Az wi stodi som a di tingz weh Dayvid mi seh eena Psalm 56, tink bowt how ih ku schrentn wi chros eena Jehoava ahn help wi fi stay kaam wen wi feel frayd.

WEH JEHOAVA DON DU?

5. Wen Dayvid laif mi eena daynja, weh mi help ahn fi stay kaam? (Psalm 56:​12, 13)

⁵ Wen Dayvid laif mi deh eena daynja, ih neva fokoas pahn di daynja weh hihn mi deh eena. Insted, ih mi foakos pahn di gud tingz weh Jehoava mi du far ahn eena di paas. (Reed Psalm 56:​12, 13.) Dat da weh Dayvid mi du aal ih laif. Fi egzampl, sohntaim Dayvid mi tek taim fi tink bowt di tingz weh Jehoava mek, ahn dehndeh tingz mi rimain Dayvid dat Jehoava powaful ahn dat ih lov eech wan a wi wahn lat. (Ps. 65:​6-9) Dayvid mi aalso tek taim fi meditayt pahn di tingz weh Jehoava mi du fi adaz. (Ps. 31:19; 37:​25, 26) Ahn hihn mi tek taim fi meditayt pahn di tingz weh Jehoava mi du fi hihn. Fahn sins Dayvid da-mi wahn baybi, Jehoava mi help ahn protek ahn. (Ps. 22:​9, 10) Fi shoar, wen Dayvid mi meditayt pan aala dehnya  tingz, ih mi help ahn fi schrentn ih chros eena Jehoava!

6. Wen yu feel frayd, weh wahn help yu fi chros Jehoava?

⁶ Wen yoo feel frayd, aks yuself, ‘Weh Jehoava don du fi mi?ʼ Ih wuda gud fi tink bowt weh Jehoava mek. Fi egzampl, “stap ahn noatis” how Jehoava tek kayr a di berd ahn di flowaz dehn. Eevn doa dehn kyaahn kapi Gaad wayz ahn dehn kyaahn wership ahn, hihn stil tek kayr a dehn. Soh den, yu noh tink Jehoava wahn tek kayr a wee tu? Wen wi meditayt pahn dat, ih help wi fi chros Jehoava eevn moa. (Mach. 6:​25-32) Yoo ku aalso tink bowt weh Jehoava don du fi ih servant dehn. Maybi yu ku stodi di egzampl eena di Baibl bowt som a Jehoava faytful servant. Yu ku reed wahn laif stoari bowt wan a Jehoava servant weh liv eena fi wee taim. a Tek taim fi tink bowt weh aal Jehoava don du fi yoo. Yu ku tink bowt weh aal hihn mi du fi help yu fi get fi noa ahn. (Jan 6:44) How hihn ansa yu pryaaz? (1 Jan 5:14) Ahn how yu benifit evri day fahn fi hihn Son sakrifais?—Ifee. 1:7; Heeb. 4:​14-16.

7. How Danyel egzampl mi help Vanessa fi stap feel frayd?

⁷ Mek wi luk pahn di egzampl a wahn sista weh naym Vanessa, b weh liv da Haiti. Shee mi gaahn chroo wahn sichuwayshan weh mi fraitn ahn. Wahn man weh liv eena di ayrya wehpaat shee liv mi-di teks ahn kaal ahn evri day di chrai kanvins ahn fi ga seks wid ahn. Bot Vanessa mi tel ahn schrayt op, dat mi wahn neva hapm. Wel dat neva stap hihn, an insted hihn geh beks ahn staat tu chretn ahn. Shee seh, “Ai mi feel frayd.” Soh weh Vanessa mi du fi stay kaam? Shee mi du weh ih kud fi protek ihself. Wahn elda mi inkorij ahn fi ripoat it tu di polees. Den shee mi aalso tink bowt weh aal Jehoava du fi protek ih servants eena di paas. Vanessa seh: “Di fers persn Ai mi tink bowt da di prafit Danyel. Dehn mi chroa hihn eena wahn deep hoal wid sohn laiyan weh mi hongri. Hihn neva du notn rang fi mek dehn du ahn dat. Soh Jehoava mi tek gud kayr a Danyel, an ih mi shet di laiyan dehn mowt soh dat dehn noh hert ahn. Soh Ai aks Jehoava fi mek di man stap tink bowt mi ahn fi fiks di prablem, sins Ah kudn du notn moa bowt di sichuwayshan. Afta dat, Ai neva feel frayd nohmoh.”—Dan. 6:​12-22.

WEH JEHOAVA DI DU NOW?

8. Eevn doa Dayvid laif mi deh eena daynja, weh hihn mi shoar a? (Psalm 56:8)

⁸ Wen Dayvid mi deh da Gat, ih laif mi eena daynja. Bot ih neva tink bowt tingz weh mi wahn mek ih feel frayd. Insted, ih mi foakos pahn weh Jehoava mi-di du far ahn eena da sichuwayshan. Eevn doa Saal mi-di chrai kil Dayvid, ih mi get weh. Dayvid kuda mi tel dat Jehoava mi-di gaid ahn protek ahn, an ih mi andastan how ih feel. (Reed Psalm 56:8.) Janatan ahn Hai Prees Ahimelek da-mi ih gud frenz weh mi aalwayz dehdeh far ahn. (1 Sam. 20:​41, 42; 21:​6, 8, 9) Soh Dayvid mi kanvins dat Jehoava mi noa weh ih mi-di goh chroo ahn how dat mi mek ih feel.

9. Weh Jehoava noa bowt eech wan a wi?

⁹ Wen wee di goh chroo wahn chraiyal weh mek wi feel frayd, wi need fi memba dat Jehoava noatis weh wi di goh chroo  ahn hihn noa how wi feel. Fi egzampl, Jehoava neva onli si how di Eejipshan dehn mi-di chreet di Izrelaits bad, bot ih mi noatis “humoch [dehn] mi-di sofa.” (Eks. 3:7) Wan a Dayvid sang seh dat Jehoava mi si fi hihn “sofarin” ahn noa weh aal mi-di “schres” ahn. (Ps. 31:7) An eevn wen di Izrelaits mi-di sofa sayka dehn oan foolishnis, Jehoava “mi feel lata payn.” (Isa. 63:9) Wen wee feel frayd, wi noa dat Jehoava andastan how wi feel an ih redi fi help.

10. How yoo noa dat Jehoava si weh yu di goh chroo ahn dat hihn wahn help yu?

¹⁰ Sohntaim wen wi di goh chroo wahn chraiyal, wi mait wanda how Jehoava di help wi. If yoo eva feel soh, aks Jehoava fi help yu si how ih di help yu. (2 Ki. 6:​15-17) Den yu ku aks yuself kweschanz laik, ‘Ah ku tink bowt wahn taak, wahn koment, wahn poblikayshan, wahn veedyo, er wahn orijinal sang weh inkorij mi? Sohnbadi eva inkorij mi er shayr wahn inkorijin skripcha wid mi?ʼ Sohntaim wi mait ferget humoch wi bradaz ahn sistaz lov wi ahn humoch di spirichwal food weh wi get inkorij wi. Bot dehnya da preshos gif fahn Jehoava, ahn dehn shoa dat hihn reeli kay bowt wi. (Isa. 49:​14-16; 65:13; Maak 10:​29, 30) Soh dehnya da gud reezn wai wi ku chros Jehoava.

11. Weh mi help Sista Aida fi stap feel frayd?

¹¹ Sista Aida, weh liv da Senegal, memba how Jehoava mi help ahn wen ih mi-di goh chroo wahn rof taim. Fi shee payrents mi ekspek shee fi mek inof moni fi tek kayr a aala dehn, laik how shee da-mi di oaldis owta aala ih breda ahn sista dehn. Bot laytaraan, shee mi chooz fi liv wahn simpl laif fi mek ih ku painyaa, soh ih neva mi-di mek moch moni. Sayka dat, ih famili staat tu kritisaiz ahn an chreet ahn bad. Shee seh: “Ai mi frayd Ah mi wahn kyaahn tek kayr a mi ma ahn pa ahn dat evribadi mi wahn taak bad bowt mi. Ah mi eevn blaym Jehoava fi how bad tingz mi get.” Noh lang afta dat, shee mi lisn tu wahn taak da wahn meetin. Ih seh: “Di speeka mi rimain mi dat Jehoava noa how hert Ah feel. Pahn tap a dat, di eldaz ahn sohn ada  bradaz ahn sistaz mi inkorij mi, ahn lee bit bai lee bit Ah mi staat feel laik Jehoava lov mi agen. Ah mi staat tu chros dat Jehoava mi wahn help mi eevn moa wen Ah pray tu ahn, an Ah mi feel pees wen Ah mi si how Jehoava ansa mi pryaaz.” Laytaraan, Aida mi fain wahn jab weh help ahn fi sopoat ihself wail ih painyaa an eevn fi help tek kayr a ih famili tu. Aida seh: “Now moa dan eva bifoa, Ah chros Jehoava wid mi hoal haat. Lata taim wen Ah pray, Ah eevn feel laik Ah ferget weh Ah mi-di wori bowt.”

WEH JEHOAVA WAHN DU?

12. Bays pahn Psalm 56:​9, weh Dayvid mi shoar a?

¹² Reed Psalm 56:9. Dis vers shoa wahn nada reezn wai Dayvid neva feel frayd eevn doa ih laif mi stil deh eena daynja. Hihn mi tek taim fi tink bowt weh Jehoava mi wahn du far ahn. Fi egzampl, hihn mi noa dat Jehoava mi wahn reskyu ahn bikaaz Jehoava mi pramis dat hihn wahn bee di neks king a Izrel. (1 Sam. 16:​1, 13) Hihn mi shoar dat Jehoava mi wahn du weh ih pramis fi du.

13. Wai wi ku chros Jehoava?

¹³ Weh Jehoava pramis yoo? Wi noa dat Jehoava noh wahn protek wi fahn aala wi chraiyalz, bot wi ku bee shoar dat eena Paradais hihn wahn geh rid a evriting weh mek wi sofa. c (Isa. 25:​7-9) Hihn moa dan powaful inof fi geh rid a siknis, rayz peepl bak fahn di ded, ahn dischrai Saytan ahn wikid peepl.—1 Jan 4:4.

14. Weh wi fi tek taim fi tink bowt?

¹⁴ Wen yoo feel frayd, tink bowt evriting weh Jehoava wahn du fi yoo eena di fyoocha. Tink bowt how yu wahn feel wen hihn dischrai Saytan ahn wikid peepl, ahn wen di hoal ert ful a raichos peepl. Pahn tap a dat, evri day wi wahn di geh perfek lee bit bai lee bit. Eena di 2014 reejinal kanvenshan, dehn mi ga wahn demonschrayshan weh shoa how wi ku imajin wiself eena Paradais. Wahn pa mi taak bowt 2 Timoti 3:​1-5 wid ih famili, ahn hihn mi eksplayn dat eena Paradais dehndeh vers wahn seh sohnting difrent fahn weh dehn seh now. Dis da weh dehn wuda seh: “Eena di nyoo werl, wi wahn ga di hapiyis taim a wi laif. Peepl wahn lov wan anada ahn lov spirichwal tingz. Dehn noh wahn boas ahn tink dat dehn beta dan ada peepl. Dehn noh wahn insolt peepl, ahn dehn wahn lisn tu weh dehn ma ahn pa tel dehn fi du. Dehn wahn bee tankful ahn dehn wahn lov Gaad wayz. Dehn wahn shoa kansaan fi ada peepl ahn dehn wahn kain tu evribadi. Dehn wahn aalwayz taak gud bowt wan anada ahn valyu wan anada laif, ahn dehn wahn ku kanchroal dehnself. Dehn wahn bee kaam, ahn dehn wahn lov evriting weh gud. Evribadi wahn ku chros dehn. Dehn wahn bee hombl ahn ga wahn jentl haat. Dehn wahn lov Gaad insteda lov plezha. Dehn wahn alow Gaad fi gaid dehn laif. Dehndeh da di kaina peepl yu fi stik kloas tu.” Yoo ahn yu famili er ada bradaz ahn sistaz eva taak bowt weh laif wahn bee laik eena di nyoo werl?

15. Weh mi help Sista Tanja fi stap feel frayd?

¹⁵ Tanja, wahn sista fahn di naat a Macedonia, mi tink bowt aal di tingz weh Jehoava wahn du fi shee eena di fyoocha, ahn dat mi help ahn fi noh feel frayd nohmoh. Fi shee ma ahn pa mi hayt wen shee staat stodi di Baibl. Shee seh: “Som a di tingz weh Ai mi frayd fa mi did hapm. Mai ma mi beet mi afta Ah kohn bak fahn evri meetin. Ahn shee ahn mai pa mi eevn chretn fi kil mi if Ai eva geh baptaiz ahn  ton wan a Jehoava Witnisiz.” Fi shee payrents neva don til dehn kik ahn owta di hows. Bot weh Tanja mi du? Shee seh: “Ah tink bowt how hapi Ah wahn bee fareva eena Paradais bikaaz Ah mi stay laayal. Ah mi aalso tink bowt how Jehoava noh wahn mek Ai rimemba aal di bad tingz weh hapm tu mee eena dis sistem. Ah tink how ih wahn bles mi fi eniting weh Ah mi looz.” Tanja mi stay laayal tu Jehoava, ahn Jehoava mi help ahn fi fain wahn plays fi liv. Now, Tanja marid tu wahn faytful brada, ahn too a dehn hapi di serv Jehoava ful taim.

SCHRENTN YU CHROS EENA JEHOAVA FAHN NOW

16. Wen wi si di prafesi da Look 21:​26-28 kohn chroo, weh wahn help wi fi stan op schrang ahn ga korij?

¹⁶ Joorin di grayt chribyulayshan, “peepl wahn faynt weh kaaz dehn wahn soh fraitn.” Bot Jehoava peepl wahn stan op schrang wid korij. (Reed Look 21:​26-28.) Wai wee noh wahn feel frayd? Bikaaz wee wahn chros eena Jehoava. Tanja, di sista weh wi menshan erliya, seh dat di tingz weh shee gaahn chroo eena di paas di help ahn fi bee redi fi ada chraiyalz weh shee fays eena laif. Ih seh: “Ai laan dat dehn noh ga no sichuwayshan weh Jehoava kyaahn help wi wid. Sohntaim ih mait luk laik adaz deh eena kanchroal, bot Jehoava schranga dan dehn. An eevn doa ih mait feel laik wahn chraiyal tu haad fi deel wid, ih wahn kohn tu wahn en.”

17. How wi 2024 yaateks ku help wi? (Koment pahn di picha pahn di kova.)

¹⁷ Ih naamal fi feel frayd. Bot jos laik Dayvid, wi kyaahn mek fyaa kanchroal wi. Dayvid pryaa tu Jehoava da wi 2024 yaateks. Hihn mi seh: “Wen Ah feel frayd, da yoo Ah put mi chros eena.” (Ps. 56:3) Wahn ekspert weh stodi di Baibl seh: “Dayvid neva kip di tink bowt tingz weh mek hihn feel frayd. Insted, hihn mi pen pan ih Sayvya, di wan weh mi wahn reskyu ahn.” Soh tink bowt di yaateks wen yoo feel frayd. Tek taim fi tink bowt aal di tingz weh Jehoava don du fi yu, di tingz hihn di du fi yu rait now, ahn di tingz ih wahn du eena di fyoocha. If yu du dat, den jos laik Dayvid, yu wahn ku seh: “Da yoo Ah put mi chros eena; Ah noh feel frayd.”—Ps. 56:4.