1. How di Baibl diskraib Jehoava?

 YOO eva chrai imajin weh Jehoava luk laik er weh kaina persn hihn? Wen yu pray tu ahn, weh yoo tink bowt? Eevn doa wi kyaahn si Jehoava, di Baibl diskraib ahn eena lata difrent wayz. Fi egzampl, ih seh dat Jehoava da laik “di son weh shain pahn wi ahn laik wahn sheel weh protek wi” ahn da laik “wahn faiya weh dischrai evriting.” (Ps. 84:11; Heeb. 12:29) Izeekyel mi si Jehoava eena wahn vizhan, an ih seh dat da laik if hihn shain laik metal, dat ih sidong pahn wahn safaiya chroan, an aal rong ahn mi brait laik wahn raynboa. (Ezek. 1:​26-28) Wi mait fain it reeli amayzin wen wi reed how di Baibl diskraib Jehoava, er ih ku eevn mek wi feel laik wi noh gud inof fi bee fi hihn fren.

2. Weh ku mek it haad fi som a wi jraa kloas tu Jehoava?

² Sins wi kyaahn si Jehoava, wi mait fain it haad fi bileev dat ih lov wi. Er som peepl tink dat Jehoava kuda neva lov dehn bikaaz a di tingz weh dehn gaahn chroo eena dehn laif. Maybi fi dehn pa neva shoa dehn lov. Jehoava andastan dehndeh feelinz, an ih noa how dehn afek wi. Soh fi help wi, Jehoava yooz fi hihn Werd fi mek wi noa weh kaina persn hihn.

3. Wai wi need fi laan bowt Jehoava lov?

³ Lov da di bes werd fi diskraib Jehoava. Di Baibl seh dat “Gaad da lov.” (1 Jan 4:8) Evriting weh hihn du, hihn du bikaaz a lov. Gaad lov soh deep ahn soh schrang dat ih shoa lov eevn tu peepl weh noh lov hihn. (Mach. 5:​44, 45) Eena dis aatikl, wi wahn laan moa bowt Jehoava ahn fi hihn lov. Di moa wi laan bowt wi Gaad, di moa wi wahn lov ahn.

JEHOAVA LOV WI WAHN LAT

4. How Jehoava lov mek yoo feel? (Koment pahn di picha.)

⁴ “Di Faada lov unu.” (Jan. 16:27) Eena di Baibl, hihn kompyaa ihself tu wahn ma. (Isa. 66:​12, 13) Jos imajin humoch wahn ma lov ih baybi. Ih tek gud kayr a ahn, ih hoal  ahn pan ih lap, ahn taak tu ahn eena wahn kain ahn lovin way. Wen ih baybi krai er deh eena payn, shee mek shoar dat ih geh weh ih need. Da rait soh wen wee deh eena payn, wee ku bee shoar dat Jehoava lov wi. Dayvid mi seh: “Wen Ah feel laik mi woriz da tu moch fi mek Ah deel wid, yu komfert mi ahn kaam mi soal.”—Ps. 94:19.

5. Weh Jehoava laayal lov meen tu yoo?

⁵ Jehoava laayal. (Ps. 103:8) Hihn noh stap lov wi wen wi du sohnting rang. Di Izrelait dehn mi disobay Jehoava oava ahn oava agen. Bot wen dehn mi shoa dat dehn mi sari fi weh dehn du ahn dehn stap du it, Jehoava mi rimain dehn humoch ih lov dehn. Hihn mi tel dehn: “Bikaaz yu preshos tu mee, Ai aana yu, an Ai lov yu.” (Isa. 43:​4, 5) Jehoava ga di saym kaina lov fi wee tudeh, soh wi ku chros dat hihn wahn aalwayz lov wi. Eevn if wee mi mek sohn seeryos mistayk eena di paas, Jehoava noh wahn abandan wi. Wen wi reeli sari fi weh wi mi du, chaynj wi wayz, ahn goh bak tu Jehoava, hihn wahn fergiv wi “eena wahn big way.” (Isa. 55:7) Di Baibl seh dat wen Jehoava fergiv wi, hihn rifresh wi ahn komfert wi.—Aks 3:19.

6. Weh Zechariah 2:8 tel wi bowt Jehoava?

⁶ Reed Zechariah 2:8. Di aiy da wahn delikayt ahn preshos paat a wi badi. Soh wen Jehoava kompyaa wee tu di senta a fi hihn aiy, da laik if ih di seh, ‘Enibadi weh hert mai peepl di hert sohnting weh preshos tu mee.ʼ Bikaaz Jehoava lov wi, hihn andastan wi feelinz an ih redi fi protek wi. Hihn feel hert wen wee feel hert. Soh wi ku bee shoar dat ih wahn ansa wi wen wi aks ahn fi ‘protek wi laik di senta a ih aiy.ʼ—Ps. 17:8.

7. Wai ih ku bee haad fi bileev dat Jehoava lov wi?

⁷ Jehoava waahn yu bee shoar dat hihn lov yoo. Bot hihn noa dat bikaaz a di tingz weh wi gaahn chroo eena wi laif, wi mait tink dat hihn kuda neva lov wi. Er wi mait di goh chroo sohnting rait now weh mek wi kweschan if Jehoava reeli lov wi. Weh wahn help wi fi bileev dat Jehoava lov wi? Mek wi si how Jehoava shoa dat ih lov Jeezas, di anointid bradaz ahn sistaz, an aala wi.

 HOW JEHOAVA SHOA IH LOV

8. Wai Jeezas mi shoar dat ih Pa lov ahn?

⁸ Jehoava ahn Jeezas spen bilyanz a yaaz tugeda da hevn. Dehn ga di langis rilayshanship eva. Soh dehn reeli kloas ahn dehn ga schrang lov fi eech ada. Machyu 17:5 shoa wi how Jehoava feel bowt Jeezas. Jehoava neva onli seh, “Di wan weh Ah pleez wid.” Insted, hihn mi waahn wi noa humoch ih lov Jeezas, soh ih aalso seh, “Mai Son, di wan weh Ah onli lov.” Jehoava mi prowd a Jeezas, espeshali bikaaz ih mi wilin fi giv op ih laif. (Ifee. 1:7) Ahn Jeezas neva ga no dowt dat ih Pa, Jehoava, mi lov ahn. Hihn mi shoar a da lov! Oava ahn oava, hihn mi seh dat ih Pa lov ahn.—Jan 3:35; 10:17; 17:24.

9. How di Baibl diskraib Jehoava lov fi anointid bradaz ahn sistaz? (Roamanz 5:5)

⁹ Jehoava aalso shoa ih lov fi di anointid bradaz ahn sistaz. (Reed Roamanz 5:5) Bays pahn di orijinal langwij fi dis vers, wahn Baibl dikshineri diskraib Gaad lov laik if ih di “poar dong pahn wi laik wahn schreem.” Dat reeli shoa wi humoch Jehoava lov di anointid bradaz ahn sistaz, ahn dehn noa dat Gaad lov dehn. (Jood 1) Di apasl Jan mi shoa how anointid Kristyanz feel wen ih rait: “Yu si humoch di Faada lov wi? Hihn kaal wi fi hihn chiljren, ahn wee da fi hihn chiljren fi chroo.” (1 Jan 3:1) Yu tink Jehoava lov onli di anointid bradaz ahn sistaz? Af koars nat! Jehoava lov aala wi.

10. Wat da di bes way Jehoava shoa humoch ih lov yoo?

¹⁰ Wat da di bes way Jehoava shoa wi humoch ih lov wi? Hihn gi wi di ransom. Wen Jehoava du dat, ih shoa moa lov dan weh enibadi els eva shoa! (Jan 3:16; Roam. 5:8) Jehoava mi giv op ih preshos Son ahn mek ih ded fi aal hyoomanz, soh dat wi ku geh fergivnis fahn wi sin dehn ahn soh dat wee ku bee fi Hihn fren. (1 Jan 4:10) Di moa wi sidong ahn tink bowt di hai prais weh Jehoava ahn Jeezas mi pay, di moa wi wahn andastan humoch dehn lov eech an evri wan a wi. (Gal. 2:20) Jehoava neva gi wi di ransom jos bikaaz hihn mi need fi proov dat hihn da wahn fyaa Gaad. Hihn gi wi da gif bikaaz ih lov wi. Jehoava mi proov ih lov fi wi wen ih alow ih moas preshos Son, Jeezas, fi sofa ahn ded fi wi.

11. Weh wi laan fahn Jeremiah 31:3?

¹¹ Ih klyaa fi si dat Jehoava noh kip ih feelinz tu ihself. Hihn noh jos feel lov fi wi, ih tel wi humoch ih lov wi. (Reed Jeremiah 31:3.) a Jehoava jraa wi tu ahn bikaaz ih lov wi. (Kompyaa Deuteronomy 7:​7, 8.) Notn ahn nobadi ku separayt wi fahn da lov. (Roam. 8:​38, 39) How dat mek yoo feel? Reed Psalm 23, ahn si how Dayvid mi feel bowt Jehoava lov ahn how ih ku mek yoo feel.

HOW JEHOAVA LOV MEK YOO FEEL?

12. Weh wi laan fahn Psalm 23?

¹² Reed Psalm 23:​1-6. b Psalm 23 da wahn sang weh shoa dat Dayvid mi reeli bileev eena Jehoava lov ahn kyaa. Eena  dis sang, ih taak bowt di schrang rilayshanship weh hihn mi gat wid fi hihn Shepad, Jehoava. Dayvid mi feel sayf wen ih mek Jehoava gaid ahn, an ih mi pen pahn Jehoava fi evriting. Dayvid mi noa dat Jehoava mi wahn shoa hihn lov evri singl day. Bot da how hihn kuda mi bee soh shoar a dat?

13. Wai Dayvid mi shoar dat Jehoava mi wahn tek kayr a ahn?

¹³ “Ah ga evriting weh Ah need.” Bikaaz Jehoava mi aalwayz provaid fi Dayvid, hihn kuda mi feel humoch Jehoava kay bowt ahn. Ahn Dayvid mi noa dat Jehoava mi hapi wid ahn, an dat Hihn da-mi ih fren. Dat da wai hihn mi noa fi shoar dat noh mata weh hapm eena di fyoocha, Jehoava mi wahn kantinyu fi giv ahn evriting weh ih need. Bikaaz Dayvid mi chros dat Jehoava lov ahn wahn lat, dat mi help ahn fi deel wid eni woriz weh hihn mi gat. Dat mi aalso help ahn fi bee hapi ahn kantentid.—Ps. 16:11.

14. How Jehoava shoa dat ih kay bowt wi?

¹⁴ Jehoava tek kayr a wi, espeshali wen bad tingz hapm eena wi laif. Claire, c wahn sista weh serv da Betel fi oava 20 yaaz, neva noa weh fi du wen ih famili mi-di goh chroo difrent prablemz wan afta di ada. Fi shee pa mi kech wahn bad schroak, wan a fi shee sista mi geh disfeloship, ahn fi shee famili mi looz dehn lee bizniz ahn dehn hows. How Jehoava mi shoa dehn dat ih lov dehn wahn lat? Claire seh: “Evri day Jehoava mi mek shoar dat mi famili ga weh dehn need. An  evri singl taim, hihn mi provaid moa dan weh Ah kuda eva imajin! Ai aalwayz tink bak tu dehndeh taimz wen Ah mi geh fi si ahn feel Jehoava lov, ahn dehn soh preshos tu mi. Dehndeh memriz help mi fi noh giv op wen Ah di goh chroo chraiyalz.”

15. Wai Dayvid mi feel rifresh? (Koment pahn di picha.)

¹⁵ “Hihn rifresh mi.”  Sohntaim, Dayvid mi feel soh schres owt sayka aala di prablemz ahn chraiyalz weh hihn mi-di goh chroo. (Ps. 18:​4-6) Bot eevn soh, di waam lov ahn kyaa weh Jehoava mi shoa ahn mi rifresh ahn. Jehoava mi kehr ih taiyad lee fren tu sohn “green green paascha” ahn tu “wahn schreem a waata fi mek [ih] res.” Ahn bikaaz a dat, Dayvid mi get bak ih schrent, ih neva giv op, an ih mi kantinyu fi serv Jehoava wid jai.—Ps. 18:​28-32.

16. How Jehoava lov schrentn yu?

¹⁶ Saym way, eevn wen wi goh chroo prablemz ahn chraiyalz, “da sayka Jehoava laayal lov wee stil deh ya.” (Lam. 3:22; Kol. 1:11) Tek, fi egzampl, weh mi hapm tu Rachel. Shee mi feel hert ahn dipres wen ih hozban mi lef shee ahn Jehoava joorin di COVID-19 pandemik. How Jehoava mi help shee? Shee seh: “Jehoava mi mek shoar dat Ah mi geh wahn lata lov. Hihn mi gi mi frenz weh mi spen taim wid mi, bring food fi mi, sen mi inkorijin skripchaz ahn mesij, smail wid mi, ahn rimain mi dat Jehoava mi-di tek kayr a mi. Ai aalwayz pray tu Jehoava ahn tel ahn tanks fi gi mi wahn big famili weh lov mi.”

17. Wai Dayvid neva frayd fi notn?

¹⁷ “Ah noh frayd fi notn, bikaaz yoo deh wid mi.” Dayvid mi aalwayz deh eena daynja, ahn hihn mi ga lata powaful enimiz. Bot Jehoava lov mi mek hihn feel sayf. Dayvid kuda mi feel dat Jehoava mi deh wid ahn eena evri sichuwayshan, ahn dat mi schrentn ih fayt eena Jehoava. Dat da wai hihn kuda mi sing: “[Jehoava] reskyu mi fahn aala mi chrobl.” (Ps. 34:4) Eevn doa Dayvid mi feel frayd, hihn kuda mi get oava ih fyaa bikaaz hihn mi noa dat Jehoava lov ahn.

18. How Jehoava lov ku schrentn yu wen yu feel frayd?

¹⁸ If wi noa dat Jehoava lov wi, how dat  wahn help wi wen wi goh chroo haad taimz? Wahn painyaa weh naym Susi tel wi how shee an ih hozban mi feel wen dehn son kil ihself. Shee seh: “Wen sohnting soh sad hapm eena yu laif, ih afek yu wahn lat, ahn yu frayd dat moa bad tingz wahn hapm. Bot Jehoava lov mek wi feel sayf, laik hihn di protek wi.” Rachel, weh wi mi taak bowt erliya, seh: “Wahn nait wen Ah mi-di feel reeli sad, di wori ahn feel frayd, Ah krai haad ahn pray tu Jehoava. Rait away, Ah mi feel laik ih komfert mi ahn kaam mi dong, jos laik how wahn mami du fi ih lee baybi, an Ai jrap asleep. Ah wahn neva ferget da taim.” Wahn elda weh naym Tasos mi spen foa yaaz da jayl bikaaz ih mi rifyooz fi jain di aami. How Jehoava mi tek kayr a ahn, an shoa ahn dat ih lov ahn? Hihn seh: “Jehoava mi gi mi moa dan weh Ah need. Dis mi mek Ah chros ahn eevn moa. Ahn Jehoava mi yooz ih hoali spirit fi gi mi jai, eevn doa jayl da-mi wahn veri dipresin plays. Dis mi help mi fi si dat di moa Ai chros eena Jehoava, di moa Ah wuda feel humoch hihn lov mi. Soh Ah mi staat serv az wahn regyula painyaa wail Ah mi deh da jayl.”

JRAA KLOAS TU JEHOAVA —YU LOVIN GAAD

19. (a) How wi wahn pray if wi noa dat Gaad lov wi? (b) Weh yoo laik di moas bowt Jehoava lov? (Si di baks weh naym “ Sohn Skripchaz Weh Ku Help Wi Feel Jehoava Waam Lov.”)

¹⁹ Di ekspeeryens dehn weh wi reed bowt eena dis aatikl proov dat Jehoava, “di Gaad a lov,” deh wid wi! (2 Kor. 13:11) Hihn kay bowt eech wan a wi, ahn wee ku bee shoar dat “Jehoava laayal lov wahn protek enibadi weh chros eena ahn.” (Ps. 32:10) Di moa wi meditayt pahn how Jehoava shoa ih lov fi wi, di moa wi wahn si humoch ih kay bowt wi ahn wi wahn feel kloasa tu ahn. Wee ku pray tu Jehoava widowt feel frayd ahn tel ahn humoch wi need ih lov. Wee ku tel Jehoava eniting weh di bada wi, bikaaz wi ku bee shoar dat ih andastan wi an ih waahn help wi.—Ps. 145:​18, 19.

20. How Jehoava lov jraa wi kloasa tu ahn?

²⁰ Jos laik how wahn faiya ku mek wi feel waam pahn wahn koal day, da rait soh Jehoava lov ku gi wi komfert. Eevn doa Jehoava lov powaful, ih aalso waam. Soh bee hapi weneva yu feel Jehoava lov. Ahn den yu wahn ku rispan tu Jehoava lov ahn seh: “Ai lov Jehoava”!—Ps. 116:1.