1-2. Giv egzamplz a som a di sichuwayshanz weh Jehoava faytful servants mait goh chroo.

 WEN sohnting bad hapm, wi hoal laif ku chaynj sodn-wan. Fi egzampl, wahn brada weh naym Luis a mi fain owt dat ih ga kyansa, ahn di dakta mi tel ahn dat ih onli mi ga wahn fyoo monts fi liv. Monika an ih hozban mi bizi di serv Jehoava tugeda, an ih hozban mi eevn di serv az wahn elda. Bot wan day, Monika mi fain owt dat ih hozban mi-di liv wahn dobl laif fi yaaz. Wahn singl sista weh naym Olivia mi haftu lef ih hows bikaaz wahn bad harikayn mi-di kohn. Afta di harikayn, ih hows mi gaan. Dehnya chree egzampl shoa dat wen terabl tingz hapm sodn-wan, wi hoal laif ku ton opsaid dong. Yoo eva gaahn chroo sohnting terabl weh chaynj yu hoal laif sodn-wan?

² Aala Jehoava faytful servants goh chroo prablemz ahn geh sik, jos laik evribadi els. Wi mait aalso haftu fays persikyooshan fahn peepl weh hayt wi kaaz wi serv Jehoava. Af koars, wi noa dat Jehoava noh wahn stap dehndeh tingz fahn hapm tu wi, bot ih doo pramis fi help wi. (Isa. 41:10) Eevn wen wi di goh chroo sohn reeli haad sichuwayshan, Jehoava ku help wi fi bee hapi, mek gud disizhanz, ahn stay laayal tu ahn. Eena dis aatikl, wi wahn taak bowt foa wayz how Jehoava help wi wen wi di goh chroo tof sichuwayshanz. Wi wahn si weh wee need fi du, tu, fi mek wi ku benifit fahn di help weh Jehoava gi wi.

JEHOAVA WAHN KIP YU SAYF

3. How wahn tof sichuwayshan eena wi laif ku afek wi?

³ Di prablem. Wen wi di goh chroo wahn tof sichuwayshan, ih ku bee haad fi tink schrayt ahn mek disizhanz.  Wai? Bikaaz wi mait feel hert, ahn wi mait wori bowt aal kaina ting. Aala dat ku mek wi feel laas ahn kanfyooz. Wi ku feel soh bad dat wi jos noh noa weh fi du. Noatis how di too sistaz weh wi taak bowt erliya mi feel wen dehn mi-di goh chroo dehn chraiyalz. Olivia seh: “Afta di harikayn mi dischrai mi hows, Ah mi feel laas, an Ah neva noa weh fi du.” Dis da weh Monika seh wen ih fain owt dat ih hozban mi cheet pan ahn: “Ah neva jos feel disapointid. Ah mi feel laik ih brok mi haat. Eevn di evriday tingz mi haad fi mek Ah du. Ah neva tink dat eniting laik dis kuda mi eva hapm tu mi.” How Jehoava pramis fi help wi wen wi feel laik wi kyaahn tek it nohmoh?

4. Bays pahn Filipiyanz 4:​6, 7, how Jehoava pramis fi help wi?

⁴ Weh Jehoava pramis fi du fi wi? Di Baibl seh dat ‘Gaad wahn gi wi pees.ʼ (Reed Filipiyanz 4:​6, 7.) Di pees weh Gaad gi wi da wahn kaam feelin weh eez di payn eena wi haat ahn help wi noh fi wori tu moch. Wi onli feel da kaina pees bikaaz wi da kloas fren wid Jehoava. Dis da wahn kaina pees “weh peepl kyaahn andastan.” Ih moa wandaful dan weh wi kuda eva imajin! Yoo eva fain dat afta yu don poar owt yu haat tu Jehoava yu feel kaam kaam? Dis noh fi sopraiz wi, bikaaz da Gaad gi wi da kaina pees.

5. How di pees weh Gaad gi wi ku protek wi main ahn haat?

⁵ Da saym skripcha seh dat dis pees fahn Gaad wahn ‘protek wi haat ahn main.ʼ Di Greek werd weh chranslayt az “protek” da wahn werd weh dehn yoostu yooz fi taak bowt how soaljaz wuda protek wahn siti fahn atak. Soh di peepl eena da siti kuda mi sleep gud, kaaz dehn mi noa dat di soaljaz mi-di du dehn jab fi protek di siti ahn kip dehn sayf. Saym way soh, wen di pees weh Gaad gi wi protek wi haat ahn main, ih mek wi feel kaam ahn sayf. (Ps. 4:8) Jos laik Hana, wi ku ga pees ahn stay kaam eevn if wi sichuwayshan noh chaynj rait away. (1 Sam. 1:​16-18) Ahn wen wi feel kaam, ih wahn eeziya fi tink schrayt ahn mek gud disizhanz.

6. How di pees weh Gaad gi wi ku help wi? (Koment pahn di picha.)

⁶ Weh wee need fi du? Wen wi feel frayd ahn wi di wori tu moch, wi need fi aks Jehoava fi protek wi. Kip di pray til yu feel di pees weh onli Jehoava ku gi yu. (Look 11:9; 1 Tes. 5:17) Luis, weh wi mi menshan erliya, an ih waif, Ana, mi fain owt dat hihn mi onli ga wahn fyoo monts fi liv. Dis da how hihn an ih waif mi deel wid  di sichuwayshan. Hihn seh: “Wen yu di goh chroo wahn sichuwayshan laik dis, ih haad fi mek disizhanz bowt how fi tek kayr a yu helt ahn bowt ada tingz. Bot wi mi aybl fi ga pees ahn stay kaam joorin dis haad taim bikaaz wi mi aalwayz kip di pray tu Jehoava.” Luis an ih waif seh dat dehn mi kip di bayg Jehoava fi gi dehn pees a main, wahn kaam haat, ahn di wizdom fi mek gud disizhanz. Sayka dat, dehn kuda mi akchwali feel how Jehoava mi help dehn. If yoo di goh chroo wahn tof sichuwayshan, den pray aal di taim, ahn Jehoava wahn gi yu fi hihn pees weh wahn protek yu haat ahn main.—Roam. 12:12.

JEHOAVA WAHN PUT YU PAHN WAHN SALID FONGDAYSHAN

7. How wee mait feel wen wi di goh chroo wahn tof sichuwayshan?

⁷ Di prablem. Wen wi di goh chroo wahn haad taim eena laif, ih mait mek wi feel laik wi di goh krayzi. Wi mait kyaahn tink schrayt, feel how wi naamali feel, er du tingz di way wi naamali wuda du dehn. Wi mait feel laik wahn ship owt da see eena di midl a wahn staam. Jos laik how di staam ku fling di ship aal bowt, wi mait feel laik wi oan feelinz di fling wi bowt fahn said tu said. Ana, weh wi mi taak bowt erliya, mi feel aal kaina way afta ih hozban mi ded. Shee seh: “Wen da feelin a emtinis setl een, da den Ah staat feel sari fi miself. An Ah wuda geh beks dat ih noh deh ya wid mi.” Weneva Ana mi haftu mek disizhanz bowt tingz weh Luis yoostu tek kayr a, shee wuda feel loanli ahn foschraytid. Ahn sohntaim, dat mi mek shee feel laik da ship eena di staam. How Jehoava ku help wi wen wi feel laik wi kyaahn tek it nohmoh bikaaz wi di jrongdid eena wi oan feelinz?

8. Akaadn tu 1 Peeta 5:​10, weh Jehoava wahn du fi wi?

⁸ Weh Jehoava pramis fi du fi wi? Jehoava pramis fi put wi pahn wahn salid fongdayshan. (Reed 1 Peeta 5:10.) Soh eevn if wi raak fahn said tu said laik wahn ship eena wahn staam, ih noh wahn mek wi sink. Joorin wahn staam, wahn ship mait raak laik if ih wahn ton oava. Bot fi mek dat noh hapm, di ship ga sohn speshal fin pahn eech said anda di waata. Eevn doa ih mait bee wahn rof raid, di peepl pahn di ship wahn bee sayf. Bot dehndeh speshal fin werk beta wen di ship di moov faawod. Saym way soh, Jehoava wahn help wi fi bee schrang ahn noh giv op if wi kantinyu fi bee faytful tu hihn eevn joorin rof taimz.

9. How wi risaach toolz ku help wi fi kanchroal wi feelinz? (Koment pahn di picha.)

 ⁹ Weh wee need fi du? Wen yu feel laik yu kyaahn tek it nohmoh sayka weh yu di goh chroo, chrai yu bes fi kip op wid yu spirichwal skejul. Af koars, wi mait kyaahn du az moch az wi mi yoostu. Bot memba dat Jehoava reeznabl ahn noh ekspek wi fi du moa dan weh wi kud. (Kompyaa Look 21:​1-4.) Az paat a wi spirichwal skejul, wi aalso waahn mek shoar wi du persnal stodi ahn tek taim fi tink gud bowt weh wi stodi. Wai? Bikaaz Jehoava waahn help wi fi stay kaam ahn noh mek wi feelinz kanchroal wi wen wi di goh chroo wahn tof sichuwayshan. Hihn yooz ih aaganaizayshan fi du dat. Ih gi wi wahn lata aatikl ahn veedyo weh ku help wi wen wi di goh chroo haad taimz. Fi help wi fain weh wi need, wi ku yooz di risaach toolz weh wi gat eena wi langwij, laik di JW Library^® app, Watch Tower Publications Index, ahn di Risaach Gaid fi Jehoava Witnisiz. Monika, weh wi mi taak bowt erliya, seh dat enitaim shee wuda staat feel di payn di groa eena ih haat, ih wuda du sohn risaach. Fi egzampl, dipendin pahn how ih feel, ih wuda du risaach pahn “anga,” “wen sohnbadi bichray yu,” er “laayalti.” Den shee wuda reed di infamayshan weh ih fain til ih feel beta. Shee seh: “Eevn doa Ah staat aaf di feel bad wen Ah du risaach, bai di taim Ah finish Ah wuda feel laik Ah geh wahn big hog fahn Jehoava. Joorin mi risaach, Ah riyalaiz dat Jehoava andastan egzakli how Ah mi-di feel ahn dat ih di help mi.” Jehoava ku help yu kanchroal yu feelinz soh dat yu ku feel kaam jos laik Monika.—Ps. 119:​143, 144.

JEHOAVA WAHN SOPOAT YU

10. If yu goh chroo sohnting terabl, how dat ku mek yu feel?

¹⁰ Di prablem. Afta wi goh chroo sohnting terabl, wi mait ga dayz wen wi jos feel dipres ahn feel laik wi noh ga no schrent fi du eniting. Wi mait feel laik wahn rona weh yoostu ku ron faas, bot den ih geh hert ahn soh now ih di limp. Wi mait schrogl fi du tingz weh yoostu bee eezi fi wi, er wi mait noh feel fi du tingz weh wi yoostu injai. Wi mait feel laik Ilaija. Ih mait bee haad fi mek wi get op, ahn wi mait jos waahn sleep. (1 Ki. 19:​5-7) Weh Jehoava pramis fi du fi wi wen wi feel week er dong?

11. Wat da wahn neks way how Jehoava help wi? (Psalm 94:18)

 ¹¹ Weh Jehoava pramis fi du fi wi? Jehoava pramis fi sopoat wi. (Reed Psalm 94:18.) Jos laik how wahn rona hoo geh hert need help fi moov bowt, wi mait aalso need help fi kantinyu stay bizi eena Jehoava servis. Joorin dehnya taimz, Jehoava tel wi: “Ai, Jehoava yu Gaad, di hoal aan tait tu yu rait han. Ai da di Wan weh tel yu, ‘Noh bee frayd. Ai wahn help yu.ʼ” (Isa. 41:13) Dat da di kaina help weh Jehoava mi gi King Dayvid wen ih mi-di goh chroo chraiyalz ahn deel wid enimiz. Dis da weh hihn mi tel Jehoava: “Yu sopoat mi wid yu rait han.” (Ps. 18:35) Bot how Jehoava wahn sopoat wi?

12. Wen wi feel diskorij, hoo Jehoava ku yooz fi help wi?

¹² Jehoava sopoat wi wen ih yooz adaz fi help wi. Fi egzampl, wen Dayvid mi feel dong, ih fren Janatan gaahn vizit ahn fi inkorij ahn schrentn ahn. (1 Sam. 23:​16, 17) Wahn nada taim, Jehoava mi yooz Ilaisha fi help Ilaija. (1 Ki. 19:​16, 21; 2 Ki. 2:2) Tudeh, Jehoava mait yooz wi famili, frenz, an eldaz fi sopoat wi. Bot wen wi feel diskorij, wi mait noh feel laik wi waahn deh rong peepl. Wi mait jos waahn stay bai wiself, an ih naamal fi feel da way sohntaim. Weh wi need fi du if wi waahn Jehoava sopoat wi?

13. Weh wi need fi du fi geh help fahn Jehoava? (Koment pahn di picha.)

¹³ Weh wee need fi du? Chrai yu bes fi noh kip tu yuself aal di taim. Wen wi kip weh fahn adaz, wi ku staat tink onli bowt wiself ahn wi oan prablemz. If wi tink laik dat, wi noh mait mek di bes disizhanz. (Prov. 18:1) Da chroo, aala wi need sohn taim fi deh bai wiself, espeshali wen wi di deel wid wahn terabl sichuwayshan. Bot noh spen tu moch taim bai yuself. If yu du dat, yu mait en op di push weh di help weh Jehoava di gi yu. Soh, eevn wen yu di goh chroo wahn tof sichuwayshan, aksep help fahn yu famili, frenz, an eldaz. Jehoava ku yooz eni wan a dehn fi help yu.—Prov. 17:17; Isa. 32:​1, 2.

JEHOAVA WAHN GI YU DI KOMFERT WEH YU NEED

14. Weh kaina sichuwayshan ku mek wi feel frayd?

¹⁴ Di prablem. Dehn ga taimz wen wi mait feel frayd. Eena di Baibl, wi laan bowt wahn lata Jehoava faytful servants hoo mi feel schres owt ahn frayd sayka  dehn enimiz er ada prablemz. (Ps. 18:4; 55:​1, 5) Jos laik dat, wi mait di fays prablemz da skool, da werk, fahn wi famili, er fahn di govament. Wi mait feel frayd bikaaz wi ga wahn bad siknis weh ku kil wi. Joorin dehndeh taimz, wi mait feel laik wahn lee pikni weh kyaahn du notn fi ihself. How Jehoava wahn help wi wen wi feel laik dat?

15. Bays pahn Psalm 94:​19, weh Jehoava wahn du fi wi?

¹⁵ Weh Jehoava pramis fi du fi wi? Hihn pramis fi komfert wi ahn mek wi feel kaam. (Reed Psalm 94:19.) Dis hoal saam mait mek wi tink bowt wahn lee gyal weh frayd sayka wahn bad tonda staam. Wi ku imajin ih pa di kohn hog ahn, an komfert ahn til ih jrap asleep. Eevn doa ih mait stil di tonda owtsaid, di lee gyal feel sayf bikaaz ih pa di hog ahn. Saym way soh, wen wi di goh chroo prablemz weh mek wi feel frayd, wi need wahn hog fahn wi Pa, Jehoava, fi mek wi feel sayf. Weh wi need fi du fi geh komfert fahn Jehoava?

16. Weh wi need fi du fi geh komfert fahn Jehoava? (Koment pahn di picha.)

¹⁶ Weh wee need fi du? Wi need fi spen taim wid Jehoava. How wi du dat? Wen wi pray ahn reed di Baibl. (Ps. 77:​1, 12-14) Soh weneva wi feel schres owt, di fers ting wi waahn du da aks Jehoava fi help. Tel ahn bowt weh yu di goh chroo ahn weh yu frayd fa. Wen yu reed sohnting eena di Baibl weh komfert yu, da laik Jehoava di taak tu yu. (Ps. 119:28) Maybi yu ga skripchaz weh komfert yu ahn kaam yu wen yu feel frayd. Fi egzampl, yu mait fain lata komfert fahn di buk a Joab, Psalms, Proverbs, an eevn weh Jeezas mi seh da Machyu chapta 6. Wen yu reed di Baibl ahn pray tu Jehoava, yu wahn feel di komfert weh hihn gi yu.

17. Weh wi ku chros Jehoava fi du wen wi goh chroo haad taimz?

¹⁷ Wee ku chros dat Jehoava wahn help wi wen wi goh chroo haad taimz. Hihn wahn neva lef wi bai wiself. (Ps. 23:4; 94:14) Jehoava pramis dat hihn wahn kip wi sayf, put wi pahn wahn salid fongdayshan, sopoat wi, ahn gi wi di komfert weh wi need. Isaiah 26:3 seh weh Jehoava wahn du fi wi. Ih seh: “Yoo wahn protek enibadi weh aalwayz pen pahn yu; yu wahn gi dehn pees weh wahn laas, bikaaz dehn chros eena yoo.” Soh chros eena Jehoava, an aksep di help weh ih gi yu. If yu du dat, hihn wahn schrentn yu joorin haad taimz.