Som a wi bradaz groa op eena sohn kolcha wehpaat man luk dong pahn laydi. Fi egzampl, wahn serkit oavaseeya da Bolivia weh naym Hans mi seh: “Eena sohn kolcha, di man dehn rayz op fi ak laik maacho man, soh dehn reeli tink dat man beta dan laydi.” b Shengxian da wahn elda fahn Taiwan. Hihn seh: “Wehpaat Ai liv, wahn lata man bileev dat weh wahn wuman tink noh mata non ataal. If wahn man tel ih frenz bowt wahn laydi opinyan, dehn wahn luk dong pan ahn.” Sohn ada man shoa dat dehn noh ga no rispek fi laydi wen dehn tel disrispekful joaks bowt dehn.

Bot wahn man ku chaynj di way ih tink, noh mata weh kolcha ih kohn fram er how ih groa op. Ih ku laan fi stap feel dat man beta dan wuman. (Ifee. 4:​22-24) Wahn brada ku laan fi du dis if ih kapi Jehoava egzampl. Eena dis aatikl, wi wahn si how Jehoava chreet laydi, how bradaz ku chreet dehn di way Jehoava chreet dehn, ahn how eldaz ku set di egzampl eena di way dehn shoa rispek fi sistaz.

HOW JEHOAVA CHREET LAYDI?

Jehoava set di bes egzampl a how fi chreet laydi. Hihn ful a kompashan ahn hihn da wahn lovin Pa. (Jan 3:16) Ahn faytful sistaz da laik daataz weh preshos tu hihn. Soh, mek wi luk pahn how Jehoava shoa dat ih lov ahn rispek dehn.

Jehoava chreet man ahn laydi di saym way. Jehoava mek man ahn wuman fi bee  laik hihn. (Jen. 1:27) Hihn neva mek man smaata dan wuman er mek dehn fi du tingz beta dan wuman. Ahn Gaad chreet wahn man ahn wahn wuman di saym way. (2 Chron. 19:7) Hihn mek man ahn wuman soh dat dehn ku laan an andastan weh di Baibl teech. Jehoava apreeshiayt man ahn laydi weh faytful tu hihn, ahn hihn gi di too ahn dehn di saym hoap—fi eeda goh da hevn fi rool az king ahn prees, er liv fareva pahn di ert. (2 Peet. 1:1) Soh ih klyaa dat Jehoava noh shoa no fayvritizm bitween man ahn laydi.

Jehoava lisn tu dehn. Jehoava kay bowt how laydi feel an ih wilin fi hyaa bowt dehn woriz. Hihn mi lisn tu Raychel ahn Hana pryaaz, ahn hihn mi ansa dehn. (Jen. 30:22; 1 Sam. 1:​10, 11, 19, 20) Eena di Baibl, Jehoava mi mek dehn rait bowt sohn man weh mi reeli lisn wen laydi taak tu dehn. Fi egzampl, Jehoava mi tel Aybraham fi lisn tu ih waif Saara, ahn hihn mi did lisn tu ahn. (Jen. 21:​12-14) Ahn King Dayvid mi lisn tu Abigayl. Az a mata a fak, hihn mi feel laik da Jehoava mi sen shee fi taak tu ahn. (1 Sam. 25:​32-35) Jeezas, hoo da jos laik ih Pa, mi lisn tu ih ma, Mayri. (Jan 2:​3-10) Dehnya egzampl shoa wi dat wan way how Jehoava shoa rispek fi laydi da wen ih lisn tu dehn.

Jehoava chros dehn. Jehoava mi chros Eev fi help tek kayr a di hoal ert. (Jen. 1:28) Dat shoa dat hihn neva si shee az les dan Adam. Hihn mi si shee az wahn paadna fi ih hozban. Jehoava mi aalso chros too laydi hoo da-mi prafit fi gaid ih peepl. Debora mi advaiz wahn joj, ahn Holda mi advaiz wahn king. (Judg. 4:​4-9; 2 Ki. 22:​14-20) Tudeh, Jehoava chros Kristyan sistaz fi du fi hihn werk. Dehnya faytful sistaz serv az poblishaz, painyaaz, ahn mishineriz eena di kangrigayshan. Dehn help dizain, bil, ahn mantayn Kingdom Haal ahn difrent branch aafis bildin. Som a dehn sistaz serv da Betel, an adaz serv da di rimoat chranslayshan aafis dehn. Dehnya sistaz da laik wahn big aami weh Jehoava aaganaiz fi du fi hihn werk. (Ps. 68:11) Wi si fahn dis dat Jehoava noh luk pahn laydi az week er laik dehn kyaahn du notn.

HOW BRADAZ KU LAAN FI CHREET LAYDI LAIK HOW JEHOAVA CHREET DEHN?

Bradaz, if yu waahn noa if yu di chreet yu sistaz di saym way how Jehoava chreet dehn, yu need fi bee aanis wid yuself. Yu need fi tek wahn gud luk pahn weh yu tink bowt dehn ahn how yu chreet dehn. Yu mait need sohn help fi du dat. Jos laik how wahn ekschray masheen ku si if sohnting rang wid sombadi fizikal haat, saym way soh, di Baibl er wahn gud fren ku help wi fain owt if wi mait ga eni kaina rang tinkin er feelin tuwaadz laydi. Bot weh wi ku du fi geh di help wi mait need?

Aks wahn gud fren fi help. (Prov. 18:17) Ih gud fi goh tu wahn fren weh yu chros ahn weh wahn bee kain ahn reeznabl. Yu ku aks ahn sohn kweschanz laik: “How yu tink Ai chreet sistaz? Dehn feel laik Ai reeli rispek dehn? Wat els Ai ku du fi chreet dehn beta?” If yu fren tel yu dat yu need fi du beta eena sohnting, noh geh beks ahn staat mek lata ekskyoos. Insted, bee wilin fi aksep di advais ahn mek chaynjiz.

Stodi Gaad Werd. Di bes way fi noa if yu di chreet sistaz eena di karek way da fi yooz Gaad Werd fi egzamin how wi tink an ak. (Heeb. 4:12) Eena di Baibl, wi ku laan bowt sohn man hoo mi chreet laydi wid lata rispek, ahn som weh neva du dat. Den, wi ku kompyaa fi dehn egzampl wid di way wee chreet sistaz. Dat ku aalso help wi fi noh twis wahn skripcha fi sopoat eni rang aidyaa wi mait ga bowt laydi. Fi egzampl, di skripcha da 1 Peeta 3:7 seh dat wahn hozban fi chreet ih waif wid “rispek kaaz shee da di uman ahn di weeka wan.” c Soh, yu  tink dat meenz dat shee weeka dan hihn, dat shee noh az smaat az hihn, er dat shee kyaahn du eniting az gud az hihn? Non ataal! Kompyaa weh Peeta seh wid Galayshanz 3:​26-29, weh seh dat Gaad mi chooz sohn wuman fi goh rool da hevn wid Jeezas tu. Soh, wen wi stodi Gaad Werd er aks wahn gud fren bowt how wi chreet laydi, wi ku laan how fi rispek wi sistaz eevn moa.

HOW ELDAZ SHOA DAT DEHN RISPEK SISTAZ?

Bradaz ku aalso laan how fi shoa rispek fi sistaz wen dehn kapi di egzampl a lovin eldaz. How di eldaz dehn set di egzampl fi shoa rispek tu sistaz? Mek wi luk pahn how dehn ku du dat.

Eldaz komen sistaz. Paal mi set wahn gud egzampl fi mek di eldaz fala. Ih komen wahn lata sistaz wen ih mi rait wahn leta tu di kangrigayshan da Roam. (Roam. 16:12) Yoo ku imajin how hapi dehn sista mosi mi feel wen di bradaz reed owt da leta da di kangrigayshan? Saym way soh, eldaz ku komen sistaz fi di gud kwalitiz weh dehn shoa ahn how haad dehn werk fi Jehoava. Wen di eldaz du dat, di sistaz wahn noa dat di kangrigayshan rispek ahn valyu dehn. Dehndeh inkorijin werdz ku bee aal weh di sistaz need fi kantinyu serv Jehoava.—Prov. 15:23.

Wen eldaz di komen sistaz, dehn komen di sistaz fahn dehn haat ahn dehn spesifik bowt weh dehn di seh. Wai dehn du dat? Wahn sista weh naym Jessica seh: “Ih nais fi hyaa wahn elda seh ‘Yu du wahn gud jab.ʼ Bot wi apreeshiayt it eevn moa wen di eldaz komen wi fi sohnting spesifik, laik wen wi teech wi pikni fi sidong da meetin ahn noh mek naiz, er wen wi du aal weh wi kud fi pik op wahn Baibl styoodent ahn bring ahn da di meetin.” Wen wahn elda komen wahn  sista fi sohnting spesifik, dehn mek di sista feel impoatant eena di kangrigayshan.

Eldaz lisn tu sistaz. Eldaz weh hombl noa dat dehn da noh di onli wanz weh ku ga gud aidyaaz. Dehn aks di sistaz fi dehn advais ahn dehn lisn tu weh dehn ga fi seh. Wen eldaz du dat, dehn inkorij di sistaz ahn dehn benifit fahn dat tu. How dat pasabl? Wahn elda weh naym Gerardo, weh serv da Betel, seh: “Wen Ah aks di sistaz fi dehn opinyan, dat help mi fi du mi werk beta, bikaaz moas a di taim dehndeh sistaz di du di werk fi wahn lang taim.” Eena di kangrigayshan, wahn lata sistaz da painyaa, soh dehn wuda noa wahn lat bowt di peepl eena di teritori. Wahn elda weh naym Brian seh, “Di sistaz ga lata gud kwalitiz ahn skilz weh di aaganaizayshan need. Soh laan fahn dehn ekspeeryens!”

Wai eldaz noh fi ignoar sojeshanz fahn sistaz? Wahn brada weh naym Edward seh: “Wahn sista weh ga ekspeeryens ku help wahn brada fi andastan sohnting beta if hihn lisn tu fi shee opinyan, ahn shee ku help di brada fi andastan how sombadi els feel.” (Prov. 1:5) Eevn if wahn elda kyaahn yooz wahn sojeshan weh wahn sista giv ahn, ih stil ku tank ahn fi shayr ih sojeshan.

Eldaz chrayn sistaz. Eldaz weh waiz luk fi eni chaans fi chrayn sistaz. Fi egzampl, dehn ku teech di sistaz how dehn ku pripyaa fi kandok wahn meetin fi feel servis shud in kays wahn baptaiz brada noh deh rong. Dehn ku aalso shoa di sistaz how fi yooz difrent toolz ahn masheen fi help owt wid mantaynans ahn kanschrokshan proajeks. Da Betel, di bradaz weh di tek di leed chrayn di sistaz how fi tek kayr a difrent asainments. Sistaz help owt wid mantaynans, dehn help rait kompyoota proagram, dehn help bai tingz fi di aaganaizayshan ahn manij di akonks, ahn dehn help wid lata ada tingz. Wen eldaz chrayn sistaz fi du dat, dehn shoa dat dehn chros di sistaz ahn noa dat dehn ku du wahn gud jab.

Lata sistaz yooz di chraynin weh dehn geh fahn di eldaz fi help owt adaz. Fi egzampl, dehn ga sohn sistaz weh yooz di chraynin weh dehn geh pahn kanschrokshan proajeks fi help adaz bil op bak dehn hows afta wahn nachral dizaasta. Ada sistaz yooz di skilz weh dehn laan eena di minischri fi chrayn moa sistaz fi preech. How sistaz feel bowt di eldaz weh chrayn dehn? Wahn sista weh naym Jennifer seh: “Wahn elda mi tek di taim fi chrayn mi wen Ah mi werk pahn wahn kanschrokshan proajek. Hihn apreeshiayt weh Ah mi du an ih mi komen mi fi it. Ah mi laik werk wid hihn bikaaz hihn mi chros mi an ih mi valyu di werk weh Ah mi du.”

HOW WI BENIFIT WEN WI CHREET WI SISTAZ LAIK WI FAMILI

Wi reeli lov wi faytful sistaz, ahn Jehoava lov dehn tu! Soh wi chreet dehn laik wi famili. (1 Tim. 5:​1, 2) Wi apreeshiayt dehn ahn wi injai di werk lang wid dehn. Ahn wi hapi wen dehn noa dat wi lov ahn sopoat dehn. Wahn sista weh naym Vanessa seh: “Ah soh tankful tu Jehoava dat Ah ku bee paat a ih aaganaizayshan, weh ga lata bradaz hoo inkorij mi wahn lat.” Wahn sista fahn Taiwan seh: “Ah veri tankful dat Jehoava an ih aaganaizayshan reeli apreeshiayt di sistaz ahn dehn rispek how wi feel. Dis help mi fayt geh schranga, ahn mek Ah feel eevn moa tankful fi bee paat a Jehoava aaganaizayshan.”

Wen wi faytful Kristyan bradaz shoa rispek an apreeshiayt di sistaz, dat reeli mek Jehoava feel hapi. (Prov. 27:11) Wahn elda fahn Scotland weh naym Benjamin seh, “Wahn lata man eena di werl tudeh noh ga no rispek fi laydi. Soh wen wahn laydi waak eena wahn Kingdom Haal, wi waahn mek dehn feel dat wi ga lata rispek fi dehn.” Mek aala wi du wi bes fi kapi Jehoava egzampl a lov ahn rispek ahn chreet aala wi dyaa sistaz eena di way dehn dizerv.—Roam. 12:10.