1. Wat da wan reezn wai Jehoava gi wi di gif a marij?

 JEHOAVA da “di hapi Gaad,” an ih waahn wee bee hapi tu. (1 Tim. 1:11) Hihn gi wi lata gud tingz fi injai laif. (Jay. 1:17) Ahn wan a dehn da di gif a marij. Wen wahn man ahn wahn laydi geh marid, dehn pramis fi lov ahn rispek eech ada. Ahn wen dehn werk haad fi lov wan anada moa ahn moa, dehn wahn jraa kloasa tu eech ada ahn dehn wahn bee hapi.—Prav. 5:18.

2. How lata hozban chreet dehn waif tudeh?

² Lata marid peepl noh kantinyu lov ahn rispek eech ada laik weh dehn mi pramis wen dehn geh marid. Sayka dat, dehn noh hapi. Wahn ripoat fahn di World Health Organization seh dat lata hozban abyooz dehn waif eena difrent wayz. Fi egzampl, dehn beet dehn, seh meen tingz tu dehn, ahn hert dehn feelinz. Sohn hozban wuda chreet dehn waif gud fronta ada peepl, bot wen nobadi els deh rong, dehn chreet dehn rof. Lata hozban wach poarnografi ahn dat mek dehn waif feel laik dehn noh lov dehn.

3. Wai sohn hozban abyooz dehn waif?

³ Wai sohn hozban abyooz dehn waif? Maybi dehn groa op di si dehn pa di abyooz dehn ma eena difrent wayz, soh dehn tink dat da how wahn man sopoas tu chreet ih waif. Ih ku bee dat, bikaaz a dehn kolcha, dehn feel laik wahn reel man haftu shoa dehn waif hoo da baas, eevn if dat meenz dat dehn haftu beet dehn. Er maybi dehn neva laan how fi kanchroal dehn feelinz, ahn soh ih eezi fi dehn looz dehn tempa. Sohn man ga di habit fi wach poarnografi, ahn dat mek dehn tink bowt laydi ahn seks eena di rang  way. Ahn lata ekspert seh dat joorin di COVID-19 pandemik, moa man mi staat tu abyooz dehn waif. Bot non a dehnya tingz giv eni man reezn fi chreet ih waif bad.

4. Weh wahn Kristyan hozban need fi bee kyaaful noh fi du, ahn wai?

⁴ Wahn hozban weh serv Jehoava need fi bee kyaaful fi noh tink bowt laydi di way peepl eena di werl tink bowt dehn. a Wai? Bikaaz di way wahn persn tink afek di tingz weh ih du. Di apasl Paal mi waan anointid Kristyanz fi “stap kapi di peepl a dis werl.” (Roam. 12:​1, 2) Wen Paal mi rait tu dehndeh Kristyanz, dehn mi-di serv Jehoava fi yaaz. Bot ih seemz laik dehn stil mi-di tink laik di werl. Dat da wai hihn mi tel dehn dat dehn need fi chaynj di way dehn tink ahn di way dehn bihayv. Ahn dat da stil gud kongsl fi Kristyan hozbanz tudeh bikaaz som a dehn stil di fala di tinkin a di werl ahn dehn di abyooz dehn waif. b How Jehoava ekspek wahn hozban fi chreet ih waif? Wi fain di ansa eena di teem skripcha fi dis aatikl.

5. Akaadn tu 1 Peeta 3:​7, how wahn hozban shuda chreet ih waif?

⁵ Reed 1 Peeta 3:7. Jehoava koman hozbanz fi chreet dehn waif wid lov ahn rispek. Dat meenz dat dehn wahn chreet dehn kain ahn wid aana. Eena dis aatikl, wi wahn kansida how wahn hozban ku shoa lov ahn rispek tu ih waif. Bot fers, mek wi taak bowt tingz weh wahn hozban shuda neva du tu ih waif.

NOH DU NOTN WEH WAHN HERT YU WAIF

6. How Jehoava feel bowt man weh beet dehn waif? (Koloashanz 3:19)

⁶ Wahn hozban noh fi beet ih waif. Jehoava hayt enibadi weh vailent. (Saa. 11:5) Bot Jehoava reeli hayt wahn hozban weh abyooz ih waif. (Mal. 2:16; reed Koloashanz 3:19.) Akaadn tu wi teem skripcha, 1 Peeta 3:​7, if wahn hozban noh chreet ih waif gud, ih wahn damij ih frenship wid Jehoava. Ahn Hihn mait nat eevn lisn tu ih pryaaz.

7. Akaadn tu Ifeezhanz 4:​31, 32, how wahn hozban noh fi taak tu ih waif? (Koment pahn di futnoat.)

⁷ Wahn hozban noh fi seh meen tingz tu ih waif. Sohn hozban tel aaf dehn waif ahn tel dehn kruwil tingz weh hert dehn feelinz. Bot Jehoava hayt “anga, ahn raat,” an ih hayt wen peepl “hala op aata wan anada” an “insolt wan anada.” c (Reed Ifeezhanz 4:​31, 32.) Jehoava hyaa evriting. Ih kay bowt how wahn hozban taak tu ih waif, eevn wen nobadi els deh rong. Wahn hozban weh taak meen tu ih waif wahn damij ih rilayshanship wid ih waif an ih rilayshanship wid Gaad.—Jay. 1:26.

8. How Jehoava feel bowt poarnografi, ahn wai?

⁸ Wahn hozban noh fi wach poarnografi. Jehoava hayt poarnografi. If wahn hozban wach poarnografi, den ih wahn damij ih rilayshanship wid Jehoava ahn wid ih waif. d Jehoava ekspek wahn hozban fi bee laayal tu ih waif. Ahn Jeezas mi seh dat wahn man weh luk pahn wahn nada  wuman ahn los afta ahn don komit adolchri “eena ih haat.” e (Mach. 5:​28, 29) Soh wahn laayal hozban wuda neva cheet pan ih waif—ih wudn eevn tink bowt it!

9. Wai Jehoava hayt wahn hozban weh foas ih waif fi du tingz weh shee noh waahn wen dehn di ga seks?

⁹ Wahn hozban noh fi foas ih waif fi du tingz weh shee noh waahn du wen dehn di ga seks. Sohn hozban chrai foas dehn waif fi du tingz weh wuda bada fi shee kanshans, weh wuda mek ih feel doti, er weh wuda mek ih feel laik ih hozban noh lov ahn rispek ahn. Wahn hozban weh chreet ih waif laik dat wuda shoa dat ih koal an ih onli kay bowt ihself. Jehoava hayt wen wahn man chreet ih waif da kaina way. Jehoava ekspek wahn man fi lov ahn cherish ih waif ahn fi rispek ih feelinz ahn kanshans. (Ifee. 5:​28, 29) Soh wi don taak bowt sevral wayz how wahn man mait abyooz ih waif. Bot wat if wahn Kristyan hozban gilti a eni wan a dehndeh tingz? Ih need fi chaynj di way ih tink, an ih need fi chaynj di way ih bihayv. Soh weh ku help ahn fi chaynj?

HOW WAHN HOZBAN KU STAP CHREET IH WAIF BAD

10. Weh wahn hozban ku laan fahn Jeezas egzampl?

¹⁰ Weh ku help wahn hozban fi stap chreet ih waif bad? Hihn ku werk haad fi kapi Jeezas egzampl. Eevn doa Jeezas neva marid, di way hihn mi chreet ih disaiplz shoa how hozbanz fi chreet dehn waif. (Ifee. 5:25) Mek wi si weh hozbanz ku laan fahn di way how Jeezas taak tu ih apasl dehn ahn how ih chreet dehn.

11. How Jeezas mi chreet ih apasl dehn?

¹¹ Jeezas neva chreet ih apasl dehn bad. Rada, ih mi aalwayz chreet dehn kain ahn wid rispek. Eevn doa Jeezas mi ga moch moa powa dan ih disaipl dehn, hihn neva yooz ih powa fi rof dehn op. Insteda dat, ih mi hombl an ih mi serv dehn. (Jan 13:​12-17) Ih mi tel ih disaipl dehn: “Laan fahn mi, kaaz Ai kain ahn hombl, an unu wahn fain res fi unu soal.” (Mach. 11:​28-30) Jeezas mi ga wahn kain ahn jentl haat. Bot jos bikaaz ih shoa dehndeh kwalitiz noh meenz ih mi week. Insted, dat shoa dat ih mi ga self-kanchroal. Wen sohnbadi er sohnting provoak ahn, ih mi kanchroal ih feelinz ahn kip kaam.

12. How Jeezas mi taak tu peepl?

¹² Wen Jeezas mi taak tu ih falowaz, ih aalwayz yooz werdz weh komfert dehn an inkorij dehn. Ih neva skoal dehn op er taak tu dehn eena wahn rof way. (Look 8:​47, 48) Eevn wen ih enimi dehn mi insolt ahn op ahn chrai get ahn beks, “hihn neva insolt dehn bak.” (1 Peet. 2:​21-23) Sohntaim, Jeezas mi chooz fi noh seh notn. (Mach. 27:​12-14) Dis da wahn reeli gud egzampl fi hozbanz!

13. Laik weh Machyu 19:​4-6 seh, how wahn hozban ku “stik tu ih waif”? (Koment pahn di picha.)

¹³ Jeezas mi seh dat hozbanz fi bee laayal tu dehn waif. Ih mi ripeet weh ih Pa mi seh, dat wahn man fi “stik tu ih waif.” (Reed Machyu 19:4-6.) Di Greek werd weh chranslayt az “stik tu” da wahn werd weh dehn yoostu yooz fi taak bowt wen yu gloo tingz tugeda. Soh dat meenz dat wahn hozban ahn waif shuda lov eech ada soh moch dat dehn stik tu wan anada laik if dehn gloo tugeda. If wan a dehn du sohnting weh hert di ada, di too a dehn wuda sofa. Wahn hozban weh reeli lov ih  waif noh wahn luk pahn no kaina poarnografi. Insted, ih wuda stap “luk pahn tingz weh wertles” rait away. (Saa. 119:37) Da laik if ih mek wahn kanchrak wid ih aiy fi noh luk pahn eni laydi eena wahn rang way.—Joab 31:1.

14. Weh wahn hozban weh abyooz ih waif need fi du fi bil bak ih rilayshanship wid Jehoava ahn wid ih waif?

¹⁴ Wahn hozban weh abyooz ih waif wahn need fi tek ada steps fi bil bak ih rilayshanship wid Jehoava ahn wid ih waif. Weh ih need fi du? Fers, ih need fi andastan dat ih ga wahn seeryos prablem an ih kyaahn haid weh ih seh ahn du fahn Jehoava. (Saa. 44:21; Ikl. 12:14; Heeb. 4:13) Sekant, ih need fi stap abyooz ih waif ahn chaynj di way ih bihayv. (Prav. 28:13) Terd, ih need fi apolojaiz tu ih waif ahn tu Jehoava an aks dehn fi fergivnis. (Aks 3:19) An ih need fi beg Jehoava fi help ahn chaynj di way ih tink, di way ih taak, ahn di tingz weh ih du. (Saa. 51:​10-12; 2 Kor. 10:5; Fil. 2:13) Foat, ih need fi werk pahn di tingz weh ih pray bowt soh dat ih ku laan fi hayt vailens ahn stap seh meen tingz. (Saa. 97:10) Fif, ih need fi geh help fahn di eldaz rait away. (Jay. 5:​14-16) Siks, ih need fi kom op wid wahn plan weh wahn help ahn fi noh du dehndeh tingz agen. Wahn hozban weh luk pahn poarnografi need fi fala dehnya saym steps. Jehoava wahn bles ahn an help ahn fi chaynj ih wayz. (Saa. 37:5) Bot wahn hozban noh onli need fi stap du tingz weh wahn hert ih waif. Ih need fi laan how fi shoa ahn lov ahn rispek. How ih ku du dat?

HOW WAHN HOZBAN KU SHOA IH WAIF DAT IH LOV AHN RISPEK AHN

15. How wahn hozban ku shoa ih waif dat ih lov ahn?

¹⁵ Shoa yu waif dat yu lov ahn. Sohn bradaz weh eena wahn hapi marij mek it wahn habit fi du sohnting evri day fi shoa dehn waif humoch dehn lov ahn. (1 Jan 3:18) Wahn hozban ku shoa lov fi ih waif  eena lata lee wayz. Fi egzampl, ih ku hoal ih han er giv ahn wahn hog. Ih ku sen ahn wahn lee mesij weh seh “Ah mis yu” er “How yu day di goh?” Sohntaim, ih mait rait ahn wahn lee kyaad fi tel ahn humoch ih lov ahn. Wen wahn hozban du tingz laik dat, ih shoa ih waif aana, lov, ahn rispek. Dat wahn mek dehn marij geh schranga.

16. Wai wahn hozban fi prayz ih waif?

¹⁶ Tel yu waif dat shee speshal. Wahn hozban weh lov ahn rispek ih waif wahn tel ahn weh ih lov bowt ahn an help ahn fi feel gud bowt ihself. Wan way hihn ku du dat da fi shoa ih waif dat ih apreeshiayt evriting weh shee du fi help ahn. (Kol. 3:15) Wen wahn hozban prayz ih waif fahn ih haat, shee wahn reeli feel speshal. Shee wahn feel sayf, an ih wahn feel laik ih hozban lov ahn rispek ahn.—Prav. 31:28.

17. How wahn hozban ku shoa rispek fi ih waif?

¹⁷ Bee kain tu yu waif ahn shoa ahn rispek. Wahn hozban weh lov ih waif wahn shoa dat ih apreeshiayt ahn. Tu hihn, shee da wahn byootiful gif fahn Jehoava. (Prav. 18:22; 31:10) Sayka dat, ih wahn kain tu ahn an shoa ahn rispek, eevn wen dehn di ga seks. Ih noh wahn chrai foas ahn fi du tingz weh wahn bada ih kanshans, mek ih feel laik ih di abyooz ahn, er mek ih feel bad eena eni kaina way. f Hihn noh wahn du notn weh wahn bada fi hihn kanshans needa.—Aks 24:16.

18. Weh wahn hozban fi chrai ih bes fi du? (Koment pahn di baks weh naym “ Foa Tingz Weh Ku Help Wahn Hozban Shoa Rispek.”)

¹⁸ Jehoava hapi wen ih si wahn hozban di chrai ih bes fi shoa lov ahn rispek fi ih waif eena evriting weh ih seh ahn du. Soh du yu bes fi aana ahn rispek yu waif ahn noh du notn weh ku hert ahn. Bee kain tu ahn, chreet ahn wid rispek, ahn shoa ahn humoch yu lov ahn. Dat wahn shoa yu waif dat shee speshal tu yoo. Wen yu shoa lov ahn rispek fi yu waif, yu wahn protek yu moas impoatant rilayshanship—yu frenship wid Jehoava.—Saa. 25:14.