1. How wi ku mek Jehoava hapi?

 IMAJIN yu gi sohnbadi weh yu lov wahn speshal gif. Di gif priti ahn yu noa da sohnting weh dehn ku yooz. How yu wuda feel if dehn jos put op di gif ahn ferget bowt it? Bot how yu wuda feel if yu si dehn yooz di gif ahn dehn tel yu humoch dehn apreeshiayt it? Dis da di point: Jehoava gi wi wahn preshos gif—ih giv op ih Son fi wi. Jos tink how hapi hihn feel wen ih si dat wi tankful fi da gif ahn fi di lov weh ih shoa wi!—Jan 3:16; Roam. 5:​7, 8.

2. Weh wi wahn diskos eena dis aatikl?

² Oava taim, wi ku looz wi apreeshiayshan fi di ransom. Da laik wi jos put op da speshal gif ahn noh tink bowt it az aafn az wi shud. Fi mek dat noh hapm, wi haftu kip di tink bowt weh Gaad ahn Krais du fi wi. Dat wahn mek wi apreeshiayshan groa. Dis aatikl ku help wi fi du dat. Wi wahn taak bowt how wi benifit fahn di ransom now, how wi wahn benifit eena di fyoocha, ahn how wi ku shoa dat wi tankful fi Jehoava lov, espeshali joorin Memoaryal taim.

HOW WI BENIFIT NOW

3. Wat da wan way how wi don di benifit fahn di ransom?

³ Wi don di benifit fahn Jeezas sakrifais. Fi egzampl, tanks tu di ransom, Jehoava fergiv wi sin dehn. Hihn noh haftu fergiv wi, bot ih fergiv wi bikaaz ih waahn fergiv wi. Dayvid mi shoa apreeshiayshan fi dat wen ih sing: “Yoo, Oa Jehoava, da wahn gud Gaad ahn yu aalwayz redi fi fergiv.”—Saa. 86:5; 103:​3, 10-13.

4. Fi hoo Jehoava gi di ransom? (Look 5:32; 1 Timoti 1:15)

 ⁴ Som a wi mait feel laik wi noh dizerv Jehoava fergivnis. Ahn da chroo, non a wi dizerv it. Di apasl Paal mi seh: “Ai noh eevn dizerv fi mek dehn kaal mi wahn apasl.” Bot den ih seh: “Da onli bikaaz a Gaad grayt kainis dat Ai da wahn apasl.” (1 Kor. 15:​9, 10) Soh if wi noh dizerv Jehoava fergivnis, den wai ih fergiv wi? Hihn fergiv wi bikaaz ih lov wi, az lang az wi ripent fahn wi sinz. Soh weh yu ku du wen yu feel dong bikaaz yu noh dizerv Jehoava mersi? Memba dat Jehoava neva gi di ransom fi perfek peepl; ih giv it fi sinaz weh ripent.—Reed Look 5:32; 1 Timoti 1:15.

5. Wai nobadi ku seh dat dehn dizerv Jehoava mersi?

⁵ Wi noh waahn feel laik wi dizerv Jehoava mersi jos bikaaz wi di serv ahn fi lata yaaz. Wi noa dat Jehoava apreeshiayt aal weh wi du oava di yaaz fi serv ahn. (Heeb. 6:10) Bot hihn gi wi ih Son az wahn gif, noh az wahn payment fi aal weh wi du far ahn. If wi eva tink dat wi dizerv fi hihn mersi er wi dizerv speshal chreetment, da laik if wi di seh dat Krais akchwali ded fi notn.—Kompyaa Galayshanz 2:21.

6. Wai Paal mi werk haad fi Jehoava?

⁶ Paal mi noa dat noh mata how haad ih werk, ih stil neva mi wahn dizerv Jehoava mersi. Soh da wai ih mi werk soh haad fi Jehoava? Ih mi du dat fi shoa Jehoava humoch ih mi apreeshiayt Ih grayt kainis. (Ifee. 3:7) Wi waahn bee laik Paal ahn werk haad fi Jehoava. Wi noh du dat fi chrai geh mersi fan ahn, bot wi du it fi shoa ahn humoch wi apreeshiayt ih mersi.

7. Wat da wahn nada way how wi don di benifit fahn di ransom? (Roamanz 5:1; Jaymz 2:23)

⁷ Wahn nada way how wi benifit fahn di ransom da dat wi ku ga wahn kloas ahn persnal rilayshanship wid Jehoava. a Laik weh wi diskos eena di laas aatikl, wi neva baan wid wahn rilayshanship wid Jehoava. Bot sayka di ransom, wi ku ga “pees wid Gaad” ahn jraa kloas tu hihn.—Reed Roamanz 5:1; Jaymz 2:23.

8. Wai wi shuda bee tankful dat wi ku pray tu Jehoava?

⁸ Bikaaz wi ga wahn rilayshanship wid Jehoava, wi ku pray tu ahn enitaim. Dat da sohnting speshal, noh chroo? Ahn Jehoava noh onli lisn wen wi pray tugeda az wahn groop, hihn hyaa wi persnal pryaaz tu. Pryaa ku help wi feel kaam, bot dat da noh di onli reezn wai wi pray. Wi pray soh dat wi ku schrentn wi rilayshanship wid Jehoava. (Saa. 65:2; Jay. 4:8; 1 Jan 5:14) Wen Jeezas mi deh pahn ert, hihn mi pray tu Jehoava aal di taim bikaaz ih mi noa dat Jehoava di lisn tu ahn, an dat pryaa wuda schrentn ih rilayshanship wid ih Pa. (Look 5:16) Wi soh tankful dat, sayka Jeezas sakrifais, wi ku bee Jehoava fren an eevn taak tu ahn!

HOW WI KU BENIFIT EENA DI FYOOCHA

9. How faytful peepl wahn benifit fahn di ransom eena di fyoocha?

⁹ How Jehoava faytful peepl wahn benifit fahn di ransom eena di fyoocha? Dehn wahn geh evalastin laif. Lata peepl seh dat kyaahn hapm bikaaz nobadi eva yet liv fareva. Bot wen Jehoava mek  hyoomanz, ih mi waahn dehn liv fareva. Soh if Adam neva sin, ih wuda bee naamal fi liv fareva. Di way tingz stan rait now, doh, wi mait fain dat haad fi bileev. Bot memba dat Jehoava don pay di haiyis prais—di laif a ih oan Son—fi mek dat pasabl. (Roam. 8:32) Soh wi ku chros dat Jehoava wahn giv ih peepl evalastin laif eena di fyoocha.

10. Weh di anointid ahn di ada sheep di luk faawod fa?

¹⁰ Eevn doa evalastin laif da fi di fyoocha, Jehoava waahn wi luk faawod tu it fahn now. Wi anointid bradaz ahn sistaz di luk faawod fi goh da hevn fi rool az king lang wid Krais. (Rev. 20:6) Di ada sheep kyaahn wayt fi liv eena Paradais widowt payn er saro. (Rev. 21:​3, 4) Yoo da wan a di ada sheep weh di luk faawod fi liv fareva pahn ert? Dat da weh Gaad mek wi fa, ahn dat wahn mek wi hapi. Soh noh feel laik yu di mis owt er laik if di anointid wahn geh wahn beta riwaad.

11-12. Wat da sohn blesinz wi ku luk faawod tu eena Paradais? (Koment pahn di picha dehn.)

¹¹ Imajin weh yu laif wahn bee laik eena Paradais. Yu noh wahn haftu wori bowt geh sik er ded. (Isa. 25:8; 33:24) Jehoava wahn gi yu aal di gud tingz weh yu waahn. Weh yoo wuda waahn laan bowt? Yu wuda waahn laan moa bowt animalz? Yu wuda waahn laan how fi play wahn inschrument, how fi jraa, er how fi bil wahn hows? Wi definaytli wahn need peepl weh noa how fi du tingz laik plan ahn bil hows, du faamin, mek toolz, kuk, ahn weh ku plaant gyaadn ahn tek kayr a dehn. (Isa. 35:1; 65:21) Evalastin laif wahn gi yu nof taim fi laan how fi du eniting weh yu waahn.

¹² Tink bowt how hapi wi wahn bee fi welkom bak peepl weh geh rezorek! (Aks 24:15) Ahn tink bowt how hapi yu wahn bee fi laan moa bowt Jehoava fahn di tingz weh ih mek. (Saa. 104:24; Isa. 11:9) An eevn beta dan dat, tink bowt  how hapi yu wahn bee fi wership Jehoava widowt eva haftu aks fi fergivnis! Yoo wuda eva giv op dehndeh blesinz jos ‘fi injai di plezhaz a sin weh onli laas fi wahn lee wailʼ? (Heeb. 11:25) Af koars nat! Dehndeh blesinz wert eni sakrifais weh wi haftu mek now. Memba, di Paradais noh wahn aalwayz bee sohnting fi luk faawod tu fi di fyoocha. Ih soon kohn, ahn dat wahn bee di plays wehpaat wi wahn liv fareva. Aala dis pasabl onli bikaaz Jehoava lov wi soh moch dat ih giv op ih Son fi wi!

SHOA DAT YU TANKFUL FI JEHOAVA LOV

13. How wi ku shoa dat wi tankful fi Jehoava lov? (2 Korintyanz 6:1)

¹³ How wi ku shoa Jehoava dat wi tankful fi di ransom? Wi ku mek shoar dat wi servis tu ahn da di moas impoatant ting eena wi laif. (Mach. 6:33) Aftaraal, Jeezas mi ded “soh dat enibadi weh liv noh wahn liv fi dehnself nohmoh, bot dehn wahn liv fi di Krais, hoo mi ded fi dehn ahn geh rayz op bak fahn di ded.” (2 Kor. 5:15) Jehoava shoa wi grayt kainis an ih fergiv wi. Wi wuda neva waahn tek dat fi grantid. Rada, wi waahn du evriting wi kud fi shoa Jehoava dat wi andastan humoch ih du fi wi ahn dat wi reeli tankful far it.—Reed 2 Korintyanz 6:1.

14. How wi ku chros Jehoava ahn fala ih dairekshan?

¹⁴ Wahn nada way how wi shoa dat wi tankful fi Jehoava lov da wen wi chros ahn an fala ih dairekshan. How wi du dat? Wi ku shoa dat wen wi di mek disizhanz. Fi egzampl, wi mait di tink if wi need moa ejukayshan, er wi mait haftu disaid weda er nat wi wahn tek wahn sertn kaina jab. Wi need fi tink bowt weh Jehoava wuda waahn wi du. (1 Kor. 10:31; 2 Kor. 5:7) Wen wi mek disizhanz bays pahn wi fayt eena Jehoava, den wi fayt, wi frenship, ahn wi hoap wahn groa schranga.—Roam. 5:​3-5; Jay. 2:​21, 22.

15. How wi ku shoa dat wi tankful joorin Memoaryal taim?

¹⁵ Wi aalso waahn du aal weh wi kud joorin Memoaryal taim fi shoa Jehoava dat wi tankful fi di ransom. Wi waahn mek planz fi deh da di Memoaryal wiself, bot wi waahn invait ada peepl fi dehdeh tu. (1 Tim. 2:4) Wen yu invait sohnbadi fi kohn da di Memoaryal, tel dehn weh wahn hapm. Yu ku shoa dehn veedyoz fahn jw.org laik Wai Jeezas Mi Ded fi Wi? ahn Memba di Det a Jeezas. Eldaz wahn mek shoar fi invait bradaz ahn sistaz weh stap kohn da meetin er preech wid di kangrigayshan. Yoo ku imajin how hapi evribadi da hevn ahn pahn ert wahn bee wen dehn si wan a Jehoava sheep  weh mi laas kohn bak tu di kangrigayshan? (Look 15:​4-7) Wen wi deh da di Memoaryal, mek wi chrai wi bes fi hayl evribadi, espeshali peepl weh kohn fi di fers taim er peepl weh noh kohn da meetin lang taim. Wi waahn mek dehn feel welkom!—Roam. 12:13.

16. Wai wi shuda chrai du moa eena di minischri joorin Memoaryal taim?

¹⁶ Yu tink yu ku du moa fi Jehoava joorin Memoaryal taim? Dat wuda bee wahn gud way fi shoa dat yu tankful fi evriting weh Jehoava ahn Jeezas du fi yu. Di moa yu goh owt goh preech, di moa yu wahn si how Jehoava help yu. (1 Kor. 3:9) Dat wahn mek yu chros ahn eevn moa. Ahn du yu bes fi kip op wid di Memoaryal Baibl reedin, weh yu ku fain eena di Stodi di Skripchaz Evri Day buk er pahn di chaat eena di midweek meetin werkbuk. Yu mait eevn waahn du moa risaach pahn som a dehndeh Baibl pasij.

17. Weh mek Jehoava hapi? (Koment pahn di baks weh naym “ How Wi Ku Shoa Dat Wi Tankful fi Jehoava Lov.”)

¹⁷ Af koars, yu mait deh eena wahn sichuwayshan weh noh alow yu fi du moa dan weh yu don di du fi Jehoava. Bot memba dat Jehoava noh kompyaa weh yoo du wid weh adaz du. Hihn si weh deh eena yu haat, ahn hihn hapi wen ih si dat yu reeli tankful fi di ransom.—1 Sam. 16:7; Maak 12:​41-44.

18. Wai wi tankful fi Jehoava Gaad ahn Jeezas Krais?

¹⁸ Di onli reezn wai wi ku geh fergivnis fi wi sinz, bee Jehoava fren, ahn ga di hoap fi liv fareva da bikaaz Jehoava gi wi di ransom. Hihn gi wi aala dehnya blesinz bikaaz ih lov wi. Soh mek wi aalwayz shoa dat wi tankful fi Jehoava lov. (1 Jan 4:19) Ahn mek wi shoa dat wi tankful fi Jeezas, hoo lov wi soh moch dat ih giv op ih laif fi wi!—Jan 15:13.