STODI AATIKL 3
SANG 35 Put Impoatant Tingz Fos
Mek Disizhanz Weh Pleez Jehoava
“Yu wahn staat fi bee waiz wen yu ga lata rispek fi Jehoava. An if yu geh fi noa Gaad, hoo da di Hoali Wan, yu wahn geh nalij.”—PRAV. 9:10.
WEH WI WAHN DISKOS?
Dis aatikl wahn help wi fi yooz nalij, andastandin, ahn gud jojment fi mek waiz disizhanz.
1. Wat da sohnting weh aala wi need fi du?
WI MEK disizhanz evri day. Som a dehn eezi fi mek, fi egzampl, weh wi wahn eet er wen wi gwehn sleep. Ada disizhanz haada fi mek. Dehn ku afek wi helt, wi hapinis, wi frenz ahn famili, er wi wership. Wi waahn mek shoar dat di disizhanz weh wi mek wahn benifit wee ahn wi famili. An eevn moa impoatant, wi waahn mek shoar wi disizhanz pleez Jehoava.—Roam. 12:1, 2.
2. Weh yu ku du fi mek gud disizhanz?
2 Ih wahn eeziya fi mek wahn gud disizhan if yu (1) gyada aal di infamayshan weh yu need, (2) tink bowt how Jehoava seeʼt, ahn (3) kompyaa di opshanz. Dis aatikl taak bowt dehnya steps, an ih wahn help wi fi laan how fi tink di rait way.—Prav. 2:11.
GYADA AAL DI INFAMAYSHAN WEH YU NEED
3. Weh iloschrayshan help wi fi andastan wai wi need fi gyada infamayshan bifoa wi mek wahn disizhan?
3 Di fers ting weh yu need fi du fi mek wahn gud disizhan da fi gyada aal di infamayshan weh yu need. Wai? Imajin sohnbadi goh da dakta bikaaz dehn ga wahn seeryos helt prablem. Weh di dakta wuda du? Ih wuda chek di persn gud an aks ahn lata kweschanz bowt how ih feel. Afta di dakta fain owt evriting, ih ku disaid weh kaina medisn fi giv di persn. Di saym ting ku werk fi yoo tu. If yu tek di taim fi tink bowt evriting weh yu noa bowt yu sichuwayshan, yu wahn ku mek gud disizhanz. How yu ku du dat?
4. How di advais da Praverbz 18:13 ku help yu fi mek shoar yu ga inof infamayshan fi mek wahn gud disizhan? (Koment pahn di picha.)
4 Wan way how yu ku fain owt moa da fi aks kweschanz. Fi egzampl, sopoaz sohnbadi invait yu tu wahn gyadarin. Yu tink yu shuda goh? If yu noh noa di persn weh di plan it er wat da di plan, yu wuda need fi aks ahn kweschanz laik: “Wen ih wahn hapm? Wehpaat ih wahn deh? Humoch peepl wahn dehdeh ahn hoo invaitid? Hoo wahn soopavaiz it? Weh evribadi wahn du? Dehn wahn ga lika?” Di ansaz tu dehndeh kweschanz wahn help yu fi mek wahn waiz disizhan.—Reed Praverbz 18:13.
Aks kweschanz fi get aal di infamayshan weh yu need (Paragraaf 4) a
5. Weh yu shuda du afta yu gyada infamayshan?
5 Wans yu ga aal di infamayshan weh yu need, yu waahn luk pahn di hoal sichuwayshan ahn tink gud bowt it. Fi egzampl, how if yu fain owt dat som a di peepl weh wahn deh da di gyadarin noh fala Baibl prinsiplz? Wat if yu fain owt dat dehn wahn ga lika ahn nobadi noh wahn soopavaiz it? Yu ku si how di gyadarin kuda get owta han, noh chroo? (1 Peet. 4:3) Bot maybi notn rang wid di gyadarin. Yu tink ih aarait fi stil goh? Wat if yu wuda haftu mis meetin er feel servis bikaaz yu gaahn da di gyadarin? Wen yu tink bowt di hoal sichuwayshan, ih wahn eeziya fi mek wahn gud disizhan. Soh now dat yu noa how yoo si di sichuwayshan, weh yu need fi du neks? Fain owt how Jehoava feel bowt it.—Prav. 2:6.
TINK BOWT HOW JEHOAVA SEEʼT
6. Akaadn tu Jaymz 1:5, wai wi shuda pray an aks Jehoava fi help?
6 Aks Jehoava fi help yu andastan weh ih tink bowt di mata. Jehoava pramis fi gi wi wizdom soh wi ku andastan weda er nat hihn wahn hapi wid di disizhan weh wi waahn mek. “Gaad jenaros, an ih gi wizdom tu evribadi widowt mek dehn feel shaym fi aks.”—Reed Jaymz 1:5.
7. How wi ku laan weh Jehoava tink bowt wahn mata? Yooz di egzampl eena di paragraaf.
7 Wans yu pray an aks Jehoava fi help, pay kloas atenshan tu ih ansa. Tink bowt it laik dis: If yu mi-di chravl sohnweh ahn yu geh laas, yu wuda aks sohnbadi weh noa di ayrya gud fi help yu. Bot yu tink yu wuda waak weh bifoa ih ku ansa yu? Dat wudn mek sens, noh chroo? Yu wuda lisn gud tu weh ih tel yu. Saym way soh, afta yu aks Jehoava fi wizdom, chrai yooz di laa ahn prinsipl dehn fahn di Baibl fi andastan Jehoava ansa. Fi egzampl, tink bowt di sichuwayshan weh wi menshan erliya bowt wahn invitayshan tu wahn gyadarin. How yu ku disaid if yu gwehn? Tink bowt weh di Baibl seh bowt tingz laik wail paati ahn bad kompni, ahn memba dat ih moa impoatant fi sopoat Gaad Kingdom dan fi du wateva wee waahn.—Mach. 6:33; Roam. 13:13; 1 Kor. 15:33.
8. Weh yu ku du if yu need help fi fain di infamayshan weh yu di luk fa? (Koment pahn di picha.)
8 Sohntaim, yu mait need help fi fain di infamayshan weh yu di luk fa. Yu ku aks oalda bradaz ahn sistaz fi advais. Bot ih gud fi du yu oan risaach tu. Yu ku fain lata infamayshan eena wi poblikayshan dehn, fi egzampl eena di Risaach Gaid fi Jehoava Witnisiz ahn Scriptures for Christian Living. Memba dat yu goal da fi mek wahn disizhan weh pleez Jehoava.
Tink bowt how Jehoava seeʼt (Paragraaf 8) b
9. How wi ku noa if di disizhan weh wi mek wahn pleez Jehoava? (Ifeezhanz 5:17)
9 How wi ku noa if di disizhan weh wi mek wahn pleez Jehoava? Fers, wi need fi geh fi noa ahn gud. Di Baibl seh: “If yu geh fi noa Gaad, hoo da di Hoali Wan, yu wahn geh nalij.” (Prav. 9:10) Yes, if yu geh fi noa Jehoava wayz, ih perpos, weh ih lov, ahn weh ih hayt, den yu wahn ku andastan weh fi du eena eni sichuwayshan. Aks yuself, ‘Bays pahn weh Ai noa bowt Jehoava, weh disizhan Ah ku mek weh wuda pleez ahn?ʼ—Reed Ifeezhanz 5:17.
10. Wai Baibl prinsiplz moa impoatant dan weh peepl eena wi kolcha er famili waahn?
10 If wi waahn pleez Jehoava, sohntaim wi wahn haftu mek disizhanz weh peepl kloas tu wi mait noh laik. Fi egzampl, sohn payrents mait insis dat dehn daata marid wahn man weh ga lata moni er weh ku tek kayr a dehn, eevn if ih noh di du gud spirichwali. Dehn mait ga di bes a intenshan fi dehn daata. Bot da hoo wahn help shee fi schrentn ih rilayshanship wid Jehoava? How Jehoava si di sichuwayshan? Wi ku fain di ansa da Machyu 6:33. Jeezas mi inkorij ih falowaz fi “aalwayz mek shoar dat di Kingdom ahn Gaad raichos standadz kohn fers eena [dehn] laif.” Soh eevn doa wi aana wi payrents ahn rispek di peepl eena wi kamyooniti, di moas impoatant ting fi wee da fi mek Jehoava hapi.
KOMPYAA DI OPSHANZ
11. How Filipiyanz 1:9, 10 ku help yu fi tink gud bowt di disizhanz weh yu mek?
11 Wans yu noa di Baibl prinsiplz weh fit yu sichuwayshan, yu need fi kompyaa aal yu opshanz. (Reed Filipiyanz 1:9, 10.) Som disizhanz mait bee eezi fi mek, bot adaz mait bee moa komplikaytid. Wen yu ga wahn tof disizhan fi mek, yu need fi mek shoar dat yu reeli andastan di sichuwayshan gud soh dat yu ku yooz gud jojment fi mek wahn waiz disizhan.
12-13. How wi ku mek wahn waiz disizhan bowt weh kaina jab fi tek?
12 Tink bowt dis sichuwayshan. Yu di luk fi wahn jab soh yu ku sopoat yu famili. Too jab kom op. Yu fain owt aal weh yu kud bowt di too jab, inkloodin tingz laik weh kaina werk yu wahn haftu du, di skejul, ahn how faar yu wahn haftu chravl. Needa jab goh gens Baibl prinsiplz. Maybi yu laik wan moa dan di ada bikaaz yu prifaa da kaina werk er bikaaz ih pay beta. Bot yu need fi tink bowt ada tingz bifoa yu mek wahn disizhan.
13 Soh da weh kaina tingz yu need fi tink bowt? Yu tink wan a di jab dehn wuda mek yu mis meetin? Er ih wuda tek weh taim weh yu kuda spen wid yu famili? Ih wuda mek it haad fi yu help yu famili jraa kloasa tu Jehoava? Wi need fi tink bowt tingz laik dehnya kaaz dat wahn help wi fi foakos pahn “di moa impoatant tingz,” laik wership ahn famili, insteda di foakos pahn mek moni. Den yu wahn ku mek wahn disizhan weh Jehoava wahn bles.
14. Wai wi need fi shoa lov ahn tink bowt adaz wen wi di mek disizhanz?
14 Wi need fi tink bowt how wi disizhan ku afek ada peepl soh dat wi noh stombl nobadi, er “mek enibadi looz dehn fayt.” (Fil. 1:10) Dis impoatant wen wi mek persnal disizhanz bowt tingz laik weh wi wahn wayr er how wi wahn luk. Fi egzampl, wi mait laik wahn sertn stail, bot how yu tink adaz eena di kangrigayshan ahn peepl pahn di owtsaid wahn feel bowt it? Yu tink ih mait ofen dehn? Wi need fi rispek ada peepl feelinz. Lov wahn moov wi fi “tink bowt weh gud fi adaz” ahn jres eena wahn rispektabl way weh deesent ahn sensabl. (1 Kor. 10:23, 24, 32; 1 Tim. 2:9, 10) Den wi wahn ku bee shoar dat wi disizhan noh wahn stombl nobadi.
15. Weh yu fi tink bowt bifoa yu mek wahn impoatant disizhan?
15 If yu need fi mek wahn impoatant disizhan, memba weh Jeezas teech wi: “Figa owt humoch evriting wahn kaas.” (Look 14:28) Soh tink bowt humoch taim, moni, an eniting els yu wahn need fi mek yu disizhan werk. Sohntaim, yu mait need fi taak tu yu famili fi si weh dehn need fi du fi sopoat yu disizhan. Wai ih gud fi mek dehnya kaina planz? Ih mait help yu fi si if yu need fi mek lee ajosment tu yu disizhan er if wahn nada opshan wuda werk owt beta. Wen yu taak tu yu famili ahn lisn tu weh dehn ga fi seh, dehn wahn bee moa wilin fi help yu.—Prav. 15:22.
MEK WAHN DISIZHAN WEH WAHN WERK OWT GUD
16. Weh wahn help yu fi mek wahn disizhan weh wahn werk owt gud? (Koment pahn di baks weh naym “ How fi Mek Waiz Disizhanz.”)
16 If yu fala dehnya steps weh wi jos diskos, den yu wahn redi fi mek wahn waiz disizhan. Yu don gyada aala di infamayshan weh yu need. Yu du yu risaach ahn fain owt weh prinsiplz yu ku yooz fi mek wahn gud disizhan. Ahn yu redi fi mek wahn disizhan weh wahn pleez Jehoava. Now yu ku aks ahn fi help yu mek yu disizhan werk owt gud.
17. Wat da di mayn ting weh wahn help wi fi mek gud disizhanz?
17 Wat da di mayn ting weh wahn help wi fi kantinyu mek waiz disizhanz? Wi kyaahn pen pahn wiself noh mata humoch gud disizhanz wi mek eena di paas. Wi haftu aalwayz pen pahn Jehoava fi wizdom. Onli hihn ku gi wi nalij, andastandin, ahn gud jojment. Dehndeh da di tingz weh wahn mek wi waiz. (Prav. 2:1-5) Jehoava ku help yu fi mek disizhanz weh wahn pleez ahn.—Saa. 23:2, 3.
SANG 28 Hoo Da Jehoava Fren?
